Read Aghem Hibùlù 13 Bible Online

Hibùlù 13 - Aghem bible

Hibùlù 13

¹E ləghaa nduw ko nlò ghue zɛʼɛ zo tò waazə̂.

²Waazə̂ ghò, e kpeeniī kɔʼɔ nlò ghî ghila ghe bwîin wo alo ghɛ̀, ghî à li mafə êzə ghəŋlo ndùw kpènì kɔ̌ʼ tsə̀təndə̄ghā tə Kəzə̀ mo ghe kwo yo.

³E moʼn tsughù nlò ghî ghəla ghe lo an ndughūtsaʼ, tò è soō ghɛ̀ a ghee lo a dzə̀m an ndùghūtsaʼ e te. E moʼn tsughuu nlò ghî ghəla ghe tsuū ghee; nǐi tsughu nlò enyəa ghɛ̀ zuuw sùgho fɔɔn zəla ghe zuūw.

⁴Tɔʼɔ kwukele tsughu nlò ghəa a ghùe è niī gho alo ŋ kɔʼso, e kwo ko ghùw aŋ ghì ghəla ghe nî tsughu ghue zo lô səā nûŋlo; nu Zə̀ kə̀ lo baa nu mbɛ an tuw kə ghì ghəla ghe sə nûŋlo àsùghò ghì ghə̀n a dzə̀m ghe nûuŋ kaŋlo.

⁵Kâ nlò fə̂ŋ tɛʼɛ to aŋghəa a ukʉa gaʼ, nǐi tsughu nlò enyəa fəgha kə̀là ghù wɛʼɛ ki kə m kpe â wə̄n; nu Zə̀ kə̀ dzɛ̂ tsughu enyəa, “Ŋ̀ kê bvʉ̀so màʼà kòʼ yò ghɛ, Ŋ̀ kê zə̀ghàa tàʼa kòʼ sùghò yò ghɛ.”

⁶À fi lo enyəa a lo nû aledzàa tsughu mo a tsɔ̂ɔ tə̀fə̀ŋ enyəa, “Mughu ù te yosò mùghò, Ŋ̀ ki yo aletsəŋ ghəa e li zo, ghùw lò aleghɛ kə kwò â mùgho a?”

⁷E moʼn tsughuu nlò tsoʼ tɛʼɛ to, tɔ̂ɔŋ ghì ghəla ghe mò kə̂a wô shwaʼ u Kəzə̀ wò â ghɛ̀. Ghɛ̀ e moʼn tsughuu ghəa a dzûŋ ghəla mughu e ghee e fə̀ deē, ghɛ̀ koʼ ni boo zəla ghe fə̀ ki â Zə̀ kò.

⁸Yɛso Kə̀lestò lǒ ghùw ù mɔ̀ʼɔ wəla ù fə̀ lo, vʉ̀a ù lò nɛ, vʉ̀a ù dòʼo tən sugho.

⁹E kwo ndə̀mà tə etsʉ̀ tə̀ fughu tə̀ li tə lô bughò sêe nughùun tsughuu ghɛ an dziī è tsəghatsəgha. À lò ghəa è dzûŋ zò abugho fə̀ŋ e ghùw nɛɛ̄ tsughu mò à lò dzɔ̀ e Kəzə̀, mò à yo dzə̂ aŋ ghəa à naŋlo a lwàŋ u ghəa a ufʉ̀ghàzəa, mo lwâŋ wən yòso yò ghee aŋ ghəa è li zo.

¹⁰A ki kətsaʼ mò fɔ̀e təla tə fwaʼa an luʼu kəla Dzûu tə̀ ndûw fughuu kɔʼso mò a te, ki yo daʼa ko alezə fəgha kəla ghe sɛ̂ nduw a te.

¹¹Tuw kə fɔ̀e kə Tə̀dzûu kə̀ bughōo kə n nì nyə̀ wò kàŋ tə tənyòm təla ghe bughòo alefughu tǒ fughu kə̀ suuw maʼn kə təbòo kò an Tsughu è Bâabaa zo, ghe ŋ kuuwn sə̀ kpàa kɔʼ gwən a tənyòm a te gho a beē kə enaʼ a fia ghə fə̀ mughu.

¹²Yɛso mò fɛ fala kpuw sugho a beē kə ghɔŋ wə enaʼ alesùuw maʼà tsughu bôo tə aghì aŋ kàŋ tə wə̄n.

¹³Bùgho nlo tò sɛ̀ ndûw səā koʼò wə̄n êzəŋ a beē kə ghɔŋ wə enaʼ, a ndûw boʼò sughò tuw kə̀ dəla kəla ù fə̀ boʼō.

¹⁴A ki tən dzə yo naʼ è li zo fɛ am mbī zən, a chîi ndùw tùʼ alo enaʼ e naām ki alebùghò.

¹⁵Bùgho nlò tò sɛ̀ fughuu ndûw Kə̀zə̀ êzəŋ â kɔʼso mò tǒ fughu kə sɛ̀ am bàm e Yɛso — aŋghəa sɛ̀ dzâa səa wo an dzughu a sɛ̀ enyəa ù lò Mughu ù te.

¹⁶E kwo ghɛ̀ ke bughuu doʼò kôʼ aleghəəŋ dzɔ̂ zò àsùghò aleteen dzəəŋ fʉgha wo, tɔŋlo enyəa fə̀ŋ è Kə̀zə̀ zɔ̀lɔ nù aŋ ŋgòʼ è ufughu vʉ̀.

¹⁷E zuuw nduw nlò â ghì ghəla ghe lô tsoʼ tɛʼɛ to, ghɛ̀ è ghəəŋ nduw ghəa ghəla ghe dzâa wo. Ghe lɛnlo â ghɛ̀, nu ghe lo ki aleteso dzɛ̀ â Zə̀ kò ghəa ghən a dzə̀m ghe fə̀ fwaʼ â ghɛ̀. E zuuw nduw nlò â ghee to ghe fwaʼā â ghɛ̀ alo eduʼnlo. Ghɛ̀ lo alezə kə kwò a te abugho ghɛ ghəŋlo enyəa ghe e mʉŋe zee a?

¹⁸E gɔŋlo nlò an tuw waʼā, nu ghàʼ kwo enyəa fə̂ŋ taʼa tə zɔlɔ nù, ghǎʼ yia dəma enyəa to ghàʼ mô zumso ghəəŋ ndùw ghəa ghəla a lô tsəghatsəgha aŋ ghəa ghən à dzə̀m.

¹⁹M̀ fɛ ŋgee buʼu wò kə̀ghu a te â ghɛ̀ enyəa ghɛ̀ e gɔ̂ɔŋ nduw â Zə̀ kò enyəa kə lo kôom nîi tuu wô mùghò ebàm a vʉ̀a ghɛ̀.

²⁰Ŋ̀ gɔ̂ŋlò êzəŋ enyəa to Zə̀ kə ebughuun kəla kə mò kôom nî nughù wò Mughùbè Yɛso alo evʉ̄, wəla ù lǒ bàʼàtə̀ndzì ù ghàʼa — aŋghəa kə fə̀ nî kɔʼ kàŋ tə wə̄n to zə kɔʼ kàa məla n dòʼo tən a te,

²¹mô fughu ghɛ â fʉgha ù dzûŋ wə̀n ù dzə̀m, tò ghɛ̀ è bwiī nduw an dzə̂ è wə̀n. Kə è fwaʼā ghəa gho a zəŋò sɛ̀ am bàm e Yɛso Kə̀lestò, ghəa ghəla a ghəŋlo enyəa fə̀ŋ e wə̄n duʼnlo a te. To sɛ̀ mô fughuu Yɛso Kə̀lestò â kɔʼso məla n dòʼò tən. Zə e lo ko êzə̀.

²²Waazə̂ ghaŋa gho, M̀ buʼu kə̀ghu â ghɛ̀, enyəa ghɛ̀ naŋa wo nlò tuūŋ ko an shwaʼ waŋā wəla ù lo mò mùghò n tsʉ̀ wò ghɛ a te, zən lò e ghee Ǹ tɔm wô sə fə aghəa fən fo â ghɛ̀.

²³Ghɛ̀ kele tsughu enyəa ghe ŋ wàazə̀ ù sɛ̀ Timotì tsʉ̀ zə̀ghàa an ndùghùtsāʼ. Ghàʼ à wə̄ n lo bùghò kòʼò nù ghɛ̀ a dzə̀m abugho ù kùʼù bugho.

²⁴Tɔɔŋ zuw nlò tsoʼ tɛʼɛ to ghèe ghê ghì a Kəzə̀ ghò a dzə̀m. Waazə̂ a sɛ̀ ghəla ghe nughu wo an Etalì fughù wò sughò ghɛ̀ â tɔɔŋ zo.

²⁵Ŋ̀ gɔ̂ŋlò enyəa to Zə̀ kə mô dê ghɛ̀ a dzə̀m â dzɔ̀ e wə̄n zo. Zə e lo ko êzə̀.