Read Aghem Hibùlù 9 Bible Online

Hibùlù 9 - Aghem bible

Hibùlù 9

¹Kàa n sûesʉ mən fə̀ kì lwâŋ wəla u deē aŋghəa a ki alefughuu kɔʼso mò a te â Zə̀ kò àsùghò luʼū kə̀ baa kəla a ki alendùw fughuu Zə̀ kò â kɔʼso mò a te am mbī.

²Ghe fə̀ ti kɔʼ kəpfʉ̌a, ghe m gbò dzùghùun tsughu alo dzughu a bə̀gha alo evʉa, an dzughu e sûesʉ zə, à n lo ti kə lam a te àsùghò ndaŋ kəla ghe gaʼā naāŋ bɛ kəla ghe fughuu â Zə̀ kò, ghe n tɔŋɔ tsughu luʼū kə te ko enyəa, Luʼū kə̀ Baa ko.

³An dzughu e kə̀ bə̀ghà zən, ghe tɔŋɔ tsughu enyəa à lo Luʼū kə̀ bâabaa ko.

⁴A fughu a te, à n lo ti kə etsɛ alekpɛɛn nyee zo a te àsùghò tɛtɛ kə ŋkāa kò mo ghe m bɔ̀me kaaŋ wò alo etsɛ, an tɛtɛ kən, tôo fə etsɛ̀ fə̀ li fə n lo a te àsùghò fʉ̀ghàzəa wəla ghè tɔŋlo enyəa à lo manà a te, àsùghò mbàŋ è Ɛlɔ̀n è nyə̀nlo mo fôo tə m fùw sə̀ kɔʼ a te, àsùghò bwaaŋ wə atia wə ŋ kàa mən mò u bʉ̀ghà.

⁵An tuw kə kətɛtɛ kən, à n lo fʉgha ù li wo ù ki ghûo tò mo ghe tɔŋlo enyəa à lǒ tə̀chɛlòbîn tə dêe tsughuu enyəa Zə̀ kə lo nu fughu, mo ghûo tə ghee tə n tsən kele tsughu luʼu kəla ghe mò ghuuwmaʼn bôo tə aghì to a te. A kuuwn yò dzə̂ aletɔʼɔ teso dzâa wô ghɛ̀ â ghəa ghən gho êzəŋ a dzə̀m.

⁶Ghəa ghe bian naŋa tsughu ghəa gho, fɔ̀e tə n ndûuw zěe ko dzughu e kəpfʉ̌a e sûesʉ zən, ghe nduw fwaʼā fwàʼ kə ghee kəla ghe ki alefwàʼ ghè kò.

⁷A fə̀ kuuwn nyəa ko tuw kəfɔ̀e an dzughu e kəpfʉ̌a e kə̀bəghà zən wə̄n à nəŋ ko, ù fə̌ fughu nyəa ko enəgha e mɔ̀ʼ alo kənùm; mò ù so e nyəa fughu, ù ŋ ki təkâŋ alenyəa fughuu nduw â Zə̀ kò an tuw kə wə̄n àsùghò am tuw u ghì ghəla ghe mò ghəəŋ bôo tò mo ghe kwo yo.

⁸Zuʼ tə̀ Zɔlɔ tə fə̀ deē tsughu aŋ ghəa ghən enyəa dzì aletsəgha nyə an luʼu kə̀ Bâabaa ko kaam ghue wə n tsʉ dzə̀ aŋghəa dzughu e kəpfʉ̌a e sûesʉ zən fə̀ naām lo dzə.

⁹Zən lǒ tsəa zəla è dèe nəgha zəla a lo ezəŋ a te. E dêe enyəa fʉgha wən àsùghò nyòm təla ghe fə̀ sâa fughu nduw â Zə̀ ko yò dzə̂ aleghəəŋ fə̀ŋ e ghùw wəlà ù fughu kɔʼso n te mò enyəa zə̀ e zɔlɔ.

¹⁰Ghəa ghən a dzə̀m ghe ghənlo, ghe ghəəŋ ndùw ko bòʼ dzughu è zəa zo àsùghò fʉgha ù mʉa wo, àsùghò ghəa à fughuu â ghûw ghò â mùghù ŋ Kə̀zə̀ mò. Wən lò ko lwâŋ wəla u yo dzə alekuuwn fə̀ŋ è ghùw, mo lwâŋ u te u fə̀ fwaʼ bugho kum tsughu ko an nəgha zəla Zə̀ kə fə̀ ghəəŋ tsughu enyəa aghəa a dzə̀m dòʼò à fughu gho.

¹¹Kə̀lestò ŋ kuuwn m bugho tò tuw kə fɔ̀e aŋ ghəa à dzûŋ ghəla a lo mo ghə m bùgho. Pfʉ̌a kəla ù fwaʼà ghəa a wə̄n gho a te, kə ghaʼa nù, chia kə tɔ̀ʼ fəghaan ti sugho tsəghàsə pfʉ̌a ù li wən, mò à kà ghùw bəgha dzə̀, (à fi lo enyəa pfʉ̌a kə te kə yo dzə̂ fɛ am mbī zən)

¹²Aŋghəa Kə̀lestò a fə̀ nyə nduw an luʼu kə̀ baa ko, u ka fə nyəa dzə̀ â kàŋ tə dzə to ŋkāa tə mbɔ̀ŋ tò, ù fə̀ a fughu nyə ko enəgha e mɔ̀ʼ, nyə tən ko êsəŋò, aŋghəa ù fə̀ nî kɔʼ kâŋ tə wə̄n to, ù n zùe sə̀ wò tuw u sɛ̀ a te, zue tən ko ê səŋò.

¹³Fɔ̀e tə mò bugho ghe ŋ waan ndùw kàŋ tə tədzə àsùghò kàŋ tə təmbɔ̀ŋ tò àsùghò dzwə̀m u tsʉa u mbɔ̀ŋ zəla ghe kpâa kɔʼ a zəŋo ghì ghəla ghe dzəā an sə kə Kəzə̀ an nəgha zəla ghe mò suūw ghî gho a te, ghî a te ghə n zɔ̀n e tsughu.

¹⁴Kâŋ tə Kə̀lestò tə̀ ŋge tùghù tsə̀ghàtàʼà sə ghəa ghən a dzə̀m! Am bàm e Zuʼ tə Kəzə təla tə doʼò tən ù m fùghù ndùw ghue u wən an tuw u sɛ̀ tǒ fughu kəla kə kpe â Zə kò. Kâŋ tə wə̄n tə lo sûuw zɔnso fə̀ŋ tə sɛ̀ aŋ ghəa ghəla a nîi wô vʉ zo, enyəa to sɛ̀ e lo alefwaʼā Zə̀ kəla kə lo â tuw ko.

¹⁵À fi lo enyəa Kə̀lestò lǒ ghùw ù nî wô kàa m fughu mò enyəa ghî ghəla Zə̀ kə mò tɔŋɔ ghee e lo alekele fəgha kəla ghe mo to naŋa enyəa ghe lo kele tə̀n. Ghəa ghən lo səa nù bòʼ Kə̀lestò mafə kpuw alezuū səa wô tuw u ghee am bòo tə ghee təla ghè ghəə̄ŋ tsəgha tì kəla kàa n sûesʉ m fə̀ naām ki daʼa ko a zəŋò ghee.

¹⁶Â to ko alekele kə̀daʼa, a ki aledèe tsughu enyəa ghùw wəla ù to naŋa to kə te ko m kpuw.

¹⁷To kə daʼa kə kele ko abugho ghùw wəla ù mò to naŋa to kə te ko buw â tuw ko. To kə ki tsəgha yo fwàʼ ko abugho mughu wəla ù mò to naŋā to kə te ko naam lo â tuw ko.

¹⁸Zən lò e ghee kàa n sûesʉ mən fə̀ bûʼ yo aleghə̂əŋ ghəa e li zo mo kâŋ tə yo.

¹⁹Zə lo e ghee aŋghəa Musî fə̀ tɔɔ̄ŋ dzɛ̂ mɛʼɛ nduw lwâŋ u Kəzə̀ wò aŋghəa ghe tɔm naŋa â ghì gho a dzə̀m, u n tsûu kɔ̀ʼɔ̂ kâŋ tə təmbɔŋ àsùghò tə tədzə to àsùghò mùghù mò a te an nyùŋ təndzì tə baŋa to mo ghe nyeme kɔʼ alo təkəŋo waan ndùw am mwàʼsò kə kəlàŋ kə te ko àsùghò a zəŋò ghì yì a dzə̀m.

²⁰A m bùgho ù walā nduw, ù n dzâa tsughuu enyəa, “Tən lò kâŋ tə kàa məla Zə̀ kə̀ dzɛ̂ enyəa ghɛ̀ è bwiī a te.”

²¹An dziī è mɔ̀ʼɔ, ù ŋ waan kaaŋ wò kàŋ tə te to am pfʉ̌a chì àsùghò am fʉgha wən ù dzə̀m ghe mò nî kɔʼso tsəgha Zə̀ kò a te.

²²Kùmkùm alo kəlàŋ, e lo ko tò a e soō a fʉgha wo u dzə̀m sûuw ko alo təkàŋ, àsùghò enyəa abugho kâŋ tə̀ doʼkè tsughuu tsughu Zə̀ kə̀ yo sughò aleghuūw maʼà tə̀bòo.

²³E mò kuūm lo nû enyəa to ghe mô sûuw maʼà tsughu fwèen kə ufʉgha u kəwala wən fɛ am mbī mo ghe sɛ̂ fùghù ndùw tənyòm, ghe kuuwn sûuw maʼà fʉgha u kəwala wo mo ghe sɛ̂ fughu ndùw fəgha kəla kə ŋge tsəghàtaʼà sə nyôm tò.

²⁴Kə̀lestò kà nyə̀ ndùw dzə̀ an lùʼû kə̀ baa kəla ghe bəgha aŋ ghu, mò à lǒ fwěen kəla kə kûm lo, ù fə̀ laam nyə daŋso nduw alo kəwālā, alendùw tee a vʉa Zə̀ kò an tuw u sɛ̀.

²⁵Tuw kə fɔ̀e kə Tə̀dzûu kə nyəa tsəgha an tsughu è dəghà zò nûu tə̀ nùu à kàŋ tə nyôm tò. Kə̀lestò kà fə kuuwn nyə̀ ndùw dzə̌ fughu enyəa e ndûw fughu tuw kə wə̄n, ù e koōm fughuu kwenlo.

²⁶Abugho e mò lo ezə̀, à fi lo enyəa to Kə̀lestò mò fala ndə̀mà tə̀nəgha alekaʼa nughù wô aŋghəa mbī mò kaʼ tsughu. E fɛ kuuwn lo enyəa, ù fə̀ tee sə tən wo ko e nəgha e mɔ̀ʼ aŋghəa mbī fə̀ kaʼa wo alemìaa, alesùuw maʼà èbo aŋghəa ù fə̀ nî fughu sə wô ghue u wə̄n wo a te tò kefughu.

²⁷Ghuw kì ko alekpuw enəgha e mɔ̀ʼ, ghe n daŋso saʼ tsughu saʼ e wə̄n.

²⁸E lo sugho êzə̀ enyəa ghe mǒ Kə̀lestò fɛ sɛ tən nduw ko enəgha e mɔ̀ʼ alenìi nughù bòo tə ndə̀mà tə aghì. Zəa e lô sugho enyəa ù kè kòom bùgho kpèʼe nù alebùghò kôʼ ghî ghəla ghe mbûuŋ keē wə̄n, mò ù kòom bùghò yo alebùghò sûuw maʼà bòo tə aghì, mò ù bùgho alebùghò bəghāsə̄ ghee.