Read Aghem Taetùs 1 Bible Online

Taetùs 1 - Aghem bible

Taetùs 1

¹À mwàʼsò kən kə tɔm mugho Pôl, kɔ̂ɔ[1] fə Kəzə̀, àsùghò tum è Yɛso Kə̀lestò. Ghe mugho tùm wò alebùghò tughusô boo e ghì ghəla Zə̀ kə̀ mò shîa kɔʼ enyəa e noo, àsùghò â ghee alekelê tsʉ̀ è səŋò zəla e lo, aleyòsò ghee enyəa ghe e mughu an dziī zəla Zə̀ kə̀ ləghaa.

²Tsʉ̂ è səŋò zən lo ghəəŋ nù ghe lo e mughu, kwo tən enyəa ghe lo kelê mùghù e doʼn təla zəla Zə̀ kəla kə kaʼn yô gha gho fə̀ to naŋā â wǐiwì.

³A m bùghò nəgha e Kəzə̀ è kpe tsughu, Kə ŋ ghəəŋ tsughu enyəa a kele làbəlà è wə̄n è dzùŋ zən zəla Ǹ naʼn wo. Kən lǒ fwàʼ kə̀là Zə̀ kəla kə bəghaasəa fughu wo â mùghò enyəa mùghò è fwaʼā.

⁴M̀ mwàʼsò kən fɛ tɔɔ wò â ghù a Taetòs, ghù kùm lǒ wɛ waŋā ù sə̀ŋò bòʼ ghàʼ à dzeŋe boo fughu â Kə̀lestò Yɛso. Gɔ̂ɔŋ zaŋa e lo enyəa to Kə̀zə̀, Tsele ù te, àsùghò Yɛso Kə̀lestò wəla ù Bəghāasəā sɛ̀, mô fughu ghû â bughuun zo, à dzùŋù mò.

⁵Mùgho fə̀ ghû fɛ aŋ Kə̀lêt naŋa taʼā tsughu enyəa ghù nəghaso mɛʼɛ̄ kaaŋ wo ghəa ghəla a fə̀ doʼò səā, àsùghò enyəa ghù tsuʼ kaaŋ nduw tsoʼ to an ndughù è kə̀zə̀ an nàʼà ŋ Kə̀lêk mə̀n n dzə̀m, aŋ ghəa mùghò fə̀ dzɛ̂ â ghù.

⁶Tsoʼ è ndùghù è Kə̀zə̀ ki alelō ghùw wəla ù ki mwam ù dzûŋ wò, mò ghùw yò alesɔ̀ʼ kə̀ghu a zəŋò wən enyəa ù mò ghə̌əŋ bonlo èghəa, mò ù kì ko wi u mɔ̀ʼ, mo wɛ a wə̄n ghə m boo fùghù sùghò â Yɛso, tughuu sùghò yò â tuw ko, mo ghe kâ sə̀ bò sùghò.

⁷Nu e lo enyəa ghùw wəla ù lǒ tò kətuw an ndùghù è kə̀zə̀, fwàʼà â Zə̀ kò, kì alelō ghùw wəla ghùw yò alesɔ̀ʼ kəghu a zəŋò wə̄n enyəa ù mò ghə̌əŋ bonlo èghəa, mò ù kɔʼɔ nyaʼn sùghò yò an tuw u aghì, mò ù tɔ̌ɔ sùghò yò â nə̀ghà fò, ŋkāa mʉa kala sùghò yǒ lʉ̀ mò, ù è lo sugho ghùw wəla ù kəŋo sùghò yô tsû wò, ŋkāa səa sùghò yò â sə gho aŋ ghəa tə ukʉ̄a.

⁸Ù lǎam ki aledòʼò tsùghù ghùw wəla ù bɔŋɔ̄ naāŋ ghî ghò alô wə̄n, tèlè lə̀ghaa kô ghəa è dzûŋ zò, tɔ̀ʼ kwò sugho alekùu kɔlɔ̂ tsughu ghue u wə̄n. À è lo mò ù lǒ ghùw ù tsəghatsəgha, zɔlɔ sùghò, tɔ̀ʼ kwò sugho ghəa ù tiso ghuw kə ebwìi kə wə̄n ko a te.

⁹Ù kì aletɔ̀ʼɔ̀ kwuū tsʉ̀ è dzûŋ zəla ghe fə̀ zoʼn wə̄n a te, tò ù è lo aletoōn ndûuŋ ndûw ghì à li gho an tsʉ̀ è səŋò e te zo, ù e lo sugho alekomsô ghì ghəla ghe tuū maʼn tsʉ̂ è dzûŋ e te zo.

¹⁰Ŋ̀ ghəa ghən kə̂aa bòʼ ndə̀mà tə aghì tə̀ lo nû ghe tuū mâʼn êsəŋò, ghî ghəla ghe kə̂aa kaāŋ zuum tə aghəa to, fɔɔ kaaŋ sùghò tɔ u aghì an làʼsò zəla ghe kəaa ghè zò, a ka dɔ̂m tàŋ ghî ghəla ghe teē tən tsughu ko am bùghoo kə Tə̀dzûu kən enyəa to ghe mô tèlè sùghoo tsughûu tiigh kə ghûw.

¹¹Ghù kì aleghəə̄ŋ tsughu enyəa ghe bughū naŋâ shwaʼ ù laʼsō u ghee u te wo, nu ghe saʼà màʼn kàâŋ ndughu tə aghì enyəa ghe ka kele dzə̀ êsəŋò. Ghe fɔ tə aghəa tən fɛ ghəəŋ kaaŋ ko ghe sô səā â sə gho aŋ ghəa a ukʉ̄a.

¹²Ghùw ù Kə̀lêt ù lì, mò à fə̀ lo ghùwshʉ̀ghà am bvʉa e ghee mafə̄ bûʼ dzɛ̂ sùghò enyəa, “Kə̀letàn tə̀ tughu lò tsəgha ghî ghə agha, ŋgee zəa sùghò mo ghe lɛɛ nù, lò sugho nyôm tə ŋgwə̄n tə̀ biigh to.”

¹³Shwaʼ u ghùw ù Kə̀lêt wən lo èsəŋò. E fi lo enyəa ghù è komso təla nduw ghee an sə kə ghee, aleghəŋlo enyəa boo e ghee aŋ ghəa a Kəzə̀ lo bughò teme, zə e tughuu sugho,

¹⁴to ghe e ka zyəən kaaŋ tsəgha zə̀azə̀a mə̀ àgha məla Dzûu tə̀ bughòon səā kɔʼɔ̄, bwìi sùghò yò an lwàŋ u aghì ghəla ghe tuū maʼn êsəŋò.

¹⁵Ghî ghə̀là ghe ki fə̂ŋ tə̀ zɔlɔ to, ghəa ghə̀n à dzə̀m zɔ̀lɔ nù â ghee. Yia a bughò ghəla ghe fwəlà luʼū to, boom fughuu ndùw sùghò yò, aghəa a dzə̀m â ghee lo à dzəa gho; tɔŋlo enyəa moʼnlò e ghee e bûʼ fwə̀n lò sugho nû, àsùghò fə̀ŋ tə ghee to.

¹⁶Ghe dzâa wò alo edzughu enyəa ghe ŋge kwo Kəzə̀, ghe yia kuūwn tuū maʼn Zə̀ kò aŋ ghəa a ghee à ghəəŋ gho. Mwam e ghee e dzəa nù, ghe zuuw yo â Zə̀ kò, ghe tsô bùʼ yò sughò aleghə̂əŋ ghəa è dzûŋ è li zo.