Read Aghem Hibùlù 10 Bible Online

Hibùlù 10 - Aghem bible

Hibùlù 10

¹Aŋghəa lâŋ kə Tə̀dzûu kə̀ tsô lò ko kəzəŋso kə dêe wô ghəa à dzûŋ ghəla a ki alebùghò, dèe êzə̀ mò à kùm yò dzə̂ ghəa ghəla a ki alelo ghè ghò, lâŋ kə te kə kê nə̀ghàsò kòʼ yò ghî ghəla ghe kuʼso wo Zə̀ kò am fʉgha wəla ghe gbôo fughuu wə̄n nûu tə̀ nùu.

²Abugho ghì ghəla ghe kɔʼso Zə̀ ko mò lo mo ghe ŋ kùm sùw maʼà tən ghee aŋ ghəa a ghee a biigh gho am fʉgha wəla ghe gbôo fughu nduw â Zə̀ kò, to ghe mô kòom kwo yo enyəa ghe ghəəŋ nù bo zo àsùghò enyəa to ghî a mô kòom gboō fughu yo fʉgha wo â Zə̀ kò.

³E fɛ kòom lò enyəa fʉgha ù gboo fughuu wo â Zə̀ kò nûu tə̀nùu zə̂əŋ wò aghì aŋ ghəa a ghee à biigh gho.

⁴Dzì yò dzə̂ â kàŋ tə təmbɔ̀ŋ to àsùghò tə tədzə̀ to alesùuw maʼà tə̀bòo.

⁵Zən lò e ghee ghəa Kə̀lestò mò so e bugho am mbī, ù n dzɛ̀ â Zə kò enyəa, “Ghù mò ləghaa yo fʉgha ù gboō fughu wo àsùghò fughu ù li wən, ghu m bəgha kɔʼ gwən e ughùe â mùghò.

⁶Fə̀ŋ zə̀ghà mò zɔlɔ dzə̀ yo am nyòm təla ghe mò kpɛ̂ɛn fughuu wo â ghù asùgho təla ghe mò gbôo fughuu wo alesùuw maʼà bòo tə aghì.

⁷Mugho n daŋso dzɛ̀ tsùghu enyəa, ‘Ǒo Zə̀ kò, mùgho wəlà, M̀ fɛ bùgho alefwàʼ fwàʼ kəla ghù tsə̀m tsughu, aŋghəa ghe tɔm naŋa an nyəme u kəmwàʼso kùu wò mùgho.’ ”

⁸Kə̀lestò fə̀ sûesʉ dzɛ tsughu enyəa, “Ghù mò ləghaa yo nyom tə̀ gboo fughuu to, ŋkāa fughu kə̀ kɔʼɔ fughu ko, ŋkāa fughu ù kpɛɛn wo ko ŋkāa fughu ù li wəla u lɛɛn sugho ghəa a təbòo ghò, ŋkāa ghəa a te ghə yo aleghəŋlo enyəa fə̀ŋ zə̀ghà e duʼnlo” (ghe fə̀ fʉgha wən fughuu aŋghəa lâŋ kə Musî kə̀ deē).

⁹Ù n daŋso dzɛ̀ kpeʼe tsughu enyəa, “Ǒo Zə̀ kò, Mùgho wəla, M̀ fɛ bùgho alebùghò fwâʼ fwàʼ kəla ghù tsə̀m tsughu.” Zə̀ kə̀ bughuu naaŋ tsughu kàa n sûesʉ mò, kə n zə kɔʼ kàa m fughu mò.

¹⁰Zə̀ kə n tsə̀m tsughu alesùuw maʼà bòo tə sɛ̀, kə ŋ ghəəŋ tsughu enyəa Yɛso Kə̀lestò fughuu kɔʼ ghue u wə̄n an tuw u sɛ̀, ù fughuu təla ko êsəŋò.

¹¹A fə̀ lǒ tsuʼu mən n dzə̀m n dzə̀m fɔ̀e tə Tə̀dzûu tən tə dzə̀m fə̀ soʼo nyəa nduw fwaʼ kə ghee ko, ghe n tsôo sàa fùghuu kwèen kô fʉgha u mɔʼɔ wo, mo u yo dzə̂ alesùuw maʼà kôʼ təbôo.

¹²Kə̀lestò fə̀ kuuwn sɛ fughu tən kô ghue u wə̄n alo enəgha e mɔ̀ʼ alesùuw maʼà tə̀bôo to mbī kê bughò mîaa. Ù n daŋso dòʼò tsughu aŋ kwe u Kəzə̀ ù təma wo.

¹³Nì nùghù wò an ti kə te ko, ù fɛ ləəm tsuʼ wəla Zə̀ kə̀ kê ghəəŋ tsughuu enyəa ghiīkətuw a wə̄n a doʼò tsughu fəgha kə wən kə̀ gaʼn kə aghuw kò.

¹⁴Am fughu kə wə̄n kən kə̀ mɔ̀ʼ, ù ŋ ghəŋlò ghî ghəla ghe sûw maʼà bôo tə ghee to n dòʼò tə̀n kɔʼ ghî à ghe kpe aŋghəa Zə̀ kə̀ ləghaa.

¹⁵Zuʼ tə̀ Zɔlɔ tə teso dzàa wò sùgho nù ghəa ghən gho â sɛ̀; nu tə fə̀ daŋso dzɛ tsughu enyəa,

¹⁶“Tsə̂ntə̀mbî n dzɛ̀ tsùghù enyəa mən lǒ kàa məla Ǹ lo zəā kɔʼɔ ghàʼ à ghee abugho tsùʼu n te lo tsəghà tsughu, Ǹ lo dzə̀la nǎaŋ nduw lwaŋ waŋa am fə̀ŋ tə ghee, Ǹ tɔɔ naŋa nyəa nduw an tuw u ghee.”

¹⁷Zuʼ tə̀ Zɔlɔ tə n dzɛ̀ kpèʼe tsughu enyəa, “Ǹ lo kòom mòʼn yò ghəa a ghee à biigh gho asùgho ghəa à kwu ghəla ghe ghəŋlo.”

¹⁸Abugho ghe ghuūwmaʼà dzə̂ ghəa ghən gho, efi lo enyəa a kôom ki dzə yo alegboō fughuu fʉgha wo a Zə̀ kò alesùuw maʼn bôo tò.

¹⁹À fi lo enyəa waazə̂ ghò, sɛ̀ tɔ̂ʼ kwò tən nû enyəa a lo nyəa nù an Tsùghu e Baa zo am bàm e kàŋ tə Yɛso.

²⁰A lô fughu tsəghàa nyə̌a ndùw an dzì è fughu zəla e lo ghəŋlo enyəa sɛ̀ kelê mùghù è doʼn təla zo, dzì zəla u mò tsʉ nyə nduw â sɛ̀ aŋghəa ù mò bâʼ nyə ndûw vʉa zo am vʉ zəla ù mò kpuw ghè zò.

²¹Sɛ̀ ki nu tuw kə Fɔ̀e kò kə lɛnlo a dzeŋe kə ghì a Kə̀zə̀ ghò alo kəwalā.

²²E lo enyəa sɛ̀ ki alendùw a vʉ̀a Zə̀ kò am fə̂ŋ è zɔ̀lɔ mo aŋ kùm bǒo fughu â wə̄n, am fəŋ təla a lo mo a n sùw zɔnso àsùghò alo eghùe mo a n sùw am mùghù n zɔ̀lɔ mò.

²³Bùghò nlò tò sɛ̀ tɔʼɔ̀ teē tsughu an tùʼ zəla sɛ̀ chiī ghè zò mo a tsəəŋ kaaŋ yo, tùʼ zəla sɛ̀ dzâa nduw sugho â waazə̂ a sɛ̀ ghò; tɔŋlo enyəa Zə kə̀ naaŋ nǔ to kə wə̄n kəla kə to tsughu.

²⁴To a mô kele tsughuu ko aletoon nduw ghue è ləghaa nduw zo àsùghò alefwaʼa nduw fwàʼ kə̀ dzûŋ kò.

²⁵E kwo ko sɛ̀ lǒ zəghàan maʼn mwam zəla sɛ̀ ki enyəa a e bugho təmadzəŋlo, aŋghəa ghî à li a ghəŋlo, sɛ̀ è toon nduw ghue zo aŋghəa Tsuʼ fəla Mughu ù te lo bughoo a te tsoo fəghaan suū wô sugho.

²⁶Abugho sɛ̀ kele tsughu êsəŋò, sɛ̌ yia naām ndzə̂m ghəə̄ŋ ndûw ko ghəa à biigh gho, fəgha kə̀ li kə kôom yò a lo alesàa fughuu ndûw â Zə̀ kò alesùuw maʼà bòo tə te to a te.

²⁷Abugho a ndzə̂m ghəə̄ŋ tsughu bo zo enyə, a kê bɔ̌ɔm ləəm nduw ko nʉgha u Kəzə ù pfʉa wo am fə̀ŋ tə̀ tsəəŋ to, ləəm sùghò fɛ̀ɛn kə uwə̀n kəla kə lo bugho ləŋe ghîikətuw a wə̄n gho.

²⁸Abugho ghùw zaʼ lâŋ kə Musî kò, ghî yia lo a bə̀ghà ŋkāa a təgha ghe tɔʼ teso dzɛ̂ wo, ghe m wì màʼa ghùw ù te mo ghe kâ kwùsò se zo.

²⁹Ghɛ̀ moʼò enyəa ghùw wəla ù tso kuuwn chwiilwii tsughu Wɛ̀ ù Kə̀zə̀, lɛɛn kè tsughu kâŋ tə kàa ŋ Kə̀zə̀ məla tə fə̀ sûw maʼà tsughu wə̄n, tsoʼô Zuʼ tə Kəzə̀ təla tə bughòo dzɔ̂ zò, u wən wo utsû kǔuwn tsò bòʼò lò aledòʼò ênzə̂n?

³⁰A kwo nu ghùw wəla ù fə̀ dzɛ̂ tsughu enyəa, “À lò mugho Ǹ diī ŋgə̀mà tò, Ǹ lo ghəəŋ nù ghiīkətuw ghaŋa a lo fala bòʼ bo zəla ghe ghəŋlo.” U n dzɛ̀ kpèʼe sùghò enyəa, “Mughu ù te lo saʼa nù ghî a wə̄n gho.”

³¹À ŋgè lǒ fɛ̀ɛn kə eghəa â ghùw alebvʉ̀a tsughu nyəa tsughu aŋ ghu kə Kəzə̀

³²Mòʼn wò nlò ghəa ghəla a fə̀ sə a zəŋò ghɛ̀ à wǐiwì, aŋghəa ghɛ̀ mò kôʼ tsughu tsə̀ è Kəzə̀, ghɛ̀ m fala tsughu an ndə̀mà tə aghəa, ghəa a te ghə ŋ kè kuuwn tsəghàsə ghɛ.

³³Ghe n sûuwn ghɛ̀ bùʼù bǔu sùghò ghɛ̀ an nəgha tə̀ li to an sə kə aghì. Ghɛ̀ n yosò sughò ghî a li ghəla ghe mo faan sugho, ghe fə̀ buu sùgho ghee an nəgha tə̀ li to.

³⁴Ghɛ̀ mò bughoo ghɛ̀ Ŋ̀ ki se è kwuso a zəŋò ghìidughutsaʼ gho, ghɛ̀ m boo nduw aŋ ghùe e ghɛɛn zo enyəa ghe kwuū nughù fʉgha wɛɛ; nu ghɛ mo kwo nu enyəa ghuūghùe zɛʼɛ e ki nû ghəa è səŋò è li zo alo kəwalā, mo e kê tsɛ̀lɛ̀ nù.

³⁵Kà nlǒ fə̀ŋ zəla ghɛ̀ gaʼ tsughu a zəŋò Mughu ù te kôom nì nùghù ebàm, nu è lo nìi wò nù ghɛ â namso kə̀ ne ko.

³⁶Ghɛ̀ ki alekɔlɔ tsughu ko tə̀ fə̀ŋ, tò ghɛ̀ e lo aleghəəŋ ghəa ghəla Zə̀ kə ləghaa, ghɛ̀ lo kele kɔʼ fəgha kəla ke fə̀ to naŋā â ghɛ̀.

³⁷Ghe tɔm naŋa am Mwàʼsò kə Kəzə̀ enyəa, “Nu a tsûuŋ tsùghu ko enyə, ghùw wəla ù ki alebùghò ù bùghò nù, ù lòʼn yo.

³⁸Ghùw wəlà ù lò tsəghatsəgha lo mughùun nù aŋghəa ù gaʼ tsughu fə̀ŋ e wə̄n a zəŋò Zə kò, abugho ù kuuwn kôom ghɔ̂ɔn tsughu ebàm, fə̀ŋ zaŋa ŋ kôom dzɔ̀ɔ yò a zəŋò wən.”

³⁹Sɛ̀ kuuwn yo dzə̂ aŋ kɔ̀n kə ghì ghəla ghe ghɔ̂ɔn wo ebàm, Zə̀ kə n dzùw màʼa ghee. Sɛ̀ lo ghî ghəla ghe gaʼ fə̂ŋ tò a zəŋò Zə̀ kò, mo kə lo bəghasəa nǔ sɛ̀.