Read Aghem Edêe Fughu 14 Bible Online

Edêe Fughu 14 - Aghem bible

Edêe Fughu 14

¹Mùghò m bàŋ lɛ̀nlo è nduw, kòʼ ndùw Tsʉa u Ndzì u te wo aŋ kwàʼ u Zayòn, ù n lo ghèe ghêe ghì gho 144,000 (ghèe ghê kam zə̀ àghì fəbɔm à ghè ghò ŋ ghəm n chìako à ghì ghò a chìakò.) Ghî ghən ŋ ki zən e wə̄n àsùghò zən e Tsele zo ghe tɔm naŋā kɔʼ aŋ kàʼ mə̀ èsʉ ŋ ghee.

²Mùghò n zùw kɔʼ ndùw dzə̀ è lì alo kəwālā to dzughùu tə̀ lô kuŋu àsùghò tò ghuuw e lô kwuū; dzə̀ e te ŋ kûu tò ghî a lò buʼu bôm kə ntee ko.

³Ghe n zoo tsughûu zom è fughu zo an sə kə ndàŋ è kə̀də̀ŋ te, asugho an sə fʉgha wən u chùakò u lo â tuw ko àsùghò an sə kə tsōʼ tì. Ghùw n yo alezoʼn zom zə̀ mò à gɔ̀ʼɔ̀ ko yo kam zə̀ àghì zən fəbɔm à ghì ghò ŋ ghə̀m n chìakò à ghì ghò a chìakò ghe fə̀ bəghasə̄ tsughu am mbī.

⁴À lò ghî ghən ghe lo mo ghe kaām dzəso ghue e ghee zo ghèe ghê ghìzən gho; nu ghe naam lo mo ghe kaam kwo yo wìzən. À lǒ ghee ghən Tsʉa u Ndzì u te u tsəghàa ko a ghɛ ghe n lo a bàâ wə̄n. Ghən lǒ ghee ghəla ghe bəghasə̄ tsughu aŋ ghu kə ghùw nsɔ̌ɔŋnchùw, ghe lo to fəgha kə sûesʉ kəla kə kwən wo an usum a fughuu kɔʼɔ â Zə̀ kò ghèe Tsʉa u Ndzì u te wo.

⁵Ghe ka fə̄ kaʼ kò tsə̀gha dzə̀ gha zo, nu ghe dzʉ u li wo am mùghù e ghee.

⁶Mùghò n daŋso nùghù kòʼ kpèʼe ndùw tsə̀ndə̄ghā è lì è zəghāa kaŋlo edzuŋ, mò ù kǐ làbəlà e dzùŋ zəla è dòʼò tən alenàʼà â ghì ghən a dzə̀m ghe mughu aŋ ghueekətsə̄, â nàʼà mə̀n n dzə̀m, â ndùm tə̀n tə̀ dzə̀m, â tùu tə̀n tə̀ dzə̀m, àsùghò â ghì a sàʼà tə tənàʼà tən tə dzə̀m.

⁷Ù mo an zò kə dzə̂ enyəa, “E tsəŋo nduw nlǒ Zə̀ kò, ghɛ̀ è fughuu nduw ghè kò â kɔʼso mò, tɔŋlo enyəa nəgha e wə̄n è saʼa zə aghì zə̀ m kpē; e fughu nduw nlò kɔʼso mò â ghùw wəla ù fə̀ bɔm wala ko à ghueekətsə̄ ko, dzùghùntsòʼ àsùghò nndzînlò”

⁸Tsə̀ndə̄ghā è kə̀bə̀ghà n dzûum wò è sûesʉ zə̀ nàʼn wò enyəa, “Ù n tsùghù bvʉ̀, Babilɔ̀n tuw kə enaʼ kə n tsùghù bvʉ̀. Naʼ e ne a zəla e fə̀ ghəə̄ŋ tsughu nàʼà mə̀n n dzə̀m m muʼ mʉ kɔʼ aŋ ghəa a ghee a nuūŋ kaaŋ gho to ghe lô muʼu mʉā lʉ̀ mò.”

⁹Tsəndə̄ghā è lì kpeʼe, è kə̀təgha n dzûum wò tə̀ li tì tə̀ bə̀ghà, nàʼn wò an dzə̂ e tughu enyəa, “Abugho ghùw kɔʼso nyòoŋgwən è te àsùghò mùʼù fə wə̄n fəla fə fweēn wə̄n, ghe yia tsə̂sò tsughu wə̄n aŋ kwàʼusʉ̄ ŋkāa aŋ ghu,

¹⁰ù lo muʼu mʉa sùghò nù nʉ̀ghà u Kəzə̀ ù pfʉa wo, mo ghe tsom dzə̀n tsughu aŋ wùa è Kə̀zə̀ è nʉ̀ghà ù pfʉa wo mo ghe kâ nyɔ̀mlò, ghe fɔeso tsughu wə̄n am fɛ̀ɛn kə uwə̀n mo zuʼ kə̀ biigh kə̀ li səa wò fùghù èzə̀ an chia tə ŋwə̀n təla ghe tɔŋlo enyəa à lò sulfò, an sə kə tsə̀təndə̄ghā tə̀ zɔlɔ tì àsùghò an sə kə Tsʉ u Ndzì u te wo.

¹¹Nyoʼ kə uwə̀n kəla kə fəmso ghee lo e kɔʼɔ ndùw edzuŋ, kɔʼɔ təla ndùw ko êsəŋò. Ghee ghəla ghe kɔʼso nyòoŋgwən è te àsùghò mùʼù fəla fə fweēn wə̄n àsùghò chìa wəla ghe tso fughu tsughu wə̄n â tsə̌a e wə̄n, ghe a te a kê tsò yò alezʉ̀nlò eghue â tsə̀ tò ŋkāa â tsuʼ wo.”

¹²Zən lò ghəa zəla e dê tsughu enyəa ghî a Kəzə̀ à zɔlɔ a ki alekɔlɔ tsughu təfə̂ŋ, tɔ̂ɔŋ ghì ghəla ghe naāŋ lâŋ kə Kəzə̀ kò, gaʼ sùgho fə̀ŋ è ghee a zəŋò Yɛso.

¹³Mùghò mo e daŋso zuw dzə̀ è lì è dzâa tsughu wo alo kəwālā enyəa, “Tɔm naŋa tsughu ghəa ghən gho: Dzɔ̀ lò ghî a kpuuwn ghəla ghe mò kpuw aŋ ghəa e Mughu ù te alenìi nughù tsughu êzəŋ.” Zuʼ tə Kəzə̀ tə̀ dzɛ̂ enyəa, “Dzɔ̀ kùm lò â ghee, enyəa to ghe mô zʉ̂ʉn tsughu am fwàʼ kəla ghe fwaʼ, nu fwàʼ kə ghee kə ndûw dzə̌əŋ ko ghèe ghee, dêe wò fəgha kəla ghe lo ghè kò.”

¹⁴Mùgho mo e baŋà lɛ̌ɛn ndùw nù, mùghò ŋ kòʼ ndùw mbàʼ è fə̀ma è lì, mo fəgha kə̀ li kə doʼ a te, kə n lo tǒ ghùw à mbɛ kə etsɛ̀ ko alo kətuw, àsùghò tɔ̀ɔtɔ kə ŋgwɛlɛ kə fənyə ko aŋ ghu.

¹⁵Tsə̀ndə̄ghā è li n sə kpeʼe wò an ndùghù e ne è Kəzə̀, dzàŋa tɔ̌ɔŋ ndùw ghùw vʉ̀a ù mò doʼ am mbàʼ zə enyəa, “Dzə̀la nyə ndùw nyə fəghà fò, ghù kəa fʉgha wo, nu nəgha è kwuū kwəla e ufʉgha zə m kpē aŋ ghueekətsə̄.”

¹⁶Ghùw vʉ̀a ù mò doʼ an mbàʼ zə fi shʉ̂aa wò nù nyə fə wə̄n fo aŋ ghueekətsə̄, kwùu nùghù kɔ̀ʼ ufʉgha a te a te, dùum nùghu kwən e nduw.

¹⁷Tsə̀ndə̄ghā è lì n sə kpeʼe wò an ndùghù e Kəzə̀ è ne zə̀a è lò alo kəwālā à tɔ̀ɔtɔ kə ŋgwɛlɛ kə fənyə ko an ghu sughò.

¹⁸Tsə̀ndə̄ghā è li n daŋso sə wo aŋ kəŋ e te zo, tsə̀ndə̄ghā zəla e ki daʼa ko a zəŋò wən wo, zə̀ n dzàŋ tɔ̀ŋɔ ndùw tsə̀ndə̄ghā zə̀a e mò ki tɔ̀ɔtɔ kə ŋgwɛlɛ kə fənyə chi ko enyəa, “Dzə̀la nyə ndùw nyə fəgha fò, ghù e kwɛɛ̄ nduw mbuuŋ mò alo kəkāʼ aŋ ghueekətsə̄, tɔŋlo enyəa twam u wən wə m bàŋlò.”

¹⁹Tsə̀ndə̄ghā e te n shùaa nyə̀ ndùw nyə fə wə̄n aŋ ghueekətsə̄ kə̀a kɔʼ kwaʼ wə mbǔŋlo u te wo màʼà nyə̀ tsughu am faŋkwu kə etsugho kə nʉ̀ghà u Kəzə̀ ù pfʉa wo.

²⁰Tsugho e te zə n dòʼò sə ndùw â ŋgwəlā gho, ghe n dzughòon mbùŋlo n te mò, à n ŋ kuŋu səa wò tə̀kǎŋ fughu alo etsūgho mò tə məən nyəa tsughu ndùw tò tətàm tə bə̀ghà, zə̀ ŋ kùŋ mîasò ndùw tò alendùw kɔʼɔ tɛ̂ kam e tətàm mbɔm n təgha.