Read Aghem 1 Dzɔ̌n 4 Bible Online

1 Dzɔ̌n 4 - Aghem bible

1 Dzɔ̌n 4

¹Fən ghaŋā gho, kâ nlò e tsoō boom fughu ko â ghî ghən a dzə̀m ghe dzɛ̂ enyəa ghe ki Zuʼ tə Kəzə̀ mò ghɛ̀ kâ ghe bûʼ mɔ̀msò kòʼ tsughu dzə̀ alekele enyəa à Zuʼ tə te tə tə̂əm fughu to Kə̀zə̀ à; tɔŋlo enyəa ghiīshʉ̀ghà ghə agha a dûuw nù am mbī.

²Dzì zəla a lo alekòʼòkɛlɛ Zuʼ tə Kəzə̀ a te lo enyəa: Ghùw wəla ù dzɛ̀ enyəa Yɛso Kə̀lestò fə̀ am mbī bugho to ghùw nsɔ̌ɔŋnchùw, ù fi ki zuʼ təla tə nughù wo aŋ ghùu Zə̀ kò.

³Ghùw wəla ù kuuwn tue maʼà ghəa zən zo, ki dzə yo zuʼ təla tə nughù wo an ghùu Zə̀ kò. Zuʼ tə te tə lo təla tə nughù wo aŋ ghùu ghùwkətuw ù Yɛso wəla ghɛ̀ fə̀ zuw enyəa ù bùghò nù. Ù m bùghò; ù e êzəŋ fɛ lò am mbī.

⁴Ghɛ̀ a wɛ ghaŋa gho, ghɛ̀ yia lo ghî a Kəzə̀ ghò; ghɛ̀ yia təm zə sugho ghiīshʉ̀ghà ù biigh gho, nu ghùw wəla ù lò a zəŋò ghɛ̀, ù tughu tsə̀ghàtàʼà ghùw wəla ù lò a zəŋò ghì a mbī gho.

⁵Ghe lo ghî a mbī gho, ghe kə̂aa kô ghəa a mbī gho, fəgha kəla ghe kəaa, mbī zə̀a è zuūw nduw â ghee.

⁶Sɛ̀ lo ghî a Kəzə̀ ghò. Ghùw wəla ù kwo Zə̀ kò zûuw fəgha kə̀là sɛ̀ dzâa. Ghùw wəla ù kuūwn kwo yo Zə̀ kò, zuuw yo â sɛ̀. Zən lô dzì zəla a lô alekele nəŋo nəŋ e Zuʼ təla tə lo tə̀ êsəŋò tò àsùghò təla tə lô tə agha to.

⁷Fən ghaŋa gho, bùghò nlò to sɛ̀ è ləghaa ghue e sɛ̀ zo, nu à ghə̌əŋ tsughuu Kə̀zə̀ enyəa sɛ̀ è ləghaa ghue è sɛ̀ zò. Ghùw wəla ù ləghaa wàazə̀ kwo nù Zə̀ kò, vʉ̀a ù lò sugho wɛ ù Kəzə̀.

⁸Ghùw wəla ù ləghaa yo wàazə̀ fi kwo yo Zə̀ kò, bòʼ enyəa Zə̀ kə̀ lo eləgha.

⁹Ghən lò ghəa ghəla Zə̀ kə̀ fə̀ dê ləgha e wə̄n zo a te â sɛ̀: aŋghəa Ù fə̀ tum wo sɔ̀ʼ kə Wɛ kə wə̄n kə̀ nuù ko a te am mbī enyəa to sɛ̀ mô kele mùghù zəla e doʼò tən am bàm e wə̄n.

¹⁰Kùum kə eləgha kə yo dzə̂ enyəa sɛ̀ mò ləgha nduw Kəzə̀ esə̄, à kǔuwn lò enyəa Zə̀ kə mò sə kə ləgha wo dzə sɛ̀, tùm wo wɛ ù wə̄n ù nùu enyəa ù bùghò kpuw an tuw u sɛ̀, to kə ghuuw maʼa bòo tə sɛ̀.

¹¹Fən ghaŋa gho, abugho Zə̀ kə fə̀ tɔ̂ʼ ləgha sɛ̀ ènyə, sɛ̀ ki sugho nû aleləghāa ghue e sɛ̀ zò.

¹² Ghùw ù lì kaām kôʼ kòʼ tsə̀gha Zə̀ kò; abugho sɛ̀ kuūwn kûu ləghaa ghue e sɛ̀ zò, Zə̀ kə n lo sɛ̀ à ghee, ləgha e wə̄n e dzə̀m zə ŋ kùm lò a zəŋò sɛ̀.

¹³Aŋ ghəa ghən, sɛ̀ kwo enyəa, sɛ̀ lo nû sɛ̀ à ghê Zə̀ kò, Zə̀ chìa kə ti sɛ̀ à ghèe, bòʼ enyəa Kə m fughu sɛ̀ â Zuʼ tə wə̄n to.

¹⁴Sɛ̀ ŋ kòʼ, yia a teso dzàa sùghò enyəa, Tsele n tùm wǒ Wɛ ù wə̄n ù nùu enyəa ù bùghò bəghāasə̄ mbī.

¹⁵Ghùw wəla ù teso dzɛ̂ enyəa Yɛso lǒ Wɛ ù Kə̀zə̀, Zə̀ kə̀ ti ghèe wə̄n, vʉ̀a ù lo sugho ghèe Zə̀ kò.

¹⁶Ghue u eghùe e sɛ̀ zəa e kwo, boo fùghù tsùghù sùghò an ləgha zəla Zə̀ kə̀ ki a zəŋò sɛ̀. Zə̀ kə lo eləgha, ghùw wəla ù mùghū alo e ləgha lo ghèe Zə̀ kò, Zə̀ chìa kə ti sugho ghèe wə̄n.

¹⁷Abugho sɛ̀ kûum ləghaa ghue e sɛ̀ zò, mùghù sugho tò aŋghəa Yɛso fè mughu fɛ a te am mbī, sɛ̀ kê ki yo tsəŋ zo abugho tsuʼ u saʼ u kê kpe wo.

¹⁸Tsəŋ è li e yo abugho ghù kùum ləghaa wàazùghù. Kùum kə eləgha kə dzûu nùghùnlò etsəŋ, nu tsəŋ e bughô â fə̀mso ko. Ghùw wəla ù ki tsəŋ zo an ləgha e wə̄n a zəŋò wàazə̀, ki yo kùm kə eləgha ko.

¹⁹Sɛ̀ ləgha e fɛ ki aŋ ghùe e sɛ̀ bòʼ Zə̀ kə̀ fə̀ ləgha wo dzə̄ sɛ̀ esə̄.

²⁰Abugho ghùw dzɛ̀ enyəa e ləghaa Kə̀zə̀, vʉ̀a ù kuuwn bâa wàazə̀, ghùw ù te fi lòʼsò ghue u wə̄n. Tɔŋlo enyəa abugho ghùw yo aleləghā wàazə̀ mò ù kòʼò ndùw nû wə̄n, ù lo ênzə̂n aleləghā Kə̀zə̀ mò ù kaam wə̄n ŋ kôʼ kò a?

²¹Kən lò lâŋ kə̀là Kə̀lestò fughu sugho â sɛ̀ enyəa, “Ghùw wəla ù ləghaa Zə̀ kò ki aleləghaa sugho waazə̂ ghò.”