Read Aghem Dzɛ̂ms 3 Bible Online

Dzɛ̂ms 3 - Aghem bible

Dzɛ̂ms 3

¹Waazə̂ ghaŋa gho, e kwo ko ndə̀m zɛʼɛ lô so nyəa ndùw alebùghò doʼò ghe wàdè alezoʼn ghî ghò, tɔŋlo enyəa sɛ̀ ghəla sɛ̀ zoʼn ghî ghò, ghe kê sɛ̀ saʼa mo ghe tɔʼɔ̀ nyǎaŋ nyəa tsughuu nù ghəa a sɛ̀ ghò.

²Sɛ̀ a dzə̀m mǔuwn nɔʼɔ dàŋà tsə̀ghà nù. Abugho ghùw kuūwn nɔʼɔ̄ yo aŋ ghəa a wə̄n à kəaa gho, ù fi lo ghûw ù tsəghatsəgha, ù lò sugho nû alenaŋso ghuw kə ebwìi kə wə̄n ko.

³A dzəlà tsùghû nyàaŋ fə fətsāʼ an dzughu e kəkə̀anyòm enyəa kə e zuuw wo â sɛ̀, an lo aleghəŋlo kə m bwiī nduw aŋghəa a ləghaa.

⁴Kwə̀n wə endzə̀ŋ u ne wo sughò, ghəa u dûuw ko fî, mò à bòʼn ndùw tùghùtùghù kə kəkǔɛɛ, à ghè wò sêe ndùw kô nyàaŋ fə kəbvūʼ enyə am bà kəla ghùwsěe ù te ləgha kɔʼ alekəaso ndûw a te.

⁵Nom kə bɔɔm lò sugho êzə̀, à lò ko nyàaŋ fə fəfə̀ghà ènyə a zəŋò ghùw, fia fə tsɔɔ̄ fə̀ŋ an ndə̀mà tə kɔʼ tə aghəa. Mòʼo ndùw to kuw kə ŋkàʼ kə̀ ne ko a, kê kə uwə̀n kə bughoo kə n dɛ̀ màʼà è kɔʼ a.

⁶Nom kə lo sugho tò kê kə uwə̀n. Nom kə lo mbī è ghə̀a à biigh gho, kə lo aŋ gwə̀n e ughùe e ghûw. Kə dzûuw màʼn tsùghû ghue u ghûw u dzə̀m, kə dâa màʼn kɔ̀ʼɔ̂ mùghù e ghûw e dzə̀m. Nom kə te kə bûʼ lò sugho aŋ uwə̀n, uwən mò à lò wən u kpǎaghùw.

⁷Ghùw lò nû alenɔɔ̄m nyəsô lee tə ufʉgha tən tə̀ dzə̀ tə mughu — nyôm tə ŋgwən tən tə̀ dzə̀m, nnwən, fʉgha ù ghaāŋ wo àsùghò nyòm tə dzughù tò, u m bùʼ nɔ̌ɔm nyəso.

⁸Ghùw kǔuwn yò dzə̂ alenaŋsô nom kə wə̄n. Nom kə lo fəgha kə̀ biigh ko, a yo alebɔɔ̄ tiso, kə ki sugho no è bǐigh bǐigh zəla è lò alewī ghùw.

⁹A fughuu ŋkɔʼso â Tsele ù sɛ̀ ghèe Mughùbè ù sɛ̀ an nom kə te ko, yìa à lò sugho an nom kə̀ mɔʼɔ̄ kə te ko a nîi sûuwn ghî gho a te, mò à lò aghî Zə̀ kə̀ bɔm tsughu am fwêen kə wə̄n.

¹⁰Yia a nîi dzughu è mɔʼɔ̄ e te zo fughuu Kə̀zə̀ a te â zɔ̀ɔŋ kò, sùuwn sùghò àghì a te. Waazə̂ ghaŋa gho, e ki dzə yo aledòʼò êzə̀.

¹¹To mùghù n dzə̌a mə̀ ŋ kuŋ dzəəŋ sə tsùghù wò an sə e dzughù e mɔ̀ʼ ghèe mùghù n zɔ̀lɔ mò à?

¹²Waazə̂ ghaŋa gho, to twam u tə̀ olèf wə̀ m mʉ aŋ kàʼ fə kəgə̀m à? Ŋkāa to twam u kəgə̀m wə̀ m mʉ aŋ kàʼ fə̀ tələma a? Ŋkāa, to mùghù m kpə̀ŋo mə̀ n sə̀ kɔ̀ʼ wò an dzùghù fə ntsòʼ a?

¹³Abugho ghùw lò am bvʉa zɛʼɛ̄ enyəa e tɔɔ nù, vʉ̀a ù zuuwkɛlɛ sùghò ghəa gho, ù dèe tsughu ghəa a te gho am fwàʼ kə wə̄n kə̀ dzûŋ kò am mwam u wə̄n àsùghò an tɔ u wə̄n.

¹⁴Abugho à kuūwn lô enyəa ghù ki kəmʉ̀nlo â ghì à loʼ gho. ghù vʉ̀a ghù mòʼò sugho enyəa ghù tsə̀ghàsə̀ aghî a dzə̀m, e kwo ko ghù lò so e tsɔ̂ɔ fə̀ŋ enyəa ghù kwo ghəa è li zo — mo abugho ghù ghəŋlo êzə̀, ghù fi nîi kɔ̀ʼɔ êsəŋò fə̀nsò nǎaŋ wò alo agha.

¹⁵Ŋgòʼ è ùtɔ wən yò dzə̂ tɔ wəla u lo alesəā tsughu wô alo kəwālā, à lò tɔ u mbī wo, à kà fùghù wò dzə̀ Zuʼ tə Kəzə̀ tò tɔ u te wo, à lò tɔ wə avʉatsə̄a.

¹⁶Tɔŋlo enyəa abugho mʉ̌ʉn kə lô alo kəlùʼu, ghî yia a moʼn kaŋlo enyəa to à mò tsə̀ghàsə ko ghee a zəŋò ghì à li gho, luʼū kə te kə n lo waʼn kə kəlùʼu, ghə ŋ ghəəŋ kaaŋ sùghò ŋgòʼ tə aghəa tə̀ biigh tən tə̀ dzə̀m a fughu.

¹⁷Yia a kuūwn bughò tɔ wəla u sə tsughu wo edzūŋ, à kì ghî a Kəzə̀, ghe bûʼ kì dzə fə̂ŋ tə̀ zɔlɔ to, ghe lo ghî ghəla ghe ləghaa enyəa ghəa ghə e lo bughubughu. Ghe lo zʉ̀ tə aghì, mùghù sugho kədzûŋ ghèe ghê ghì ghò, ki se è kwùso zo, fughuu sùghò èyòso â ghì ghò. Ghe m bâa yò kpwiī wo, tsèe sùghò yò ghue e ghee zo aŋ ghəa a ghee à ghəəŋ gho.

¹⁸Abugho ghê bughuso mbī naāŋ bughuun zo am bvʉa zə aghì, e ghəəŋ nù ghî ghə m mughu kədzûŋ.