Read Aghem Edêe Fughu 16 Bible Online

Edêe Fughu 16 - Aghem bible

Edêe Fughu 16

¹“Mùgho n daŋso zùw nyə̀ ndùw zò kə dzə̂ kə̀ li ko fughu an ndùghù Kə̀zə̀ e ne è dzàa nduw â tsə̀təndə̄ghā tì sə̀ghàmbəgha enyəa, ‘Ndǔw kwə̀la màʼa tsughu kəŋò n nʉ̀ghà m pfʉa ŋ Kəzə̀ mì sə̀ghàmbəgha a ghueekətsə̄!’ ”

²Tsə̀ndə̄ghā è sʉesʉ zə fi daŋso ndùw kwə̀n màʼà sə̀ wò nù u wən wo ukwəŋ, zəla nʉghà ù pfʉa u Kəzə̀ ù mô lo a te aŋ ghueekətsə̄. Aŋghəa Tsə̀ndə̄ghā zə kwə̂n maʼà sə wo nʉgha u Kəzə̀ ù pfʉa wo êzə̀, fɛ̀ɛn tə fɔɔn tə nsə̀ghà tə̀ li tə n sə kaaŋ kɔʼ a zəŋò ghì ghəla ghe mò ki tsə̌a è nyòoŋgwən è te àsùghò a zəŋò ghì ghəla ghe mò fughuu kɔʼso mò â mùʼù fə nyòoŋgwən e te.

³Tsə̀ndə̄ghā è kə̀bə̀ghàa n ndùw kwə̀n màʼà ndùw vʉa u mò lô alô u wə̄n wo ukwəŋ an dzùghùntsòʼ. Aŋghəa è kwə̀n nduw êzə̀, dzùghùntsòʼ è te m fwə̀n kɔ̀ʼ təkâŋ, tò kâŋ tə ghûw ù kpǔuw, nyòo mə̀n n dzə̌m fughu an dzùghùntsòʼ mo è kpuwnlo.

⁴Tsə̀ndə̄ghā è kə̀təgha n daŋso ndùw kwə̀n màʼà nyə tsughu vʉa aŋ kwə̀ŋ u wə̄n alo tədzùghùu àsùghò alo nndzînlò, dzughùu tə te àsugho nndzînlò n te mə̀ fwə̀n kɔʼ alo təkâŋ.

⁵Mugho n daŋso zuw tsə̀ndə̄ghā zəla è lɛnlo â dzùghùu tò dzɛ̀ tsughu enyəa, “Ôo ù Zɔ̀lɔ, ghù wəla ghù lǒ, mò ghù fə̀ lo tsəgha nû, ghù lò tsəghatsəgha an saʼ təghà tən.

⁶Tɔŋlo enyəa ghî ghə̀ ŋ wiin ghî a zɔlɔ gho àsùghò ghǐishʉ̀ghà ghə̀a ghò, kâŋ tə ghee tə n tsughu tsughu aŋ ghueetsə̄, ghù vʉ̀a ghù fughu ghî a te gho â kàŋ tò enyəa ghe mʉ; à lò namso kəla kə kpe â ghee.”

⁷Mùghò mo e zuw dzə̀ è li n daŋso dzɛ̀ sə wò fughu alo kətsāʼ enyəa, “Ǒo, Tsə̂ntə̀mbî, Zə̀ kə ghaʼa kən kə̀ dzə̀m, saʼ təgha tə̀ lo êsəŋò lò sugho tsəghatsəgha!”

⁸Tsə̀ndə̄ghā è kə̀chìakò ŋ kwə̀n ndùw fəgha chìa ù mò ki alo u wə̄n wo ukwəŋ alo ezūuw, aŋghəa ù kwə̀n ndûw êzə̀, Zə̀ kə̀ n zə̀ghàa tsùghù enyəa zuw e te e nyɔ̀ʼnlò àghì alo ŋwə̀n.

⁹Ghî ghə̀ m pfʉ tsughu am bòobò kə enùm kə te ko, ghe ŋ kàʼ ndùw aletsɔ̀ɔm zən e Zə̀ kə̀la kə ki daʼa ko a zəŋō zəŋ tən to, ghe ŋ kè ŋgəmso tiī kuūwn fə̀ŋ tə ghee aŋ ghəa a ghee a biigh gho, ŋkāa alebùʼù fughu ndûw kɔʼso ndûw wə̄n.

¹⁰Tsə̀ndə̄ghā è kə̀tɛ̀ n daŋso kwə̀n ndùw nʉgha u Kəzə̀ ù pfʉa vʉa aŋ kwə̀n u wə̄n an ndàŋ è kə̀də̀ŋ e nyòoŋgwəŋ è te, aŋghəa ù kwə̀n nduw êzə̀, ləm kə n nùghù bvʉ̀ tsùghù an naʼ e wə̄n, ghî ghə̀ m pfʉa àsɔŋ enyə am fɔɔn zo ghe zuūw.

¹¹Ghe n tsɔɔ̄m Zə̀ kə kəwālā bòʼ fɔɔn zəla ghe zuūw àsùghò an səghà mia ghe ki, ghe ŋ kè ŋgəmso tiī kuwnlo aŋ ghəa a ghee biigh ghəla ghə ghəŋlo.

¹²Tsə̀ndə̄ghā è kə̀tǔu zə ŋ kwə̀n màʼà sə̀ nduẁ nʉgha u Kəzə̀ ù pfʉa wəla u mò lo alô u wə̄n wo ukwəŋ an dzughùu è nêene zəla ghe tɔŋlo enyəa à lò Dzùghù è Yufə̀lɛ̀t, aŋghəa ù kwə̀n tsughu êzə̀, dzùghù e te n zueme è kɔʼ, alefughu dzì â dwə̀ŋ wəla u sə wo an tsə kə tsə̂ kə̀ səa ko.

¹³Mùghò mo e kôʼ zə̀a m biigh n li mò n təgha tò utwsàm u səā wo an dzughu e ŋgəm zə̀, səa wò sughò an dzughu e nyòoŋgwən zə̀ àsùghò an dzughu e ghûwshʉ̀ghà wə̀ àgha vʉ̀.

¹⁴Ghe lo zə̀a m biigh mò ghe dêe sə̀ghàa mò, ghe səa ndùw an nàʼà tə beē to, ndùw kòʼò dwə̀ŋ u nàʼà tə te to, alendùw tughuso naŋā tsughu ghee alesəa wo an tsām an tsuʼ ù nêene u Zə̀ kə̀ ghaʼa kə kə̀ dzə̀m.

¹⁵Mughu ù te n dzɛ̀ enyəa, “Kòʼô, M̀ bughòo tǒ ghùw ù ghùwtsɔ̀ŋɔ lô bughoo an nəgha zəla ghɛ̀ kwo naŋa yo! Dzɔ̀ lǒ ghùw wəla ù naām koʼō, vʉ̀a ù ki tən ndzʉ tə wə̄n to enyəa ù lô səā ŋgəaa kaŋlo â tuè kò a beē, ù kelê tuw kə̀ dəla ko!”

¹⁶Zə̀a m bǐigh mi n daŋso tɔŋɔ zuuŋ tsùghù udwə̀ŋ an lùʼù kəla ghe tɔŋlo an shwaʼ u Hebə̀lù enyəa à lǒ Àmàgɛ̀dɔ̀n.

¹⁷Tsə̀ndə̄ghā è sə̀ghàkəmbəgha n nì kɔ̀ʼ nʉgha u Kəzə̀ ù pfʉa wəla u lo alô u wə̄n wo ukwə̀ŋ kwə̀n màʼà kɔ̀ʼ e dzūŋ, aŋghəa ù kwə̀n kɔʼ êzə̀, mùgho n daŋso zuw dzə̀ è lì è dzɛ̀ sə wo fughu an ndàŋ è kə̀də̀ŋ an ndùghù è Kəzə̀ e ne an dzə̂ è tughu enyəa, “À kpomkəsoʼ!”

¹⁸Ghuuw zə ŋ kaʼ tsughu emwɛ̂nlò, bɔ̀ŋ mə̀ n səa wò fughu, ghuuw zə ŋ kəmà sùghò, luʼū tə m fɛ̂ɛn nòʼò enyə, mo e kaam sə kòʼ êzə̀ aŋ ghu echìa ghùw fə̀ doʼò wo aŋ ghueekətsə̄.

¹⁹Naʼ è ne e te zə n nùghùu dzùghùu tsùghù alo ugbà u tʉgha, naʼà tə aghì tə̀ n sàʼà bvʉ̀ kǎaŋ wo enyə. Zə̀ kə̀ m môʼn kô kɔ enaʼ kə Babilɔ̀n, enyəa kə̀ muʼu mʉa ko nǔ fɛ̀ɛn kə nʉ̀ghà u wə̄n ù pfʉa wo.

²⁰Nàʼà n dzùghùu mə̀n n dzə̀m mo è saŋa, kaʼà tə̀ ŋ kôom yò sughò.

²¹Ŋgɔ̀ʼɔ̀ tə n tiatia tə̀ li tə ŋ kaʼ tsughu aletsughu a zəŋò ghì ghò, fòʼ zə edə̀n e tiatia n te m fə̀ lo tò dên e mbə̀ghà è sème, ghî ghə̀ ŋ kàʼ ndùw Kə̀zə̀ aletsɔ̀mlò an ndzəgha kə ntiatia kə te ko, nu ndzəgha kə te kə fə̀ fɛɛ̄n ndɔŋ kətuw.