Read Aghem 2 Pità 1 Bible Online

2 Pità 1 - Aghem bible

2 Pità 1

¹Mùghò Sǎemòn, tɔɔŋ Pità, wəla Ǹ lo ghùw ù kə̀fwàʼ àsùghò tum è Yɛso Kə̀lestò; M̀ fughu wò ètɔŋlo â ghɛ̀ ghəla ghɛ̀ lo mò ghɛ̀ ŋ kele boo zəla e tughuu sugho tò zaʼā zo. À lǒ bòʼ dzɔ̀ e Zə̀ kə sɛ̀ àsùghò e Bəghambī ù sɛ̀ zo e ghəŋlo enyəa sɛ̀ e ki boo zən zo.

²Ŋ̀ gɔŋlò enyəa to ghɛ̀ mô lô alo ebughunlo, ghɛ̀ e zuuw sugho kədzûŋ bò enyəa ghɛ̀ kwo nu Zə̀ kò ghèe Yɛso Mughùbè ù sɛ.

³Daʼa kə Kəzə̀ kə̀ m fughu sɛ̀ â fʉgha wən ù dzə̀m sɛ̀ ki alekele alemughu mughù è zɔlɔ zo, aŋghəa sɛ̀ kwo dzə wə̄n wəla ù mò tsɔʼ kɔʼ sɛ̀ alemùghù aŋ kɔʼso ŋ wə̄n àsùghò dzɔ̀ e wə̄n zo.

⁴An dziī zən, Ù n lueso to kə wə̄n kə̀ ne kela ù fə̀ to naŋā, fughù wo sɛ̀ â ghəa à səŋò ghò. Ghea à səŋò a te yia a ghəŋlo ghɛ̀ yia ti nughù sə wo aŋ ghəa à biigh ghəla gwən e ùghùe e leghāa, enyəa to ghɛ̀ mô mùghù mughù è zɔlɔ zo.

⁵Zən lò e ghee ghùw ki alesɔʼn tsughu ŋkāa aletəmabaʼso ndùw èdzɔ̀ am boo e wə̄n, àsùghò alebaʼso ndùw tɔ u ghəa Kəzə̀ an dzɔ̀ e wə̄n;

⁶Kà è kaa ghəəŋ ko nlò ghəa gho tò ghî ghə̀la ghe kwo Zə̀ kò, ghɛ̀ ki sugho alenaŋsô ghuw kə ebwìi kò. Tò aŋghəa ghɛ̀ lo alenaŋsô ghuw kə ebwìi kɛʼɛ, ghɛ̀ ki sugho alekɔlɔ tə̀fə̀ŋ an nə̀gha e utsù. Tò aŋghəa ghɛ̀ lo alekɔɔn tsughuu fə̂ŋ tò an nə̀gha e utsù, ghɛ̀ e ki sugho mwam e ghì a Kəzə̀ gho.

⁷Tò aŋghəa ghɛ̀ ki mwam e ghì a Kəzə gho, ghɛ̀ ki aleləghāa nduw kə̀chìa tò waazughù. Tò aŋghəa ghɛ̀ ləghaa kə̀chìa tò waazughù, ghɛ̀ ki aleləghāa ghî ghò a dzə̀m am fə̂ŋ e mɔ̀ʼ.

⁸Abugho ghɛ̀ tso ki dzə̂ ghəa ghə̀ è ghə̀n a dzə̀m, yia nomlo am bvʉa zɛʼɛ̄, a lo ghəəŋ nù ghɛ̀ è fwaʼā dzɔɔ̄, mʉa sùghò tam kə̀ dzûŋ kò, ghəa a te a lo e deē tsughu enyəa ghɛ̀ kwo nû Mughùbè ù sɛ̀, tɔɔŋ Yɛso Kə̀lestò u te.

⁹Lò êzə̀, abugho ghùw ki yo ghəa ghə̀ è ghə̀n, à fi lo enyəa ù lǒ tǒ ghùw ù fǒo; ù kòʼòkɛlɛ̄ yo ghəa gho, nìzə̀a tsùghu enyəa ghe maā sûw màʼà bôo tə ghee təla ghe fə ghəə̄ŋ tsəghà dzə.

¹⁰Waazə̂ ghaŋa gho, à fi lo enyəa ghɛ̀ ki alesɔʼn tsughu ŋkāa aledèe tsughu enyəa Zə̀ kə̀ ghɛ shìaa tɔ̀ŋɔ sə̀ wò nù enyəa ghɛ̀ bugho doʼō ghî a wə̄n gho. Abugho ghɛ̀ ghəəŋ dzə êzə̀, ghɛ̀ kê bvʉ̀ kòʼ yò am boo zɛʼɛ̄,

¹¹ghe kê kpeēnîi sughò ghɛ̀ am fɔ̀e ù doʼn təla wəla à ki Mughùbè ù sɛ̀, tɔɔŋ Bəghambī, Yɛso Kə̀lestò.

¹²E fi lo enyəa Ǹ lo ki tsəgha ko alezəə̄ŋ zee wò ghɛ, ghəa e bûʼ lo ko enyəa ghɛ̀ kwo ziī nû ghəa a te gho, tɔ̀ʼ tì sugho an səŋò zəla ghɛ̀ lo mò ghɛ̀ ŋ kele zìi.

¹³Ŋ̀ kwo enyəa à ŋgə̀mso lǒ dzɔ̀, â mùghò alezəə̄ŋ zee wo ghɛ êzə̄ŋ wəla Ǹ naām lo â tuw ko, enyəa ghùw wɛʼɛ lô so e nîizə̀a ghəa a te gho.

¹⁴Ŋ̀ kwo nû enyəa aletsùuŋ tsughu, Ǹ lo kòom yò dzə̂ a sə à tughu gho tò aŋghəa Mughùbè waŋa Yɛso Kə̀lestò mò tɔ̂ʼ dê fughu wo â mùghò.

¹⁵Ŋ̀ ki nû aleghəəŋ tsughu enyəa Ǹ děe naŋa tsughu dzì zəla ghɛ̀ kê lo aletaā moʼn ghəa ghən a te nəgha tən tə̀ dzə̀m abugho Ŋ̀ kê buw ko â tuw ko.

¹⁶Ghàʼ fɛ â ghɛ̀ dzâa wò yǒ zə̂azə̂a mə̀là ghî a fə̀ tɔɔm naŋa tsughu aŋ ŋgəŋ è ghee, aŋghəa ghǎʼ mò dzɛ̂ wô â ghɛ̀ enyəa ghɛ̀ kele tsughu dwaʼa u Mughùbè ù sɛ̀ wò, tɔɔŋ Yɛso Kə̀lestò àsùghò bùghò e wə̄n è ne zəla u lo bughoo ghè zò, à fə̀ kuuwn lo ghəa à ne ghəla ghàʼ ghue e ghùe zaʼā e fə̀ koʼ.

¹⁷Ghaʼ fə̀ lo a fughu, aŋghəa Kə̀zə̀, Tsele ù te fə̀ naāŋ wə̄n alo ŋkɔʼso àsùghò alo nsəghanyəghā; dò kə dzə̂ kə̀ n sə̀ tsùghù wò fùghu a te alo kə̀wala, dzàa tsùghù enyəa, “Wən lǒ Wɛ ù fə̀ŋ waŋa. Fə̀ŋ zaŋa zɔlɔ nù a zəŋò wə̄n.”

¹⁸Ghue e ughùe zaʼa e mafə zuw ghəa dzə̀ è te sə tsughu wo alo kəwālā mò ghàʼ à ghee lo a dzə̀m a fughu aŋ kwàʼ ù zɔlɔ wo.

¹⁹Ghàʼ mô êzəŋ kûum boo fughu enyəa fəgha kə̀là ghiīshʉ̀ghà a Kəzə̀ fə̀ dzɛ̂ naŋā lo êsəŋò. E dzɔ̌ɔ nù enyəa ghɛ̀ gaʼ tsughu tuw ko a te, tɔŋlo enyəa shwaʼ u te u lo tò kəkɛ̀ʼɛ̀ kə baŋā an lùʼù kə kələ̂m, to tsuʼ u kê telè zuw. Kele tsughu ko nlò êzə̀ to abugho nəgha e te e lo bugho, Yɛso, tɔɔŋ sə̀ghàbəlà fə gbəlàgbə̀là fə̀ lo e baŋa aŋ fə̀ŋ tɛʼɛ.

²⁰Aŋ ghəa ghən a dzə̀m, ghɛ̀ ki alezuūwkɛlɛ̄ tsughu enyəa, ghəa è li yo dzə̂ ghe tɔm naŋa am Mwàʼsò kə Kəzə̀, zəla ghiīshʉ̀ghà a fə̀ dzɛ naŋā wo mò à fə̀ tso moʼn sə kɔʼ ko ghee aŋ ŋgəŋ è ghee.

²¹Nu shwaʼ u shʉ̀ghà ù li u ka fə̂ bughò kôʼ dzə̀ mò à tsə̀m kɔʼ ghùw; ghî a fə̀ shwaʼ u Kəzə̀ ù naʼn wo mò à ghee tsoom kɔʼɔ̂ Zuʼ tə̀ Zɔlɔ to.