Read Aghem Edêe Fughu 11 Bible Online

Edêe Fughu 11 - Aghem bible

Edêe Fughu 11

¹Ghe n daŋso fùghù wò mùghò â fòʼ tǒ mbàŋ è nyə̀nlo, ghe n dzɛ̀ â mùghò enyəa, “Nùghù fòʼn tsughu ndughu e Kə̀zə̀ e nē, à tsaʼ kə te ko, ghù taŋ tsughu sugho ghî yia ghe kɔʼso Zə̀ kò a fughu.

²Kà be kə beē kə kuuwn fòʼn dzə̀; zə̀ghaa màʼà chì, nu a m fùghù tsə̀ghà ndùw â Tòʼò zò. Ghe lo dzùghòon naʼ è zɔlɔ zo alo aghùw aŋ ghə̀m n tə̀ndzɔ̀ŋɔ n chìakò à ndzɔŋɔ to tə bə̀ghà.

³Ǹ lo daŋso fughuu tsughu ghê bvʉ̂nɔ̀ʼ ghaŋa ghən à bə̀ghà â daʼa ko aledzɛ̀ ùshʉ̀ghà alo ntsuʼu kam à bɔm tə nstuʼu to tə bə̀ghà à ghè mò ŋghəm tǔu[4] mo ghe dzəlà kèlê ndzʉ tə evʉ̄.”

⁴Ghê bvʉ̂nɔ̀ʼ ghən a bə̀ghà lǒ kàʼ n tə̀ Olèf m bə̀ghà, àsùghò twi u tə̀lâm wò u bʉ̀ghà, ghe yia a ti an sə kə Tsə̂ntə̀mbî wəla ù saʼā mbī e dzə̀m.

⁵Abugho ghùw dzɛ̀ enyəa e so e nomso ghee, wən wə m bəghaan wò səa wò an dzughu e ghee, wə m pfʉ kɔʼ ghîikətuw a ghee. Abugho ghùw dzɛ̀ enyəa e so e nomso ghee, ghe fi ki alewī ghùw ù te an dziī e mɔ̀ʼɔ.

⁶Ghe ki kədaʼa alekə̀ŋò naŋa tsughu kəwālā enyəa ghuuw e lô tsughuu an tì kə̀là ghe dzâa shʉghà u Kəzə̀ wò a te. Ghe ki sugho kədaʼa a zəŋò dzùghùu tò aleghəə̄ŋ tsughu enyəa tə fwəlà kɔʼ təkâŋ, àsùghò alefughu mbī â tsù wò aŋ ŋgòʼ è ezə̄ŋ zəla ghe tsə̂m tsughu abugho à lò ko an nəgha è ghɛ zo.

⁷Abugho ghe lo daŋso dzɛ̂ mɛʼɛ̀ tsughu shʉghà u ghee wo, fɛ̀ɛn kə nyòoŋgwən chia kə lo səa kɔʼɔ wo am bùʼ kəla kə kuʼù yo lo bu kəŋgè ghèe ghee, kə lo təmāzəā kɔʼ ghee, kə wiī maʼà sughò ghee.

⁸Gwən a ghee a lo e nyəŋ ko an dziī è nàʼ è səŋò zəla ghe fə̀ təghàa Mughubè u ghee a te; zən zə naʼ è səŋò è gɔɔ e te lo enyəa, “Sodòm” ŋkāa “Edzìpt.”

⁹Ghî à kê nyəŋo lɛ̂ɛn gwən a ghee alo ntsuʼu n təgha à kə̀m kò, aghî ghe sə an ndùm tə̀n tə̀ ndzə̀m, aghî ghe saʼā saʼà tə̀n tə̀ dzə̀m, ghe sə wo an naʼā tə̀n tə̀ dzə̀m, ghe e tuu enyəa ghe tsəən yo ghee.

¹⁰Ghî a mbī a ke duʼnlo bòʼ vʉ e ghì ghə̀n a bə̀ghà, ghe e zəa, saŋlo, tsɛ̀ʼɛ̀ kǎàŋ ghue e ghee, bòʼ ghiīshʉ̀ghà ghə̀n à bə̀ghà mò fughuu utsû â ghì ghəla ghe mughù am fɛ am mbī.

¹¹A m bùghò tsùʼù mən n təgha à kə̀m kò tsə̀ghà tsughu, Zə̀ kə̀ n fùghù wò Zuʼ təla tə fughuu mughù zò tə m bùghò nyə̌ən tsughu a zəŋò ghee, ghe n nùghù tème wò am fwee e ghee, fə̂ŋ tə̀ n sə mîaso ndùw ghì ghəla ghe mò ti fughu lɛɛn nduw ghee.

¹²Ghe n zuw ghùw ù lì ù dzɛ̀ tsughu wô alo kəwālā an dzə̂ è tughu â ghee enyəa, “Nùghu kɔʼ wò nlò fɛ!” Ghe n nùghù kɔ̀ʼ ndùw alo kəwālā am mbàʼ mo ghîikətuw a ghee yì tɔʼɔ̀ lɛ̌ɛn wo nù nu an sə a ghee.

¹³An nə̀gha e te zo, ghueekətsə̄ kə biso nùghù nòʼ ŋgə̀a è wo, dəŋò kə enaʼ kə te ko kə mɔ̀ʼ abugho a dzughùu tsughu naʼ zo alo udwə̀ŋò eghə̄m, kə m bɛ̀lɛ̀ bvʉ̀ è tsughu. Kam tə aghì tə̀ m kpuw an nòʼ e te zo sə̀ghàmbəgha. Fə̂ŋ tə̀ n ti sə ghî à li yì fughu ghe mò taʼkè kpuwnlo, ghe m fughu ukɛɛ â Zə̀ kə kəwālā ko.

¹⁴Tsû u kə̀bə̀ghà ù ne wə̀ n tsə̀ghà, gha kə səa yo mo u kə̀təgha u kâ bùghò.

¹⁵Tsə̀ndə̄ghā è sə̀ghàkəmbəgha n daŋso tɔŋ tsughu mbuwlì è wə̄n, a n zuw dzə̂ tə̀ tughu tə̀ li to alo kəwālā tə dzâa wô enyəa, “Naʼ e mbī zə m bùghò dòʼò fɔ̂e u Tsə̂ntə̀mbî ù sɛ̀ wò ghèe Bəghambī u wən: wəla ù fə̀ tsɔʼ kɔʼ, ù ke e saʼa tuw u aghì wò to mbī kê bughò mîaa.”

¹⁶Tsoʼ tən ŋghəm m bə̀ghà à ghè tò tə chìakò ghe mò doʼ an ndàŋ tə udwə̀ŋ tə ghee a vʉ̀a Zə̀ kò n nùghù bvʉ̀ pfʉ̌ɔ ndùw sʉ e ghee a ghueetsə̄, kɔʼso ndùw Kə̀zə̀.

¹⁷Ghe n dzâa tsùghù enyəa, “Tsə̂ntə̀mbî Zə̀ kə̀ Ghaʼa kən kə̀ dzə̀m kəla kə mò lô tsəgha, chi kə lo! Ghàʼ fughuu zɔ̀ɔŋ kə̀a enyəa ghù n nì daʼa kə̂a kə̀ ne ko ghù vʉ̀a ghù kàʼ ndùw alesāʼ tuw u aghì!

¹⁸Toʼò e mò ŋgee pfʉso n nəghà bòʼ nəgha zəla ghù so e dê nʉ̀ghà wʉ̀a u pfʉa wo a te m kpē, àsùghò nəgha zəla ghù ki alesaʼ ghî à kpuuwn gho a te kpe tsughu. Nəghā zə m kpe alenamsô kɔ̀ɔ mə̀ghà, ghiīshʉ̀ghà ghə̀a, àsùghò ghì ghə̀a ghò a dzə̀m, ghî ghə̀n a dzə̀m ghe fughuu ghû â kɔʼso mò, ne ghò àsùghò bvùʼù mə̄n. Nəghā zə m kpe â ghù aleləŋê ghì ghəla ghe sâʼ maʼa mbī.”

¹⁹Ndughu e Kəzə̀ è ne alo kəwālā n daŋso nùghù tsʉ̀ è tsughu, a ŋ koʼō nyə̌a ndùw tɛtɛ kə ŋkāa kə wə̄n a fughu. Ghuuw zə n nùghù mwɛ̀ɛn kǎaŋ wò ènyə, a n zuuw mbɔ̂ŋ àsùghò dəm kə eghūuw, ghueekətsə̄ kə n noʼò, tiatia mə̀ ŋ ŋgee tâa.