Read Aghem 2 Pità 3 Bible Online

2 Pità 3 - Aghem bible

2 Pità 3

¹Fən a fə̂ŋ ghaŋa gho, kən êzəŋ e ghəəŋ tsughu mwàʼsò waŋa u bʉ̀ghà Ǹ tɔɔ wo â ghɛ̀. Am mwàʼsò wən ù bʉ̀ghà, mùghò n də̀m alezòom kɔʼ moʼnlò è dzûŋ zò am fə̀ŋ tɛʼɛ aŋghəa M̀ zə̂əŋ wô ghɛ̀ aŋ ghəa ghən.

²Ǹ ləghaa enyəa ghɛ̀ e moʼn tsughuu shwaʼ wəla ghiīshʉ̀ghà à zɔlɔ a fə̀ dzɛ̂ naŋā â wìiwì, àsùghò alezə̀əŋ wô ghɛ̀ an lwàŋ u Mughu ù te, tɔɔŋ Bəghambī, wəla tum tə̀ zɔlɔ tə fə̀ dzɛ̂ naŋā zîi wo â ghɛ̀.

³Alebùʼù nîi tsughu, ghɛ̀ ki alezuūwkɛlɛ̄ tsughu enyəa ghî à li a kê bùghò nù an tsùʼù məla mbī kê suū wo alebùghò mîa, mò à mùghù e ghee e boʼò kèle ghəa ghəla gwən e ughùe e ghee e ləghaa, ghe lo e tsoʼo ghɛ.

⁴Ghe lo e bvʉa tsughu enyəa, “À lo mo Yɛso ka fə dzɛ̂ nàŋa enyəa e lo kòom bùghò nù? Ù mafə sô bùghò à? Ù sò wɛ̀ɛ à? Ghê bə̀ghàbəgha mafə kpuwnlo, aghəa à dzə̀m yia kuuwn naam lô ko alo kətə̀ŋ aŋghəa a fə̀ lo tsəgha ko a te to mbī e tsoō kaʼā tsughu.”

⁵ Ghe n tso kuuwn tsùghòsò màʼà tsùghù səŋò zən enyəa kəwala àsùghò ghueekətsə̄ ghue u bɔm dzə̀ mò Zə̀ kə̀ saʼ sə̀ wò dzə̀. Ghe mo enyəa ghe fə̀ ghueekətsə̄ kə fəghaan sə kɔʼ wo alo mmùghu, mùghù mə̀ ndzə̀ŋ ŋgəa kɔʼ ghueekətsə̄ kə tə ko,

⁶Ghe n dzɛ̀ sùgho enyəa, à fə̀ lo sugho am mùghù m mɔ̀ʼɔ n te mò Zə̀ kə fə̀ nî sâʼ maʼa mbī è wǐi a te.

⁷Zəa e kuuwn lô enyəa, an dzə̂ è mɔ̀ʼɔ e wə̄n e te, Zə̀ kə̀ m bàʼ nàŋa sə̀ wo wala kəla kə lo êzəŋ àsùghò ghueekətsə̄ ko enyəa ghe e ləəm tsughu tî kə̀la kə̀ kê saʼa wiī maʼn ghî ghəla ghe kwo yo wə̄n a te.

⁸ Fən ghaŋa à dzûŋ ghò, ghəa e kuuwn lô e mɔ̀ʼ ghɛ̀ ki yo alenìizə̂, ghəa e te e lo enyəa: an sə kə Mughu ù te, fətsuʼ fə mɔ̀ʼ fə̀ lo tò tənǔu təbɔm èghəm; tənǔu təbɔm èghəm tia tə lo tò fətsuʼ fə mɔ̀ʼ. Ghəa a te gho a bə̀ghà lò ko kəfəgha kə̀ mɔ̀ʼ â wə̄n.

⁹E kuuwn lò enyəa, Mughu ù te lɛso dzə̀ yo alelueso to kə wə̄n tò aŋghəa ghî à li a môʼnlo. Ù ləghaa yo enyəa to ghùw mò kwəlà sâŋlò. Ù kuuwn ləghaa enyəa to ghî à mô maʼà bòo tə ghee, ghe tiī kuwnlo.

¹⁰Zəa e kuuwn lô sugho enyəa, Tsuʼ wəla Mughu ù te kê bughoo a te, ghùw kè kwò naŋa yo, ù kè bùghòo ko tǒ ghùwtsɔ̀ŋɔ. An tsuʼ u te wo, dəm kə ke e kwuū aŋghəa wala kə saŋā mîan nyəā nduw. Wən u kê pfʉā nughù kɔʼ ghueekətsə̄ àsùghò fʉgha wə̀n ù dzə̀m a te, ufʉgha u dzə̀m kə̀ saŋa mîaa ndûw an uwə̀n.

¹¹Ghəa e lô enyəa ghe lô fʉgha wə̀n ù dzə̀m dzûuw màʼnlò an dziī zə, e fi lo enyəa ghɛ̀ ki alemùghù mùghù è zɔlɔ zəla Zə̀ kə̀ ləghaa,

¹²lə̂əm tsughû tsuʼ wəla Zə̀ kə̀ naŋā enyəa Yɛso kè bughoo a te èbàm, moʼn zɛʼɛ zə e lo tən ko enyəa to ù mò mbaā bughò, tɔŋlo enyəa an tsuʼ u te wo, kəwālā kə̀ dzə̀m kè pfʉ̌a nùghù kɔ̀ʼɔ nù, ufʉgha u dzə̀m a te kê saŋā mîa ndûw.

¹³ A fɛ kuuwn ləəm kô to kəla Zə̀ kə fə̀ to naŋā, enyəa kə lo bɔɔ tsughû wala kə̀ fughu ko àsùghò ghueekətsə̄ kə̀ fughu ko, mbī zəla à kè mughu tən ko ghî ghəla ghe ghəə̄ŋ ghəa ghəla Zə̀ kə̀ ləghaa.

¹⁴À fi lo enyəa fən ghaŋa gho, aŋghəa ghɛ̀ ləə̄m tsuʼ fən fo, də̀ma tən tsughu nlò aleghəŋlo enyəa ghɛ̀e e zɔlɔ, ghɛ̀ è ki sugho yo nùʼ tò a sə̀a Zə̀ kò, lò sugho alo ebughunlo ghɛ̀ à ghee.

¹⁵Kele tsughu nlò enyəa Mughu ù te naam ləmlo â ghɛ̀ enyəa ghɛ̀ boo fughu wo â wə̄n tò ghɛ̀ zə tuw ko. Ghəa ghən bɔɔm lò eghəla aŋghəa waʼāwāʼ Pôl fə̀ tɔm wô ghɛ̀ â mwàʼsò kò an tɔ wəla Zə̀ kə mò fughu â wə̄n.

¹⁶Ù bɔ̂ɔm kə̀aa kô ghəa è mɔʼɔ zo, tò aŋghəa ù kə̂aa am mwàʼsò wən ù dzə̀m. Ghəa à li a lo am mwàʼsò u wən u te wo a tughūu alezuūwkɛlɛ, làʼsò tə aghì ghəla ghe tɔ̂ʼ ti yo and ghəa è li zo yia nî bɔe naŋā ndûw moʼnlò e te zo an dzǐi tə ghee, tò aŋghəa ghe buʼù ghəə̄ŋ dzə an də̀ŋo tə li to am Mwàʼsò kə Kəzə̀, mo ghe êzə fi tsɔ̂ɔ kô nyʉ e ghee aŋ ŋgɔ̀ʼ.

¹⁷Waazə̂ ghaŋa gho, ghəa e nyɔ̂ʼ lô enyəa ghɛ̀ ŋ kele zìi ghəa ghən gho, e ghomlo nlò, e kwo ko gha a ghì ghəla ghe bwîi dzə̀ yo alo kəlàŋ lò so e ghəŋlo enyəa ghɛ̀ bvʉ komlo.

¹⁸Zə êzəŋ e lo enyəa, to dzɔ̂ e Mughu ù te, tɔɔn Bəghambī ù sɛ, Yɛso Kə̀lestò àsùghò tɔ wəla ghɛ̀ ki kùu wə̄n mò ghəŋlo enyəa ghɛ̀ e ŋgee noōm dzɔɔ̄. To ghî mô kɔ̀ʼso tsə̀ghà wə̄n to mbī kê bughò mîa. Zə e lo ko êzə̀.