Read Aghem Hibùlù 7 Bible Online

Hibùlù 7 - Aghem bible

Hibùlù 7

¹Mɛ̀chisɛdɛ̀k wən fə̀ lo də̀ŋ kə Salɛ̀m, ù n lò sughu fɔ̀e è Zə̀ kə̀ Ghaʼa ko. Ghəa Abə̀làhâm bughoo ebam mò ù n dwəŋ wən wo ù chʉakò an tsam ndùw tə̀m zə̀ wò, Mɛ̀chisɛdɛ̀k m bùgho kòʼ wò wə̄n, fughu tsughu wə̄n â bughuso zo.

²Abə̀làhâm n nì kɔʼ fʉgha wən ù dzə̀m ù mò təm zə wo an tsam dzùghùu tsughu alo ukwaʼ eghəm, nì sə̀ wò kəkaʼ kə mɔʼ a te fughu nduw â Mɛ̀chisɛdɛ̀k. Zən e Mɛ̀chisɛdɛ̀k zən mòʼnlo enyəa, “Də̀ŋ kə tsəghatsəgha ko.” Mo e moʼn sùgho enyəa, “Dəŋ kə Salɛ̀m kò.” Tɔ̂ɔŋ “Dəŋ kəla kə nîi wô bughuun zo.”

³À lo ghùw mò a kwo yo tsele ŋkāa zə̂, ŋkāa kèndughu kəla u sə a te, kwo sugho yo tsuʼ fəla ghe fə dzə wə̄n a te àsùghò fəla ù fə̀ kpuw a te. Ù fwěen ko wɛ ù Kə̀zə̀, vʉ̀a ù lo fɔ̀e zəla è dòʼò tən.

⁴Kòʼ aŋghəa tuw wən mò ghaʼa a te a! Ghuūghùe wə Abə̀làhâm tsele ù ghê tselè tsele a sɛ̀ n nì fə̀ndzùghòo am fʉgha wəla ù mò təm zə wo an tsam, fùghù ndùw â ghee.

⁵Ghî ghəla ghe sə an tigh kə Lɛvi, ghe doʼn fɔ̀e tò, à lò kəlâŋ â ghee enyəa ghî a ki alefughu wo ghee â ndzùghòo am fʉgha u ghee wəla ghe kele tsughuu, mo ghî a te a lo waazə̂, aŋghəa waazə̂ a te a bûʼ lô ko mo ghee sə an tigh kə Abə̀làhâm.

⁶Ghùw wən, mò ù kà fughu alo kətigh kuuwn sə, ù nì ndùw ndzùghòo fia Abə̀làhâm mò bughò fughu wo â wə̄n, fughu Abə̀làhâm â bughuso zo Abə̀làhâm wəla Zə̀ kə fə̀ to naŋā fʉgha u te wo â wə̄n.

⁷E kûm lò nû enyəa à ghùw telè bughuso ko ghùw wəla ù tsə̀ghàtàʼà sə wə̄n.

⁸Am bùʼ kən, à ndzùghòo fə̀ fɛ nîi ghì ghə nsɔ̌ɔŋnchùw mo ghe lo kpuuw nù Yia a kuuwn bugho am bùʼ kə Mɛ̀chisɛdɛ̀k, à fə̀ ni wə̄n wəla ghe tɔm naŋā am mwàʼsò kə Kəzə̀ enyəa ù naām lǒ â tuw ko.

⁹Aŋghəa a lô alebùʼù dzâa sughò enyəa ghuūghùe u Lɛvì, (tsele â ghî ghəla Abə̀làhâm fə̀ ndûw kɔʼ fughu ndzùghòo fə wə̄n fo â ghee), ù fughuu sùghò nǔ ndzùghòo fə wə̄n fo am fʉgha u wə̄n wəla ù kele kɔʼɔ̄ bòʼ Abə̀làhâm.

¹⁰À fə̀ lo mo ghe kafə kaam dzə Lɛvì aŋghəa Mɛ̀chisɛdɛ̀k fə̀ kpeēn ghèe tselè ghê tsele tɔɔŋ Abə̀làhâm.

¹¹Abugho e lò enyəa fɔ̀e təla tə sə an tigh kə Lɛvì fə̀ fwaʼa dzɔɔ̄ nu fwàʼ kə ghee ko, (nu à fə̀ lo a tsəlà ghee ghî a mò zuuw nduw lâŋ ko) to Zə̀ kə̀ ka fə tum wò dzə fɔ̀e e nughù an dzə̀ tə Mɛ̀chisɛdɛ̀k, mò à yò dzə̂ an dzə̀ tə Ɛlɔ̀n.

¹²Abugho fɔe kə təfɔ̀e kə̀ kuūwn kɔʼ, laŋ kə n telè kì sugho alekuūwn kɔʼɔ.

¹³Tɔŋlo enyəa ghùw wəla ghe kə̂aa ghəa a wə̄n gho sə an tigh kə̀ nughù kò, mò fɔ̀e è li kaām sə kòʼ tsə̀gha fughu an tigh kə te ko alenyəa saā fʉgha wo alo ekəŋ.

¹⁴E zɔlɔ nu enyəa Mughùbè ù sɛ̀ mò sə an naʼ e Dzudà, Musî ka mo ghəa è li e kə̂a kùu ndùw tum kən aŋghəa ù fə̀ kə̂aa ghəa gho kùu ndùw tə̀fɔ̀e.

¹⁵Zə ŋ kùm bughò sə an ndɛ enyəa fɔ̀e è nùghù m bùgho sə kɔʼ mò è lò sugho tǒ Mɛ̀chisɛdɛ̀k.

¹⁶Ù ka fə bughò dòʼò dzə̂ fɔ̀e aŋghəa lâŋ kə̀ deē, ù fə̌ fɔ̀e kuuwn bugho doʼō bòʼ daʼa kəla kə lo am mùghù e wə̄n mò fəgha kə yo aledzùuw maʼà.

¹⁷Ghe teso dzàa am Mwàʼsò kə Kəzə̀ kùu ndùw wə̄n enyəa, “Ghù kè lǒ fɔ̀e è dòʼò tən an dzə̀ tə Mɛ̀chisɛdɛ̀k.”

¹⁸Ghe mò laŋ kə̀ wii kə baʼ naŋa kɔʼ bòʼ kə mò ki yo daʼa ko, ki sugho yo fwàʼ kò.

¹⁹Laŋ kə te kə fə̀ ghəəŋ dzə yo enyəa ghəa zə e dzɔɔ̄, aŋghəa e mô ki alelo a te. Ghe n dzì è dzùŋ zəla a lo alechìi tùʼ a te dê â sɛ̀, mo a lo aletsəgha a te alendùw a vʉ̀a Zə̀ kò.

²⁰Dzì è fughu zəla ghe naāŋ fɔ̀e tò a te fə̀ bəla kə ni mò à fə̀ kɛ tsughu Kəzə̀, kə n zə kɔʼ ŋkâa. Zə̀ ka fə zə dzə̌ kàa mò aŋghəa ghe fə̀ buʼù naāŋ tsəgha waawɛ a Ɛlɔ̀n gho alo təfɔ̀e

²¹Yɛso ŋ kuuwn bùghò dòʼò tsùghu fɔ̀e mò Zə̀ kə̀ zə kɔʼ ŋkâa, kə to naŋa tsughu â wə̄n enyəa, “Tsə̂ntə̀mbî ŋ kɛ̀ e tsughu, mò ù kè kǔuwn kòʼ yo fə̀ŋ e wə̄n enyəa, ‘Ghù lǒ fɔ̀e zəla è dòʼo tən.’ ”

²²Bòʼ kàa mən êzə̄ŋ, Yɛso m bùghò ghəŋlo sɛ̌ yia a kwo tən enyəa kàa məla a zə sɛ̀ à ghê Zə̀ kò êzə̄ŋ tsəghàsə ŋ wii m mî

²³Kɔ̂n kə tə̀fɔ̀e kə̀ wii kə mò nduuw nû bòʼ vʉ e mò sɔŋɔ̀ fughuu zeē ghee â mbàŋ, ghe ŋ kôom yò alefwàʼ fwàʼ kə ghee

²⁴Wən kuuwn yò alebughu doʼò kôʼ mò ù fwàʼa yǒ fwàʼ kə fɔ̀e kə wə̄n ko, tɔŋlo enyəa ù dòʼò tən nû.

²⁵Zən lò e ghee ù lò alebəghaasə aghî nəgha tən tə̀ dzə̀m, ghî ghəla ghe kuʼso nduw Zə̀ kò mo ghe tsəgha am bam e wə̄n, ghəa ù lǒ mò ù tso mughu tsəgha ko nû alebuʼ kəghu an tuw u ghee.

²⁶E mò kpe nû enyəa a kele tsughu ŋgòʼ è tuw kə fɔ̀e tò kən, ghùw mò u zɔlɔ nù, ki yo tsû wò, ki yo dzʉ wo, yò dzəəŋ dzə̂ ghèe ghê ghì à biigh gho, mò Zə̀ kə̀ ŋ wə̄n alo kəwala kɔʼso naŋa kɔʼ.

²⁷Ù ndòʼ kì yo alesaā fughuu fʉgha wo tsuʼu mən n dzə̀m, am bòo tə wə̄n àsùghò alo tə ghì tò, tò aŋghəa tuw u təfɔ̀e ù li wən fə̀ ghəŋlo; ù mò ghəa a te a ghəəŋ tən ko aŋghəa ù mò fughu nduw tuw kə wən ko tò kəfughu.

²⁸Lâŋ kə Musî kə fə̀ boom nû ghî gho mo ghe tɔʼ ti yo enyəa ghe doʼò tuw u təfɔ̀e; A m bùgho Zə̀ kə̀ zə kɔʼ kàa mò aŋghəa kə fə̀ to naŋā, mo e fə̀ bugho a bǎa làŋ kò, kə n tsuʼ kɔʼ Wɛ ù wə̄n mò ù dòʼo tən tsəghatsəgha.