Read Aghem 3 Dzɔ̌n 1 Bible Online

3 Dzɔ̌n 1 - Aghem bible

3 Dzɔ̌n 1

¹ Mùghò, Tsoʼ an ndughu e Kə̀zə̀, Ǹ tɔɔ wò mwàʼsò kən ko â ghù a Gayùs, ghù wəla Ŋ̀ kûum ŋgeē ləghaa.

²Fən waŋa ù dzùŋ, ŋgɔ̂ɔŋ zaŋa e lo enyəa to ghəa ghə̀a à mô bwîi dzɔ̂ɔ, àsùghò enyəa ghuūghuè wʉ̂a ù è tughū dzɔɔ̄ sugho, tò aŋghəa tughuu dzɔ̂ɔ sugho am fə̂ŋ.

³Mugho fə̀ ŋgee duʼn nû aŋghəa waazə̂ a sɛ̀ à li a fə̀ bughô dzɛ̂ wô â ghàʼ enyəa ghù bɔ̌ɔm kùm mùghò ko an dzì è êsəŋò zəla Zə̀ kə̀ ləghaa, yia Ŋ̀ kûm kwo enyəa ghù mùghò êzə̀.

⁴Duʼn kə̀ ne kə̀ li kə kɔʼɔ yo mugho an ghəa eli zo, tsəghà sə̂a ko yo alezuw enyəa wɛ ghaŋa a bwìi alo êsəŋò.

⁵Fən waŋa ù dzùŋ, fwàʼ kə̀là ghù fwaʼa a zəŋò waazə̂ a sɛ̀ ghò, ghù fwàʼà am fə̂ŋ zə̀gha è mɔ̀ʼ, a ka dɔ̂m taŋ abugho ghù mò bûʼ kwo ko yo ghee.

⁶Ghe n ləgha zə̀ghà è teso dzɛ̀ fɛ an dzeŋe kə ghì a Kəzə̀. E fughuu ghee â yòsò zò an dzì zəla Zə̀ kə̀ ləghaa, abugho ghe səā bwînlo.

⁷Tɔŋlo enyəa ghe sə wò alefwàʼ fwàʼ kə Yɛso Kə̀lestò mo ghe boom yo alenì fəgha kə̀ li ko aŋ ghulô ghì ghəla ghe kwo yo Zə̀ kò.

⁸A fi lo enyəa sɛ̀ ki aletɔɔ̄m ŋgòʼ è ghî ghən tò sɛ̀ lo e fwaʼā dzəəŋ sɛ̀ à ghee alezoʼn nduw ghî ghò aŋ ghəa à səŋò ghò.

⁹M̀ maā tɔm wò mwàʼsò kò â dzeŋe kə ghì a Kəzə̀ kɛʼɛ ko, à sò kǔuwn lò ko enyəa Dǐotefìs wəla ù ləghaa tsə̀ghà ko aledòʼò kə̀sə alo aghəa a dzə̀m u kafə tso naŋa tuūŋ ko am fəgha kəla Ǹ dzaā.

¹⁰A fi lo enyəa abugho Ǹ lo bugho, Ǹ lo teso kɔʼɔ wô tuŋlo u aghì am bòobò tə aghəa təla ù lǒ mò ù ŋ kə̀a kàŋlo àsùghò gha ghəla ù lo mò ŋ kaʼn kaŋlo a zəŋò sɛ̀. Ù kǎa ghəəŋ ko yo ghəa ghən gho, ù tǔu sùghò alekpeē nî ghì ghəla ghe bwìin nyəā wo an dzeŋe kə ghì a Kəzə̀, tsoo bughu naaŋ sùghò waazə̂ à li ghəla ghe ləghaa alekpeeniī wo ghî ghəla ghe bwiīn wo, ù m bùʼ dzùm dàŋso sə ghee a beē.

¹¹Fən waŋa ù dzûŋ, kà e koʼo niī ghəa è biigh zo, e kuuwn koʼo niī ko ghəa e dzûŋ zò. Ghùw wəla ù ghəəŋ ghəa à dzûŋ ghò, à lǒ wə̄n ghùw ù Kə̀zə̀. Ghùw wəla ù ghəəŋ ghəa à biigh gho kaam kwo yo Zə̀ kò.

¹²Aghî a dzə̀m kɛ̌ɛ Dɛ̀mitiùs, səŋò e sô tsoō dêe sugho ghue wo a zəŋò wə̄n, ghəa a te yia a dêe enyəa ù lo ghùw ù dzùŋ. Ghuūghùe zaʼa zəa e dzâa wô sugho enyəa ù lo ghùw ù dzùŋ. Ghù vʉ̀a ghù ndòʼ kwo sugho enyəa abugho ghàʼ dzɛ̂ wô ghəa zo, e fi lo êsəŋò.

¹³Ŋ̀ ki ndə̀mà tə aghəa aledzɛ̀ wô â ghù, yia Ŋ̀ kuūwn yo aletɔɔ̄ wô ghəa a te gho alo kəmwàʼsò.

¹⁴M̀ moʼn nù alekùʼn bughò bwîin kôʼ ghù, tò ghàʼ à ghù lo kə̂aa dzəə̄ŋ ndûw aghəa.

¹⁵Fən ghə̂a ghəla ghe lô fɛ ghàʼ à ghee fughuu wò ghù â tɔɔŋ zo, Tɔɔŋ zuw tsughu fən ghə̂a yia ghe lo fi èzə̀ ghɛ̀ à ghee, fə mɔ̀ʼ fə̀ mɔ̀ʼ. To bughunlo e mô doʼò ghɛ̀ à ghee.