Read Aghem Edêe Fughu 13 Bible Online

Edêe Fughu 13 - Aghem bible

Edêe Fughu 13

¹Mùghò ŋ kòʼ ndùw nyòoŋgwən è lì è səā kɔʼɔ̄ wo an dzùghùntsòʼ, mò è ki utuw sə̀ghàmbəgha à ndɔŋ to eghə̄m, Zə̀ ŋ ki umgbɛ̄ eghə̄m an ndɔŋ tə te to àsùghò zən gho an tuw u wə̄n u te wo u dzə̀m, mo zən a te a sûuwn ndùw Kə̀zə̀.

²Nyòm e te fə̀ lo ko tò kəbəgha, ghuw a wə̄n ghə n dûuw, ki tənyûŋ a te, nyʉagha u wən wə n dâa tò ghuw a nyòoŋgwən è lì ghe tɔŋlo enyəa à lò bɛ̂ɛ, dzughu e wə̄n zə n lo tò dzughu e tsɛɛ̄kəbə̄ghā. Ŋgəm zə m fùghù ndùw daʼa kə wə̄n â nyòoŋgwən e te, fùghù sùghò ndàŋ è kə̀də̀ŋ è wə̄n, àsùghò ndə̀mà tə udwaʼa tə wə̄n to alesaʼa tuw u aghì wò.

³Tuw kə wə̄n kə mɔ̀ʼ kə̀ n lo tò kə ki fɛ̀ɛn fɛ̂ɛn kə efəŋ, fɛ̀ɛn kə efə̄ŋ kə wən kə te kə ŋ kè e tsughu, tuw kə m kpuw aghî a dzə̀m am mbī, ghe n sə̀ təŋò ndùw a bàâ nyòoŋgwən è te.

⁴Ghî ghə̀ m fughu ŋkɔʼso â ŋgəm zə̀, tɔŋlo enyəa è mò fughu tsughu dwaʼa u wə̄n â nyòoŋgwən zə̀, ghe ŋ kɔʼso nyòoŋgwən zə̀, dzàa tsùghùu enyəa, “À lò ndugho tǒ nyòoŋgwən è te a, à lò ndugho alebū kəŋgě ghèe wə̄n à?”

⁵Ghe zə̀ghàa tsùghu nyòoŋgwən enyəa zə̀ è ki dzughu e biigh zo, sùuwn sùghò Kəzə̀. Ghe n zə̀ghàa tsùghù sùghò enyəa è dèe kəŋo ndûw dwaʼa u wə̄n aŋ ghə̀m n tə̀dzɔ̀ŋɔ n chìakò à ghè tò tə bə̀ghà.

⁶Nyòm e te n nùghù dzaʼ kɔʼ edzughu sùuwn səā wô Kə̀zə̀; sùuwn zən e Kəzə̀ àsùghò luʼu kəla Zə̀ kə̀ mughu a te àsùghò ghì ghəla ghe mughu fughu alo kəwālā.

⁷Ghe n zə̀ghàa tsùghù sùghò wən enyəa ù sòʼò ndûw ghì à Kəzə̀ à zɔlɔ gho an tsam, ù təmāzəā kɔʼ ghee. Ghe m fughu tsughu wə̄n â daʼa ko enyəa ù è lɛɛn ndughu tən tə̀ dzə̀m, ghî ghə̀n à dzə̀m, ghî ghəla ghe saʼa saʼà tə tənàʼà ten tə̀ dzə̀m àsùghò tùu tə̀n tə̀ dzə̀m.

⁸Ghî ghə̀n à dzə̀m ghe mughù aŋ ghueekətsə̄ lo e kɔ̄ʼsō sugho wə̄n, ghî ghəla ghe fə̀ so e bughò bɔm mbī mo zən a ghee a kaān nyə am dzə̀ mwàʼsò kə emùghùu kə Tsʉa u Ndzì wəla ghe fə̀ sugho wī.

⁹Mò ghùw ki kətuŋlō, ù zuw.

¹⁰Abugho ghùw lǒ mo ghe lô wə̄n ki alekwuū fêe naŋa an ndughùtsaʼ, ghe lô wən telè kwǔu fèe nǎaŋ ko alo kətə̀ŋ. Abugho ghe ki alegbòo wi ghùw alo kəkɔ̀ɔ, ghe lô wə̄n telè wǐi ko ezə̂. Ghəa ghən fɛ dèe tsùghu enyəa ghî a Kəzə̀ à zɔlɔ a ki alekaā tsughu ezə, ghe naŋa tsughu kô fə̀ŋ tə ghee a zəŋò Zə̀ kò.

¹¹Mùghò n daŋso kòʼ kpèʼe ndùw nyòoŋgwən è ne è lì è sə kɔʼ wo aŋ ghueekətsə̄. Zə̀ ŋ ki təndɔ̄ŋ tə bə̀ghà tǒ ndɔŋ tə tsʉa u ndzì ù li wo, kuuwn bʉghaa səā wò dzə̀ ènyə tǒ ŋgə̄m.

¹²Zə̀ n dêe dwaʼa u nyòoŋgwən è sʉ̂seʉ zə̄n u dzə̀m an sə kə nyôm e te, zə̀ ŋ ghəŋlo ghueekətsə̄ àsùghò ghî ghəla ghe mughu a te ŋ kɔʼso sugho nyòoŋgwən è sûesʉ zə̀, zəla fɛ̀ɛn fɛ̂ɛn kə efə̄ŋ kə wə̄n kə̀ mò ke tsughu.

¹³Zə̀ n dêe sə̀ghàa m fɛ̌ɛn mò, bùʼù ghə̌əŋ sùghò wən wə n nùghù sə̀ tsùghù wò alo kəwālā, tsùghù wò aŋ ghueekətsə̄ mo ghî à ti nû.

¹⁴An sə̀ghàa məla ghe fə̀ zəghàa tsughu enyəa è dè an sə kə nyôm zə̀, zə̀ sèe mə̀ŋsô ghì ghəla ghe mughù aŋ ghueekətsə̄. Nyòm e te n dzɛ̀ â ghee enyəa ghe e bɔɔ̄ kɔʼ fəmùʼù am fwěen kə nyòoŋgwən zəa ghe mò kaʼ alo kəkɔ̀ɔ, zə̀ n naām lò â tuw ko.

¹⁵Ghe n zə̀ghàa tsùghù sùghò enyəa nyòoŋgwən zə zʉ̂e nyəā tsughu təzuʼ am mùʼù fə fwèen kə nyòoŋgwən è sûesʉ zə̀ to fə e lo alebùʼù kə̂aa àghəa, tò mùʼù fə te fə lo aleghəŋlo ghe ŋ gbòon wîin ghì ghəla ghe tue alekɔʼsô ghè fò.

¹⁶Nyòm è te ŋ ghəə̄ŋ tsughuu sughò enyəa ghe tsə̂sò naŋa tsughu aghî à dzə̀m, ghî à ne gho àsùghò bvuʼù mə̀ aghì mò, ghî a kuu gho àsùghò à laa gho, ghî ghəla ghe ndzə̂m mughu àsùghò kɔ̀ wò, enyəa ghe tsə̂sò naŋa tsughu ghee aŋ kwe u təma wo ko ŋkāa aŋ kwàʼ u usʉ̄.

¹⁷To e doʼò tsughu ghùw è yo dzə̂ alezue kəfəgha ŋkāa alefèe mò ù kì yo tsə̌a è te, mò tsə̌a è te lo zən e nyôm è te ŋkāa tàŋ è zə̀n e wə̄n.

¹⁸Ghùw kì aleki tɔ wo â wə̄n alezuūwkɛlɛ̂ ghəa ghən. Ghùw wəlà ù ki tuw ko, ù kəŋo səā kɔʼ tàŋ è nyòoŋgwən è te, nu à lǒ taŋ zəla e an ti an tuw kə ghûw, tàŋ è te lo 666 (mbɔm tǔu à ghə̀m mò tǔu à ghè mǒ tǔu).