Read Aghem Hibùlù 3 Bible Online

Hibùlù 3 - Aghem bible

Hibùlù 3

¹Waazə̂ ghaŋa à zɔlɔ gho, ghɛ̀ ghəla ghɛ̀ lo mo Zə̀ kə ŋ ghɛ̀ tɔŋɔ am fɔ̀e u kəwalā, naŋa nduw nlo tuw kɛʼɛ ko a zəŋò Yɛso, wəla a dzɛ̂ enyəa ù lǒ tum e Kəzə̀, lò sugho tuw kəfɔ̀e kəla Zə̀ kə mò tɔŋɔ̄.

²Ù mò gaʼ fə̀ŋ e wə̄n a zəŋò ghùw wəla ù mò tsuʼ naŋa kɔʼ wə̄n, tò aŋghəa Musî mò bɔɔm gaʼ sugho fə̀ŋ e wə̄n a te am fwàʼ kə wə̄n â dzeŋe kə ghì a ndùghù è Kəzə̀.

³E lo nû mgbaŋ enyəa Yɛso kpe nû alekele kɔʼso məla Ǹ tsəghasə m Musi mò, tò aŋghəa ghùw wəla ù bəgha ndughu ki kɔʼso mò tsəghasə ndùghù è te.

⁴À ndughu bəghaa ghùw — Zə̀ chia kə kuuwn lo ghùw wəla ù bɔm fʉgha wə̀n u dzə̀m.

⁵Musî fə̀ gaʼ tsughu fə̀ŋ e wə̄n alelo kɔ̂ɔ fò alefwaʼā â dzeŋe kə ghì a Kəzə̀ gho a dzə̀m, ù n dèe zìi wò ghəa ghəla Zə̀ kə ki alenaām ki alebùghò dzɛ̂.

⁶Kə̀lestò vʉ̀a ù kuūwn fwâʼ am fə̂ŋ e wə̄n e dzə̀m tǒ wɛ aŋ ghì a Kəzə̀. Sɛ̀ lo tǒ ndughu è wən abugho sɛ tee tsughu ko am fəŋ zəla a ki àsùghò am fə̀ŋ zəla a tsɔɔ an tuʼ zəla a chiī.

⁷Zuʼ tə Zɔlɔ tə dzɛ̂ tsughu enyəa, “Tsuʼu nɛ wən, abugho ghɛ̀ zuw tsughu dzə̀ è Kə̀zə̀,

⁸e kwo ko ghɛ̀ lô so e tughuso nâaŋ fə̀ŋ tɛʼɛ, aŋghəa ghê tselè tsùghò fə̀ tuū alezuw â Zə̀ kò aŋghəa ù mò mɔ̂msò koʼò ghee aŋ ŋgwən.

⁹À fì a ghe mò mɔ̂msò koʼ mugho, mgbaŋa kòʼò wò kô fwàʼ kaŋa aŋ ghə̀m n tə̀nùu n chìako.

¹⁰Zə lò e ghee mùghò fə̀ pfʉso nʉgha wò ghàʼ à ghee dzɛ̀ tsughu enyəa, ‘Ghe tughuu ndùuw tsə̀ghà ko alo èkwû zò, ghe yia kwo yo dziī taŋa to.’

¹¹Mùgho ŋ kɛ̀ tsùghù an nʉgha ù pfʉa wo enyəa, ‘Ghe kê bùghò kòʼ yò an lùʼu kə̀ zʉʉ̄n kə ughùe kəla mùghò fə̀ to naŋa enyəa Ǹ lo fughuu â ghee.’ ”

¹²Ghòmlo nlò a waazə̂ ghò, e kwo ko ghùw wɛʼɛ lô so e kelê fə̀ŋ è bǐigh, ù e tsoo tuu aleboō fughu â Zə̀ kò, ghəa a te a lô ghəŋlo enyəa ù ka ndûw a vʉ̀a Zə̀ kəla kə lô â tuw ko.

¹³E laam toon nduw nlò ghue zɛʼɛ zo tsuʼu mən n dzə̀m n dzə̀m, aŋghəa ghe tɔŋɔ tsughu dzə tsuʼ fə te fo enyəa “Nɛ!”[1] aŋghəa mwàʼsò kə Kəzə kə deē â sɛ̀. E kwo ko bo e lô nɔɔ̄ ghɛ ghɛ̀ tughu doʼo nduw a te.

¹⁴Abugho sɛ boō fughu tən tsughu ko nù alendùw kuʼù ndûw, yia a gaʼ tsughu ko fə̀ŋ a zəŋò Zə̀ kò aŋghəa a mò ki gaʼ a te sûesʉ, sɛ̀ lo zəa dzeeŋ sughò nù fʉgha wəla u lô Kə̀lestò wò.

¹⁵Ghe tɔm naŋa am Mwàʼsò kə Kəzə̀ enyəa, “Tsuʼu nɛ wən, abugho ghɛ̀ zuw tsughu dzə̀ è Kə̀zə̀, e kwo ko ghɛ̀ lô so e tughuso nâaŋ fə̀ŋ tɛʼɛ, to aŋghəa ghê tselè tsùghò fə̀ tuū alezuw â Zə̀ kò.”

¹⁶À fə̀ lo ghê ndùgho ghe fə̀ zuw dzə̀ è Kə̀zə̀ a, ghe n tughuso naŋa tsughu fə̂ŋ tə ghee a? À mò mgbaŋ yo ko ghî ghəla Musî fə̀ nì nughù sə wo an naʼ zə Edzìp à?

¹⁷Ù mò pfʉaso unʉghà ghèe ghê ndùgho aŋ ghə̀m n tə̀ nùu n chìako a? À mò yo ghî ghəla ghe mò ghəə̄ŋ boon tsughu a, ghe m bvʉ̂ʉn kpǔuwn wò aŋ ŋgwən a?

¹⁸Zə̀ kə̀ mò fəgha kə kɛ â ghê ndùgho enyəa ghe kê bùghò sə̀ kòʼ yò an lùʼu kə zʉʉ̄n kəla ù fə̀ to naŋa â ghee a, abugho à buw â ghì ghəla ghe mò tsughoso maʼn wən à?

¹⁹A ŋ koʼ enyəa ghe mò yo dzə̂ alendùw nyə fughu bòʼ ghe kafə boo fùghù dzə̀ â Zə kò.