Read Aghem Hibùlù 11 Bible Online

Hibùlù 11 - Aghem bible

Hibùlù 11

¹Aleboō fughuu tsughu â Zə̀ kò lò ghəa zəla e ghəŋlo enyəa sɛ̀ è kwo tən enyəa fʉgha wəla sɛ̀ chiī tùʼ a te lo bùghòo nù, boo e lo tsə̌a zəla è dèe wô enyəa ghəa ghəla a koʼò yo kùm lò nû.

²À fə̀ lo bòʼ ghî à wii a fə̀ boo fughu tsughu â Zə̀ kò e fə̀ ghəŋlo enyəa Zə̀ kə̀ dêe ndûw â ghe enyəa e duʼn nǔ ghèe ghee.

³À lò aŋghəa a boō fughu tsughu â Zə̀ kò, a zuwkɛlɛ enyəa mbī fə̀ ghue u gbən sə kɔʼ wo mò à dzɛ̀ tsùghù Kəzə̀, to zə e lo enyəa ghe mò fʉgha wəla a koʼò nduw fəghaan sə kɔʼ am fʉgha wəla a koʼò yo.

⁴À fə lo aŋghəa Ɛbɛ̀l fə̀ boō fughu tsugh â Zə̀ kò e fə̀ ghəŋlo ù kɔ̀ʼ fùghù ndùw Kə̀zə̀ â fughu ko mo kə dzɔ̂ tsə̀ghàsə kə Kɛ̂n kò, Zə̀ kə̀ n nì ndùw Ɛbɛ̀l enyəa ù lò tsəghatsəgha, mò Zə̀ kə fə̀ de tsughu aŋghəa kə boo nduw fughu kə wən ko. Ghəa ù lo ko mò ù mafə kpuw, vʉ̀a ù kuuwn naam kə̂aa ghəa gho am bàm e boo e wə̄n.

⁵À fə̀ lo bòʼ Ɛnɔ̀k fə̀ boo fughu tsughu â Zə̀ kò e fə̀ ghəŋlo Zə̀ kə n nì nùghù kɔʼ nduw wə̄n enyəa ù ka vʉ zo alo esə tsuʼ; ghe ŋ kə̀ŋ kè wə̄n bòʼ Zə̀ kə̀ mafə wən nî. To ghe e nî wən êzə̀ à n lo mo ghe kə̂aa enyəa, ù mò ghəəŋ nû fə̀ŋ è Kə̀zə̀ n zɔlɔ.

⁶Abugho ghù dòʼŋkè boo fughu â Zə̀ kò, ghù yò dzə̂ aleghəŋlo fə̀ŋ è wən zə̀ zɔlɔ. Tɔŋlo enyəa ghùw wəla ù ləghaa alendùw a vʉ̀a Zə̀ kò ù kì aleboō tsughu enyəa Zə̀ kə̀ lo nû, chia kə namso sugho ghî ghəla ghe kûm diī alekele wə̄n.

⁷À fə̀ lo bòʼ Nôa fə̀ boō fughu tsughu â Zə̀ ko e fə̀ ghəŋlo ù n zùw ndùw shwaʼ u Kəzə̀, aŋghəa Zə̀ kə̀ kʉɛɛn tsughu wən kùu nduw ghəa ghəla ù fə̀ kaām koʼò yo, u m bəgha kɔʼ kəkwə̀n alebəghaasə kèndughu kə wə̄n. Aŋ ghəa zən, Nôa fə̌ fi de nduw enyəa ghî a mbī a lo ghî a biigh gho. Bòʼ Nûa fə̀ boō fughu â Zə̀ kò, Zə̀ kə̀ n nì ndùw wə̄n enyəa ù lo ghûw u tsəghatsəgha.

⁸À fə̀ lo bòʼ Abə̀làhâm fə̀ boo fughu tsughu â Zə̀ kò e fə̀ ghəŋlo enyəa ù zuw dzə̀ e Kə̀zə̀ aŋghəa Zə̀ kə̀ fə̀ tɔŋɔ wə̄n enyəa ù ndùw an lùʼù kəla ù fə̀ ki alendùw zə. Ù n sə̀ nùghù ndùw a fughu mò ù kwò yo luʼu kəla ù mò nduūw a fughu.

⁹Bòʼ ù fə̀ boo fughu â Zə̀ kò, ù n ndùw mùghùu ndùw an luʼu chia Zə̀ kə fə̀ to naŋa â wə̄n tǒ ghùw wəla ù bwìin nyə nduw nû a fughu, ghe m mughu alo mpfʉ̌a tò aŋghəa Esaʼ àsùghò Yàkɔ̂b fə̀ mughù sugho a te, ghee ghəla ghe fə ki alezəā sughò fʉgha ù mɔʼɔ̄ wəla Zə̀ kə fə̀ to naŋā â Abə̀làhâm.

¹⁰Tɔŋlo enyəa ù fə̀ tuw kə naŋa nduw ko an naʼ zəla ghe fə̀ lo mo ghe bʉ̀ghànlò u təndughu wo a te kuʼ naŋa kaŋlo, mò à fə̀ kɛɛ̄n tɔm naŋa tsughu Kəzə̀, a m bə̀ghà kɔ̀ʼ sughò wə̄n.

¹¹À fə̀ lo sugho bòʼ Sàla fə̀ boo fughu sugho â Zə̀ kò e fə̀ ghəŋlo ù ŋ kele ùnùŋ alekòom bɔŋ wɛ, bugho dzə̀ è wo, mò noo u wə̄n u mafə tsə̀ghà ghəa à koōm dzəa gho, bòʼ ù fə̀ lɛɛn tsughu enyəa ghùw wəla ù fə̀ to to ke te ko naaŋ nù dzughu e wə̄n zo.

¹²Zən lo e ghee ghî a fə̀ sə tsughu aŋ ghuw wə̀n ù mɔ̀ʼ, mò ù m bùʼ mìaa mɛ̀ʼɛ̀ sugho, ghî a fə̀ sə tsughu aŋ ghùe ndzà tò nsə̀ghàbəlà alo kəwala àsùghò shiashia kə mǎakùw kò mo yo aletaŋ.

¹³Vʉ e fə̀ bugho sɔŋ fughu ghî ghən â mbàŋ mo ghe naam boo fughu ko â Zə̀ ko, mo ghe kâ kèle fəgha kəla Zə̀ kə to naŋā â ghee, à n lo mo ghe ŋ kuuwn kòʼ zìi ndùw alo fəgha kə te ko alo kədɛ̀, sò kwò enyəa ghe lo kele nù, boo tsùghu sugho enyəa ghe fɛ am mbī bwîin nyə wò nù àsùghò enyəa ghe lo ghî ghəla tsəghāa dzì fɛ am mbī.

¹⁴Ghî ghəla ghe kə̂a ghəa gho enyə, e dêe tə̀la wò nù enyəa ghe kəŋô naʼ e ghee.

¹⁵Ghe fə̀ koōm moʼn yo naʼ zəla ghe mò sə nughù wo a te, abugho ghe fə̀ môʼnlo, to ghe mafə kəŋ dzì alekôom ndǔw fughu a te e bàm.

¹⁶Zə ŋ kuuwn lò enyəa ghe ləghâa naʼ zəla e dzɔ̂ tsəgha; tɔ̂ɔŋ naʼ e kəwālā. E fi dêe enyəa Zə̀ kə̀ də̂ŋsò dzə̀ yò tuw ko abugho ghe tɔɔ̄ŋ wə̄n enyəa à lǒ Zə̀ kə ghee; tɔŋlo enyəa kə n naʼ zo â ghee bian naŋa.

¹⁷À fə̀ lo fə̀ lo bòʼ Abə̀làhâm fə̀ boō fughu â Zə̀ kò e fə̀ ghəŋlo u n nì kɔ̀ʼ Aezìk enyəa e ndûw sâa fughu â Zə̀ kò, aŋghəa Zə̀ kə fə̀ mɔ̂msò kôʼ tsughu wə̄n. Ghùw wəla ghe fə̀ fughu naŋa to ke te ko â wə̄n fə̀ lo nû alenìi sâa ndûw wɛ ù wə̄n ù nùu.

¹⁸Zə̀ kə mafə â wə̄n ki dzɛ̀ nàŋa enyəa, “À lò am bàm e Aezìk ghù lo kele waawɛ ghəla mùgho fə̀ to naŋā â ghù.”

¹⁹Abə̀làhâm m boo tsughu enyəa Zə̀ kə̀ lo nû alenìi nughù wô ghùw alo evʉ mò ù m kpuw. A fi lo aledzàa tsughu enyəa Zə̀ kə̀ mò ni fughu wo Aezìk ebàm â wə̄n mo Aezìk maā kpùw.

²⁰À fə̀ lo bòʼ Aezìk fə̀ boo fughu â Zə̀ kò e fə̀ ghəŋlo Zə̀ kə̀ m fughu tsughu Yakɔb ghèe Esau â bughuso zo am mùghù e ghee â sə ko.

²¹À fə̀ lo aŋghəa Yakɔb fə̀ boō fughu â Zə̀ kò ghəa a te a fə̀ ghəŋlo ù m fughu tsughu ebughuso â wɛ a Dzùghùsî gho aŋghəa u fə̀ so e kpuw mò ù zʉ̌a wò an tuw kə mbàŋ e wə̄n è nyə̀nlo aŋghəa ù fə̀ fughuu kɔʼso mò â Zə̀ kò.

²²À fə̀ lo aŋghəa Dzùghùsî fə̀ boō fughu â Zə̀ kò e fə̀ ghəŋlo aŋghəa Dzùghùsî so e kpuw ù n dzɛ̀ nàŋa tsughu aŋghəa ghî ghə Ezə̀lɛ̂ à lo nughuun səa kɔʼɔ wo a te an naʼ zə Edzipt, teso dzɛ sùghò aŋghəa ghe lo tsəə̄n wə̄n a te.

²³À fə̀ lo sugho bòʼ ghê tselè Musî fə̀ boo fughu â Zə̀ kò e fə̀ ghəŋlo ghe n nàn naŋa Musî alo tədzɔŋɔ tə təgha aŋghəa ghe fè dzə tsughu wə̄n, bòʼ ghe fə̀ kôʼ tsughu enyəa wɛ u te fə̀ laan dzɔɔ̄ nû; Ghe ŋ kè tsoō tsəŋ lâŋ kə̀la də̀ŋ kə Edzìpt kə fə̀ tsə̀ghàsò sə wo.

²⁴À fə̀ lò aŋghəa Musî fə̀ boō fughu â Zə̀ kò e fə̀ ghəŋlo ù n noo tughu tsughu aŋ ghûw, tùe màʼà tsughù enyəa ghe wə̄n nî dzə̀ tò wɛ ù wɛ̄ ù zən ù Fɛlò[4]

²⁵Ù m biso shìa kɔʼ alefala dzəə̄ŋ ghèe ghê ghì a Kəzə̀ ghò, tsə̀ghàtàʼà alezuw kədzûŋ aŋ kə̀mà fə̀ enə̀gha aŋ ghəa a biigh.

²⁶Ù m mòʼn tsùghù sùghò enyəa e dzɔ̂ɔ alefala am bàm e Kə̀lestò tsə̀ghàtàʼà sə alekelê fʉgha u dzûŋ wəla u lô an naʼ zə Edzìpt, nu ù fə̀ mòʼn təla nduw ko namso kəla kə lo a sə ko.

²⁷À fə̀ lo bòʼ Musî fə̀ boo fughu â Zə̀ kò, e fə̀ ghəŋlo ù n tiigh nùghù sə̀ wò an naʼ zə Edzìp, ù ŋ kè ndoʼò tsəŋ nʉgha u kədə̀ŋ u pfʉa wo, ù ŋ ka tsughu ko ezə, tɔŋlo enyəa ù fə̀ naŋa nduw esə a zəŋò ghùw wəla a buw tò a e kôʼ.

²⁸À fə̀ lò sugho aŋghəa Musî fə̀ boō fughu tsughu â Zə̀ kò e fə̀ ghəə̄n tsughu ù n naŋâ Zə kə e zəŋso naaŋ ko, nɔm kaaŋ sùghò kətàŋ a fûu e təndughu e ghì ghə Ezə̀lɛ̂ enyəa e kwo ko Tsə̀ndə̄ghā è Kə̀zə̀ zəla e wiī ghî gho lô mɔ̂ɔ wɛ a ghee à sûesʉ gho.

²⁹À fə lo bòʼ ghî ghə Ezə̀lɛ̂ a fə̀ boo fughu â Zə̀ kò e fə̀ ghəŋlo ghe n tsə̀ghà daŋsə dnùw an dzùghùntsòʼ è bàŋa mo ghe bwîi ndùw an luʼu kə zumso tò à yò dzə̀ an ndzughù. Am bùghò ghì ghə Edzìpt a ndùw sə̀ kəŋo wò sughô alebùghò dâŋ, bʉgha u dzùghù e te m bvʉ̀ wò a zəŋò ghee, kuŋso nùghù ndùw ghee.

³⁰À fə̀ lo bòʼ ghî ghə Ezə̀lɛ̂ à boo fughu â Zə̀ kò e fə̀ ghəŋlo ghe m ŋgə̀a tsə̀ghà wò ghɔŋ wə e nâʼ u Dzɛ̀lekò alo ntsuʼu sə̀ghàmbəgha, wə m bɛ̀lɛ̀ bvʉ̀ è wo.

³¹À fə̀ lo bòʼ kpàlà kəla ghe fə̀ tɔŋlo enyəa à lǒ Lahàp fə̀ boo fughu tsughu â Zə̀ kò, e fə̀ ghəŋlo ù ŋ kè kpuūw dzəŋlo ghèe ghê ghî ghəla ghe fə̀ naaŋ yo tuuŋ ko aŋ ghəa e Kəzə̀, bòʼ enyəa ù fə̀ kuuwn ni naŋā ghì ghə Ezə̀lɛ̂ ghəla ghe fə̀ bugho aletsè tə̀ luʼū aŋghəa naʼ e fə̀ lo a te.

³²Ǹ lo alekòom kə̂a kpeʼe wo êndūghō a? Ŋ̀ kôom ŋge ki yo nəgha zo alekə̀a wò aghəa kùu ndùw ghì ghən; tɔɔŋ ghê Gidiyòn, Balàk, Sâmsòn, Dzɛftà, Dɛvìd, Sǎmwɛ̀l àsùghò ghǐisʉghà gho.

³³À fə̀ lo sugho eboo e fə̀ ghəŋlo enyəa aghî to ghən təma zə tənàʼà an tsam, à li ghə ghə̂əŋ ghəa ghəla à fə lô tsəghatsəgha, à li ghə kele sùghò fʉgha wəla Zə̀ kə fə̀ to naŋā â ghee, à li ghə ghàʼa sùghò u bʉgha,

³⁴à li ghə n lo sugho alenyəm wə̀n ù n tughu məla m fə̀ bəghanlo, à li ghə n lo sugho aletiī zəŋo ghɔŋ a tsam, à li ghə n dòʼò tsugho ghî a tughu gho aŋghəa ghe fə̀ bûʼ lo ko bvùʼù mə̀ aghì mò, à li ghə ŋ ghaʼa sùghò an tsàm, ghe n lo sugho aletəma zə sùghugòʼ tə tətùu, tə n tinlo è nughù.

³⁵ Yîzən ghə ŋ kòʼ tsughu mò ghî a ghee ghəla ghe fə̀ kpuwnlo ŋ kòom zòo wò ebàm alo evʉ. Ghe n dèsò ghì a Kəzə̀ à li gho am fʉgha wə ŋkwə̀n, à li ghə m kpùw è daŋso, ghe màʼà fə̀ ləghaa yo aletuū maʼà Kə̀zə̀ enyəa to ghî a te a mô zəghà maʼà ghee. Ghe fə̀ enyə boo tsughu alekpuwnlo bòʼ enyəa ghe kê kelê mùghù è dzûŋ zò abugho e ghe kê kɔʼsə kɔʼ alo evʉ̄.

³⁶Ghe n lugho a loʼ gho, vʉʉn bu alo təkwùu, ghe ŋ kùm tsùghù à li gho alo tetsaʼ nì fè nàŋa ndùw ghee.

³⁷Ghe n təəm à li gho alo atia, ghe n sughoon kə̀aan à li gho alo təsɔ̌ɔ alo utɔ̀ŋ u bʉ̀ghà, sùghùu ŋ wi a li gho alo təkɔ̄. Ghe m bwîin kàaŋ tsə̀ghà ko alo ese, mo ghe n dzə̀là kele gûw tə tədzə àsùghò gùw tə təndzì to, tò təndzʉ. Ghe ŋ ŋgee laa sugho, ghî ghə m biso tsùu ghee, ndzaŋso sùghò ghee.

³⁸Mbī zən fə̀ yo dzə̀ luʼu kə̀ dzûŋ ko â ghee alemùghù a te. Ghe n laʼà bwìi ŋgə̌a kaaŋ tsə̀ghà alo təbəghaā asùghò alo tə̀ kàʼà, nyəaa bwìi ndùw a tsəla unwɛ̄ asùghò am gbùʼ a ghueetsə̄ wo.

³⁹Aŋghəa Zə̀ kə fə̀ bûʼ dê ko aghì ghən enyəa kə duʼn nǔ ghèe ghee bòʼ boo zəla ghe fə̀ ki ghè zò, ghe ŋ kè naām kele fəgha kəla ghe fə̀ to naŋa â ghee.

⁴⁰Zə̀ fə̀ enyə lǒ bòʼ Zə̀ kə̀ ka fə ka bian naŋ ko dzɔ̀dzɔ̀ tə aghəa tən to a ghee, à fə̀ lo sugho â sɛ, enyəa ghe e ke yo alebùghò doʼò fəgha kəla ghe fə̀ ki aledòʼò mò sɛ̀ yo a te.