Read Aghem Dzɛ̂ms 2 Bible Online

Dzɛ̂ms 2 - Aghem bible

Dzɛ̂ms 2

¹Waazə̂ ghaŋa gho, kà nlò kpiī wo e baā aŋghəa ghɛ̀ lo mò ghɛ̀ m boo fughu â Yɛso Kə̀lestò, Mughu ù te wəla ù ki səghanyəgha mò.

²Nu abugho ghùw nyə wo am bvʉa zɛʼɛ̄ mò ù kǐ tee mə̀ ètsɛ aŋ waaghu, àsùghò ndzʉ tə wən è tughu zo a zəŋo ughùe, ghùw ù lǎa vʉ̀a ù nyə wô sugho mo ù dzə̀là kèle shwaʼ u təndzʉ a zəŋo ughùe,

³ghù vʉ̀a ghù tɔ̀ʼɔ̀ lɛɛ̄n ndûw ko ghùw wəla ù ki ndzʉ tə wən è tughu zo, dzɛ̀ â wə̄n enyəa, “Dòʼo kɔʼ wò ènyə a mughùbè.” Kuuwn dzɛ̀ â ghùw ù lǎa vʉ enyəa, “Tee tsughu fì.” Ŋkāa, “Dòʼo wò fɛ a ghueetsə̄ a tsəla efwee zaŋā.”

⁴Ghɛ̀ fi mgbaŋa bàa ù kpiī aŋ ghəa yì êzə̀ aŋ ghùe zɛʼɛ̄ à, ghɛ̀ yia a lô sughò ghî ghəla ghe saʼā sàʼ to mo ghe ki mòʼnlò è biigh zo.

⁵Waazə̂ ghaŋa gho, tiso kɔʼ nlò tuw ko edzūŋ, Zə̀ kə̀ kâ shìaa ghî ghəla ghe laā fɛ am mbī enyəa ghe e kuuwn lo ghî à kuu gho aŋghəa ghe gaʼ tsughu fə̀ŋ a zəŋò Zə̀ kò. À lǒ ghee ghe lo ki alezə fɔe wəla Zə̀ kə fə̀ to naŋā â ghì a wə̄n ghəla ke ləghaa.

⁶Ghɛ̀ ŋ ghùw ù lǎa ù te kuuwn kòʼ kè. À mgbàŋ yò ghî à kuu a te ghəla ghe kɔʼ nyaʼā an tuw wɛʼɛ, sèe ndùuw zěe ko â ghɛ̀ an tia e sāʼ a?

⁷À yǒ ghee a, ghe nî kɔʼ kɔ kə ezən kəla ghɛ̀ boō fughu a te, ghe yia a sûuwn kaŋlō a?

⁸ Abugho ghɛ̀ kûu naaŋ lâŋ kə fɔ̀e u Kəzə̀ wò, aŋghəa mwàʼsò kə Kə̀zə̀ kə̀ dêe tsughu enyəa, “Ghù ki aleləghāa wàazùghù aŋ ghəa ghəla ghù ləghaa ghue wʉ̀a wò a te.”

⁹Abugho ghɛ̀ kuūwn dêe alo kəsì, ghɛ̌ fi ghəŋlo èbo nù, ghe ŋ ghɛ̀ taŋ enyəa ghɛ̀ n làŋ kə̀ zaʼ;

¹⁰tɔŋlo enyəa, abugho ghùw bùʼ naŋā mɛʼɛ̀ ko lwâŋ wən wo u dzə̀m, vʉ̀a ù bvʉ̀ tsughu ko kə mɔ̀ʼ etɔ̀ŋ, à fi lo enyəa ù m bvʉ̀ u dzə̀m.

¹¹ Tɔŋlo enyəa ghùw wəla ù fə̀ dzɛ̂ enyəa, “Kà sə nùŋlò.” À fə̀ dzɛ sugho wə̄n enyəa, “Kǎ ghùw wi.” Abugho ghùw tàʼkè səā nûŋlò, kuuwn wi tsughu ghùw, ghùw ù te n làŋ kə̀ bvʉ̂.

¹²Ghɛ̌ fi ki alekəaa ghəa gho, fwàʼà ndùw sùghò tò ghî ghəla ghe lo saʼā ghee an làŋ kəla kə ghəŋlo enyəa ghî à zə kətuw.

¹³Nu Zə̀ kə̀ lo kwuso yo se zo a zəŋò ghùw wəla ù saʼā sāʼ mò ù kwùso yo se zo. Zə̀ chia kə lo kuūwn kwusō se zo a zəŋò ghì ghəla ghe kwusō se zo abugho ghe saʼā ghî ghò an tia e sāʼ.

¹⁴Waazə̂ ghaŋa gho, ghùw zə̌a kɔʼɔ̀ kə̀ kwò a te a, abugho ghùw dzɛ̀ enyəa e boo fughu â Kə̀lestò a, mò fwàʼ kə wə̄n kə̀dzûŋ kə̀ dêe tsùghuu yo fəgha kəla ù boō fughu tsughu a te a? To ù n tuw kə zəā a, enyəa ù bǒo fughu â Kə̀lestò à?

¹⁵Nǐi tsughu nlò enyəa wàazə̀ wɛʼɛ ù lì, ù zən ŋkāa ù nù kpɛ̀ʼɛ lò nû mò ù kì yo kə wə̄n kə̀ zəa ko alo fətsuʼ, làʼà sùghò ndzʉ tə̀ dzəə̄n to,

¹⁶vʉ̀a ù so e səā bwînlò, ghùw wɛʼɛ ù lì n dzɛ̀ â wə̄n enyəa, “Ndùw kədzûŋ, Zə̀ kə̀ bughuso ghù, e zəa kuuw tsughu, dzə̀ən kɔ̀ʼɔ̂ fəgha kə ufwo.” E ghee yosò aŋ kwò abugho ghù dzɛ̀ ndûw êzə̀ à, mò ghù kà wə̄n â fəgha kə̀là ù ki yo fughu ndùw a?

¹⁷À lò sugho eghəla abugho ghùw dzɛ̌ enyəa e boo fughu â Zə̀ kò, mò ù dèe yò aŋ ghəa a wə̄n à ghəəŋ gho, boo e wə̄n e te e fi lo kə̀nughùnùghù.

¹⁸To ghùw ù lì kuuwn dzâa tsughu enyəa, “Ghùw lò nû ù boō ko â Zə̀ kò, ù li vʉ̀a ù lo ù ghəə̄ŋ à dzûŋ ghò.” N sô bɛlɛ̀ wô enyəa, “Děe wò mugho â ghùw wəla ù dzɛ̀ enyəa u bǒo fughu â Kə̀lestò mò ù ghə̌əŋ yo ghəa à dzûŋ gho, Ǹ sô dêe wô â ghù enyəa M̀ boo fughu â Kə̀lestò am fwàʼ kaŋa kə̀ dzûŋ kò.”

¹⁹Ghù bǒo fughu nû enyəa Zə̀ kə̀ lo ko kə mɔ̀ʼ a? Abugho ghù boō fughu dzə êzə̀, ghù fi ti a te, zʉ̀ ù biigh u bûʼ bǒo fùghù sùghò êzə̀, vʉa u tsəŋo sugho.

²⁰Làʼsò kə ghûw kən, ghù lə̀ghaa enyəa a dêe wô â ghù enyəa à lǒ kə̀nughùnughù abugho ghù dzɛ̀ enyəa e boo fughu â Kə̀lestò mò ù dèe tsùghuu yo am fwàʼ kə wə̄n kə̀ dzûŋ kò a?

²¹ Tsele ù ghê tsele a sɛ̀ Abə̀làhâm fə̀ doʼo ênzə̂n ghùw ù tsəghatsəgha an sə kə Kəzə̀ a? À fə̀ lo bòʼ fwàʼ kə wə̄n kə̀ dzûŋ kò, aŋghəa ù fə̀ nî gaʼ kɔʼ wɛ ù wə̄n ù nùu, Aezìk alo kətsaʼ alesàa fughu â Zə̀ kò.

²²Ghù n tɔ̀ʼ kòʼò a! Fə̀ŋ zəla ù fə̀ gaʼ tsughu a zəŋò Zə̀ kò ndûuw dzə̌əŋ ko ghèe fwàʼ kə wə̄n kə̀ dzûŋ kò. À fə̀ lo am fwàʼ kə wə̄n kə dzûŋ kò è fə̀ dê sə wo enyəa ù kùm gaʼ kpe to nǔ fə̀ŋ a zəŋò Zə̀ kò.

²³ Ghəa ghən mò fɛ lueso tsughu ghəa ghəla ghe tɔm naŋa am Mwàʼsò kə Kəzə̀ enyəa, “Abə̀làhâm fə̀ boo fughu â Zə̀ kò, Zə̀ kə̀ n nì ndùw wə̄n an taŋ enyəa ù lǒ ghùw ù tsəghatsəgha.” Ghe n tɔŋɔ ndùw wə̄n enyəa ù lǒ ghùwfən ù Kə̀zə̀.

²⁴Ghù n tɔ̀ʼ kòʼ êzə̄ŋ enyəa Zə̀ kə ghùw nîi ko enyəa ù lo tsəghatsəgha bòʼ fwàʼ kə wə̄n kə̀ dzûŋ kò, mò à kà yò ko am enyəa ù bǒo fughu tsughu ko â Zə̀ kò.

²⁵ À fə̀ mgbaŋ yo sugho ghəa è mɔʼɔ̄ zo a kùu nduw Lahàb, tɔɔŋ kpàlà kən a, aŋghəa Zə̀ kə fə̀ taŋ nduw wə̄n aŋ wìzən ù tsəghatsəgha enyəa ù fə̀ kpeni tətum a, nì zə̀ghà ndùw ghee an dziī ènùghù à?

²⁶Nu abugho ghùw kòom zwîi yo, ù fi lo mò u m kpuw. À lò sugho eghəla abugho ghùw boō fughu tsughu ko â Zə̀ kò mò ù fwàʼà ǒ fwàʼ kə̀ dzûŋ kò, ghùw ù te kâ fi tso boo fùghù kè dzə̀ â Zə̀ kò.