Read Aghem Hibùlù 4 Bible Online

Hibùlù 4 - Aghem bible

Hibùlù 4

¹Ghəa to kə̀ nyea ko an lùʼû kə̀ zʉʉn kə ughue kən naam ti dzə, bùgho nlò sɛ̀ ghôom tsughu enyəa ghùw wɛʼɛ u mɔ̀ʼ lò doʼnlo mò ù kà fughu an lùʼû zʉʉ̄n kə ndûw nyə̄.

²Tɔŋlo enyəa ghe maā làbəlà e dzùŋ zən â sɛ̀ naʼa wò, to aŋghəa ghe fə̀ naʼà ndûw sugho â wɛ ghə Ezə̀lɛ̂ ghəla ghe fə̀ lo aŋ ŋgwən. Làbəlà zəla ghe fə̀ naʼa nduw â ghee ŋ kè kuuwn kwu eghəa, bòʼ ghî ghəla ghe fə̀ zuw làbəlà e te ka fə nî naŋa dzə̀ am fə̀ŋ tə ghee.

³À lo ko sɛ̀ ghəla sɛ̀ boō tsughu a lo nyəā taā an lùʼû kə̀ zʉʉ̄n kə ughùe kə te ko, aŋghəa Zə̀ kə̀ dzɛ̂ tsughu enyəa, “M̀ fi to nu to ko an nʉ̀gha ù pfʉa wo enyəa, ‘Ghe kê nyə̀ tɛ̀ koʼ yo an luʼu kaŋa kə̀ zʉʉ̄n ko.’ ” Aŋghəa e mò bûʼ lo ko enyəa ù maā biaan naŋa mɛ̀ʼɛ̀ ghəa gho a dzə̀m aŋghəa ù fə̀ gbə̂n wo mbī.

⁴Tɔŋlo enyəa kə ŋ ghəa a kə̂a kùu nduw tsuʼ u sə̀ghàkəmbəgha wo an də̀ŋò kə̀ li ko an shwaʼ wən enyəa, “A m bùgho Zə̀ kə̀ fwâʼ mɛʼɛ̀ tsughu fwàʼ kə wən ko kə̀ dzə̀m, kə n zʉ̀ʉn tsughu an tsuʼ u sə̀ghàkəmbəgha wo.”

⁵Vʉ̀a ù dzɛ kpeʼe tsughu an də̀ŋo kən enyəa, “Ghe kê nyə̀ tɛ̀ kòʼ yò an lùʼû kə̀ zʉʉ̄n kəla mùghò fə̀ to naŋā â ghee.”

⁶E naam lò ko nû enyəa ghî a li a lo nyəa nù an lùʼu kə̀ zʉ̀ʉn kə te ko. Ghî a li yia a lô ghəla ghe mò bûʼ naʼā wo làbəlà e te â ghee, ghe ŋ kè nyə fughu bòʼ tuw kə ghee kə tughuu ko.

⁷Zə kə ŋ kòom naŋa kpeʼe tsughu tsùʼ fə̀ li fo, ù n tɔŋɔ tsughu tsuʼ fə te fo enyəa, “Nɛ.” Ù ŋ ghəəŋ tsughu enyəa Dɛvìd bùghò kə̀aa wô ghəa a te gho mo gha kə n sə aŋghəa ghe fə̀ dzɛ̂ naŋa enyəa, “An tsuʼu u nɛ wən, abugho ghɛ zuw tsughu dzə̀ e wə̄n, e kwo ko ghɛ lô so e tughuso nâaŋ fə̀ŋ tɛʼɛ.”

⁸Abugho Dzushùa mò ghəŋlo enyəa ghe nyəa an lùʼû zʉʉ̄n kəla ghe mò to naŋā â ghee, to Zə̀ kə̀ ka mō kôom bùgho kə̀aa dzə̀ ghəa zo ebàm kùu nduw tsuʼ ù li wo.

⁹À fi lo enyəa Tsuʼ ù zʉnlo ughùe[2] ù naam lò nû â ghì à Kəzə̀ ghò.

¹⁰Ghî ghəla ghe nyə nduw an lùʼû kə̀ zʉʉ̄n kə ughùe kəla Zə̀ kə fə̀ to naŋā â ghee lo bɔɔm zʉ̀ʉn sùgho eghue am fwàʼ kə ghee aŋghəa Zə̀ kə̀ mò zʉ̂ʉn tsughu aŋghəa ù bɔm mɛʼɛ̀ tsughu mbī.

¹¹E fi lo enyəa sɛ̀ ki aledə̀mà təla tsughu alendùw nyə fughu an lùʼu kə̀ zʉʉ̄n kə te ko. E kwo ko ghùw lò tsəghaa tə̂əŋ tsughuu an tuw kə ghee kə̀ tughuu kə te ko, ù dòʼò tsughu mò u kà ndùw nyə an lùʼû kə̀ zʉʉ̄n kə te ko.

¹²Kùmkùm shwaʼ u Kəzə̀ ù ki kədaʼa, fwàʼa sùgho aghəa, u tɔ tsə̀gha nyə fəla fə tɔɔ̄ bâa tò tə bə̀gha, u nyəa məən ndùw ghuw am fəŋ àsùghò aŋ ghùe u ghûw, nyəa məən ndùw an nyùŋ u ughùe àsùghò alo mgbaŋ mgbaŋ. Shwaʼ u te u tsʉa dèe kɔ̀ʼɔ̂ mòʼnlo e ghûw àsùghò fəgha kəla ghùw biso lo ghè kò.

¹³Fəgha kə̀ li yo dzə fɛ am mbī Zə̀ kə fə̀ gbə̂n wo kə nân doʼo an sə kə wə̄n. Ghəa ghən a dzə̀m tsò tsʉ̀ doʼo ko enyə an sə kə wə̄n. Sɛ̀ ki aletaŋso dzɛ̂ ghəa ghən a dzə̀m sɛ̀ lo mo a m fwàʼ â wən.

¹⁴Ghəa e lô dzə enyəa sɛ̀ ki nû Yɛso, Wɛ u Kəzə̀, tɔɔŋ Tuw kə fɔ̀e ù tughu wəla ù lǒ mò ù n tsə̀ghànyə alo kəwālā; to sɛ̀ mô tɔʼɔ̀ sɔʼn tsughuu ko ŋkāa am boo zəla sɛ̀ ki â Zə̀ kò.

¹⁵Tɔŋlo enyəa Tuw kə fɔ̀e kəla sɛ̀ ki, à yò dzə kəla kə buw alekwuso èse a zəŋò sɛ̀ abugho sɛ̀ bvʉ̂ kôom tsughu; sɛ̀ laam ki Tuw kə fɔ̀e kəla kə lǒ mo ghe ŋ wə̄n tsoom kaŋlo alo tədzìī tə dzə̀m, to ghe mò tsoōm kôʼ sugho sɛ̀, ù ŋ kè kuūwn ŋgəmso ghəŋlo èbo.

¹⁶Abugho sɛ̀ ləghaa fəgha ko, a n dò nduẁ bvʉ̀ ndùw â Zə̀ kə̀ sɛ̀ kəla kə dêe sɛ̀ â dzɔ̀ e wə̄n zo, a ŋ kwo tən enyəa kə sô dèe nù sɛ̀ â se e wə̄n e kwuso zo, kə fughuu sughò sɛ̀ â fəgha kəla kə kpe â sɛ̀.