Read Aghem Edêe Fughu 15 Bible Online

Edêe Fughu 15 - Aghem bible

Edêe Fughu 15

¹Mùghò n daŋso kòom kòʼ kpèʼe ndùw kɔ kə fɛ̀ɛn fɛ̀ɛn kə tsə̌a kə̀ li ko, à mò lo tsə̀təndə̄ghā sə̀ghàmbəgha àsùghò zəŋ təla tə fə doʼò gûŋsò tsughu sə̀ghàmbəgha; tɔŋlo enyəa Zə̀ kə̀ lo so e dêe gûŋsò tsughu nʉghà u wə̄n ù pfʉa wo ghèe ghee.

²Mugho n daŋso kòʼ ndùw fəgha kə̀ li ko kə fwēen ko dzùghùntsòʼ è kə̀lùwŋgɛ̀lɛ è fɔ kɔʼ ghèe wən wo, ghî ghəla ghe mò ghaʼ tsughu nyòoŋgwən è te ghèe ghê mùʼù fə wə̄n fəla fə mò fweēn wə̄n, àsùghò tàŋ è zən e wə̄n n ti a ŋgùŋ è dzùghùntsòʼ è kə̀lùwŋgɛ̀lɛ zə̀, à gbòm wə ntee wò aŋ ghu, Zə̀ kə̀ fughu tsughu a ghee.

³Ghe n zôo zom zəla à fə̀ bughòo tsughu Musî kɔ̂ɔ fi Kəzə̀, asùghò e Tsʉ u Ndzì zò, dzàa tsùghùu a te enyəa, “Tsə̂ntə̀mbî, Zə̀ kə̀ ghaʼa kən kə̀ dzə̀m, ghəa ghə̀a à ghəəŋ gho a bòʼò ghàʼa kwò enyə a, Ôo Də̀ŋ kə mbī ko! Ghəa ghə̀a à lo tsəghatsəgha, lò sugho êsəŋò.

⁴À lò ndūghō ù yò alestə̄ŋ ghu a Tsə̂ntə̀mbî, ù tàʼkè fughuu wô ghù â kɔʼso an zən zəghà mò a? Nu à bɔ̌ɔm zɔlɔ ko ghù â nəŋ ko. Aghî a dzə̀m an nàʼà mə̀n n dzə̀m kè bùghò tə̀ma tə̀ŋguʼ a tsəlà ghù, tɔŋlo aghî a dzə̀m ŋ ko enyəa ghəa ghəla ghù ghəŋlo a lo tsəghatsəgha.”

⁵Ghəa zən n tsə̀ghà è tsughu, mugho ŋ kòʼ ndùw ndùghù e Kə̀zə̀ è ne alo kəwālā, pfʉ̌a kàa ŋ Kəzə̀ kə̀ n lo mo kə n tsʉ̀ dòʼò.

⁶Tsə̀təndə̄ghā tən sə̀ghàmbəgha ghe mò ki zəŋ tən sə̀ghàmbəgha n sə̀ wò fughu an Ndùghù è Kə̀zə̀ e ne, mo ghe n dzəla dàla tə̀ nee tə̀ fəma nyəghaan to a zəŋo eghùe; à kwùu mə̀ estɛ mò mo ghe ŋ wā naŋā alo kəchīchī.

⁷Kəfəgha kə mɔ̀ʼ am fʉgha vʉ̀ u chùako u lo â tuw ko m fùghù ndùw kə̀ŋò mə̀ ètsɛ̀ sə̀ghàmbəgha â tsətəndəghā tì sə̀ghàmbəgha; kə̀ŋò mə̀ e tsɛ̀ mən fə̀ lo mo ghe lueso naŋa nʉghà u Kəzə̀ ù pfʉa wo a te, tɔ̂ɔŋ Zə̀ kəla kə doʼò tən.

⁸Nyoʼ wə n nyə lue tsughu an Ndùghù è Kə̀zə̀ e ne e te, mo u sə wò an səghanyəgha ŋ Kə̀zə̀ àsùghò an daʼa kə wə̄n, ghùw n yo alekòom tsə̀ghàa nyə fughu an ndùghù è Kəzə̀ e ne e te mo zəŋ tì sə̀ghàmbəgha tə nughù wo aŋ ghùu tsə̀təndə̄ghā tì sə̀ghàmbəgha kâ bùgho tsə̀ghà mîaa kɔ̀ʼ dzə̀.