Read Aghem 1 Pità 4 Bible Online

1 Pità 4 - Aghem bible

1 Pità 4

¹Aŋghəa e lô enyəa Kə̀lestò fə̀ fala aŋ gwə̀n e ughùe, kele tsùghù sùghò nlò moʼnlò e wə̄n e te zo; tɔŋlo enyəa abugho ghùw zuw tsughu fɔɔn zo aŋ gwə̀n e ughùe, ù ŋ kôom ki yo moʼn zo aleghəŋlo ebo.

²A m bùghò ù ghəŋlo êzə̀, ù n lo alemùghù mùghù è wə̄n e dzə̀m am mbī aŋghəa Zə̀ kə̀ ləghaa, mò à yò dzə̂ aŋghəa gwən e ughùe è ləghaa.

³Ghɛ̀ maā boon màʼà kə̂m kə enə̀gha kə̀ dzûŋ kò aleghəə̄ŋ ndza tə aghəa təla Toʼò è ghəə̄ŋ ghè ghò. Ghɛ̀ fə̀ mughu tsəgha dzə̀adzə̀ kə emùghù, mʉa kɔʼɔ nlʉ̀ buʼn kaŋlo m̀bɔ̀ŋ an sə à kala gho, səa â sə gho am fʉgha u mbī wo, làŋà bə̀la bwii kaŋlo, ghɛ̀ ŋ kɔʼso sùghò zʉ̀ wə agha.

⁴Tuw kə kpûuw Etòʼò enyəa ghɛ̀ kôom tə̀ma dzəəŋ yo ghee an dzə̀adzə̀ kə emùghù kəla ghe mughu ghè kò, zə lo e ghee ghe sûuwn ghɛ.

⁵À sò fɛ kuuwn lò ko enyəa ghe lo ki aletaŋso dê see kə emùghù kə ghee â ghùw wəla ù ti tən ko alesaʼ aghî a dzə̀m; ghî ghəla ghe lo â tuw ko àsùghò ghəla ghe lo mo ghe mafə kpuwnlo.

⁶Zən lò e ghee ghe fə̀ kə̂a ndûw sugho shwaʼ u Kəzə̀ wò â ghî ghəla ghe lo mo ghe mafə kpuwnlo, tò aŋghəa ghe fə̀ bûʼ fala ko aŋ gwə̀n e ughùe tò aghî aŋghəa Zə̀ kə fə̀ fɔeso tsughu ghee, ghe lo e mughu alo təzuʼ tò Kəzə̀.

⁷Nəgha e fɛ êzəŋ e kpee wò nù â ghəa gho a dzə̀m alebùghò mîaa. E fi lo enyəa ghɛ̀ tee kɔʼ nlò alo efwee, ghɛ̀ naŋso tsughu ghuw kə ebwìi kɛʼɛ ko, tò ghɛ̀ è ki sə̂ŋ zò alegɔ̀ŋlò.

⁸Ghəa è səŋò zəla e lo ghè zò lò enyəa, e ləghaa nlò ghue zɛʼɛ zo am fə̂ŋ e mɔ̀ʼ, bòʼ kwò enyəa à lò eləgha e tsəla nàlà ndə̀mà tə tə̀bòo tò.

⁹Kà nlò e səmlo alenaŋâ ndughu tɛʼɛ̄ tughoo â ghì ghəla ghe bùghò a vʉ̀a ghɛ̀.

¹⁰To aŋghəa Zə̀ kə lo mo kə m fughu chìa â fwàʼ kò, tò ghî a kəfwàʼ à dzûŋ ghò, ghɛ̀ ki aleyoso nduw ghî ghò am fwàʼ kədzûŋ kəla Zə̀ kə̀ namso ghɛ a te.

¹¹Abugho à lò ko ndughoo ù nàʼn tum è Kə̀zə̀, ù ki alenàʼà ko fəgha kə̀là Zə̀ kə̀ dzɛ; mò a lo ndughoo ù fughuu yosò zò â ghì ghò, ù ki aleyosō ghee an daʼa kəla Zə̀ kə̀ fughu â wə̄n; to zə e lo enyəa alo aghəa a dzə̀m, aghî ghə̀ è fughu Zə̀ kò â kɔʼso mò am bàm e Yɛso Kə̀lestò. Səghanyəgha n lo â wə̄n àsùghò dwaʼa wo, to mbī kê bughò mîaa. Zə e lo ko êzə̀.

¹²Fən ghaŋa à dzûŋ ghò, e kwo ko dzughu e lô so e zuu ghɛ̀ aŋ ŋgaam kə efala kəla ghɛ̀ fanlo êzə̄ŋ. Ghəa ghən lo alemɔ̀msò kôʼ ghɛ̀, tò ghɛ̀ è bəla moʼnlò enyəa à lǒ fɛ̀ɛn kə eghəa kə̀ li ko kə səā a zəŋò ghɛ̀.

¹³E laam lo nlò alo eduʼnlo enyəa ghɛ̀ nyɔʼɔ̀ faan sùghò tǒ Kə̀lestò, tò ghɛ̀ e ke lo alekele sughò duʼnlo è ne zo abugho ù kè dê sə wô ghaʼ e wə̄n zo.

¹⁴Dzɔ̀ lò â ghɛ̀ abugho ghe sûuwn ko ghɛ enyəa ghɛ̀ lo ghî a Kə̀lestò; bòʼ enyəa ghaʼ e səghanyəgha n Zuʼ te Kə̀zə̀ n lo a zəŋò ghɛ̀.

¹⁵E kwo ko ghùw wɛʼɛ ù lì lò so e fanlo enyea e lo gbǒoghùw, ŋkāa tǒ ghùwtsɔ̀ŋɔ, ŋkāa tǒ ghùw wəla ù ghəə̄ŋ ghəa à biigh gho, ŋkāa wəla ù də̀ma alenyəso kaaŋ ghu ko aŋ ghəa a aghì.

¹⁶Abugho e bûʼ kuūwn lô ko enyəa ghùw wɛʼɛ faan nù bòʼ ù boō fughu â Zə̀ kò, e kwo ko ù lo so e də̂nsò kə̀tuw, ù ki alelaam fughuu zɔ̀ɔŋ kò â Zə̀ ko enyəa ù bǒom zən e Kə̀lestò.

¹⁷Tɔŋlo enyəa nəgha zə m kpe â Zə̀ kò alesāʼ mbī, mò ù bùʼù kàʼa nùghù tsùghù dzə̀ a zəŋò ghì a wə̄n gho. Abugho saʼ tə te tə ki alekaʼā nughù tsughu a zəŋò sɛ̀ wɛ a Kəzə̀, e lo bòʼò bǒo ênzə̂n a zəŋò ghì ghəla ghe lo mo ghe boom yo làbəlà e Kəzə̀ a?

¹⁸Mwàʼsò kə Kəzə̀ kə̀ dzɛ̂ enyəa, “Abugho e tughu alebəghaasə ghùw ù dzùŋ, à lô yia boʼò sə̌a kə̀ kwò â ghì biigh ghəla ghe kwo yo Zə̀ kò a?”

¹⁹A fi lo enyəa ghî ghəla ghe fanlo aŋghəa Zə̀ kə̀ ləghaa, ki alefwaʼā nduw ko fwàʼ kə ghee kə̀ dzûŋ kò, fughuu mɛʼn ndùw ghue e ghee â Zə̀ kəla kə bɔm ghee, Zə̀ kəla kə naāŋ dzughu e wə̄n zo aŋ ghəa zəla kə fə̀ to naŋa enyəa zə e lo ko êzə̀.