Read Aghem Hibùlù 8 Bible Online

Hibùlù 8 - Aghem bible

Hibùlù 8

¹Tiso kə eghəa aŋ ghəa ghəla a kə̂aa fɛ lò enyəa, a ki tuw kə fɔ̀e tò kəla a kə̂a ghəa a wə̄n gho fɛ, mò kə dòʼ aŋ kwe ù təma wo an ndàŋ è Kwifɔ̀e alo kəwala.

²Ù fwaʼa an tsughu è dəghà zò, àsùghò aŋ kùm kə kəpfʉa kəla Mughu u te mò tiso kɔʼ, mò a kà ghuw wə̀ nsɔ̌ɔŋnchùw bəgha dzə̀.

³Ghe tuw u təfɔ̀e wən u dzə̀m tsuʼu naaŋ kɔʼɔ enyəa ghe e fughuu fughu wo, sàa ndùw ùfʉgha â Zə̀ kò an tuw u aghì, tuw kə fɔ̀e kə sɛ̀ kə fi telè ki sugho nû fəgha ko alefughu.

⁴Tɔŋlo enyəa abugho ù mò lô fɛ aŋ ghueekətsə̄ to ù kà mô fɔ̀e doʼo dzə̀, nu ghî à ki lò tsəgha nû ghe fughuu fughu wəla lâŋ kə Musî kə̀ dzɛ.

⁵Ghəa ghəla ghe ghəŋlo lo tò kəzəŋso am fəgha kəla kə lo an tsughu è dəghà zò alo kəwala. Tɔŋlo enyəa aŋghəa Musi fə̀ so e tiso kɔʼ pfʉ̌a kə te ko, Zə̀ kə̀ n dzɛ̀ â wə̄n enyəa, “Kòʼo tsughu enyəa ghù ghəəŋ tsughu ghəa a te gho a dzə̀m doʼo tsughu am fôʼ zəla mùgho mò de â ghù aŋ ukwàʼ.”

⁶E fɛ kuuwn lò enyəa Kə̀lestò bùghò kele kɔʼ fwàʼ kə fɔ̀e kəla kə dzɔ̂ tsəgha fwàʼ kə fɔ̀e tə wii to, tò aŋghəa kâa məla ù nì wo aŋ ghùu Zə̀ kò bùghò â ghè mo â ghì gho n dzɔ̂ tsəghà taʼa n sûesʉ mò, bòʼ enyəa ndə̀mà tə aghəa a dzûŋ tə̀ lo səa wò a te.

⁷Abugho ghəa è li e mô boo yo aŋ kàa n sʉesʉ mò, to n lǐ mò ŋkâa kà mò kòom sə̀ kɔʼ dzə̀.

⁸Zə̀ kə koʼ tsughu enyəa ghî a te a ghəəŋ bonlo aghəa, kə n dzɛ̀ tsughu enyəa, “Mùghò Tsə̂ntə̀mbî, Ǹ dzɛ̂ enyəa, Tî kə̀ bughòo nu, kəla Ǹ lo zəa kàa m fughu mò ghàʼ à ghê kèndughu kə Ezə̀lɛ̂ kò àsùghò ghàʼ à ghê kèndughu kə Dzudà kò.

⁹Kə lo yo dzə̀ tǒ kàa məla mùgho fə̀ zə ghaʼ à ghê tselè tsele aŋghəa mùgho fə̀ kwu tsughu ghee an ukwe nì nùghu sə̀ kɔʼ wò ghee an naʼ zə Edzip. Ghe fə̀ koom bwiī dzə yo am fəgha kəla mùghò fə̀ zə naŋa kàa mò a te ghàʼ à ghee, mugho ŋ kôom kì yo nəgha e ghee zo.

¹⁰Tsə̂ntə̀mbî dzɛ̀ enyəa, ‘Mən lǒ kàa məla Ǹ lo zəā kɔʼɔ ghàʼ à ghê kèndughu kə Ezə̀lɛ̂ kò abugho tsuʼu n te lo tsəghà tsughu. Ǹ lo dzə̀là nǎaŋ ndùw lwàŋ waŋa an tuw kə ghee, Ǹ tɔɔ̄ naŋa ndûw sugho am fə̀ŋ tə ghee, Ǹ lo doʼò tsughu Zə̀ kə ghee, ghe doʼò tsughu ghî ghaŋa.’

¹¹Ghùw lo e yo dzə̂ alezoʼn nduw fən ŋkāa wàazə enyəa, ‘Ghù ki alekwo Mughu ù te.’ Tɔŋlo enyəa aghî a dzə̀m lo kwo nû mugho alekaʼā nughù tsughu am bvùʼu mən kɔʼ tɛ ndùw aŋ ghi à səŋò ghò.

¹²Ŋ̀ kê ghuūw maʼà ghəa a ghee a biigh gho. Mùgho è ke koōm moʼn yo fɔ tə aghəa təla ghe fə̀ buʼù ghəə̄ŋ tsəgha.”

¹³Ghəa ù fə̀ dzɛ̂ tsughu enyəa, kàa mən lo m fùghu mò, ù fə̀ fi ghəəŋ tsughu nû n sʉesʉ mə n doʼò tsughu ŋ wǐi mò. Abugho fəgha kə doʼò dzə kə̀ wii ko, chia kə laā nduw, kə fi so e bughò mia sə.