Read Aghem Taetùs 2 Bible Online

Taetùs 2 - Aghem bible

Taetùs 2

¹Yia kuūwn bughò ghû a Taetòs, ghù ki alezōʼn nduw ko ghî ghò am fəgha kəla kə boōm dzəə̄ŋ nduw ghèe tsʉ̀ è səŋò zò (kùu ndùw Yɛso Kə̀lestò).

²E zoʼn nduw noo tə ayînû tò enyəa ghe e nyoʼn lo, ghe ki alemughu mughùu zə ŋkɔʼso zo, àsùghò enyəa ghe kele tsughu alekɔɔn tsughuu ghue e ghee zo. Ghe ki aletɔ̀ʼɔ̀ boō fughuu tsughu â Zə̀ kò, ghe e kum ki ləgha zo aŋ ghùe e ghee, àsùghò enyəa, mò à sə̌a kô kwò, ghe e kɔɔn tsughu ko fə̂ŋ tò am boo e ghee a zəŋò Yɛso Kə̀lestò.

³À lò sugho eghəla ghù ki alezoʼn nduw sugho noo tə ayìzən to enyəa ghe mughùu tsughu mughùu zəla e fughuu nduw kɔʼso mò â Zə̀ kò aŋ ghəa a ghee a dzə̀m ghəla ghe ghəŋlo, ghe ka e maʼn dzə fom to, ghe ka fə̀ŋ ŋge gàʼ sùghò aleŋgee mʉa lʉ̀ mò. Ghe ki aletele fughuu ko tsʉ̂ è dzûŋ zò,

⁴enyəa, ghe e lo aletsʉ̀ wâazən gho enyəa ghe e ləghaa num a ghee gho àsùghò wɛ a ghee gho,

⁵ghe e lo wâazən ghəla ghe zumso tsughu ghue zo an ndughu tə anum, zuuw ndùw â num a ghee gho, mùghù mughùu è zɔlɔ zo, fwàʼà dzɔ̀ɔ ndùw sùghò an ndughu tə ghee, ki fə̂ŋ tə̀ dzûŋ tò, enyəa e kwo ghùw lò so e kə̂aa bǒon ghəa è li zo kùu ndùw shwaʼ u Kəzə̀.

⁶À lò sugho eghəla, ghù ki aletsʉā nduw sugho waafəghàŋ à nûu ghò enyəa ghe e maʼn tsughu ghue zo alo aghəa a dzə̀m.

⁷Ghuūghùe wʉ̂a Taetùs, ghù kì aledeē nduw tsə̌a aŋ ghəa à dzûŋ ghə̀là ghù ghəŋlo. E ti ko alo èsəŋò am fəgha kəla ghù děe ghè kò, e kwo ghù lò se nɔʼn ghəəŋ nù.

⁸E kəaa nduw shwaʼ ù səŋò wəla ghùw yò alekomso ghù a te enyəa à lò agha, tǒ ghîikətuw ghə̂a à kele tsughu tuw kə̀ dəla ko an dziī zəla ghe lo kôom ki yô ghəa è biigh è li zo alekə̀a an zən e sɛ̀.

⁹Zoʼn tsughu kɔ̀ɔ mò enyəa mə̀ è zuuw nduw â ghê mughùbè a ghee aletsəmso fə̀ŋ tə ghee alo aghəa a dzə̀m, mə̀ è ka e kəaa sugho tsə̀ghànlò u tə dzə̀ wò â ghee,

¹⁰ŋkāa kɔ̀ɔ mə̀ è ka e tsɔŋɔ sugho fʉgha u ghee wo. Ghe ki alekuūwn deē nduw mwam è dzûŋ zò an dziī zəla ghùw lò alegaʼ fə̀ŋ a zəŋò ghee, to ghî ghə̀ è koʼo tɔɔ wo mwam e ghee è dzûŋ zò, ghî a te ghə e ləghaa alezəəŋ shwaʼ u Bəghambī ù sɛ̀, Kə̀zə̀.

¹¹Tɔŋlo enyəa Zə̀ kə̀ n dè wò dzɔ̂ e wə̄n zo â ghì ghò a dzə̀m, aŋghəa Kə lo bəghasəā ghe a te.

¹²Dzɔ̂ e Kəzə̀ zən zoʼn wò sɛ̀ enyəa sɛ̀ tuū maʼà tsughu mughùu zəla à yò dzə̂ mughùu e ghì a Kəzə̀ zò, a ka fə̂ŋ tə̀ gaʼ sùghò am fʉgha u mbī wo, àsùghò enyəa sɛ̀ è naŋso tsughuu kə ebwìi kə sɛ̀ kò aŋ ghəa a sɛ̀ à ghəəŋ gho, sɛ̀ è ki fə̂ŋ tə̀ dzûŋ tò, mùghù sugho aŋghəa Zə̀ kə̀ ləghaa enyəa to a mô mùghu fɛ a te am mbī zən.

¹³Ghàʼ ndzəmà chìi tùʼ aŋghəa ghàʼ ləə̄m tsuʼ ù ne wəla a kwo enyəa Yɛso Kə̀lestò lo bùghòo a te aŋ ghùe u kədə̀ŋ. Yɛso Kə̀lestò wən lo Zə̀ kə sɛ̀ kə̀ ghaʼa ko àsùghò Bəghambī ù sɛ̀.

¹⁴ À lǒ wə̄n wəla ù fə̀ kpuw an tuw u sɛ̀ alebəghaasə sɛ̀ aŋ ghəa a sɛ̀ à biigh gho, àsùghò alesùuw maʼà bòo tə sɛ̀ enyəa sɛ̀ doʼò tsughu a wə̄n gho aghî, a e moʼn təla ko aleghəŋlo èdzɔ̀.

¹⁵E zoʼn nduw ghî ghò aŋ ghəa ghən gho, dzə̀là ndùw fə̀ŋ tə ghee, tsʉ̀a ndùw, geen ndùw sùghò ghee aŋ ghəa ghəla ghe ghəə̄ŋ bonlō, tǒ ghùw wəla ù ki daʼa kə te ko. E kwo ghù lò bomlo enyəa ghùw kòʼòkê ghù.