Read Aghem 2 Pità 2 Bible Online

2 Pità 2 - Aghem bible

2 Pità 2

¹Ghîishùghà ghə agha a lo səa kɔʼɔ nû am bvʉa zɛʼɛ̄, tò aŋghəa ghe fə̀ lo an tì kə̀ wii ko. Ghe lo e niī wo gha à kaʼn gho aŋ ghəa Kəzə̀; ghe lo tuū maʼà sughò Mughu ù te wəla ù mò zue sə tuw u ghee wo, e kê fi lo enyəa ghe ŋ ghue e ghee e boon maʼà.

²Ndə̀ma tə aghì tə lo səa tsə̀ghà ndùw a bǎà dzə̌adzə̀ kə emùghù kə ghee kə te ko, bòʼ fwàʼ kəla ghe fwaʼa ghè kò. Ghî à lo e suūwn səŋò zò bòʼ ghəa ghəla ghe ghəŋlo.

³An səa ghee à səa gho, ghe lo e niī wo gha ghəla a fween səŋò zò alezə kua wɛʼɛ. Gha kə mô êzəŋ e sə aŋghəa Zə̀ kə̀ fə̀ kaʼ alebiāan naŋā ghəa kə ki alefɔeso ghee a te. Ghùw wəla ù lo fɔeso ghee bwii dzə̀ yo.

⁴Tɔŋlo enyəa Zə̀ kə̀ ka fə̂ zəən zə̀ghà dzə̀ alefɔesô tsə̀ntəndə̄ghā tə wə̄n tə̀ li to an nə̀gha zəla ghə fə̀ ghəə̄ŋ tsughu bo zo. Kə a fə̀ ni kɔn tsughu ghee, màʼà nàŋa nyə tsughu alô fə̀baʼebigh, am bùʼ kə utsù enyəa ghe e ləəm tsughu tsuʼu saʼ wo.

⁵ Zə̀ ka fə zəən zə̀ghàa dzə̀ tì kə̀ wii ko aledzùuw maʼà ghee ghì a mbī gho, à fə̀ gɔʼɔ ko yo Nôa wəla ù fə̀ ghəə̄ŋ ghəa ghela Zə̀ kə̀ fə̀ ləghaa ghè gho ghèe ghê ghì a li ghən sə̀ghàmbəgha ghe fə̀ zə tuw ko, an nə̀ghà zəla Zə̀ kə fə̀ nî wo fʉ̀ghàdzughù tò, tə̀ m bùghò kùŋso màʼà ghî biigh gho a te;

⁶ Zə̀ kə̀ fə̀ fɔeso tsughu nàʼ e Soodòm àsùghò e Gòmolà zò aŋghəa kə fə̀ kpâa maʼà kɔʼ naʼà tə te to aŋ wə̀n ù bəghaan wo, bòʼ bòo tə ghee aledòʼò tsughu tǒ tsə̌a â ghî ghəla ghe naaŋ yo lâŋ kə Wə̄n ko.

⁷ Zə̀ kə̀ ŋ kuuwn bəghasə̄ tsughu Lɔ̂t, tɔɔŋ ghùw ù tsəghatsəgha wəla ù fə̀ ləghaa yo alekòʼ dzə̀adzə̀ tə aghəa təla ghî à biigh fə̀ a ghəŋlo.

⁸Tɔŋlo enyəa ghùw ù tsəghatsəgha fə̀ mughu am bvʉa e ghee, ù ŋgee zuuw èfɔnlo, aŋghəa ù kòʼò zeē ghəa à biigh ghəla ghe ghəŋlo an tsuʼu n te mò ndzə̀m.

⁹Abugho e lo êzə̀, à fi lo enyəa Mughu u te kwo nû alebəghaasə ghî ghəla ghe ghəə̄ŋ ghəa ghəla Zə̀ kə̀ ləghaa àsùghò alenìi kûum naŋâ ghì à biigh gho, ghe e ləəm tsuʼ u saʼ wo,

¹⁰a ka dɔ̂ɔm taŋ ghî ghəla ghe mughù tən ko dzə̀adzə̀ kə emùghù kò, bùʼù tsǒo tuu màʼn sùghò daʼa kə Kəzə̀. Ghîishʉ̀ghà ghə agha a te a sǎa â fə̀ŋ tò, bùʼù tsə̀ŋo yo alekə̀a bonlo àghəa a zəŋò ghì a zɔlɔ ghəla ghe lô alo kəwalā, bùʼù sùuwn sùghò ghee.

¹¹Tsə̀təndə̄ghā tə Kəzə̀ təla tə tsoō tughū, ghaʼà sùghò a vʉ̀a Zə̀ kò, tə buʼù kə̂a bòon yo ghəa è li zo kùu ndùw ghee[1] a vʉ̀a Mughu ù te.

¹²Ghiīshʉ̀ghà ghə agha ghən lò ghî à laʼso gho; ghe bɔɔm lò ko tò tənyôm. Abugho ghùw ù te ləgha tsughu dzə̂ ghəa zo aleghəŋlo, ù n tsò ghə̌əŋ ndùw ko nù. Ghe fə̂ ghee dzə ko alekwuu, ghe e winlo. Abugho ghe tɔ̂ʼ kwo ko yo fəgha ko, ghe n tsò sùuwn ko nù; ghe lô ghee wii ko tò tənyôm.

¹³Ghe lô ghee tsəa sùghò aŋ ŋgoʼ zəla ghe lo mo ghe m fughu â ghì ghò. Ghe nîi enyəa à lò ghəa è dzûŋ zò aŋghəa ghe zəā ghue e ghee zo, ghə̂əŋ kâaŋ dzə̌adzə̀ tə aghəa â ŋgàla tsə̀ tò. À lò aledzəsô ghue zɛʼɛ àsùghò tuw kə̀ dəla ko â ghɛ̀, â ghee aletseē ghɛ alelaŋā zəa dzəəŋ ghɛ̀ à ghee, kala kaŋlo, buʼn sùghò mbɔ̀ŋ.

¹⁴Sə a ghee a lo tən ko a zəŋò nùuŋ tə ayìzən to. Ghe bughū tsə̀ghà yo aleghəŋlo èbo. Ghe kwo aleghə̂əŋ ghì ghəla boo e ghee e lo mo e kam tughu enyəa ghe bvʉ̂ alo fətə̀mà. Ghe yia zoʼn naŋa tsughu fə̂ŋ tə ghee to enyəa to à mò ki ko ghee fʉgha wo u dzə̀m. Zə̀ kə̀ ŋ ghee ləŋ naŋa.

¹⁵ Ghe n dzì zə̀ èsəŋò zəghà màʼà, ghe yia sə̀ làʼ è nduw; aŋghəa ghe sə tsəghâ nduw an dzə̀ tə Balàam, tɔɔŋ wɛ ù Bɛyò wəla ù fə̀ ləgha kua wo alekele mò ù ghə̀ŋlo èbo.

¹⁶Ghe ŋ kwɛɛn wə̄n am bo e wə̄n e te zo. Ndzàkas fə wə̄n fə ŋ kə̀a sə̀ wò àghəa an dzə̂ è ghùw, bughu naŋa ndùw ghəa à zəgha yia ghùwshʉ̀ghà wə̀ agha vʉ̀, tɔɔŋ Balàam fə̀ so e ghəŋlo.

¹⁷Ghî ghən lo tò bûʼ wə mmùghu wəla mùghù n zʉme nùghù sə kɔʼ a te, mo u ki yo fwàʼ kò; ghe lo tò bʉgha wə eghuuw kuɛ̀ɛ kə̀ dzûu kaāŋ tsəgha. Ghe m bùʼ kò â ghee tsəm naŋa am fə̂ŋ è kə̀ləm.

¹⁸Ghe kɔʼso kaŋlo èghue, kə̀a shwaʼ ù laʼso wo, nìi kɔ̀ʼɔ ghəa ghəla ghe nûuŋ kaŋlo a te, tsʉ̀a bòon ndùw ghì ghəla ghe kuʼù nughù ti sə wo am bvʉa e ghì ghəla ghe mughu dzə̀adzə̀ kə e mùghù kò.

¹⁹Ghê wàdè ghə agha a te a zoʼn ndùw ghee a te gho enyəa ghe e ndzə̀m mughu, lo êzə̀ mo ghuūghùe e ghee lo ukɔ̂ â bo zo. Zə êzə lo bòʼ enyəa abugho ghəa enyə tughu tsughu a zəŋò ghùw, ghùw ù te m fwə̀n dòʼò ndùw kə̀kɔ̂ a bǎà ghəa e te zo.

²⁰Abugho ghî à lo mo ghe n tì zə̀ghà sə̀ wò bo e mbī zo aŋ ghəa ghe kele tsughu Mughùbè ù sɛ̀, tɔɔŋ Bəghambī Yɛso Kə̀lestò, ghe yìa kôom bughô fwə̂n kpeʼe ndûw kɔ̂ wò â bo e te zo, ghe bo tsə̀ghàsə̀ ghəa ghe fə̀ bûʼ lò tsəghà a te aŋghəa ghe fə̀ lo mo ghe kaām kele səŋò zò.

²¹Aŋghəa ghəa a te a lô ènyə, à mò so e lo dzɔ̀ abugho ghe fə̀ taʼkè kele dzì è tsəghatsəgha, tsəghasə aŋghəa ghe kele tsughu dzì e te kòom bùgho tùe màʼà tsughù lwâŋ ù zɔlɔ wəla ghe fə̀ fughu â ghee.

²² Mwam e ghee e deē enyəa, shwaʼ u kwə̀n kə̀ kwən wən lo èsəŋò enyəa, “Bvʉ kôom ndùuw ko èbàm alezə zaā u wə̄n wəla ù mò zɛ̂ maʼa.” Vʉa u dêe sugho enyəa, “Kwèlebʉgha kəla a sûuw tsughuu kôom bɔ̌ɔm ndùw mbə̀me kɔʼɔ ko ùghue alo kətsāʼ ebàm.”