Read Aghem Edêe Fughu 10 Bible Online

Edêe Fughu 10 - Aghem bible

Edêe Fughu 10

¹Mùgho ŋ kòʼ kpèʼe ndùw tùghùtughù kə Tsə̀ndə̄ghā e Kəzə̀ è lì e səā tsughuu wô alo kəwālā mò mbàʼ ŋ wən ŋgwûu kɔ̀ʼ, à gbò kəgə̄m ko edzuŋ an tuw kə wə̄n. Sʉ u wə̄n wə n lo tò ezuuw, fwee zə n lo tò nyʉ̀là u uwə̀n.

²Ù ŋ ki nyàaŋ fə unyəme u kəmwàʼsò kə tsʉ doʼō aŋ ghu kə wə̄n, ù n tiso ndùw fwee kə wə̄n kə kwè ù təma wo an dzùghùntsòʼ, tiso ndùw kə kwè ù kwû wò an ghueekətsə̄.

³Ù n zò tsùghu zò kə dzə̂ kə̀ li ko to bəgha kə lô nə̂mlo. Ghəa ù zò sə kɔʼ dzə̀ êzə̀, ghuuw zə̀ n nùghù kwùu è tsughu tənəghā sə̀ghàmbəgha.

⁴Ghəa dəm u eghūuw wən sə̀ghàmbəgha kwûu tsughu, mùghò n so e tɔɔ̄ nyəā tsughu fagha kala ŋ zuw tsughu, dzə̀ è eli dzɛ̀ tsughu wô alo kəwālā enyəa, “Nàla naŋa ghəa yia dəm u eghūuw wən sə̀ghàmbəgha dzɛ, e kwo ko ghù lò tɔɔ̄ naāŋ sugho.”

⁵Tsə̀ndə̄ghā zəla mùgho mò koʼ è ti an dzughù asùghò aŋ ghueekətsə̄ ŋ kele kɔʼ ghu kə wə̄n kə̀ zəa ko edzuŋ,

⁶kɛ̀ tsùghù an zən Zə̀ kəla kə kəla kə mùghù tən, kəla kə fə̀ gbə̂n wo wala ko àsùghò fʉgha wəla u lo a te, gbə̀n wò ghueekətsə̄ àsùghò fʉgha wəla u lo a te; àsùghò gbən wò sùghò dzùghùntsòʼ àsùghò fʉgha wəla u lo a te, dzɛ̀ tsùghù enyəa, “Ghe lo kòom bǒon sùghò yò nəgha zo êzə̄n.

⁷Abugho tsə̀ndə̄ghā è sə̀ghàkəmbəgha lo kuūwn tɔŋ tsughu mbuwlì è wən, nàn kə eghəa kəla Zə̀ kə fə̀ fôʼ naŋa lo nìi nù bəla ko, tò aŋghəa ù ke dzɛ̂ naŋa â ghîishʉ̀gha a wə̄n gho.”

⁸Dzə̀ zala M̀ mô zuw kɔʼ nduw alo kəwālā n dzɛ̀ kpèʼe tsùghù wò â mùghò enyəa, “Ndùw, nǐi kɔʼ nyəme u kəmwàʼsò vʉa u zê doʼò aŋ ghu kə tsə̀ndə̄ghā zə̀a è ti an dzùghùntsòʼ àsùghò aŋ ghueekətsə̄.”

⁹M̀ fi ndùw nǔ a vʉ̀a tsə̀ndə̄ghā zə̀, dzɛ̀ â wən enyəa ù fughuu wô mùghò â nyàaŋ fə nyəme u kəmwàʼsò fə te fo; ù n dzɛ̀ â mùghò enyəa “Nì, ghù pfʉ; kə kpəŋo nu an dzughu zəghà tò təzuw, tia tə sô kuuwn mgbaŋlo an nʉ̀ghà wʉ̀a.”

¹⁰Mùghò n daŋso nì kɔ̀ʼ nyàaŋ fə unyəme u kəmwàʼsò fə te fo, pfʉ̀ è nduw; kə m kpəŋō tò təzuw an dzughu zaŋā, a m bùghò Ŋ̀ kuūwn pfʉ mîi tsughu, kə m mgbaŋlo an nʉghà waŋa.

¹¹Ghe n daŋso dzɛ̀ â mùghò enyəa, “Ghù kì aledzàa kpeʼê shʉ̀ghà u ndə̀mà tə aghì, u ndə̀mà tə tənàʼà wò, u ndə̀mà tə təsàʼà wò àsùghò u ndə̀mà tə udwə̀ŋ wò.”