Read Aghem Hibùlù 1 Bible Online

Hibùlù 1 - Aghem bible

Hibùlù 1

¹Â wǐiwì, Zə̀ kə fə̀ kəaa wo aghəa an ndə̀mà tə̀nə̀gha àsùghò an ndə̀mà tə tədzǐi â ghê tsele a sɛ̀ ghò, mò à fə̀ zuuw dzaā wo ghǐishʉ̀ghà.

²Yia a bugho êzəŋ an tsùʼu məla ŋ gùŋso tsughu, Zə̀ kə̀ ghəa gho â sɛ̀ kə̂a wò â wɛ̀ ù wə̄n, Wɛ ù wə̄n wəlà ù fə̀ nî kɔʼ enyəa à lô fʉgha wə̀n ù dzə̀m zə̌a wə̄n, mò kə fə̀ mbī bɔm sugho am bàm e wə̄n.

³Ù dèe wò nyəghaan zəla e lo an səghanyəgha ŋ Kə̀zə̀, vʉ̀a ù bɔɔ̄m fweēn ko Zə̀ kò, ghəa ù kwu kele mbī an daʼa kə shwaʼ u wə̄n. A m bùghò ù ghəə̄ŋ tsughu enyəa Zə̀ kə̀ ghuūw maʼà bòo tə aghì, ù n doʼò tsùghù aŋ kwe u Kwîfɔ̀e ù təma wo alo kəwālā.

⁴Wɛ ù Kəzə̀ tsə̀ghàtàʼà sə tsə̀ndə̄ghā tə Kəzə̀ tò, to aŋghəa zən zəla Zə̀ kə fə̀ fughu â wə̄ tsə̀ghàtàʼà sə sugho e ghee zo.

⁵À lǒ mò Zə̀ kə fə̀ dzɛ̀ kōʼ tsəgha dzə nû â tsə̀ndə̄ghā è lì enyəa, “Ghù lǒ wɛ waŋā, nɛ wən mùghò n dòʼo tsùghò.” Ŋkāa enyəa, “Ǹ doʼn tsùghuu tsele â wə̄n, ù dòʼò tsughu wɛ â mùghò a?”

⁶Alekòom nîi kpeʼē tsughu aŋghəa Zə̀ kə̀ fə so fughuu wo Wɛ̀ ù wən ù sûesʉ am mbī, Ù n dzɛ̀ tsùghù enyəa, “Tsətəndəgha tə Kəzə̀ tə dzə̀m ki alefughuu wə̄n â kɔʼso mò.”

⁷Kùu ndùw tsə̀təndə̄ghā tə wən, Zə̀ kə̀ n dzɛ̀ enyəa, “Kə ghəəŋ tsughuu tsə̀təndə̄ghā tə wə̄n tə doʼò tsughu tò kəkʉ̌ɛɛ, kɔ̀ɔ ŋ wə̄n mə̀ lo tò wən ù bəghaan wo.”

⁸Zə̀ chia kə kuuwn dzɛ̂ tsughu kùu ndùw Wɛ̀ ù te enyəa, “Ndàŋ zə̀ghà dòʼò tə̀n nu, O Zə̀ kò, dòʼò tən ko êsəŋò, Ghù ke kwu kele ghî ghə̀a ghò an dziī zəla è lo tsəghatsəgha.

⁹Ghù lə̀ghaa ghəa à tsəghatsəgha gho, bàa ghəa a biigh gho. Zə̀ lo e ghee Kə̀zə̀, tɔ̂ɔŋ Zə̀ kə̀a, kə tsɔʼ kɔʼ ghù enyəa ghu tsəghasə ghî ghəla ghɛ̀ à ghee lo a dzə̀m, tsoʼn zəghà è tsəghàsəa sughò e ghee zo.”

¹⁰Zə̀ kə̀ n dzɛ̀ sughò â Wɛ ù wə̄n enyəa, “Mughubè ghù fə̀ gbən wo ghueekətsə̄ aŋghəa mbī mò zîi tsughu, wala chia kə lo sugho fwaʼ kə̀a kə kəghu ko.

¹¹Ghueekətsə̄ àsùghò wala ko kê bùghò tsə̀gha mìaan nù, fʉgha u te wo u dzə̀m kè ndzěen tsùghuu tò təndzʉ̄, ghù kǔuwn dòʼò tə̀n nû,

¹²Ghù kè ŋgwǔun nùghùun kɔʼɔ ghueekətsə̄ kə te ko àsùghò wala ko tò təndzʉ̄, ghueekətsə̄ kə te ko àsùghò wala kə lo kuūwn kɔʼ kôʼ e ghee. Yia a bughò ghû, ghù lò ko alo kətə̀ŋ, ghù kè dòʼn tə̀la nù.”

¹³Ù dzɛ koʼ tsəgha dzə̄ â tsə̀ndə̄ghā è ghɛ̌ zò enyəa, “Dòʼò tsughu aŋ kwe waŋa ù təma wo, Ǹ lo telè ghəə̄ŋ tsughuu dzə̂ ghîikətuw ghə̂a à doʼò tsughu fəgha kəa kə̀ gaʼn kə aghùw kò a?”

¹⁴Tsə̀təndə̄ghā tən tə̀ dzə̀m mgbàŋ yǒ zʉ̀ wəla Zə̀ kə mò tum wo enyəa ghe bughò fwâʼ â ghì ghəla ghe kê zəā tuw ko a?