Read Aghem 1 Pità 5 Bible Online

1 Pità 5 - Aghem bible

1 Pità 5

¹Mùghò tǒ tsoʼ, M̀ buʼu wò kə̀ghu à tsoʼ təla tə lo am tsətèʼè fɛʼɛ. M̀ mafə kôʼ fala e Kə̀lestò zò, Ǹ lo kòʼò sùghò nû səghanyəgha mə̀là n lò aŋ ghaʼ e wə̄n abugho ù lo kôom bugho ebàm.

²E baʼā nlò ndzì[1] tìa Zə̀ kə fughu naŋā â ghɛ̀ enyəa ghɛ̀ è lɛnlo mò ghɛ̀ twə̀ən yo, mò ghɛ̀ kuuwn ki zǐi a te. Kà è kaa fwaʼa ko nlò alekele ko kə̀namso, e fwaʼā nduw nlò enyəa ghɛ̀ fwaʼà fwàʼ kə Kəzə̀.

³Kà nlò è baŋso sə gho a zəŋò ghî ghəla ghe fughu naŋā enyəa ghɛ̀ è lɛnlo. E laam lo aledeē mwam e dzûŋ zəla ghe lo alekòʼò nî.

⁴To abugho ghùw wəla ù lò tuw ko a zəŋò ghê bàʼàtə̀ndzì lo bugho, ù lo dzəlà wô mgbɛ kə nsəghanyəgha kəla kôʼ e te e kê kuūwn kôʼ yo an tuw kɛʼɛ̄.

⁵ Yia a bughò sugho ghɛ a waafəghàŋ ghò, ghɛ̀ ki alebɔɔm zuuw nduw sugho â ghì ghəla ghe tsə̀ghàsə tsugho ghɛ an nōo. Ghɛ̀ a dzə̀m ghəla ghɛ̀ lo mò ghɛ̀ m boo fughu â Zə̀ kò, ki alemaʼn tsughu ghue zo aŋ ghəa a ghɛʼɛ à ghəəŋ gho â wàazughù ghò, tɔŋlo enyəa ghe tɔm naŋa am mwàʼsò kə Kəzə̀ kə̀ enyəa, “Zə̀ kə̀ nyuʼn dzə̀m a zəŋò ghùw wəla ù kɔʼso ghue wo, kuuwn tɔʼnlò â wəla ù màʼn tsughuu ghue wo.”

⁶ Ghɛ̀ fi ki alezumso tsughuu ghue zo a tsəlà Zə̀ kə̀ ghaʼ kəla kə lo aleyòsò ghɛ̀, to kə lo kɔʼsō naŋa ghɛ̀ edzūŋ abugho nəgha e te e lo kpe wo.

⁷Zə̀gha ndùw nlò fəm kɛʼɛ ko kə dzə̀m â wə̄n, tɔŋlo enyəa kə lɛ̀nlo â ghɛ̀ nəgha tən tə̀ dzə̀m.

⁸Nì nlò ghôm zò, ghɛ̀ tiso kɔʼ tuw ko edzūŋ! Nu ghùwkə̀tuw wɛʼɛ, tɔɔŋ Satàn kǔuw kaaŋ nù tò bəgha kə tɔɔn ko, kə kəŋo ghùw alekwuū pfʉ.

⁹Tɔ̀ʼɔ tee tən tsughu ko nlò am boo zɛʼɛ̄, e kwo ghɛ̀ lo bomlo enyəa ù tughuu tsəghà ghɛ̀; ghɛ̀ kwo nû enyəa waazughù à li a bɔɔm faan sùghò fala è mɔʼɔ̄ zo am mbī e dzə̀m.

¹⁰Àsùghò abugho ghɛ̀ tsûuŋ fala tsughu aŋ kə̀mà fə enə̀gha, Zə̀ kəla kə ki se e kwuso zo, kəla ke mò tɔŋɔ̄ nyə wô ghɛ an səghanyəgha ŋ wə̄n məla n dòʼò tən, bòʼ sɛ̀ lô fəgha ko kə mɔ̀ʼ sɛ̀ à ghê Kə̀lestò, lo kôʼ enyəa ghəa ghɛʼɛ a dzə̀m ghə ŋ kòom dòʼò kədzûŋ — boo zɛʼɛ zə e tughuu sugho — Kə lo fughuu sughò ghɛ̀ â daʼa ko, ghɛ̀ e tɔʼ ti sugho.

¹¹Fɔe u wən u kê doʼò tən, to mbī kê mîa. Zə e lo ko êzə̀.

¹²À mùghò yôsò Saelàs (Sìlvanùs), wàazə̀ waŋa wəla Ǹ tɔ̂ʼ kwo enyəa ù lo tsəghatsəgha am boo e wə̄n, aletɔɔ̄ wô kə̀mà fə kəmwàʼsò fən fo â ghɛ̀. M̀ mwàʼsò kən kə tɔɔ wò â ghɛ̀ aletsʉ̀a wô ghɛ̀ àsùghò alefəghaan teso dzâa wô â ghɛ̀ enyəa ləgha e Kəzə̀ è kûum lò êsəŋò. Ghɛ̀ tee tən tsughu ko nlò a te.

¹³ Waazə̂ ghɛʼɛ ghəla ghe lo an dzeŋe kə ghì a Kəzə̀ a fi an naʼ e Babilɔ̀n, dzeŋe kəla à fə̀ shîaa kɔʼ sugho Zə̀ kò, fughu wò ghɛ̀ â tɔɔŋ zo. Wɛ waŋa wə̄n Mâk, fùghu wò sùghò ghɛ â tɔɔŋ zo

¹⁴Tɔɔŋ zuw tsughu nlò ghue zɛʼɛ zo an ləgha e Kəzə̀. Ŋ̀ gɔ̂ŋlò enyəa ghɛ̀ a dzə̀m ghəla ghɛ̀ boō fughu à Kə̀lestò e lo nyàʼànyàʼà.