Read Aghem Edêe Fughu 17 Bible Online

Edêe Fughu 17 - Aghem bible

Edêe Fughu 17

¹Tsə̀ndə̄ghā e mɔ̀ʼ n sə tsughu an tsə̀təndə̄ghā tì sə̀ghàmbəgha ghe mò ki kwəŋ zə̀ sə̀ghàmbəgha, bùghò dzɛ̀ â mùghò enyəa, “Bùghò, Ǹ so n dêe wô ghù â ŋgoʼ zəla a lo naāŋ kpàlà[5] kə fùŋù uzwɔ̀ŋ kən a te, kpàlà kəla kə nyaʼ an tuw kə enaʼ zəla e mò bəgha doʼo aŋ ŋgùŋu tə tədzùghùu.

²Dwə̀ŋ u mbī wə ŋ ghue zo ghèe ghee nūŋlò, ghî a mbī ghe ŋ kàn dòʼo ndùw an lʉ̀ məla ù fughu â ghee enyəa ghe nyəə̄ŋ ghèe wə̄n.”

³Zuʼ tə zɔlɔ tə n nyəən tsughu mugho, Tsə̀ndə̄ghā è Kəzə̀ n daŋso bòʼò kɔ̀ʼ mugho nùghù sòʼ ndùw ghàʼ à wə̄n aŋ ŋgwə̄n. Aŋghəa a lo fughu aŋ ŋgwə̄n, mùghò ŋ kòʼ wìzən ù lì ù nyaʼ an nyòoŋgwən zəla è bàŋ sâan tsughu, mo ghe n tɔm naŋa kaaŋ wò zən ghəla a suūwn Zə̀ kò à zəŋò ughùe u nyòòŋgwən zə̀ e dzə̀m. Nyòm zə ŋ ki utuw sə̀ghàmbəgha à ndɔŋ to eghə̄m.

⁴Nughò vʉ n dzəlà kèle təndzʉ̀ mo ghe ghəŋlo an lɔ̀m kəla kə baŋà sâan tsughu enyə mo tə ŋgee dzɔ̀ɔ sùgho nù, ù là kɔ̀ʼ sùghò ghue u wə̄n u dzə̀m am fʉgha ù dzəə̄n wo mo ghe fəghanlo alo etsɛ̀ àsùghò fʉgha ù dzənlo ù li wo ghe fəghanlo alo nshʉghawʉa à shiaghɔɔŋ to. Ù ŋ ki wùa zə̀ etsɛ̀ aŋ ghu mò a te lue dòʼò kô ghə̀a à biigh gho àsùghò dzə̀adzə̀ tə aghəa tə wə̄n tə̀ nuūŋ tən.

⁵Zən e shʉ̀ghà è li zə n lo aŋ kwàʼ u usʉ̄ u wə̄n ghe tɔm naŋā enyəa, “Babilɔ̀n, zən ù nē, zə̂ â ùkpàlà wò u dzə̀m àsùghò â ghəa à kwu gho a dzə̀m aŋ ghueekətsə̄.”

⁶Mùghò ŋ kòʼ nughò vʉ mo kâŋ tə ghì a Kəzə̀ a zɔlɔ tə kɔʼn wə̄n a zəŋò e ughùe àsùghò tə ghì ghəla ghe mò winlo enyəa ghe boo fughu â Yɛso. Ghəa ŋ kôʼ nduw wə̄n dzughu zə m biso zum mugho.

⁷Tsə̀ndə̄ghā è te n dzɛ̀ â mùghò enyəa, “Dzughu e ghû zǔu aŋ kwò? Ǹ dzâa wò nù ghû â nàn kə eghəa kə wîzən wə̄n ko, àsùghò nàn kə eghəa kə nyòoŋgwən zəla è ki tuw wo sə̀ghàmbəgha à ndɔŋ tò eghə̄m è bòʼò kele wə̄n.

⁸Nyòoŋgwən è te fə̀ lo tsəgha nû, zə̀a è kòom yo, zə̀a è kuuwn kòom kì alesəa kɔʼɔ̄ wo am bùʼ kəla kə doʼŋkè kuʼù, è ndùw an lùʼu kəla ghe ki aledzùuw maʼà wə̄n a te. Ghî ghəla ghe mughù fɛ aŋ ghueekətsə̄, ghe lo mo ghe kaām tɔm zən a ghee gho am mwàʼsò kə emùghù aŋghəa mbī fə̀ kaʼ tsughu, dzughu ghe lo e zuu ghee alekòʼ nyòoŋgwən è te, mbuu è fə̀ lo nû, zə̀a è mò kôom yo tsəgha, zə̀a è kòom ki alebùghò.

⁹Ghəa ghən ləghaa ghùw wəla ù ki tɔ wo. Tuw wən sə̀ghàmbəgha fɛ ti an tuw u təkàʼà sə̀ghàmbəgha, nughò vʉ nyaʼ a te.

¹⁰Tuw wə̄n sə̀ghàmbəgha fɛ ti sugho an tuw udwə̀ŋ ù sə̀ghàmbəgha; udwə̀ŋ utwɛ̀ an dwə̀ŋ u te wə m kpuwnlo, kə mɔ̀ʼ chia kə naām lo â tuw ko; kə̀ lì kən kaam kuuwn bùghò. Abugho kə bùghò, ù lo alebùghò tèlè dòʼn ko aŋ kə̀mà fə kəgha enyə.

¹¹Yia a bugho nyòoŋgwən zə̀a è fə̀ lô tsəgha, zə̀a è kòom buw êzə̄ŋ, à lǒ də̀ŋ kə kèfāa ko mò kə̀ kuuwn lò am fɔe kə dwə̀ŋ wən sə̀ghàmbəgha, kə ndûuw an lùʼu kala ghe ki aledzùuw maʼà wə̄n a te.

¹²Ndɔŋ tən èghəm ghù mò kôʼ lo sugho udwə̀ŋ eghə̄m mo ghe kaām ŋ ghee n sûw an ndàŋ è kə̀də̀ŋ, mo ghe kuuwn ki alenìi kɔʼ kədaʼa tò udwə̀ŋ ghe doʼo ko an nəgha e tàm zə̀ ezuw e mɔ̀ʼ ghèe ghêe nyòoŋgwən è te.

¹³Dwə̀ŋ u te lo dòʼn tsùghuu èdzughu e mɔ̀ʼ ghe fughuu ndûw dwaʼa u ghee â nyòoŋgwən è te.

¹⁴Ghe lo sòʼò nduw Tsʉa u Ndzì u te wo an tsam, Tsʉa u Ndzì u te u kê təma kɔʼ ghee, nu ù lò Mughu ù ghê mughùbè, lò sugho Də̀ŋ kə udwə̀ŋ. Ghî ghəla ghe lo ghèe ghee lo ghî ghəla ghe gaʼ tsughu fə̀ŋ a zəŋò wə̄n, ghe mò tɔŋɔ̄ tsughu, shìaa è kɔʼ.”

¹⁵Tsə̀ndə̄ghā è te n daŋso dzɛ̀ â mùghò enyəa, “Dzughùu tə̀là ghù mò koʼ kpàlà kə chi kə nyaʼ a te lo an tuw u ŋgòʼ tə aghì, nɔ̂e kə aghì, tətûu, àsùghò sàʼà tə tənàʼà tò.

¹⁶Ndɔŋ tən èghəm ghù mò koʼ ghèe ghêe nyòoŋgwən zə lo bɛ̂ kpàlà chì, ghe ghəə̄ŋ tsughu kə dòʼò tsughu chwaʼchwaʼ u ghueetsə̄ wo, ghe tsʉā dêe kɔʼ tue kə wə̄n a beē. Ghe lo kə̂aan pfʉ wə̄n, ghe kpâa kɔʼ shwâ u ŋgwən e wə̄n zəla e doʼòdoʼò tsughu aŋ uwə̀n.

¹⁷À lǒ bòʼ Zə̀ kə̀ n dzə̀n nàŋa am fə̀ŋ tə ghee enyəa ghe e ghəə̄ŋ nduw fəgha kə̀là kə ləghaa, enyəa ghe fughuu tsəghàa ndûw ndàŋ è kə̀də̀ŋ â nyòoŋgwən è te an dzə̂ e mɔ̀ʼ, to ghe lo telè bugho lueso tsughu lâŋ kə shwaʼ u Kəzə̀ u te wo.

¹⁸Nughò wəla ghù mò koʼ, à lò naʼ è səŋò zəla e ki daʼa ko a zəŋò dwə̀ŋ u mbī wo.”