Read Aghem Filemùn 1 Bible Online

Filemùn 1 - Aghem bible

Filemùn 1

¹À lò mugho Pôl, Ǹ tɔɔ wo mwàʼsò kən ko, mùghò wəla Ǹ lo ghùw ù ndùghùtsāʼ bòʼ fwàʼ kəla M̀ fwaʼa â Kə̀lestò Yɛso. M̀ mwàʼsò kən kə tɔɔ wò ghaʼ à wàazə̀ ù sɛ̀ wən Timotì, ghàʼ tɔɔ wò ghǔ a waʼawāʼ Filemùn, ghù wəla sɛ̀ fwaʼà dzəŋlō a dzə̀m,

²Ghǎʼ mwàʼsò kən kə dzeŋe tɔɔ wò sùghò ghɛ̀ à ghê Afìaa wàazə̀ ù sɛ̀ ù zən vʉ̀ ghèe ghê Achippùs wəla ù lò sugho sùghugòʼ am fwàʼ kən tò ghaʼ àsùghò â ghì a Kəzə̀ yia ghe bughò dzeŋe fia a lô ghù an ndughu a Filomùm.

³Ŋ̀ gɔ̂ŋlò enyəa to Kə̀zə̀, Tsele ù sɛ̀, ghèe Mughubè ù sɛ̀ Yɛso Kə̀lestò, mò dê ghɛ̀ â dzɔ̀ e ghee zo, ghe fughuu sughò ghɛ̀ â bughuun zo.

⁴Waʼawāʼ, M̀ fughuu kə̀zɔ̀ŋlò â Zə̀ ko nəgha tən tə dzə̀m abugho Ǹ zə̂əŋ tsughu ghû aŋ gɔ̀ɔŋ zaŋa.

⁵Nu Ǹ zuuw nù ləgha zəla ghù ki a zəŋò ghì a Kəzə̀ ghò a dzə̀m, yìa Ǹ zuuw sugho aŋghəa ghù gaʼ fə̀ŋ a te a zəŋò Mughubè Yɛso.

⁶Ŋ̀ gɔ̂ŋlò enyəa aŋghəa sɛ̀ bwîi ghuw ko kə mɔ̀ʼ am fə̂ŋ zəla sɛ̀ gaʼ tsughu a zəŋò Kə̀lestò, to ghəa a te a mô ghə̀ŋlo sɛ̀ e tɔʼɔ zuuwkɛlɛ tsughu ghəa à dzûŋ ghəla à dzə̀m sɛ̀ ki aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò.

⁷Ŋ̀ wàazə̀, ləgha zəla ghù ki ghè zò ŋ ghəŋlo yìa Ŋ̀ ŋgeē duʼnlō, fə̀ŋ zaŋa zə̀ è zʉ̀ʉn dzɔ̂ɔ sugho bòʼ ghù n təm tsaʼ kə̀ saa ko am fə̀ŋ tə wɛ a Kəzə̀.

⁸Aŋghəa Ǹ lô fəgha ko kə mɔ̀ʼ ghàʼ à Kə̀lestò, Ŋ̀ ki nu dò kə fə̀ŋ kə te ko aletsə̀ghàsò tsughu kəlâŋ enyəa ghù ghəəŋ nduw ghəa zəla e lo ghè zò,

⁹ghəa Ǹ sô ləghaa ghû, zə lo e ghee Ŋ̀ kuūwn buʼu wô ghû â ghu ko, mùghò Pôl tò noo kə te ko, kəla kə lô sugho ezəŋ an ndùghùtsaʼ aŋ ghəa e Kə̀lestò Yɛso.

¹⁰M̀ buʼu wò kə̀ghu â ghù an tuw kə wɛ waŋā wə̄n tɔɔŋ Omnɛsimùs, wəla M̀ bughò doʼò kɔʼ tsele aŋghəa Ǹ lo fɛ an ndùghùtsaʼ.

¹¹Ù mò buʼ ki tsəgha yo fwàʼ kò â ghù, yia a kuūwn bughò êzə̄ŋ vʉ̀a ù lò aletumso ghàʼ à ghù.

¹²Ǹ tuu wò wən ebàm a vʉ̀a ghù, ghù è kwo enyəa M̀ fi tuu wò fə̀ŋ zaŋa.

¹³M̀ mô lə̀ghàa enyəa to ù mò doʼò tsughu fɛ ghàʼ à wə̄n, ù è yosō mugho an tuw kə̂a aŋghəa Ǹ lô fɛ an ndùghùtsāʼ bòʼ Ǹ zughoo làbəlà è dzùŋ è te.

¹⁴Yìa Ŋ̀ kuum dzɛ̂ enyəa Ǹ yo dzə̂ aleghəŋlo êzə̀ mò ghù kwò yo, e kwo e lô so e lo tò Ǹ tsəən tsùghù nû ghû aleghəŋlo êzə̀. Ǹ ləghaa enyəa ghù e ndzəma ghəən tsughu ghəa zo aŋghəa fə̀ŋ zə̀ghà dè tsughu. E fi lo enyea Ǹ yo aleghə̂əŋ ghəa è li zo mò ghù kà bǒo dzə̀.

¹⁵Zən lo e ghee ù fə̀ nyɛʼɛ ti nughù tsughu a vʉ̀a ghù aŋ kə̀mà fə enə̀gha fə̀ li fo, enyəa ù kè kôom bughò doʼò təla wô ghɛ̀ a wə̄n,

¹⁶mò ghù kà wə̄n kôom nì tò kəkɔ̂, mò ù ŋ kɔ̀ kə tsəghàsə, ghù ke ni naŋa wo wə̄n tǒ wàazə̀ ù sɛ̀, wəla sɛ̀ ləghaa. Ù lò kɔ kə ghûw â mùghò, vʉ̀a ù lò kɔ kə ghûw kò â ghù tsə̀ghàtàʼà aŋghəa ù lo â mùghò. Ù kə lò â ghù tǒ ghùw ù kəfwàʼ àsùghò wàazùghù aŋghəa ghɛ̀ a ghee lô fəgha ko kə mɔ̀ʼ ghɛ̀ à ghê Mughu ù te.

¹⁷Abugho ghù nì mugho enyəa ghàʼ à ghù fwàʼà dzə̌əŋ nù, ghù kpeni wə̄n tò aŋghea ghù lò alekpeēnî mùghò a te.

¹⁸Abugho ù ki ghû a ndàŋ kò ŋkāa ù ghəə̄ŋ boon ghù â ghəa è li zo, ghù tɔm naŋa tsughu an zən zaŋā.

¹⁹À lò mugho Pôl Ǹ tɔɔ wô mwàʼsò kən ko aŋ ghu kaŋa. Ǹ lo tsəa tsə̀ghà wò nù ghû ebàm â fəgha kəla ù ki â ghù — kuuwn kele tsughu ko enyəa fəgha kəla ghù lǒ ghè ko alo bòʼ mùgho.

²⁰Ŋ̀ wàazə̀, Ǹ dzɛ̂ enyəa ghù yoso kɔʼ mugho am bàm e Mughu ù te. Ghù tǒ ghùw wəla ù boō fughu sugho â Kə̀lestò, ghəəŋ tsùghù tò fə̀ŋ zaŋa e zʉʉ̄n dzɔɔ̄.

²¹Ŋ̀ kûum kwò nû enyəa ghù zǔuw nù lâŋ ko, zə lo e gheə aŋghəa Ǹ tɔɔ̄ wo mwàʼsò kən ko â ghùw, kwo tən nû enyəa ghù lo ghəəŋ nù ghəa ghəla M̀ bvʉa wo â ghù, ghù buʼ ghəəŋ tsəghataʼā.

²²Ghəa è li zəa e lô kpeʼe sugho enyəa ghù fəghaan naŋa tsughu mugho â dzughu e ndughu e bwii zo, nu Ǹ chîi tùʼ enyəa Zə̀ kə lo zuuw nù gɔ̂ŋlò e ghɛ̀ a dzə̀m zo, kə lo ghəŋlo M̀ bughò tɛ̂ fì ebàm a vʉ̀a ghù.

²³Epafəlàs wəla ghàʼ à wə̄n lô fɛ a dzə̀m an ndùghùtsāʼ aŋ ghəa e Kə̀lestò Yɛso fùghù wò ghù â tɔɔŋ zo.

²⁴Ghê Mâk ghəla ghàʼ à ghee fwaʼà dzəə̄ŋ fɛ a dzə̀m ghèe ghê Àlistakùs àsùghò Dɛ̀mâs àsùghò Lûk fùghù wò sùghò ghù â tɔɔŋ zo.

²⁵Ŋ̀ gɔ̂ŋlò enyəa, to Mughu ù te Yɛso Kə̀lestò mò dê ghɛ̀ a dzə̀m â dzɔ̀ e wə̄n zo.