Read Aghem 1 Pità 1 Bible Online

1 Pità 1 - Aghem bible

1 Pità 1

¹À lò mugho Pità, tɔɔŋ tùm è Yɛso Kə̀lestò — M̀ mwàʼsò kən kə tɔɔ wò â ghɛ̀ ghì a Kəzə̀ ghəla ghɛ̀ ti nân doʼò kaāŋ tsəgha aŋ kɔlɔ tə Pontùs, aŋ Gàlasìa, Kàpàdosìa, Ɛshìa, àsùghò am Bìtinìa.

²Kə̀zə̀, tɔɔŋ Tsele ù Mughùbè ù sɛ̀ ù te n tsɔʼ kɔʼ ghɛ enyəa ghɛ̀ doʼo ghî a wə̄n gho an tə̀ŋ kəla kə fə̀ fôʼ naŋā, Zuʼ tə̀ Zɔlɔ tə ŋ ghəəŋ tsughu enyəa ghɛ̀ e lo ghî à zɔlɔ gho, enyəa ghɛ̀ e zuuw nduw â Yɛso Kə̀lestò, to aŋghəa kâŋ tə wə̄n an vʉ zəla ù kpuw ghè zò fə̀ sûw maʼà tsughu ghɛ. Ŋ̀ gɔ̂ŋlò enyəa Zə̀ kə̀ mô fughu ghɛ â bughuun zo, kə dêe sughò ghɛ â dzɔ̀ e wə zo naʼ è ndə̀m.

³Sɛ̀ ki alefughuu zɔ̀ɔŋ ko â Zə̀ kò, Tselè ù Mughùbè ù sɛ̀, Yɛso Kə̀lestò. Bòʼ ghəa ù kwuso se zo a zəŋò sɛ̀, vʉ̀a ù ghəŋlo enyəa sɛ̀ è mughu mughù è fughu zo, aŋghəa ù fə̀ zôm nughù kɔʼ Yɛso Kə̀lestò alo evʉ. Zə̀ lò e ghee sɛ mughu, chìi tùʼ enyəa sɛ̀ lo kele mùghù è doʼn təla zo.

⁴Sɛ̀ e chiī tùʼ enyəa sɛ̀ lo kele fʉgha ù səŋò wəla Zə̀ kə̀ to naŋa â ghì a wən gho. Kə naŋa fʉgha u te wo â ghɛ alo kəwālā; an lùʼu kəla u buw aleboō koʼò tsəghà, ŋkāa u buw sugho alefìaa.

⁵Fʉgha u te lo â ghɛ̀ ghəla ghɛ̀ lo mò à ghɛ̀ kwu kele daʼa kə Kəzə̀, bòʼ boo zəla ghɛ̀ ki a zəŋò Kə̀lestò, Ghəa ghən kê lò ko abugho ghe kê fughu ghɛ â mùghù zəla e doʼò tən, ghəa ghə kê lò ko abugho nəgha e te e kê kpe wo (aŋghəa Zə̀ kə fə̀ fôʼ naŋā).

⁶E duʼnlo nlò bòʼ ghəa ghən, aŋghəa e bûʼ lô ko enyəa ghɛ̀ ki alemʉŋe aŋ kə̀mà fə kəgha bòʼ ŋgoʼ zəla ghɛ̀ zuūw êzə̄ŋ am fə̀mso kəla ghɛ̀ ki ghè kò.

⁷Ghəa ghən lo aledèe tsughu enyəa boo zɛʼɛ̄ e kûm lǒ è səŋò zò. Tsɛ zəla e bûʼ lô ko alebo, ghe naam mɔ̀msò kòʼò nù aŋ wə̀n. Boo zɛʼɛ̄ zəla e bûʼ tsəghàsə ko tsɛ zo, ghe ki sugho nû alemɔ̀msò kô, to ghɛ̀ ke e lo aletughuū tsəghà ghəa a mbī gho. Zə̀ kə̀ kê kɛɛ ghɛ̀, kə lo naŋa ghɛ̀ alo nsəghanyəgha, kə lo ghəŋlo ghî ghə̀ e fughuu ghɛ â kɔʼso mò abugho Yɛso Kə̀lestò kə̀ kôom dê sə wô ghue u wə̄n wo ebàm.

⁸Ghəa ghɛ̀ lo ko mò ghɛ̀ kaam wə̄n m bûʼ kòʼ, ghɛ̀ yia ləghaa wə̄n, alekòom nîi tsughu sughò, ghəa ghɛ̀ koʼò ko yo wə̄n, ghɛ̀ yia naām boō fughu ko â wə̄n. Ghɛ̀ yia ki duʼnlo è ne zo àsùghò tsoʼn zəla ghùw buw aletɔ̀ʼɔ̀ teso dzɛ̂.

⁹Ghəa ghən fɛ dèe wo namso kəla ghɛ̀ ki aŋghəa ghɛ̀ boō fughu tsughu â Zə̀ kò, enyəa ghɛ̀ n tuw kə zə.

¹⁰Ghiīshʉ̀ghà a Kəzə̀ ghəla ghe fə̀ dzɛ̂ naŋā wô ghəa gho kùu ndùw dzɔ̀ zəla Zə̀ kə deē â ghɛ̀ fə̀ tɔʼ kəŋ sə kɔʼ nû aŋghəa ghɛ̀ ki alezə kətuw a te.

¹¹Ghe n də̀m tsughu alemòʼn kele səā kɔʼ nəgha e te zo àsùghò dzì zəla ghəa a te a lo səā a te. Zən fə̀ lo nəgha zəla Zuʼ tə Kə̀lestò təla tə lo a zəŋò ghee fə̀ dêe naāŋ nduw ghee â ghəa ghəla Kə̀lestò lo ki alefala a te àsùghò səghanyəgha məka ù kè lo a te.

¹²Zə̀ kə̀ mafə dê zìi wò â ghiīshʉ̀ghà a wə̄n ghən gho enyəa ghe ki yo namso kə̀ li ko am fwàʼ kə ghee, enyəa à namso kə laam ki ghɛ. E lo sugho tò aŋghəa ghiīshʉ̀ghà a Kəzə̀ ghən fə̀ dzɛ̂ naŋā wô ghəa ghə̀la ghɛ̀ zuūw êzə̄ŋ aŋ ghùu ghì ghəla ghe naʼn wo làbəlà è dzùŋ zən â ghɛ̀ an daʼa kə Zuʼ tə̀ Zɔlɔ təla Zə̀ kə̀ tum tsughu wô alo kəwālā; mò à lò aghəa tsə̀təndə̄ghā tə Kəzə̀ tə̀ dəma alebùghò zuūwkɛlɛ tsughu.

¹³E fi lo enyəa, ghɛ̀ fəghaan tsughu ghue zɛʼɛ zo, ghɛ̀ tiso kɔʼ nlò tuw ko edzūŋ, ghɛ̀ naŋso tsughu nlò ghuw kə ebwìi kɛʼɛ ko alefwàʼ fwàʼ kə̀là Zə̀ kə ləgha ghè kò, ghɛ̀ e chiī nduw tùʼ am bughuso zəla ghɛ̀ lo kele abugho Yɛso Kə̀lestò kè kôom dê sə wô ghue u wə̄n wo ebàm.

¹⁴Tò wɛ ghəla ghe zuūw lâŋ kə Kəzə̀ kò; kà nlò kôom mùghù sùgho laaŋ kə emùghù kə̀là ghɛ̀ mò bùʼ mughù tsəghà ghè kò alo kəŋgòmsò, mò ghɛ̀ kwo yo səŋò e Kəzə̀ zò.

¹⁵Ghəa e kuūwn lô enyəa ghùw wəla ù tɔŋɔ̄ ghɛ zɔlɔ nù, ghɛ̀ ki alezɔlɔ sugho êzə̀ aŋ ghəa ghɛʼɛ̄ à ghəəŋ gho.

¹⁶ Nu ghe tɔm naŋa am mwàʼsò kə Kəzə̀ enyəa, “E zɔlɔ nlò aŋ ghəa ghɛʼɛ̄ à ghəəŋ gho, tɔŋlo enyəa Ǹ zɔlɔ nù.”

¹⁷Ghɛ̀ tɔɔŋ tsughu wə̄n enyəa, “Tsele waʼa,” abugho ghɛ̀ gɔ̂ŋlo â Zə̀ kəla kə saʼa ghî ghò mo kə bɔɔ yo sʉ wo am fəgha kəla chìa lo mò ù ŋ ghəŋlo, e fi lo enyəa ghɛ̀ ki aleki tsəŋ e Kəzè zò aŋ nə̀gha zəla ghɛ̀ naām ki fɛ am mbī.

¹⁸Ghɛ̀ kwo nû enyəa ghe fə̀ tsə tsəgha nduw fəgha kə̀ səŋò kò alezuū sə tuw kɛʼɛ aŋ ghəa a biigh ghəla ghɛ̌ fə̀ kôʼ ni aŋ ghùu ghê tsele ghɛʼɛ̄. À fə̀ yo dzə alo kəfəgha tò etsɛ ŋkāa tia è nyəghaan zo, u fʉgha to u e boō mîaa.

¹⁹À fə̀ kuuwn lo aŋ kɔ kə kàŋ tə Kə̀lestò, tǒ kâŋ tə tsʉa u ndzì zəla è ki yô dzʉ wo ŋkāa na kə̀ li ko ghe fə̀ zue sə tuw kɛʼɛ ko a te.

²⁰Zə̀ kə fə̂ mbī kaʼ tsughu alegbə̀n mo kə n wə̄n shîa naŋa kɔʼ dzə̀, a m bùghò nəgha e kpe tsughu, ghe n nì dè sə wò wə̄n an tuw wɛʼɛ.

²¹À lò am bàm e Kə̀lestò e ghəŋlo enyəa ghɛ̀ gaʼ fə̀ŋ a zəŋò Zə̀ kò; tɔ̂ɔŋ Zə̀ kəla kə fə̀ zôom nughu wo wə̄n alo evʉ, naŋa kɔʼ wə̄n alo nsəghanyəgha enyəa to boo zɛʼɛ àsùghò moʼn zɛʼɛ zə e lo a zəŋò Zə̀ kò.

²²Ghəa e lô êzə̄ŋ enyəa səŋò zəla ghɛ̀ zoʼn kele kɔʼ ghɛ̀ yia bwiī a te ŋ ghɛ̀ sûw màʼà, ghɛ̀ yia ləghaa ghue zɛʼɛ zo tò waazə̂, e kuū ləghaa nlò ghue zɛʼɛ zo am fə̂ŋ è mɔ̀ʼ.

²³Nu ghe ŋ ghɛ̀ dzə kùenlò an daʼa kə shwaʼ u Kəzə̀ wəla u fughu mughù zo, vʉa u dòʼò tən sugho; tò wɛ a ghûw wəla ù kè kpuūw dzə̂ yo, mò à yo dzə̂ tò wɛ a ghùw nsɔ̌ɔŋnchùw wəla ù lo alekpuūw.

²⁴Tɔŋlo enyəa ghe tɔm naŋa am mwàʼsò kə Kəzə̀ enyəa, “Gwən e ughùe e ghûw è lo ko tǒ kəghê, mo fwəŋ u ghee u lo ko tò udzwan, u naām mʉā wo. Ghê kə te kə gwəlà tsùghuu nù, dzwan u te wə n tsɔʼn bvʉ̀ tsùghù è sugho.

²⁵Yìa à kuūwn lô enyəa shwaʼ u Mughu ù te u doʼò tən nû.” Shwaʼ u te u lo làbəlà è dzùŋ zəla ghe fə̀ naʼà wo â ghɛ̀.