Read Aghem Hibùlù 6 Bible Online

Hibùlù 6 - Aghem bible

Hibùlù 6

¹Sɛ̀ ki aledə̀mà təla tsughu alezoʼn ghue e sɛ̀ zo aŋghəa ghəla a lo aleghəŋlo enyəa sɛ̀ məla tsughu, àsùghò enyəa sɛ̀ e moʼn nduw ghəa ghəla a tsəghàsə ghəa a sûesʉ ghəla ghe mò bû zoʼn dzə sɛ̀ a te kùu ndùw Kə̀lestò. Sɛ̀ kôom ki yo alekə̀aa zee ghəa gho kùu ghəa ghən enyəa, sɛ̀ ki aletiī kuwnlo aŋ ghəa ghəla a nîi wô vʉ zo, ŋkāa aŋghəa sɛ̀ ki alegaʼ fə̀ŋ a te a zəŋò Zə̀ kò.

²Sɛ̀ kôom kì sugho yo alekəā ghəa gho kùu ndùw alezoʼnlo aghì aŋ ghəa à fughu ghûw ghò â mùghù ŋ Kə̀zə̀ mò, ŋkāa aŋ ghəa a ghu à gaʼā nduw gho, ŋkāa aŋ ghəa à kɔʼɔsəa gho alo evʉ, ŋkāa ghəa a dzughu e saʼ zəla e doʼò tən.

³To sɛ̀ mô ndzə̂a â sə ko, ghàʼ lo zoʼn nù ghɛ aŋ ghəa ghəla a tsəghàsə ghən, abugho Zə̀ kə̀ tsəm.

⁴Ghùw yò alekòom nîi wô ghì ghəla ghe mò bùʼ kele dzə̂ ghəa ghən gho ebàm, ghî ghəla ghe lo mo ghe maā mɔ̂m zuw fughu u kə kəwala wo, ghe yia a lo mo ghe mafə Zuʼ tə̀ Zɔlɔ tə kele sùghò,

⁵mo ghe mafə zuw shwaʼ u Kəzə̀ wò, bùgho zuwkɛlɛ tsughu enyəa u dzɔ̂ɔ nù, mo ghe mafə zəən zuw tsùghù sùghò dwaʼa u mbī zəla e bùghoo â sə ko.

⁶Ghì a te yia a bùghò zəghàa maʼà tsughu Zə̀ kəla ghe mò gaʼ fə̂ŋ tò a te. A kôom yò dzə̂ aleghəŋlo enyəa ghe tii fəla wô ebàm am bòo tə ghee, tɔŋlo enyəa ghe fi təghàan kpèʼe Wɛ̀ ù Kə̀zə̀, dənsò tuw kə wən an ndɛ.

⁷Ghueekətsə̄ kəla kə mʉā mùghù mə̀ e ghuuw mə̀la n tsughuu teen tsughu a te, kə ghəŋlo enyəa fʉgha u ghì ghəla ghe gwəə̄n sum zo a te e nomlo, kə bughuso e kele wò aŋ ghù Zə̀ kò.

⁸Abugho ghueekətsə̄ kə kuuwn fughuu kɔʼɔ̄ nyɔ̌ɔŋmgbê wò àsùghò ghè ù tsuʼn wo, kə ŋ ki yo fwàʼ kò, kə n lo ko to ghe n lòʼ naŋa. Ghe m bùgho kpàa màʼà kɔ̀ʼ ghueekətsə̄ kə te ko.

⁹Aŋghəa ghàʼ buʼù kə̂aa ko ghəa gho fɛ a waʼāwāʼ, ghàʼ kwo tən nû enyəa ghəa a dzûŋ a lo nû â ghɛ̀, â ghɛ̀ ghəla ghe lo mo ghe ghɛ̀ bəghāsə̄.

¹⁰Zə̀ kə̀ lo tsəghatsəgha, kə yo dzə̂ alenìizə̂ fwàʼ kə̀la ghɛ̀ mò fwaʼ ŋkāa ləgha zəla ghɛ̀ mò de tsughu â wə̄n tɔɔŋ Kəzə̀ an yoso zəla ghɛ̀ mò fughu â ghì a Kəzə̀ à li gho, ghɛ̀ yia naam fughuu ko êzəŋ.

¹¹Ghàʼ ləghaa enyəa ghɛ̀ a dzə̀m de tsughu sugho ghəa a te gho alendùw kûu mɛʼɛ̀ ndûw, aleghəə̄ŋ tsughu enyəa tùʼ zəla ghɛ̀ chiī ghè zò ghɛ̀ è kwo enyəa e kê lò nû ezə̀.

¹²Ghàʼ ləghaa yo enyəa ghɛ̀ bugho lɛɛ tsughu, ghàʼ laam ləghaa enyəa ghɛ̀ e lo tò ghî ghəla ghe fə̀ ka tsughu zə zo, boo fùghù e tsughu alezə fəgha kəla Zə̀ kə̀ fə̀ to naŋā.

¹³A fə̀ bugho Zə̀ kə̀ toō to ko â Abə̀làhâm, a m bùgho fəgha kə̀ li kə yo kə tsəghasə â wə̄n a alekàa tsughu a te, Zə̀ kə̀ ŋ kɛ̀ tsùghu an zən e wə̄n,

¹⁴enyəa, “Kùmkùm Ǹ lo fughuu ghù â bughuso zo, Ŋ̀ ghəə̄ŋ tsughu kɔ̂n kə waawɛ ghə̂a kə̀ dûuw tsughu.”

¹⁵A m bugho Abə̀làhâm ndòʼ ka tsughu sugho zə zo ləma è koo, u m bùgho kèle kɔʼ fəgha kə̀là Zə̀ kə fə̀ to naŋā.

¹⁶Abugho ghî a zəa kàa mò, ghe kâa tsughu an zən e ghùw wəla ù tsə̀ghasə ghee aŋ ghəa a ghee. Abugho ghî a boōm dzəə̄ŋ yo, ghùw n lo alekàa tsughu aleghəŋlo enyəa ghe tsughuu boō tsughu alo edzughu e mɔ̀ʼ.

¹⁷A m bùghò Zə̀ kə̀ ləghaa aletɔ̀ʼɔ̀ dêe tsughu â ghì ghəla ghe lo kele fʉgha wəla kə fə to naŋa â ghee enyəa e kuuwn tsə̀ghà yo fə̀ŋ e wə̄n, kə̀ ŋ kɛ̀ tsughu an zən e wə̄n enyəa kə lo ghəəŋ nù êzə̀.

¹⁸Zə̀ kə fə̀ enyəa an zen e wə̄n kɛ tsughu aledèe tsughu enyəa am bàm e ghəa ghən a bə̀ghà a kuuwn koʼò tsəghà yo, ghəla a ki ghəa ghəla a dêe enyəa Zə̀ kə̀ yo dzə̂ alekaʼ e gha, sɛ̀ ghəla sɛ̀ ti nân wo, a tee tsughuu an tùʼ zəla sɛ̀ chiī ghè zò.

¹⁹Tùʼ zəla a chiī lo ko tǒ tə̀m â ghue e sɛ̀ zò, yia a tɔ̂ʼ kwo enyəa e lò êzə̀, tɔʼ tì a te, ghùw wəla a chī tùʼ a zəŋò wən lo wəla ù nyəa daŋso ndùw an tsughu e baa zo a bǎa evʉa alo kəwalā.

²⁰Yɛso mafə chwɛ dzì aŋghəa ù fə̀ nyə nduw fughu an tuw u sɛ̀, ghe n tsuʼ naŋa kɔʼ wə̄n tò tuw kə fɔ̀e an nə̀gha tən tə̀ dzə̀m tǒ Mɛ̀chisɛdɛ̀k.