Read Aghem Dzɛ̂ms 1 Bible Online

Dzɛ̂ms 1 - Aghem bible

Dzɛ̂ms 1

¹À lò mugho Dzɛ̂ms, Ǹ tɔɔ̄ wo mwàʼsò kən ko, M̀ fwaʼà a tsəlà Zə̀ kò ghèe Mughu ù te, Yɛso Kə̀lestò. M̀ mwàʼsò kən kə tɔɔ wò â ghɛ̀ ghî a Kəzə̀ ghò tɔ̂ɔŋ ghì ghə Ezə̀lɛ̂ ghə̀là ghɛ̀ sɛ̂ɛ mughùu kaāŋ nduw aŋ kàlà tə mbī e dzə̀m. Yia M̀ fughuu wô ghɛ â tɔɔŋ zo.

²Waazə̂ ghaŋa gho, nǐi tsughu nlò enyəa à lò ghəa è duʼn zo abugho ghəa a mɔ̂msò kaāŋ ghɛ,

³nu, ghɛ̀ mgbaŋ kwo nû, enyəa abugho ghəa a mɔ̂msò fə̂ŋ tɛʼɛ to, ghəa a te a fi ghəŋlo enyəa ghɛ̀ zoʼn tsughu aleka ezə.

⁴Ghɛ̀ ka tsughu ko nlò zə zo êzə̀, tò ghɛ̀ noo kpe tsughu, fə̂ŋ tɛʼɛ tə nɛɛ̄ tsughu, ghɛ è laʼa yo fəgha kə̀ li ko.

⁵Abugho ghùw wɛʼɛ ləghaa alekele ùtɔ [am fəgha kəla Zə̀ kə̀ ləghaa], ù m bvʉ̀ ndùw â Zə̀ kò, Zə̀ kə̀ sô fùghuu nù, tɔŋlo enyəa, Kə bughuu â ghu ko, fughuu ghì ghə̀n à dzə̀m â fʉgha wo mò Kə sə̂əm yò.

⁶Mò ghùw nɔ̌ɔ kə̀fəgha, ù ka e foʼō nɔɔ dzə, ù ŋ kuuwn nɔ̀e ndùw am fə̂ŋ è wə̄n e dzə̀m, tɔŋlo enyəa ghùw wəla ù fòʼò nɔɔ̄ fəgha ko â Zə̀ kò lǒ ko tò kətùŋutùŋu kuɛ̀ɛ kə tùuŋ kaŋlo an dzùghùntsòʼ.

⁷E kwo ko ghùw ù te lô lɛɛ̄n moʼnlò enyəa e lo alekele kə̀fəgha aŋ ghùu Mughu ù te;

⁸tɔŋlo enyəa ù lǒ ghùw wəla ù ki ndzùghùun kə emòʼn kò, màʼn tsùghuu yo ghue wo aŋ ghəa a wə̄n à ghəəŋ gho.

⁹Abugho wàazə̀ wɛʼɛ ù lì am bvʉa zɛʼɛ̄ laā, ù kì aletsɔɔ̄ fə̀ŋ enyəa Zə̀ kə̀ ŋ wən kɔʼso naŋa.

¹⁰ Ghùw ù kǔu e tsɔɔ̄ sugho fə̀ŋ enyəa Zə̀ kə ŋ wə̄n etsən tsughu naŋā, nu ù lo tsə̀ghàa mìaan ko tò ghê kə ŋgwə̄n ko.

¹¹Aŋghəa tsə̀ səā kɔʼɔ̄ wo, zə̀ n nûu ènyə baaŋ, zə̀ ŋ gwə̀nsò màʼà tsùghù ghê kə te ko, saŋ tə kəghè tə te tə n tsɔʼn bvʉ̀ è tsughu, kôʼ e kəghè e te zə n laa è tsughu, ghùw ù kùu lo kpuuw sùghò êzə̀ aŋ ghəa a wə̄n a mbī gho.

¹²Dzɔ̀ lǒ â ghùw wəla ù ka tsughu zə zo abugho ghəa a mɔ̂msò kaāŋ wə̄n, tɔŋlo enyəa abugho ù ghaʼ tsughu ghəa a te gho, ù lo zə e tsɛlɛ̀ aŋghəa Zə̀ kə fə̀ to naŋā â ghì ghəla ghe ləghaa wə̄n.

¹³E kwo ko ghùw ù lì lô dzâa enyəa, à ghee tsoom Kə̀zə̀ abugho ghəa à biigh a tsoōm wə̄n, nu ghəa è biigh è loʼ e yo aletsoom Kə̀zə̀, Zə̀ kə̀ tsoom sùghò yǒ ghùw.

¹⁴À ghùw lǎam nɔɔm nùghù kɔ̀ʼɔ̂ ghəa à biigh ghəla ghùw ù te ləghaa, ghə n tsoom kaāŋ wə̄n.

¹⁵Abugho ghùw tsə̀ghà təŋò tsughu am mòʼnlò e wə̄n è biigh zo, ghəa a te yia nyə tughu tsughu a zəŋò wə̄n, ù ŋ ghəəŋ tsughu ebo, a m bùghò bo e te zə a e tsə̀ghàsə bəŋ ko, vʉ zə n nì ghùw ù te.

¹⁶E kwo ko fəgha kə lô tsêe ghɛ a waazə̂ a fə̂ŋ ghaŋa gho.

¹⁷Ghəa à dzûŋ ghò a dzə̀m àsùghò ghəla a lô tsəghatsəgha, à fùghuu tsughuu wò Tsele ù te wəla Ù bɔm zuw zo. Aŋ wə̄n, fə̀ŋ è wən kuuwn tsə̀ghà yò, ghəa è li e yo sugho a zəŋò wə̄n e lo alenìi wô kə̀ləm.

¹⁸À mò tsə̄m tsughu Kəzə̀ enyəa sɛ̀ doʼò tsughu wɛ a wə̄n, an shwaʼ u wə̄n ù səŋò wəla sɛ̌ fə̀ zuw, enyəa sɛ̀ doʼò tsughu kətuw am fʉgha u wə̄n u dzə̀m wəla ù mò gbə̂n wo.

¹⁹Waazə̂ ghaŋa gho, Ǹ ləghaa enyəa ghɛ̀ kele tsughu ghəa ghən gho, tò chìa è mbaa zuuw niī ghəa zo, tò ù è ka e chwaa kəaa ghəa gho, ù e ka è laŋā pfʉso sugho nʉghà wò.

²⁰Tɔŋlo enyəa nʉgha ù pfʉa u ghəəŋ nù ghùw ŋ ghəəŋ yo ghəa a tsəghatsəgha ghəla Zə̀ kə̀ ləghaa.

²¹À fi lo enyəa ghɛ̀ ki alezə̀ghàa maʼà dzə̀adzə̀ tə bòobò tə aghəa tɛʼɛ̄ tə te to, ghɛ̀ ni ŋgɔɔm naŋa wo shwaʼ wəla Zə̀ kə̀ dzə̂n naŋā am fə̀ŋ tɛʼɛ, mo u ki kədaʼa alebəghaasə ghɛ.

²²Kà nlò doʼò tsùghù dzə̀ ghî ghəla ghe tsêe ghue e ghee zo alezūuw ko ghəa gho an utùŋlō, kuuwn dòʼo tsughu nlò ghî ghəla ghe fwaʼà fəgha kəla shwaʼ u Kəzə̀ u dzâa ghè kò.

²³Nu ghùw wəla ù zəə̄n ko ghəa gho an tùʼ è zəən zo mo ù fwàʼà ndùw yò fəgha kəla ù mò zuw, ù lo ko tǒ ghùw wəla ù lɛɛn nyəā ndûw ghue u wə̄n wò alo kəlùwŋgɛ̀lɛ.

²⁴À m bùghò ù lɛɛn tsughu ghue wò, ù nùghù tsughu a fughu, ù n daŋso kòom nìzə̀ tsughu kôʼ e wə̄n ebàm.

²⁵Abugho ghùw kuuūwn tɔ̂ʼ naŋa tsughu tuw ko an làŋ kə̀ səŋò kò, lâŋ kəla kə bəghaasəa ghî ghò, Zə̀ kə̀ lo bughuso nǔ ghùw ù te, abugho ghùw ù te fwàʼà səā ndûw ghəa a te gho mò ù zə̌ən ko yo (ghəa ghəla lâŋ kə te deē) an tùʼ è zəən zo, nìi zə̀a ndùw.

²⁶Abugho ghùw tsêe kaāŋ ghue u wə̄n wo enyəa e lo ghùw ù Kə̀zə̀ mo ù nàŋso yo nom kə wə̄n ko, ghəa a Kə̀zə̀ a wə̄n a te ghə ŋ kwuu yo ghəa zo.

²⁷Ghəa e Kəzə̀ zəla Tsele ù te, Kə̀zə̀ nìi enyəa e ki yo dzʉ wo, zəa e lô tsəghatsəgha lò enyəa; alelɛnlo â waatsʉ gho àsùghò yiikpūw gho am fala e ghee, àsùghò enyəa e kwo ko ghəa a mbī a lô so e dzəso ghùw.