Read Aghem Taetùs 3 Bible Online

Taetùs 3 - Aghem bible

Taetùs 3

¹E zəə̄ŋ zee nduw ghî ghə̀a ghò enyəa ghe e zuuw nduw â tuw u enaʼ u ghee wo, àsùghò â ghì à li ghəla ghe lô ghî à səŋo ghò alo enaʼ. Ghe doʼò təla tsughuu ko aleghəəŋ ko ghəa à dzûŋ ghò.

²E tsʉā nduw ghee enyəa ghe ka e kəaa boon dzə ghəa e ghûw zò, ghe ka e kəŋo sugho shwaʼ wo. Ghe e kuuwn maʼn tsughuu ghue zo aŋ ghəa ghee à ghəəŋ gho, dèe nduw mwam è dzûŋ zò â ghì ghò a dzə̀m.

³M̀ fɛ dzàa tɔŋlo enyəa an tì kə̀ li ko ghue e ughùe e sɛ̀, sɛ̌ fə̀ buʼ lo ghî à laʼso gho, sɛ̀ n zuuw yo â Zə̀ kò, ghəəŋ boon sùghò àghəa, ghe n sè məŋso sùghò sɛ̀, sɛ̀ m fə̀n dòʼò ndùw ùkɔ̀ a bâa fʉgha u mbī wo. Sɛ̀ m mughu aŋ kə̀f kə ebō, ki sugho kəmʉ̀nlo am fʉgha ù aghì. A m bâa ghì ghə̀n àdzə̀m, ghî ghə̀n à dzə̀m m bâa sùghò sɛ̀.

⁴A m bùghò ghe kuūwn dê tsughu sɛ̀ â dzɔ̀ e Zə̀ kəla kə bəghaasəa sɛ̀, à ləgha e Wə̄n zo,

⁵kə m bəghasə̄ tsughu sɛ̀. Kə ka fə bəghasə̄ dzə̌ sɛ̀ bòʼ ghəa a sɛ̀ à dzûŋ ghə̀là sɛ̀ lo mò sɛ̀ ŋ ghəŋlo, à fə̀ kuuwn lo bòʼ se e wə̄n è kwuso zo, Kə̀ fə̀ bəghasə̄ sɛ̀. Kə fə sɛ̀ bəghasə̄ aŋghəa Kə fə̀ tum wô Zuʼ tə̀ Zɔlɔ to enyəa tə bughò sûuw maʼà sɛ̀ aŋ ghəa a sɛ̀ à biigh gho, àsùghò enyəa, to sɛ̀ kuūwn kɔʼ mwam e sɛ̀, sɛ̀ kele tsughu mughù è fughu zo.

⁶Zə̀ kə fə̀ sɛ̀ â Zuʼ tə̀ Zɔlɔ tə te tə ŋge fughu wò bòʼ Yɛso Kə̀lestò, Bəghambī fə̀ bughò kpuw an tuw u sɛ̀,

⁷enyəa, bòʼ dzɔ̀ e Wə̄n n te zo, sɛ̀ è ke lo tsəghatsəgha a vʉ̀a Zə̀ kò, tò sɛ̀ è ke lo alenìi kelê mùghù è doʼn təla zəla sɛ̀ chiī tùʼ a te.

⁸Ghəa ghə̀là Ŋ̀ kə̂a wô fɛ â ghù kùm lǒ èsəŋò. Ǹ ləghaa enyəa ghù è tughusō dzaā kweēn nduw ko ghəa ghən gho â ghee, to ghî ghəla ghe boo fughu tsughu â Zə̀ kò è ke tɔʼ lo alegaʼa tsughu fə̀ŋ aleghəəŋ ghəa à dzûŋ ghò. Ghəa a te a dzɔ̂ bùʼ nù yòsò sùghò â ghì ghə̀n à dzə̀m.

⁹Kà è bwiī fwən wo ghɛ̀ à ghêe ghì ghəla ghe ləghaa alepfʉa dzughu gho an làʼsò tə aghəa, ŋkāa ghəla ghe taŋso wii to an zən a aghì mo ghe mafə̄ kpuuwn tsə̀ghà, boom naaŋ sùghò yò ghəla ghe zughùu zeē kùu ndùw làŋ kə Tə̀dzûu, bòʼ ghəa a te a tsəa yo aŋ ghə̀a è li zo, yia ki sughò yo fwàʼ kə̀ li ko.

¹⁰Abugho ghùw lǒ am bvʉa zɛʼɛ̄ mò ù kì tənùʼ, ghɛ̀ ŋ kwɛ̀ɛn tsùghu wə̄n alekɔʼɔ̄ sə tənəghā tə bə̀ghà, mò ù kà zuw, ghɛ̀ n zə̀ghàa màʼà wə̄n, nyuʼu dzə̀m.

¹¹Ghǔ n daŋso kele tsughu enyəa ŋgòʼò ghùw ù te lo mbaaŋ kə ghûw, bòʼ enyəa ghəa a wə̄n à biigh a dêe tə̀la wò nù fəgha kə̀là ù lo ghè kò.

¹²Abugho Ǹ lo tum wô Altɛ̄màs ŋkāa Tàekikùs a vʉ̀a ghù, ghù ke dəm tən tsughu enyəa ghù bugho koʼ mugho an Nìkopolès, tɔŋlo enyəa mùghò n tsə̀m enyəa Ŋ̀ kê ndùw mùghùun kə̌əŋ a fughu alo efwòo.

¹³Də̀ma tən tsùghù sùghò alefughu eyôsò â Zenàs; tɔɔŋ dèekə̀làŋ vʉ̀, ghèe Àpolòs, abugho ghe lo so e zəghàa səā wô. Ghù ŋ ghəəŋ tsùghù sùghò enyəa e kwo ghe lô so e laʼà fəgha kə̀ li ko.

¹⁴Ghəəŋ tsùghù sùghò enyəa ghî a sɛ̀ à zoʼn nduw aleghəəŋ tsəgha ghəa ghə̀là à lǒ à dzûŋ ghò, to ghe e lo aleyòsò ghì ghəla ghe ki yo, e kwo ghî a sɛ̀ ghəla ghe boō tsughu lò so e mūghùun tsɔ̀ kə emùghùu.

¹⁵Ghî ghə̀n à dzə̀m ghe lô fɛ ghàʼ à ghee fughu wò ghɛ̀ â tɔɔŋ zo. Tɔɔŋ zùw tsùghù sùghò fən a sɛ̀ yìa à dzə̀m ghe lo mo ghe m boo fùghù sùghò â Yɛso Kə̀lestò. Dzùŋù ŋ Kə̀zə̀ mə̀ è lo â ghɛ̀ à ghee a dzə̀m.