Read Aghem Hibùlù 5 Bible Online

Hibùlù 5 - Aghem bible

Hibùlù 5

¹Ghe tuw kə fɔ̀e kə̀ telè tsɔ̀ʼɔ səa wo am bvʉa e waazə̂, ghe n tsuʼ naŋa kɔʼ wə̄n enyəa ù è saʼā tuw u ghee wò, sàa fùghuu ùfʉgha, nìi fùghuu sùghò kəfughu â Zə̀ kò enyəa to kə mô ghuūw maʼà bòo tə aghì.

²Tuw kə fɔ̀e kə lo kwo nû alemaʼn tsughu ghue wo ghèe ghê ghì ghəla ghe mgbə̂ŋ mughu, àsùghò ghəla ghe lo mo ghe n nyəŋ làʼ, tò aŋghəa ghuūghùe wə̄n u lo nu alebvʉ̀a kôom sughò aŋ ghəa a wə̄n à biigh gho.

³Zən lò e ghee ù ki aletele saā fʉgha wo â Zə̀ kò am bòo tə wə̄n, àsùghò alô tə ghì a wə̄n gho.

⁴Ghùw mɔʼɔ̄ tsɔʼɔ̄ dzə̀ yò ghue u wə̄n wo aledòʼò Tuw kə fɔ̀e bòʼ ù lə̀ghâ ŋkɔʼso mo, à wə̄n telè tsɔ̀ʼɔ kɔʼɔ̄ Kə̀zə̀ tò aŋghəa kə fə̀ tɔŋɔ Ɛlɔ̀n.

⁵À lò sugho eghəla aŋghəa à fə̀ yo dzə Kə̀lestò ù fə̀ kɔʼso naŋā kɔʼ ghue u wə̄n wo an Tuw kə fɔ̀e, à fə̀ laam lo Kəzə̀ kə fə̀ naŋā kɔʼ wə̄n aŋghəa kə fə̀ dzɛ â wə̄n enyəa, “Ghù lǒ wɛ waŋa ù nùu, nɛ an tsuʼ fə nɛ fən mùghò n dòʼo ti ūsûŋ wʉ̀a.”

⁶Ù dzɛ̀ sùghò an də̀ŋò kə̀ li ko am Mwàʼsò kə Kəzə̀ enyəa, “Ghù kè bɔ̌ɔm tèlè dòʼn təla ko tuw kə fɔ̀e tò aŋghəa Mɛ̀chisɛdɛ̀k[3] fə̀ lo.”

⁷Ghəa Yɛso mò mughù fɛ am mbī, ù ŋ gɔ̂ɔŋ Kə̀zə̀, dìi an tùʼ è diī zo, buʼnlo m̀bɔ̀ŋ, sə̀ mə̀ n tsughuu, ù dìi dzâa nduw â ghùw wəla ù fə̀ lò alebəghaasə wən alo evʉ̄. Bòʼ ù màʼà fə̀ ŋge gaʼ fə̀ŋ a zəŋò Zə̀ kò, Zə̀ kə̀ n zuw dî e wə̄n.

⁸Ghəa ù bûʼ lô ko enyəa e lo Wɛ u Kə̀zə̀, ù n zoʼn kele kɔʼ alezuw â Zə kò am fala zəla ù fə̀ fala ghe zò.

⁹A m bùghò ù bùghò doʼò kɔʼ fəgha kəla ù mò ki alelo ghè kò, Zə̀ kə ŋ ghəə̄ŋ tsughu enyəa ghî ghəla ghe boō fughu a wə̄n e lo alezə tuw kəla kə doʼò tən.

¹⁰Zə̀ kə̀ n tsuʼ naŋa kɔʼ wən enyəa ù dòʼò tsughu ŋgòʼ è tuw kə fɔ̀ə zəla Mɛ̀chisɛdɛ̀k fə̀ lo ghè wò.

¹¹A ŋge ki ghəa à kəaa gho aŋ ghəa ghən, zəa e kuūwn tughuu aleteso dzâa wô ghəa a te gho â ghɛ̀, e sô tughuu â ghɛ̀ alembaa zuuw tɔ eghəa.

¹²Ghɛ̀ mô ki alelo ghî ghəla ghe zoʼn kaāŋ ghî ghò êzəŋ alo aghəa, ghùw ù lì kuuwn ki alefəghaan zoʼn kpeʼē wô ghɛ̀ aŋghəa ghəa a sûesʉ ghəla ghɛ̀ mò bûʼ zoʼn dzə kùu ndùw shwaʼ u Kəzə̀. Ghɛ̀ lo tò wɛ à bughuu gho ghe naam nyɔŋɔ ghe zo, mò ghe yo alezəa fʉghàzəa ù tughu wo.

¹³Ghùw wəla ù nyɔŋɔ ghe zo, ù nǎam lo tǒ wɛ ù bughuu, u kaam mən dzə̀ an shwaʼ wəla u naaŋ ghùw ù tsəghatsəgha.

¹⁴Fʉghàzəa ù tughu u lɛ̂ɛn ghì ghəla ghe noō kpe tsughu, ghî ghəla ghe n zoʼn naŋa tsughu ghue e ghee zo aŋ ghəa ghəla ghe ghəəŋ zeē, ghe yia kwo nəŋonə̄ŋ aŋ ghəa è dzûŋ zo àsùghò alô è biigh zo.