Read Aghem 1 Dzɔ̌n 1 Bible Online

1 Dzɔ̌n 1 - Aghem bible

1 Dzɔ̌n 1

¹ Ghàʼ ghəa ghən fɛ tɔɔ wò â ghɛ̀ kùu ndùw Shwaʼ u Kəzə̀ wəla u fughu mughù zò. Shwaʼ wən u fə̀ lo nû to mbī e tsoō bùghò zîi tsughu. Ghàʼ mafə̄ wə̄n kôʼ, zùw sùghò shwaʼ u wə̄n, bùʼ mɔ̀m ndùw sùghò wə̄n aŋ ghu ghaʼā.

²Ghəa ghəla Shwaʼ wəla u fughu mughù zò fə̀ sə wo am mbī, ghàʼ mo è koʼ. A fɛ kə̀aa wò â ghɛ̀ kùu ndùw Shwaʼ u te wəla ù fughu mughù è doʼn təla zo, wəla u fə̀ lo ghèe Tsele, bòʼ enyəa u mafə bughò dè ghue u wə̄n wo â ghàʼ.

³Ghàʼ fɛ dzâ wò ghɛ̀ â fəgha kəla ghàʼ lo mò ghàʼ n zuw, kòʼ è sugho, ghàʼ fɛ â ghɛ̀ dzâa wò aleghəŋlo enyəa sɛ̀ təmadzəə̄ŋ kɔʼ alo kəfəgha kə mɔ̀ʼ, tò aŋghəa ghàʼ lo alo kəfəgha kə mɔ̀ʼ ghàʼ à ghê Tsele àsùghò Wɛ ù Wə̄n, tɔɔŋ Yɛso Kə̀lestò.

⁴Ghàʼ ghəa ghən fɛ tɔɔ wò aleghəə̄ŋ tsughu enyəa sɛ̀ e kuūm ŋgee tsoʼnlo bò ghəa a te gho.

⁵Zən fɛ̀ lò tum zəla ghàʼ lo mò ghàʼ n zuw aŋ ghulô Wɛ ù Kə̀zə̀, ghàʼ yia naʼ wo â ghɛ̀. Tum e te u lo enyəa: Zə̀ kə̀ lo tsə̀, kə ŋgəmso ki yo ghəa è li zo aleghəŋlo ghèe ləm ko.

⁶À fi lo enyəa abugho sɛ̀ dzɛ̂ enyəa sɛ̀ lo kəfəgha kə mɔ̀ʼ sɛ̀ à ghê Zə̀ kò, sɛ̀ yia a kôom naām mùghù ko alo kələ̄m, a fi kaʼnlo àgha, mùghù sugho yo am fəgha kəla səŋò è deē ghè kò.

⁷Abugho sɛ̀ kuūwm mughu an tsə̂, tò aŋghəa kə lo an tsə̂, à fi lo enyəa sɛ̀ a dzə̀m lò alo kəfəgha kə mɔ̀ʼ, Kâŋ tə Wɛ ù Wə̄n tɔɔŋ Yɛso, tia tə sûuw maʼn sughò bôo tə sɛ̀ tò tə dzə̀m.

⁸Abugho sɛ̀ dzɛ̂ enyəa sɛ̀ kâ ghə̌əŋ boon dzə̀ ghəa è li zo, sɛ̌ fi loʼsò ghue e sɛ̀, səŋò zəa e buw a zəŋò sɛ̀.

⁹Abugho sɛ̀ kûm boo tsughu enyəa sɛ̀ ghəəŋ nù ghəa à biigh gho, sɛ̀ yia a mʉŋē aŋ ghəa a te gho a sə̀a Zə̀ kò, kə lo ghuūw maʼà bòo tə sɛ̀, kə sùuw maʼà sughò sɛ̀ aŋ ghəa a sɛ̀ à biigh gho. Tɔŋlo enyəa Zə̀ kə̀ lo tsəghatsəgha, chia kə naāŋ sugho to kə wə̄n ko.

¹⁰Abugho sɛ̀ dzɛ̂ enyəa sɛ̀ kaām ghəa è biigh è li e ghəəŋ kòʼ tsə̀ghà, a fi dzɛ̂ enyəa Zə̀ kə̀ kaʼnlo àgha, àsùghò enyəa shwaʼ u Kəzə̀ ù kâ sɛ̀ alo təfə̀ŋ dɔ̂ɔm nyə dzə̀.