Read Aghem 1 Dzɔ̌n 2 Bible Online

1 Dzɔ̌n 2 - Aghem bible

1 Dzɔ̌n 2

¹Ŋ̀ ghəa ghən fɛ tɔɔ wò â ghɛ̀ a wɛ ghaŋā gho, enyəa e kwo ko ghùw wɛʼɛ lô so e ghəŋlo èbo. Abugho ghùw ù mɔʼɔ̄ kpaʼ ghəəŋ tsughu bo zo, a ki nu ghùw wəla ù buʼū ghu ko an tuw u sɛ̀ a vʉ̀a Tsele ù sɛ̀, tɔɔŋ Yɛso Kə̀lestò, ghùw ù tsəghatsəgha.

²À lǒ wə̄n ghùw wəla ù mò boʼō nughu mbùŋ kə təbòo kə sɛ̀ kò. Ù ka fə ka bòʼò nùghù ko mbùŋ kə sɛ̀ kò, ù fə̀ boʼō nughu sugho mbùŋ kə təbòo kə ghì ghə̀n a dzə̀m am mbī.

³À lò ko abugho sɛ̀ naāŋ lwâŋ u Kəzə̀ wò sɛ̀ lo alekele enyəa sɛ̀ kwo nû wə̄n.

⁴Ghùw wəla ù dzɛ̀ enyəa, Ŋ̀ kwo nu wə̄n, mò ù kǔuwn naaŋ yo lwâŋ u Kəzə̀ wò, à lo ghùw wə̀ àgha. Ghùw ù te kwo yo ghəa è səŋò zò.

⁵Ghùw wəla ù kuūwn zuuw â Zə̀ kò, à lǒ ghùw ù te ù kùum kele tsughuu fəgha kə kəla ləgha e Kəzə̀ è lo ghè ko. Ghən lò ghəa ghəla sɛ̀ lo alekele enyəa sɛ̀ à ghê Zə̀ kə̀ lo nû alo kəfəgha ə mɔ̀ʼ:

⁶Ghî ghəla ghe dzɛ̂ enyəa ghe lo alo kəfəgha kə mɔ̀ʼ ghèe ghê Zə̀ kò kì alebɔɔ̄m bwii ko aŋ ghùw kə ebwìi kè Yɛso Kə̀lestò.

⁷Fən ghaŋā gho, kən yo dzə̂ lâŋ kə fughu ko Ǹ tɔɔ wo â ghɛ̀; à lò lâŋ kə̀ wii kəla kə ki lô tsəgha dzə — kəla ghɛ̀ ki kwo tsəgha, tɔ̂ɔŋ làŋ kə̀ wii kəla ghɛ̌ fə̀ ki zuw.

⁸Lò êzə̀, lâŋ kəla Ǹ tɔɔ wô fɛ â ghɛ̀ êzəŋ lo lâŋ kə̀ fughu ko, mò sɛ̀ səŋò zəla e lo a làŋ kə tə ko koʼò ndùw a zəŋò Kə̀lestò àsùghò a zəŋò ghɛ̀, bòʼ enyəa ləm kə tsəghà nùghùun ndùw nù, tsə̀ è səŋò zə̀a e daŋso tughuū səā kɔʼɔ wo.

⁹Ghùw nsɔ̌ɔŋnchùw wəla ù mòʼo enyəa e lo an tsə̂, kuuwn bàa wàazə̀, nǎam mùghù ko alo kələ̄m.

¹⁰Ghùw wəla ù ki ləgha zo a zəŋò wàazə̀ fi boo dzəəŋ ghèe tsə̀, ghəa è li e yo dzə̀ a zəŋò wə̄n e lo aletsōom wə̄n enyəa ù ghəŋlo èbo.

¹¹Ghùw wəla ù bâa wàazə̀ kǔuwn mùghù alo kələ̄m, bwìi kàŋlo a te, kwo sugho yo luʼū kəla ù ndǔuw a te, bòʼ ləm kə n sə a wə̄n a fôsò nàŋa.

¹²Ǹ ghəa ghən tɔɔ wo a ghɛ̀ a fən ghaŋā gho, bòʼ Zə̀ kə̀ m bòo tɛʼɛ tə ghuuw màʼà an am bàm e Kə̀lestò.

¹³Ŋ̀ ghəa ghən fɛ tɔɔ wò â ghê tselèwɛ̀, bòʼ ghɛ̀ ŋ kwo nu ghùw wəla ù fə̀ ki lô tsəgha to mbī e tsoō zîi tsughu. Ŋ̀ ghəa ghən tɔɔ wò â ghɛ̀ a waafəghàŋ ghò, bòʼ enyəa ghɛ ŋ ghaʼ ghùw ù bǐigh. Ŋ̀ ghəa ghən fɛ tɔɔ wò â ghɛ̀ a wɛghêtùghu gho bòʼ ghɛ̀ m boo fughu â Tsele u te.

¹⁴Ǹ tɔɔ wò â ghɛ̀, ghê tsele ghaŋa bòʼ ghɛ̀ ŋ kele ghùw wəla ù fə̀ ki lô tsəgha to mbī e tsoō bughò zîi tsughu. Ǹ tɔɔ wò â ghɛ̀ a ghâŋ fò bòʼ ghɛ̀ ki esə̂ŋ, shwaʼ u Kəzə̀ vʉa u lò sugho am fə̀ŋ tɛʼɛ, àsùghò enyəa ghɛ̀ ŋ ghaʼ ghùw ù bǐigh.

¹⁵Kà nlò fə̀ŋ tɛʼɛ tə naŋa am mbī ŋkāa an fʉgha u mbī wo. Abugho ghùw naŋa fəŋ è wə̄n am fʉgha u mbī wo, à fi lo enyəa ù ki yo ləgha zo a zəŋò Tsele u te.

¹⁶Am fʉgha wən ù dzə̀m u lô fɛ am mbī — tò ghəa ghəla ghùw ù bǐigh ləghaa, sə à səa gho, ghue è kɔʼso zo, ghəa a te gho a dzə̀m lò ghəa a mbī gho; ghəa è li zo aŋ ghəa ghən yo dzə̂ e Tsele u te zo.

¹⁷Mbī àsùghò ghəa a mbī ghəla ghî gaʼ fə̂ŋ tò a te kê tsəghàa mìaan nù, yia kuuwn bugho ghùw wəla ù naaŋ lâŋ kə Kəzə̀ kò, ù ŋ kelê mùghù è doʼn təla zo.

¹⁸Wɛ ghaŋā gho, nəgha e te zə m kpe aŋghəa ghe mò dzɛ̂ naŋā â ghɛ̀ enyəa ghùwkə̀tuw ù Kə̀lestò lo bùghò nù, alebùʼù nì tsughu ko ezəŋ ndə̀m è ghee m bùghò. Zən lô dzì zəla a kele a te enyəa nəgha zəla mbī so e bughò mîa a te, zə m kpe.

¹⁹Ghî ghən fə̀ zəghaa tsughu ghaʼ nùghù è nduw, mò à êzə lo mo ghe mo biso ti yo alo kəfəgha kə mɔ̀ʼ ghàʼ à ghee; nu abugho ghe mò ti alo kəfəgha kə mɔ̀ʼ ghàʼ à ghee, to ghe mafə doʼò dòʼò a fɛ ghàʼ à ghee; lò êzə̀, nughù sə e ghee e kûu dèe nù enyəa ghe ti yo ghàʼ à ghee alo kəfəgha kə mɔ̀ʼ.

²⁰Yia a kuuwn bughò â ghɛ̀, Kə̀lestò ŋ ghɛ̀ â Zuʼ tə Zɔlɔ tə fughu, ghɛ̀ a dzə̀m yia a kwo seŋò zò.

²¹Ŋ̀ ghəa ghən fɛ tɔɔ wò dzə̀ yò â ghɛ̀ enyəa ghɛ̀ kwo yo səŋò zò, à lǎam lò bò enyəa ghɛ̀ kwo nû səŋò e te zo, ghɛ̀ yia a kwo sugho enyəa, gha è li e səa wò yò alo êsəŋò.

²²Ghùw wə̀ àgha fɛ lò ndughoo a? A mgbàŋ yò ko ghùw wəla ù tuū maʼnlo enyəa Yɛso yò dzə̂ Bəghambī. Ŋgòʼ è ghùw ù te lo ghùwkə̀tuw ù Kə̀lestò, tɔŋlo enyəa, ù bùʼù tǔu maʼn Tsele ù te tò aŋghəa ù tuū màʼn Wɛ ù wə̄n ù nùu u te.

²³Ghùw ù li yo ù tuū màʼn wɛ, vʉ̀a ù kuūwn kwo Tsele ù te. Ghùw wəla ù boō fughu tsughu â Wɛ kwo sugho nu Tsele ù te.

²⁴Ghǒom tsughu nlò enyəa, fəgha kəla ghɛ mò zuw alekaʼa nughù wô aŋghəa ghɛ̌ fə̀ boō fughu tsughu â Kə̀lestò, kə doʼò tən a zəŋò ghɛ̀. Abugho kə doʼò tən a zəŋò ghɛ̀, ghɛ lo e ti ghuw ko kə mɔ̀ʼ ghà à ghê Wɛ àsùghò Tsele ù te.

²⁵To kəla Kə̀lestò fə̀ to naŋā â sɛ̀ lò — Mughù è doʼn tela zo.

²⁶Ŋ̀ ghəa ghən fɛ â ghɛ̀ tɔɔ wò kùu ndùw ghî ghəla ghe ləghaa alesèe məŋso ghɛ̀.

²⁷Kə̀lestò ŋ kuuwn fughu ghɛ â bughuun zo an Zuʼ tə̀ Zɔlɔ to. Tò ghəa Zuʼ tə̀ Zɔlɔ tə te tə lo am fə̀ŋ tɛʼɛ, e kwo ko ghùw ù li lô kôom bugho alezoʼn ghɛ̀ â ghəa è nughù è li zo. Aŋghəa zuʼ tə wə̄n tə̀ zɔlɔ tə dêe ghɛ̀ â ghəa gho a dzə̀m, àsùghò enyəa fəgha kəla u děe â ghɛ̀, kə kûm lo êsəŋò, mò gha e li yo a te. Tò aŋghəa Zuʼ tə̀ Zɔlɔ tə zoʼn ghɛ̀ a te, e ti ko nlò ghuw ko kə mɔ̀ʼ ghɛ a ghê Kə̀lestò.

²⁸Tee tsughu ko nlò ghuw ko kə mɔ̀ʼ ghɛ̀ à ghê Kə̀lestò êzə̄ŋ à wɛ ghaŋa gho, to abugho ù kê bugho, ghɛ̀ e ke ki yo tsəŋ zo àsùghò tuw kə dəla ko aleteme a vʉ̀a wə̄n an tsuʼ fəla ù kè bugho ebàm a te.

²⁹Aŋghəa ghɛ̀ kwo enyəa Kə̀lestò lò ghùw ù tsəghatsəgha, e fi lo enyəa ghùw wəla ù ghəəŋ ghəa ghəla a lô tsəghatsəgha à lo wɛ ù Kə̀zə̀.