Read Aghem 1 Dzɔ̌n 3 Bible Online

1 Dzɔ̌n 3 - Aghem bible

1 Dzɔ̌n 3

¹ Kòʼ nlò ləgha è ne è ne zəla Tsele ù te de wo â sɛ̀ a, enyəa ghe e tɔɔŋ sɛ̀ enyəa, sɛ̀ lo wɛ a Kəzə̀ a; sɛ̀ yia a kǔum lô sùghò wɛ a Kəzə̀ ghò a. Ghəa zəla ghî a mbī a kwo yo sɛ̀ enyəa sɛ lo wɛ a Kəzə̀ lò enyəa ghe mò kwo sugho yo Zə̀ kò.

²Waazə̂ ghaŋa gho, sɛ̀ êzəŋ e lo wɛ a Kəzə̀, sɛ̌ yia sô kaam kwo yo fəgha kəla sɛ̀ kê bughò doʼn ghê kò. Yia a kuuwn kwo enyəa abugho Kə̀lestò kè dê wô ghue wo, sɛ̀ kê bɔ̌ɔm lò sugho tǒ wə̄n, tɔŋlo enyəa an tì kə tə ko, sɛ̀ lô wə̄n koʼò ndùw aŋghəa ù lò a te.

³À fi lo enyəa ghùw wəla ù chǐi tùʼ a zəŋò Yɛso, ù fi sūw zɔ̀nso tsughu ghue u wə̄n, tò aŋghəa Kə̀lestò zɔlɔ̄ a te tsɛʼɛ̀tsɛʼɛ̀.

⁴Ghùw nsɔ̌ɔŋnchùw wəla ù ghəə̄ŋ tsughu bo zo, ù fi zaʼ kəlâŋ, tɔŋlo enyəa aleghəŋlo ebo lo alezaʼ kəlâŋ.

⁵Ghɛ̀ kwo nû enyəa ù fə̀ fɛ am mbī nyə wo alebùghò alenìi nughù bôo tə sɛ̀, mò ù ka fə ghəəŋ boon kòʼ ghəa e li zo.

⁶Ghùw ù li yo ù ti ghu ko kə mɔ̀ʼ ghèe Kə̀lestò vʉ̀a ù kòom ghəəŋ bo zo. Ghùw wəla ù ghəə̄ŋ ndûuŋ ndûw ko bo zo, ù kwò yo Kə̀lestò, ŋkāa ù kaam bûʼ kòʼ kòʼ sùgho wə̄n.

⁷Wɛ ghaŋa gho, e kwo ghɛ̀ lô bomlo enyəa ghùw ù lì sèe məŋso ghɛ! Ghùw wəla ù ghəə̄ŋ ghəa ghəla a lô tsəghatsəgha, ù lô ghùw ù tsəghatsəgha, tò aŋghəa Kə̀lestò lò tsəghatsəgha a te.

⁸Ghùw wəla ù ghəə̄ŋ zeē bo zo lǒ ghùw ù avʉatsə̄a.[1] Nu vʉatsə̄a à fə̀ sə tən wo ko â bo zo alekaʼa nughù wô. Soo kə eghəa kəla Wɛ ù Ghùw fə̀ bugho a te, fə̀ lo alebùghò saʼà maʼà fwàʼ kə avʉ̄atsəa kə te ko.

⁹Ghùw wəla ù lo wɛ u Kə̀zə̀ ghə̂əŋ ndùuŋ yò bo zo, bòʼ mwam u Kəzə̀ ù lo a zəŋò wə̄n. Ù kòom yo dzə̂ aleghəəŋ bo zo, bòʼ à wə̄n dzə Kəzə̀.

¹⁰Zən lǒ ghəa zəla è dêe tsughuu enyəa wɛ a Kəzə̀ à lo nəŋo nəŋ a zəŋò wɛ a Satàn ghò: enyəa ghùw wəla ù ghə̂əŋ yò ghəa zəla e lô tsəghatsəgha, vʉ̀a ù ləghaa sughò yo wàazə̀, ù fi yo dzè wɛ u Kə̀zə̀.

¹¹ Wən lò shwaʼ wəla ghɛ̀ mò zuw zîi wo; enyəa sɛ̀ e ləghaa ghue e sɛ̀ zò to waazə̂.

¹²Sɛ̀ ki dzə̂ yo aledòʼò to Kɛ̂ɛn wəla ù fə̀ lo wɛ ù avʉatsə̄a, ù n wi màʼà tsughu wàazə̀. Ù fə wàazə̀ wən enyə wi bòʼ kwò a? À fə̀ lo bòʼ ù fə̀ ghəəŋ ghəa biigh gho, wàazə̀ ŋ kuuwn ghə̂əŋ ghəa à dzûŋ ghò.

¹³E kwo ko dzughu e lo sô zuuw ghɛ a waazə̂ ghaŋa gho abugho mbī bâa ghɛ.

¹⁴ Sɛ̀ kwo nû enyəa sɛ̀ n sə̀ nùghùu wò aŋ kɔ̀n kə evʉ̄, tsə̀ghà wò am mùghù zəla e doʼò tən, bòʼ enyəa sɛ̀ ləghaa nù waazə̂ a sɛ̀ ghò. Ghùw wəla ù ləghaa yo waazə̂ ghò, ù fi nǎam lò ko am fàŋa kə evʉ̄.

¹⁵Ghùw wəla ù bâ wàazə̂, lo ghùw wəla ù wiī ghî ghò; ghɛ yia a kwo sughò enyəa ghùw wəla ù wiī ghî ghò ki yo mughù è doʼn təla zo.

¹⁶Ghəa ghən ghə ŋ ghəŋlo sɛ̀ yia a zoʼn kele kɔʼ fəgha kəla ləgha e lo ghe kò, mo e lo enyəa: Tò aŋghea Kə̀lestò fə̀ boo tsughu alekpuw an tuw u sɛ̀, sɛ̀ ki aleboo tsughuu sughò alekpuw an tuw u waazə̂ a sɛ̀.

¹⁷Abugho ghùw ki fʉgha u mbī wo, vʉ̀a ù kòʼò nduw wàazə̀ wəla ù kuuwn laʼā kee, vʉ̀ ù ləghaa yo alefughu wə̄n, ù lô ênzə̂n aledzɛ̀ enyəa e ki nû ləgha e Kəzə̀ zò an fəŋ è wə̄n à?

¹⁸Wɛ ghaŋa gho, sɛ̀ ki yo aleləghaa ko ghue zo aŋ ghəa à nəghaan kəaa gho, a ki sughu aledeē nduw ləgha zo an fwàʼ kə sɛ̀ àsùghò alo êsəŋò.

¹⁹Ghən lo aŋghəa sɛ̀ lo kele a te enyəa sɛ̀ fɛ ti an dzì zə̀ səŋò, sɛ̀ e ke do lo sugho a vʉ̀a Zə̀ kò —

²⁰abugho fə̂ŋ tə sɛ̀ tə̀ kê kɔlɔ̀ ko sɛ̀, nu a kwo nû enyəa Zə̀ kə̀ ghaʼ tsəghà fə̂ŋ tə sɛ̀, àsùghò enyəa kə kwo aghəa a dzə̀m.

²¹Fən ghaŋa gho, abugho fə̂ŋ tə sɛ̀ tə̀ geēn yo sɛ̀, sɛ̌ fi dô lo nû a vʉ̀a Zə̀ kò,

²²kele sùghò fəgha kəla sɛ̀ bvʉ̀a nduw â wə̄n, bòʼ sɛ̀ sô naāŋ lâŋ kə wə̄n ko, ghəəŋ sùghò ghəa ghəla a dzoō an sə kə wə̄n.

²³ Kən lo lâŋ kə̀là ù tsəghàsò tsughu enyəa: Aleboo fughu an zən e Wɛ ù wə̄n ù nùu, Yɛso Kə̀lestò, àsùghò enyəa sɛ̀ e ləghaa ghue e sɛ̀ zo, aŋghəa Kə̀lestò fə̀ dzɛ̂ naŋa.

²⁴Ghî ghəla ghe naaŋ lâŋ kə Kə̀zə̀ kò lò alo kəfəgha kə mɔ̀ʼ ghèe ghê Zə̀ ko, Zə̀ chia kə lo sugho ghèe ghee. Ghən lò sugho aŋghəa sɛ̀ kele a te enyəa Zə̀ kə̀ lo sɛ a ghee. Sɛ̀ ghəa ghən fɛ kele bò Zuʼ təla kə fughu â sɛ̀.