Read Aghem Edêe Fughu 1 Bible Online

Edêe Fughu 1 - Aghem bible

Edêe Fughu 1

¹Ghən lò ghəa ghəla Yɛso Kə̀lestò fə̀ dê fughu wo â Dzɔ̌n. À fə̀ ghəa a te gho â wə̄n fughu Kəzə̀ enyəa ù dèe tsughu â kɔ̀ɔ ŋ wə̄n mò tò ghe kele tsughu ghəa ghəla a ki alekùʼù nî kə̀bala. Kə̀lestò ŋ ghəəŋ tsughu enyəa ghî à kelê ghəa ghən mò ù tùm ndùw tsə̀ndə̄ghā e wə̄n a vʉ̀a kɔ̀ɔ fə wə̄n fo, tɔɔŋ Dzɔ̌n.

²Dzɔ̌n vʉ̀a ù teso mɛʼɛ̀ fəgha kə̀la ù fə̀ koʼ kùu ndùw shwaʼ u Kəzə̀ àsùghò êsəŋò kùu ndùw Yɛso Kə̀lestò.

³Dzɔ̀ lǒ ghuw wəla ù tɔɔ̄ŋ səā kɔʼɔ̄ shwaʼ u ushʉ̀ghà wə̄n wo, dzɔ̀ lò sugho â ghî ghəla ghe zuw tɔ shwaʼ u te wo, yìa à lò sugho dzɔ̀ â ghì ghəla ghe zuw shwaʼ u te wo bwìi ndùw an dzə̂ e ghə̀a ghəla ghe tɔm naŋā am mwàʼsò kən; tɔŋlo enyəa nəgha zə n sū â ghəa a te gho alenì kə̀bəla.

⁴À lò mugho Dzɔ̌n, Ǹ tɔɔ̄ wô mwàʼsò kən ko â dzweŋe u ghì a Kəzə̀ wən wo sə̀ghàmbəgha u lo an Ɛshìa. Ŋ̀ gɔ̂ŋlò nyəa to Zə̀ kə̀ mô dê ghɛ̀ â dzɔ̀ e wə̄n zo, kə fughuu sughò ghɛ̀ â bughuun zo. À lǒ wə̄n wəla ù lǒ, wəla ù fə̀ lo tsəgha, vʉ̀a ù ki sughò alebùghò. To Zuʼ tə Kəzə̀ ten sə̀ghàmbəgha ghe lo an sə kə ndàŋ e kə̀də̀ŋ e wə̄n mô dêe sughò ghɛ̀ a dzɔ̀ zo, ghe fughuu sughò ghɛ̀ â bughuun zo.

⁵To Yɛso Kə̀lestò wəla ù dèe wô ghəa a səŋò ghəla sɛ̀ lo alenaŋa fə̀ŋ a te, vʉ̀a ù lǒ ghuw ù sûesʉ alekɔʼɔ̄sə̄ alo evʉ̄, wəla ù saʼā dwə̀ŋ wò aŋ ghueekətsə̄, mò dê ghɛ̀ â dzɔ̀ e wə̄n zo, ù fughuu sughò ghɛ̀ â bughuun zo. Ù lə̀ghaa nǔ sɛ̀, vʉ̀a ù bəghasə̄ tsughu sɛ̀ aŋ ghùu bòo tə sɛ̀ tò aŋghəa u fə̀ ù fùghù ndùw tuw kə wə̄n ko an tuw u sɛ̀ an kàŋ tə wə̄n təla tə fə̀ kwəlà sə tsughu wo alo kədàŋlo.

⁶Vʉ̀a ù ghəə̄ŋ tsughu sugho sɛ̌ yia doʼò tsughu naʼe kədə̀ŋ zò, dòʼò tsùghù sùghò tə̀fɔ̀e alefwaʼā â Zə̀ kə wə̄n ko, tɔɔŋ Tsele. To ŋ kɔʼso àsùghò dwaʼa wo u dzə̀m am mbī mô doʼò u wə̄n wo to mbī kê bughò mîa. Zə e lo ko êzə̀, Àkpe!

⁷Kòʼo, ù bùghòo nù am mbàʼ, ghî ghə̀n à dzə̀m kə̂ koʼō nduw wə̄n, àsùghò ghì ghəla ghi mò buʼù tsuʼn sugho wə̄ alo fən wə̄n; ndùm tə̀n tə̀ dzə̀m fɛ am mbī kê dînlò bòʼ ghəa e wə̄n. Zə̀ e ke lo ko êzə̀.

⁸Tsə̂ntə̀mbî Kə̀zə̀ dzɛ̀ enyəa, “Ǹ lo kəzìi, lò sugho Ekuʼù, yìa Ǹ lô sugho wəla ù fə̀ ki lô tsəgha, wəla ù lǒ àsùghò wəla ù ki sùghò alebùghò — wəla ù Ghaʼ tsəgha.”

⁹Ǹ lo Dzɔ̌n wàazə̀ wɛʼɛ, yìa M̀ boo fughu â Yɛso. Mùghò ŋ ghɛ̀ təmdzəə̄ŋ wò aŋ ŋgoʼ zəla ghɛ̀ zuūw àsùghò an zə zəla ghɛ̀ ka tsughu aŋghəa sɛ̀ lô am fɔ̀e ù Kəzə̀. Ghe mò mugho kwu naŋa nû an nàʼà fə dzughù fə̀ li fo, ghe tɔŋlo enyəa alò Patmòs bòʼ mùghò mò kəaa shwaʼ u Kəzə̀, dzàa êsəŋò zəla Yɛso fə̀ dzɛ̂ naŋā.

¹⁰A m bùghò an tsuʼ ù kɔʼso u Mughu ù te wo, zə̀a fə̀ Kəzə̀ fə̀ n tsom kɔʼ mugho, mugho n zuw dzə̀ e tughu a bàâ mùghò e kǔu tò esɔŋ.

¹¹Dzə̀ e te n dzâa tsùghùu enyəa, tɔm tsughu fəgha kəla ghù kǒʼ, ghù tum ndùw mwàʼsò kə te ko â dzweŋe u ghì a Kəzə̀ wə̀n sə̀ghàmbəgha — an Ɛfɛ̄sùs, Smyna Pɛ̀gamò, Tytēlà, Sades, Fìlàdɛfìa àsùghò Lùdisìa.

¹²Ghəa M̀ fwə̂n tsughu alekòʼ ghùw wəla ù kə̀a wo ghəa gho, Mùgho n nùghù bàŋ kòʼ kɔʼ twi u tə lâm wə etsɛ̀ sə̀ghàmbəgha.

¹³A m bvʉa e te zo, mùgho ŋ kôʼ fəgha kə̀ li ko tǒ ghùw mò ù dzəlà kele dàla e dà tsughu kûm nduw alo tə kə̄ŋlō, à kwùu fə etsɛ̀ fò, mò ù n wa tsughu alo kəchīchī.

¹⁴Nyûŋ tə kətuw tə wə̄n tə m fəmà enyə fùuŋ; sə ghə m baŋà enyə bɔ̀ɔ tò uwən.

¹⁵Ghuw a wə̄n ghə n nyəghaŋlo tò kəbvuʼ ghe tsə tsughu alo kənàm, tsoʼso e tsughu, dzə̀ e wə̄n n səa wò enyə to bʉghabʉgha u dzùghù u tâa tsughuu wo.

¹⁶Aŋ ghu kə wə̄n kə̀ zəa ko, ù ŋ ki nsə̀ghàbəlà sə̀ghàmbəgha; nyə fə̀ tɔɔ fə n sə̀ wò an ndzughu e wə̄n mo fə tɔ̂ɔ bàa tə̀ bə̀ghà, sʉ u wə̄n wə n nyəanlo tò zuuw zəla e kɔʼ teē.

¹⁷Ghəa Ŋ̀ kôʼ nduw wə̄n, mùghò m bvʉ̀ dòʼò ndùw a tsəlà wə̄n, dòʼò ndùw tǒ ghùw ù kpǔuw. Ù n daŋso gaʼ tsughu ghu kə wə̄n kə̀ zəa ko a zəŋò mùghò, dzɛ̀ tsughu enyəa, “Kà tsəŋ, Ǹ lo kəsə àsùghò bam ko.

¹⁸Ǹ lo ghùw wəla ù lǒ â tuw ko; M̀ maā kpuw, mùghò ŋ kòom nùghù dòʼò tə̀n wò ebàm â tuw ko, yìa Ŋ̀ ki daʼa ko a zəŋò vʉ zo àsùghò an naʼ zə evʉ.

¹⁹Tɔm tsughu ghəa ghə̀là ghù kòʼo, ghəa ghəla a lo êzə̄ŋ, àsùghò ghəla a naām ki alebùghò nî kə̀bala.

²⁰Nàn kə eghəa kə lo an sə̀ghàbəlà mən sə̀ghàmbəgha ghù mò koʼ aŋ ghu kaŋā kə̀ zəa ko, àsùghò twii u tə̀lâm wə etsɛ̀ wən sə̀ghàmbəgha moʼnlò enyəa; sə̀ghàbəlà mən səghāmbəghā ti an tuw u tsə̀təndə̄ghā tən tə chiīn dzweŋe u ghì a Kəzə̀ wən sə̀ghàmbəgha, twi u tə̀lâm wən vʉa u ti an tuw u dzweŋe u ghì a Kəzə̀ wən sə̀ghàmbəgha.”