Read Aghem 2 Dzɔ̌n 1 Bible Online

2 Dzɔ̌n 1 - Aghem bible

2 Dzɔ̌n 1

¹Mùghò, Tsoʼ an ndughu e Kə̀zə̀, Ǹ tɔɔ wò mwàʼsò kən â ghù a Wìzən[1] wəla Zə̀ kə̀ shîaa kɔʼ ghɛ̀ â ghê wɛ ghə̂a ghò. Ŋ̀ kûum ŋgěe ləghaa nù ghɛ, à kà yo ko mugho, ghî ghə̀n à dzə̀m ghe kwo səŋò zò lə̀ghaa sùghò nù ghɛ.

²Ǹ ləghaa ghɛ̀ bòʼ enyəa sɛ̀ kwo nû ghəa à səŋò ghò, səŋò zəa e lo doʼn təla a zəŋò sɛ̀.

³To Kə̀zə̀, Tsele ù sɛ̀ ghèe Wɛ ù wə̄n, Yɛso Kə̀lestò mò dê sɛ̀ â dzɔ̀ e ghee zo àsùghò se è kwuso zo, ghe fughuu sughò sɛ̀ â bughuun zo, bòʼ enyəa sɛ̀ ti alo esəŋò àsùghò aŋghəa sɛ̀ ləghaa ghue zo a te.

⁴Mùghò mo ŋge duʼn nû aŋghəa mùgho mò bughò kôʼ wǒ wɛ ghə̂a a li ghò mo ghe mughu ko alo êsəŋò aŋghəa Tsele ù sɛ̀, Kə̀zə̀ mò dzɛ̂ naŋā â sɛ̀.

⁵ M̀ buʼu wò kə̀ ghu â ghû a Wìzən ù dzùŋ, à yò dzə̂ enyəa kən lò lâŋ kə fughu ko, à lo lâŋ kəla sɛ̀ ki ki tsəgha, enyəa: Sɛ̀ è ləghaa ghue e sɛ̀ zò tò waazə̂.

⁶Ləgha zəla Ǹ dzâa fɛ moʼnlò enyəa, sɛ̀ è mughu an lâŋ kə Kəzə̀. Lâŋ kə̀là ghɛ̀ a dzə̀m mò zuw alekaʼa nughù wo, lò enyəa: Ghɛ̀ a dzə̀m ki aleləghaa ghue zɛʼɛ zo tò waazə̂.

⁷Ndə̀mà tə ghî ghə agha tə n sə̀ ndùw am mbī, ghî ghəla ghe tuū maʼnlo enyəa Yɛso Kə̀lestò ka fə fɛ am mbī bughò dzə̀ to ghùw. Ŋgòʼ e ghì ghən lo ghî ghəla ghe sèe məŋso ghî ghò, lò sugho ghîikətuw a Yɛso.

⁸E ghomlo nlò â ghue zɛʼɛ̄ zo, e kwo ko ghɛ̀ lô ŋgûŋ fəgha kəla ghɛ̀ lo mò ghɛ̀ m fwàʼ nàŋa ghè kò, kuuwn də̀ma tən tsughu ko nlò nû, tò ghɛ̀ ke kele mɛʼɛ̄ namso kɛʼɛ̄ ko kə dzə̀m.

⁹Ghùw wəla ù ndùuw ko â sə ko, mo ù bɔ̌ɔm bwìi ndùw yò an tsʉ̀ è Kə̀lestò, ù fi baʼso tsughu a wə̄n gho a te, ghùw ù te yo dzə alo kəfəgha kɔ mɔ̀ʼ ghèe Zə̀ kò. Ghùw wəla ù mughu am tsʉ̀ e Yɛso Kə̀lestò, ù lò alo kəfəgha kə mɔ̀ʼ ghèe ghê Tsele àsùghò Wɛ.

¹⁰Abugho ghùw bùghò a vʉ̀a ghɛ̀ mò ù kà bùghò â tsʉ̀ zən, e kwo ghɛ̀ lô nîi naāŋ wə̄n an ndughu alô ghɛ̀, ŋkāa ghɛ̀ buʼ fughu wə̄n â tɔɔŋ zo.

¹¹Nu ghùw wəla ù kpeni ŋgòʼ è ghùw wə̄n fəla dòʼn ndùw sùghò tǒ wə̄n aŋ ghəa à biigh ghəla ù ghəŋlo.

¹²Ŋ̀ ki ndə̀mà tə aghəa aledzɛ̀ wô â ghɛ̀, yia Ǹ yo aletɔɔ̄ wô ghəa a te gho alo kəmwàʼsò. Ŋ̀ kuuwn mòʼnlò alebùghò kôʼ ghɛ̀ ghuūghùe waŋā enyəa sɛ̀ kə̂aa dzəə̄ŋ ndûw àghəa tò sɛ̀ ke e ŋge lo alo eduʼnlo.

¹³Wɛ a wàazughù ù zən ghəla ghe tsɔʼ naŋā kɔʼ fɛ fughu wò ghɛ̀ â tɔɔŋ zo.