Read Aghem Dzûd 1 Bible Online

Dzûd 1 - Aghem bible

Dzûd 1

¹À mwàʼsò kən kə tɔɔ wò mùgho Dzûd, mùghò wàazə̀ Dzɛ̂ms, yìa Ǹ lô kɔ̂ɔ fə Yɛso Kə̀lestò fò; M̀ mwàʼsò kən kə tɔɔ wò â ghî ghən a dzə̀m Zə̀ kə̀ tɔŋɔ aŋ ləgha e wə̄n, ghe yia mughù sugho a tsəlà Yɛso Kə̀lestò.

²Ŋ̀ gɔ̂ŋlò enyəa to Zə̀ kə̀ mô fughu ghɛ â bughuun zo, kə dêe sughò ghɛ̀ â se è kwuso zo àsùghò ləgha zo.

³Fən a fə̂ŋ ghaŋa à dzûŋ gho, mùgho mò kuuwn ki nû moʼn zò aletɔɔ̄ wô ghɛ̀ â mwàʼsò kò kùu ndùw aŋghəa Zə̀ kə̀ lo dzeŋe bəghaasəa sɛ̀ a dzə̀m a te, yìa Ŋ̀ kôom kôʼ tsughu enyəa, Ŋ̀ ki nû alebuʼu wô kə̀ghu â ghɛ̀ enyəa ghɛ̀ tɔʼ tee tsughu am boo zəla ghe fə̀ ki fughu naŋā to â ghî a Kəzə̀ à zɔlɔ gho a dzə̀m, fughu tən ko êsəŋò.

⁴Tɔŋlo enyəa ghî à li ghə n nyɛʼɛ bùghò tsɔŋ tsə̀ghà nyə am bvʉa zɛʼɛ mo ghe fughuu yo kɔʼso mò â Zə̀ kò, nu ghe nî kɔ̂ʼ dzɔ̂ e Kə̀zə̀ fwə̀n naŋa tsughu enyəa alo dzì â ghee aleghəəŋ kaāŋ dzə̀adzə̀ tə aghəa to a te. Aghî tò ghən, ghe mafə ki tɔm naŋa aŋghəa ghe lo baā mbɛ̄ a te an tuw kə ghee. Ghe tuu màʼn sùghò Yɛso Kə̀lestò wəla à mìaa ko wə̄n Mughùbè ù sɛ̀.

⁵Aŋghəa ghɛ̀ bûʼ kwo ko ghəa ghən gho a dzə̀m, Ǹ naam ləghaa ko nù alezə̀əŋ kpeʼe wô ghɛ̀ aŋghəa Tsə̂ntə̀mbî fə̀ bəghasə tsughu ghî a wə̄n gho aŋ ghùu ghì ghə Edzipt à li gho an tì kə̀ li ko, kə ŋ kòom ndùw bùghò dzùw màʼà tsughu à li ghəla ghe fə̀ doʼŋkè boō fughu â wə̄n.

⁶Tsə̀təndə̄ghā tə Kəzə̀ təla tə fə̀ ti naŋa taʼa tsughu bəla zəla Zə̀ kə fə̀ naŋa enyəa ghe e fwaʼa a te, tì zə̀ghàa tàʼà sùghò luʼū təla ghe fə̀ mughu a te, Zə̀ kə ŋ kùm tsùghu ghee alo tətsāʼ fè nàŋa ndùw ghee an alo kələ̄m enyəa tə doʼò fughu to nəgha zəla ghe lo saʼā sàʼ è wə̄n ne a te lo telè kpeē tsughu.

⁷À lò sugho tò ghəa è mɔʼɔ̄ zo aŋghəa naʼ e Sodòm àsùghò e Gòmolà zo àsùghò kɔlɔ tə tənàʼà tə̀ li təla tə fə̀ dzə̂ŋ ŋgəa tsəgha wô ghee fə̀ fughu kɔʼ mughù e ghee zo aleghəəŋ kaaŋ dzə̀adzə̀ tə aghəa tə̀ nuūŋ to. Ghe fɛ lo tǒ tsə̌a alekwɛ̀ɛn ndûw ghì à li ghən a dzə̀m aŋghəa ghe fanlo aŋ wə̀n wəla u kê nyəə̄m koʼò yo.

⁸À lò sugho an dziī è mɔ̀ʼɔ e te ghì a te gho ghe dzəso ghue e ghee zo an dzwoo məla n tsə̄ən zeē ghee. Ghe tuu màʼn fəgha kəla Zə̀ kə̀ lo ghè kò, ghe yia a sûuwn kaāŋ fʉgha wəla u mughu alo kəwālā.

⁹A ŋ kuuwn bùgho tsèndəgha è Kə̀zə̀ è ne zəla ghe tɔŋlo enyəa à lò Maekɛ̀l sò baāŋ gwən e Musî zò ghèe vʉatsə̄a gho enyəa à sò gwən e te e nîi tsə̌ən ndùghò, Tsə̀ndə̄ghā e Kəzə̀ è te ŋ kè luʼ alekə̀a səa wò ghəa è biigh zəla e lo alebôon zen zə Avʉ̄atsəa gho, zə ŋ kuuwn dzɛ̀ ndùw ko enyəa, “To Zə̀ kə̀ mô fɔeso ghù aŋ ghəa ghən!”

¹⁰Ghî à kuuwn tsòo sùuwn kô kə̀fəgha mo ghe bûʼ kwò yo fəgha kə te ko. Ghəa ghəla ghe tsô bûʼ kwo ko alo kəzə̌azə̌a — tò nyôm tə ŋgwən to — ghəa a te a lo ghəəŋ nù Zə̀ kə̀ lo dzûuw maʼà ghee

¹¹Utsû â ghee! Nu ghe nî kɔ̀ʼ aghəa an dzə̀ tə Kɛ̂ɛn[1]; bòʼ ghe ŋgee ləghaa alekele ghu kə ebàm kò aŋ ghəa a ukʉa, ghe yia a nɔʼɔ̄ kaāŋ tsəgha aŋ ghəa a ghee à ghəəŋ gho tò aŋghəa Balàam[2] fə̀ nɔʼ a te. Ghe yia a tughuu sugho â tuw ko tò Kolàh fə tughuu sugho â tuw ko ghèe ghee, ghe dzùuw màʼn sùghò ghe tò aŋghəa ghe fə̀ dzûu maʼa Kolàh a te.

¹²Ghe lo ko tò na kə dzəa ko kə dzəso ghɛ abugho ghɛ̀ à ghee dzeŋe zəa kùun to a dzə̀m, ghe n zəa ghɛ̀ à ghee mo ghe ki ke yo tuw kə dəla ko, ghe sô lɛɛ̄n təla tsughu ko ghue e ghee zo. Ghe lo tò mbàʼ tə̀ zum to alo kəwāla kǔɛɛ kə foō kaāŋ tsəgha mo ghuuw e yo aletsoō səa tsughuu wô a te. Ghe yia lô sugho tǒ kâʼ fə nûm fò mo fə yo alebɔŋ kətam, mo ghe n dwə̀ən nùghù sə̀ kɔʼ aŋ ghueekətsə̄, mò mə̀ m bùʼ zùm sùghò.

¹³Ghe lo tǒ ŋgaam kə kətùŋùtùŋu an dzùghùntsòʼ, mo ghəa a ghee dəla a kətuw a dêe sə̌a kɔʼɔ ùghue tò etsə̀m. Ghe lo tǒ sə̀ghàbəlà mə̀la n làʼà ŋgəaa kaāŋ tsəgha edzūŋ, mò Zə̀ kə̀ n naŋa luʼu kə kələm kə̀ biigh ko â ghè mò, kəla ŋ kè doʼn təla a te.

¹⁴À fə̀ lo eghəla aŋghəa Enɔ̀k wəla ù fə̀ ghəə̄ŋ tsughu wɛ a awɛ a awɛ ghə Abə̀làhâm ghǒ sə̀ghàmbəgha fə̀ dzɛ̂ wô sughò shʉghà u Kəzə̀ wò kùu wò ŋgòʼ e ghì ghən gho enyəa, “Kòʼo nlò! Mughu ù te lo bùgho ghèe ghê ndə̀mà tə̀ təkam tə tsə̀təndə̄ghā tə wə̄n tə̀ zɔlɔ to.

¹⁵Ù kè bùghòo ghèe ghee alebùghò saʼ aghî a dzə̀m, àsùghò alebùghò fɔesô ghì ghə̀n a dzə̀m ghe kwo yo Zə̀ kò aŋ ghəa a ghee ghela ghe ghəŋlo mo a dzɔ̂ɔ yò an sə̀ Kəzə̀, àsùghò an shwaʼ u biigh wəla ghî ghəla ghe doʼkè boō fughu â Zə̀ kò kə̀a bonlo an zən e wə̄n.”

¹⁶Ghî ghən kwo ko alenyuūŋ kə̂a àghəa, àsùghò alekəŋ utsû â ghì à li gho, ghe ndûuw ko aŋ ghəa a ghee à biigh ghəla fə̂ŋ tə ghee tə ləghaa. Ghe tsɔ̂ɔ kǎaŋ tə̀fə̀ŋ aŋ ghùe e ghee, ghî ghən ki dzughu è kpəŋo zo alenɔɔm zəa ghî gho a te.

¹⁷Waazə̂ ghaŋa ghəla Ŋ̀ ŋgeē ləghaa, ghɛ̀ e moʼn tsughu ghəa ghəla tum tə Mughùbè ù sɛ̀ Yɛso Kə̀lestò tə fə̀ dzɛ̂ zîi naŋa wo.

¹⁸Ghe fə̀ dzɛ â ghɛ̀ enyəa, “A kê bugho an tsuʼu məla ŋ gùŋso tsughu, ghî a li a kê bùghòo nù ghe e tsoʼo ghɛ, aghî mo ghe kəŋo kô aleghəəŋ ghəa ghəla Zə̀ kə̀ ləghaa yo.”

¹⁹À lò ghî ghən ghe fə̀ ghəŋlo enyəa ghî ghə̀ n ndzughu lo kaaŋ tsəgha lo ntùʼù an dzweŋe ù ghì a Kəzə̀, aghî mo ghe fə̂ŋ tə ghee tə naŋa ko am fʉgha u mbī, mo ghe ki sugho yo Zuʼ tə Kəzə̀ to a zəŋò ghee

²⁰Waazə̂ ghaŋa ghəla Ŋ̀ ŋgeē ləghaa, ghɛ̀ è kuuwn dəma təla tsughu ko alenoo am boo zɛʼɛ zəla e lô fəgha kə̀ baa ko â ghɛ̀. Ghɛ̀ è gɔŋlo an daʼa kəla Zuʼ tə̀ Zɔlɔ tə fughu â ghɛ̀.

²¹Ghɛ̀ kwu kele tsughu ko nlò ghue zɛʼɛ zo an ləgha zəla Zə̀ kə ki â ghɛ̀ aŋghəa ghɛ̀ ləmlo â Mughùbè ù sɛ̀ Yɛso Kə̀lestò alefughu ghɛ̀ â mùghù e doʼn təla zo an se e wə̄n è kwuso zo.

²²Ghɛ̀ è deē nduw se e kwuso zo â ghì ghəla tuw kə kpuūw ghee aŋ ghəa ghən;

²³ghɛ̀ è bəghasəa wo à li gho aŋghəa ghɛ̀ bɛlɛbəghaa səa wo ghee aŋ uwə̀n, à li gho ghɛ̀ e deē nduw ghee â se è kwuso zo, ghəəŋ sùghò enyəa ghe e tsəŋo nduw Zə̀ kò — ghɛ̀ ki alenyaŋa ndzʉ tə ghee to, mo ghəa a ghee a biigh ghəla gwən e ughùe e ghee ləghaa enyəa ghe e ghəŋlo n dzəso naŋa.

²⁴Ŋ̀ gɔ̂ŋlo enyəa to sɛ̀ mô fùghù ŋkɔʼso n dzə̀m â Zə̀ kò, Zə̀ kəla kə kwu kele ghɛ̀ enyəa e kwo ko ghɛ̀ lô neē bvʉ̂a, Zə̀ kəla kə lo ghəŋlo enyəa ghɛ̀ eduʼnlo abugho kə kê nî wô ghɛ̀ an səghanyəgha ŋ wə̄n mò ghɛ̀ ki yo nyàaŋ fə udzʉ fə̀ li fo am fə̀ŋ tɛʼɛ.

²⁵Ŋkɔʼso n dzə̀m n lò â Zə̀ kəla kə bəghasə̄ sɛ̀ am bàm e Yɛso Kə̀lestò Mughùbè ù sɛ̀. Ŋkɔʼso, udwaʼa u dzə̀m àsùghò fɔe u kədə̀ŋ ù lo u wə̄n wo alo tənə̀gha tə dzə̀m, an nəghà zən êzə̄ŋ àsùghò to mbī kê bugho mîaa. Zə e lo ko êzə̀.