Read Aghem Hibùlù 2 Bible Online

Hibùlù 2 - Aghem bible

Hibùlù 2

¹Bòʼ ghəa ghən a dzə̀m Zə̀ kə lo mo kə ŋ ghəŋlo, zən lò e ghee a ki aletɔ̀ʼɔ̀ gaʼā tsughu kətuw aŋ ghəa ghəlà sɛ̀ zuw kɔʼ, enyəa e kwo ko a lô zəghàan maʼn tsughuu ghəa a te gho, a səā təŋò ndûw aŋ ghəa à nughù ghò.

²Tùm zəla tsə̀təndə̄ghā tə Kəzə̀ tə fə̀ bughò naʼà wo â ghê tsele a sɛ̀ fə̀ lo êsəŋò, ghî ghəla ghe fə̀ tâʼkè bwîi ndûw a te fə̀ zuw sugho ŋgòʼ zəla è kpe â ghee.

³A lo ênzə̂n êzəŋ alesəŋo tîi abugho a dôʼkè gaʼ kətuw aŋ ghəa è səŋò zəla Zə̀ kə fə̀ dzə̂ tsughu alebəghaasə sɛ̌ a? À fə̀ lo ghuūghuè u Mughu ù tè ghùw u sûesʉ alenàʼà wo tum e te. Ghî ghəla ghe fə̀ zuw tum e te n dè wò â sɛ̀ enyəa shwaʼ u te u lo êsəŋò.

⁴Zə̀ kə̀ m mʉa fughuu wò sùghò gùw è ghee alo tətsə̌a àsùghò alo nsə̀ghàa, àsùghò aŋ ghəa kə fə̀ dzughùu fughuu ndûw fughu kə u Zuʼ tə Zɔlɔ to â ghì ghò aŋ ghəa kə fə̀ tsə̂m tsughu.

⁵Zə̀ kə̀ ka fə̄ mbī zəla è mò ki alebùghò nì nàŋa ndùw dzə̀ â tsəlà tsə̀təndə̄ghā tə wə̄n to, tɔ̂ɔŋ mbī zəla a kə̂aa ghəa a te gho fɛ.

⁶E lo an də̀ŋò kə̀ li ko am Mwàʼsò kə Kəzə̀ enyəa, “Ghùw nsɔ̌ɔŋnchùw lò kə kwò â ghù aleniī enyəa ù lò kəfəgha a, ŋkāa wɛ u ghùw lo kə kwò ghù lò alelɛnlo â wə̄n a?

⁷Ghù fə̀ ghəəŋ tsughu nû tsə̀təndə̄ghā tə Kəzə̀ tə n nyɛʼɛ tsə̀ghàsə tsughu ghùw enyə mbəs aŋ kə̀mà fə enə̀gha; ghù m fughu tsughu ghùw â dwaʼa wo àsùghò kɔʼso mò,

⁸ghù n naŋa tsughu fʉgha wə̀n ù dzə̀m a tsəlà wə̀n.” Ghəa ù fə̀ naāŋ fʉgha wo u dzə̀m a tsəla wə̄n, u ka fə fəgha kə̀ li kə naŋa sə̀ kɔʼ dzə̀ enyəa à lɛ̌ɛn yo wə̄n. A fɛ lǒ, a kaam kòʼò ndùw dzə̀ yò fʉgha wo u dzə̀m a tsəlà wə̄n.

⁹A kuuwn kòʼò ndùw nù Yɛso, wəla ghe fə̀ ghəə̄ŋ tsughu enyəa tsə̀təndə̄ghā tə tsùuŋ tsə̀ghàsə tsughu wə̄n aŋ kəmà fə kəgha, Zə̀ kə̀ n tsuʼ naŋa kɔʼ wə̄n alo udwaʼa àsùghò kɔʼso mò, aŋghəa u mò fala alekpuw, enyəa an dzɔ̀ zəla Zə̀ kə̀ ki a zəŋò sɛ̀ to ù mò kpuw an tuw u ghì ghən a dzə̀m.

¹⁰Ufʉgha u dzə̀m à kì Kəzə̀, mò à fə̀ fʉgha u te wo u dzə̀m gbən wo wə̄n. E fə̀ lo tsəghatsəgha aŋghəa Zə̀ kə̀ fə̀ ghəə̄ŋ tsughu enyəa Yɛso e lo tuw ko â zəŋò ghì a wə̄n gho, bòʼ fala zəla ù fə̀ fala ghè zò aŋghəa ù fə̀ nîi wo ndə̀mà tə wɛ a Kəzə̀ ghò an səghanyəgha ŋ wən àsùghò aŋghəa ù ghəŋlo enyəa ghe zə kətuw.

¹¹Yɛso ghèe ghê ghì ghəla ù sùw maʼà tsughu bǒo tə ghee to dzeŋe ki tsele u mɔ̀ʼ. Zən lò e ghee ù dənso yô tuw ko aletɔɔŋ nduw ghee enyəa ghe lo waazə̂.

¹²Ù dzɛ̀ â Zə̀ ko enyəa, “Ǹ lo dzàa nduw fəgha kəla ghù lǒ ghè ko â waazə̂ ghaŋa gho. Ǹ lo e kɛɛ ghû abugho ghe zuuŋ wo alefughu ŋkɔʼso â ghù.”

¹³Ù n dzɛ̀ kpèʼe sùghò enyəa, “Ǹ lo gaʼā tsughuu fə̀ŋ zaŋa a zəŋo Zə̀ kò.” Kòom dzɛ̀ kpèʼe sùghò enyəa, “Mùghò wəlà, ghàʼ à ghê wɛ ghəla Zə̀ kə̀ fughu â mùgho.”

¹⁴Aŋghəa wɛ a Kəzə̀ à lo aghî, ghe ki nyom è ughue àsùghò kàŋ to, ghuūghùe u wə̄n wə n doʼo wò sùghò êzə̀; enyəa to ù mò bɔŋɔ kpuuw tsughuu sugho alendùw dzûuw maʼà ghùw wəla ù ki daʼa ko aleghəŋlo enyəa ghî ghə̀ e kpuwnlo, tɔŋlo Avʉatsə̄a.

¹⁵À mò lo ko an dzii zə̀n ù mò lô alezèe zəghàa ghì ghəla ghe mò mughu mbī è ghee tò ukɔ̂ bòʼ ghe tsəŋo vʉ zo.

¹⁶E kûm lò nû enyəa Yɛso ka fə bughò dzə̀ alebùghò yosò tsə̀təndə̄ghā tə Kəzə̀, ù fə̀ laam bugho alebùghò yosò waawɛ ghə Abə̀làhâm.

¹⁷Zən lò e ghee Zə̀ kə̀ mò ki aleghəəŋ tsughu enyəa ù dòʼò wô tò waazə an dzii tən tə dzə̀m, enyəa to ù mò doʼo tsughu tuw kə fɔ̀e kəla kə ki se è kwuso zo, ù gaʼ sugho fə̀ŋ am fwàʼ kə wə̄n â Zə̀ kò. Zən fə̀ enyə lò enyəa ù e lo alenìi fughu ndûw ghue u wə̄n tò kəfughu tò Zə̀ kə̀ ghuūw maʼà bòo tə aghì.

¹⁸Ghəa ghue u wə̄n u lo mo ù mafə fala, ghe n tsoōm sugho wə̄n, ù lò nû aleyoso ghì ghəla ghe tsoōm kaāŋ sugho ghee.