Read Aghem 1 Dzɔ̌n 5 Bible Online

1 Dzɔ̌n 5 - Aghem bible

1 Dzɔ̌n 5

¹Ghùw wəla ù kùm boō fughu tsughu enyəa Yɛso lǒ Bəghambī u te, ghùw te fi lo wɛ ù Kə̀zə̀. Ghùw wəla ù ləghaa Tsele ù te, ləghaa sùghò nû Wɛ ù te.

²Sɛ̀ lo alekele enyəa sɛ̀ ləghaa nù wɛ a Kə̀zə̀ ghò abugho sɛ̀ ləghaa Zə̀ ko, naaŋ sùghò làŋ kə wə̄n.

³ Nu abugho sɛ̀ kûm ləghaa Zə̀ kò, sɛ̀ fi ki alenaaŋ lwâŋ wə̄n wo. Nu lwâŋ u wə̄n u tughu yo â sɛ̀ alenaŋlo.

⁴Tɔŋlo enyəa, ghùw nsɔ̌ɔŋnchùw wəla ù lǒ ghèe Zə̀ kò təma zəa nǔ mbī. À lò boo zəla sɛ̀ ki ghè zò e ghəŋlo sɛ̌ yia ghaʼ mbī.

⁵À lo ndughoo u lò aletəma zə̂ mbī lo a, mò à gɔ̀ʼɔ̀ ko yo ghùw wəla ù boo tsughu enyəa Yɛso lo Wɛ ù Kə̀zə̀?

⁶À lǒ dzì zəla Yɛso Kə̀lestò fə̀ ni mùghù ŋ kə̀zə̀ mò a te àsùghò kàŋ tə wən təla tə fə̀ tsughu tsughu alo kədàŋlo an vʉ e wə̄n, è fə̀ dêe wo enyəa ù lo Wɛ ù Kəzə̀; à ka yo ko alo mmùghu, à lò alo mmughu àsùghò a lo təkàŋ. À lò zuʼ tə̀ Zɔlɔ to tə teso dzâa wô ghəa ghən gho, tɔŋlo enyəa Zuʼ tə̀ Zɔlɔ tə dzâa wò êsəŋò.

⁷A lò aghəa à təgha a teso dzâa ghəa gho enyəa Yɛso lǒ Wɛ ù Kəzə̀:

⁸Ghəa ghəla Zuʼ tə Kəzə̀ tə dzɛ â sɛ, dzì zəla ù fə̀ ni mùghù ŋ Kə̀zə̀ mo a te, àsùghò kàŋ tə wə̄n təla tə̀ fə̀ tsughuun tsughu alo kədàŋlo. Ghəa a te gho a təgha teso dzàa ko ghəa e mɔʼɔ̄ zo.

⁹Sɛ̀ boom nù ghəa ghəla ghî à teso dzâa wo, yìa à sò kuūwn lô enyəa fəgha kə̀là Zə̀ kə̀ teso dzâa wo tughu tsə̀ghàsə̀ kə ghûw kò. Zə̀ kə̀ ghəa ghən teso dzàa wò kùu ndùw Wɛ ù Wə̄n.

¹⁰Abugho ghùw boo fughu tsughu â Wɛ u Kəzə̀, à fi lo enyəa ù n nì nàŋa shwaʼ u te wo am fəŋ è wə̄n. Ghùw wəla ù taʼkè boo fughu shwaʼ wən wo, nîi ndùw enyəa Zə̀ kə̀ kaʼnlo àgha bòʼ u kà bǒo dzə̀ fəgha kəla Zə̀ kə̀ teso dzâa wo kùu ndùw Wɛ ù Wə̄n.

¹¹Wən lò shwaʼ u te wo, enyəa Zə kə̀ mafə fughu sɛ̀ â mùghù è doʼn təla zo. Mughù e te zəa e lô zəla Wɛ ù wə̄n fughuu â ghì ghò.

¹²Ghùw wəla ù lo alo kəfəgha kə mɔ̀ʼ ghèe Wɛ ù Kə̀zə̀, ki nû mughù zən zo. Ghùw wəla ù yò dzə̂ alo kəfəgha kə mɔ̀ʼ ghèe Wɛ ù Kə̀zə̀, ki yo mughù e doʼn təla zo.

¹³Ŋ̀ ghəa ghən fɛ tɔɔ wò â ghɛ̀ ghəla ghɛ̀ boō fughu tsughu an zən e Wɛ ù Kə̀zə̀ tò ghɛ̀ kele tsughu enyəa ghɛ̀ ki mughù zəla e doʼò tən.

¹⁴Sɛ̀ ki yo tsəŋ zo a vʉ̀a Zə̀ kò, bòʼ a kwo nû enyəa ù sò zǔuw nû sɛ̀ abugho sɛ̀ bvʉ nduw wə̄n â fəgha ko an dzì zəla ù ləghaa.

¹⁵Abugho sɛ̀ kwo sughò enyəa Zə̀ kə̀ zuuw nù â sɛ̀, abugho sɛ̀ bvʉ ko kwò kò â wə̄n, sɛ̀ ŋ kwo tən am fə̂ŋ enyəa ù sò fùghuu nù fəgha kəla sɛ̀ bvʉā nduw â wə̄n.

¹⁶Abugho ghùw kòʼ nduw wàazə̂ ù ghəə̄ŋ bo zəla ghùw yo alekpūw a te, ù ŋ gɔ̀ɔŋ tsughù Kə̀zə̀, Kə m fùghù waazə̀ ù te â mùghù e fughu zò, bòʼ bo e wə̄n zə̂a e yo alewī ghùw. Bo e lo nû e ghəŋlo ghùw mò è kpuw; M̀ fɛ dzàa wò yo â ghɛ̀ enyəa ghùw kì alegɔ̀ŋlò an tuw u ŋgòʼ è ghì ghəla ghe ghəəŋ tsughu bo e te zo.

¹⁷Ghəa a ghəŋ boon gho a dzə̀m lo ebo, bo e li e kuuwn lò nu e yô aleghəŋlo enyəa ghùw kpuw.

¹⁸A kwo nû enyəa wɛ ù Kə̀zə̀ ù li yo ù ki aleghə̂əŋ ndûŋlò èbo, bòʼ enyəa Wɛ ù Kə̀zə̀ chìin nǔ wə̄n. Daʼa kə avʉatsə̄a chia kə yo sugho alemɔ̀m wə̄n.

¹⁹Sɛ̀ kwo nû enyəa sɛ̀ lo wɛ a Kəzə̀, aŋghəa mbī e dzə̀m tso bûʼ lo ko an daʼa kə avʉatsə̄a.

²⁰Sɛ̀ kwo sugho nû enyəa Wɛ ù Kə̀zə̀ ù nùu m bùghò, vʉ̀a ù fughu sɛ̀ â tɔ wo alezuūwkɛlɛ Zə̀ kə̀ êsəŋò kò a te. Sɛ̀ à ghê Zə̀ kə̀ lo alo kəfəgha kə mɔ̀ʼ àsùghò Wɛ u wə̄n, tɔɔŋ Yɛso Kə̀lestò. Ù lǒ Zə̀ kə̀ səŋò kò, vʉ̀a ù fughuu mughù e doʼn təla zo.

²¹Wɛ ghaŋa gho, nǐi nùghuu nlò fə̂ŋ tɛʼɛ to a zəŋò mùʼù mo! Nu à lô zʉ̀ wə agha.