Read Aghem Edêe Fughu 18 Bible Online

Edêe Fughu 18 - Aghem bible

Edêe Fughu 18

¹Am bùghò ghəa ghən tsəghà tsughu, mùghò ŋ kòʼ tsə̀ndə̄ghā è Kə̀zə̀ lì è səā tsughuu wô alo kəwālā, mò è ki dwaʼa ù nêene wo, nyəghaan zəla è mò nyəghāaŋ ghè zò ŋ ghəə̄ŋ tsughu luʼū tə n nùghù zɔ̀n dòʼò tsùghù enyə aŋ ghueekətsə̄.

²Zə̀ n naʼn wò an dzə̂ è tughu enyəa, “Naʼ e Babilɔ̀n è səŋò e te zə n tsùghù bvʉ̀. Naʼ e te zə m fwə̀n dòʼo luʼu kəla zə̀a m bǐigh mughu a te àsùghò dzə̀adzə̀ mə̀ nnwən məla ghî à ləghaa yo alekòʼ,

³Aghî a dzə̀m an naʼàʼ ten n dzə̀m m mʉ mɔ̀m lʉ ŋ wə̄n mò an dzə̀adzə̀ tə aghəa tə wə̄n təla ù gheŋlo, dwə̀ŋ u mbī vʉa u nûuŋ ghue zo ghèe ghee, ghî a mbòʼkùm yia ghaʼ kɔʼ am bàm e wə̄n bòʼ aŋghəa ù ŋgeē ləghaa fʉgha u mbī wo.”

⁴Mùghò n daŋso kòom zuw kpeʼe ndùw dzə̀ è lì è dzàa səā wô alo kəwālā enyəa, “Ghî ghaŋa gho, nùghu sə wò nlò fughu êzə̀ a zəŋò wìzən ù te! Ghɛ̀ ka nyəso ghuu ko aŋ ghəa a wən à biigh gho, e kwo ko ghe lô fɔeso sughò ghɛ aŋghəa ghe lo fɔeso wə̄n a te!

⁵Tɔŋlo enyəa bôo tə wə̄n tə ti alo kətə̄m to tə e kɔʼɔ̄ mɔ̂m kə̀wala, Zə chia kə lo mo kə kaām ŋ ghəa a wə̄n à biigh a te a nîzə̀ dzə̀.

⁶Ghəəŋ nduw nlò wən â fəgha kəla ghuūghùe u wə̄n lo mo wə ŋ ghəŋlo â ghɛ̀, ghɛ̀ tsə kweēn tsəgha nduw wə̄n tənəgha tə bə̀ghà aŋghəa ù mò ghəŋlo â ghɛ̀. Ghɛ̀ nyɔɔm tsughu wùa zə̀ nlʉ e wə̄n è tùghù tsə̀ghà zəla ù mò nyɔ̂ɔm fughuu â ghì ghò, ghɛ̀ fughu nduw â wə̄n.

⁷Ghəa ù fə̀ tsɔɔ̄ fə̀ŋ enyəa e mughù kuw nû, ki mɛʼɛ fʉgha u mbī wo u dzə̀m, bɔɔm fùghù sugho nlǒ wə̄n a tsù wəla u kpe sugho â wə̄n, to ù e muŋe aŋghəa a te gho. Ghəa ù dzàa tsughuu am fə̂ŋ è wən enyəa, ‘Mùghò wəla n doʼ, nàʼtūm! Ǹ yo dzə̂ aŋ wîkpūw, Ŋ̀ kê kɔ̀ʼ kòʼ yo tsʉ̂a u evʉ wo!’

⁸Bòʼ ghəa ghən zəŋ è biigh e lo bɔɔm kwuu sùghò wən êzə alo fətsūʼ fə mɔ̀ʼ zəŋ e te e kê lò dzâŋ e biigh zo, ŋgoʼ àsùghò fɛ̀ɛn kə dzəŋ ko. Ghe lo kpâa maʼà kɔʼɔ̄ sughò wə̄n aŋ uwə̀n; bòʼ enyəa Mughu ù te, Zə̀ kəla kə saʼā saʼ è nùghò ù te ghaʼ ndùuŋ nù.”

⁹Dwə̀ŋ u mbī wəla ghèe mò nûuŋ ghue zo ghèe ghee, zəa sùghò fʉgha u wə̄n kê dîin tsɔʼn tsughu enyə an tuw kə wə̄n abugho ghe kê kôʼ nyoʼ u səaa aŋghəa nughò u te pfʉā.

¹⁰Ghe kê saŋe teē ndûw alo kədɛ̀, ghe tsəŋo fala e wə̄n zo, ghe e dzaā tsughuu enyəa, “Wɛ̂wɛ̂, wɛ̂wɛ̂! Kɔ kə enaʼ tò ghû, naʼ è nêene zo tò ghu â Babilɔ̀n! Ghe tsô kùʼù mìasò tsughu ko ghù ènyə an tàm zə̀ ezuw e mɔ̀ʼ.”

¹¹Ghî a bòʼkùm a mbī ghə n dìnlò, ghoʼso daŋso è nduw, ghe diī wə̄n, mbuu ghùw kòom zǔu yo fʉgha u ghee wo.

¹²Ghî ghə̀ ŋ kôom zǔu yo fʉgha u etsɛ̀ wò, ŋkāa fʉgha ù nyəghaan wo, zuu yo fʉgha ù dzəə̄ŋ wo àsùghò sʉghawua məla ghe tɔŋlo enyəa à lò pɛ̂ɛl, zuu yo ndzʉ tə̀ wən è tughu zo ŋkāa tə ulɔ̀m tò, ŋkāa tə təndə̀gha tə̀ wəə̄n baŋā to, ghe n zuu yo kɔ tə ŋkàʼ tə̀n tə̀ dzə̀m àsùghò fʉgha wəla ghe fəghaan sə kɔʼ aŋ kɔ tə ŋkàʼ, zuu yo fə̀ghà mən n dzə̀m ghe fəghaan sə kɔʼ an sɔŋ a nyôodzə̀, ghe n zuu sùghò yò shiaghɔɔŋ to, ubvuʼ àsùghò ŋgɔ̀ʼbelè.

¹³Ghî ghə̀ n zuuw sùghò ndə̀mà tə fə̀ghà n lə̀mlo n li mò àsùghò ndə̀mà tə vʉ m ləə̄m to, enyeē, ndzaŋ, vʉ n lə̀mlo n li mò ghe mò tɔŋlo enyəa à lò mayàh, ghe n zuu yo nlʉ̀ mò, zuu yo vʉ n zə̌a mò, zuu fùŋ m pǔuw mò, àsùghò saŋ gho, tə̀mbɔ̀ŋ à ndzì tò, ùkwʉ̀ànyòm à nwaŋ zo, àsugho kɔ̀ wò àsugho ghì a li ghe mò kwuūn wo an tsam, ghe feēn sugho ghee.

¹⁴“Fʉgha u dzûŋ wən u dzə̀m ghù mò naŋa fə̀ŋ a te ŋ ghù ti zə̀ghàa tàʼà, kum zə̀ghàa zəa e miā àsùghò səghanyəgha məghà mò, mò ghù kè kòom kèle kòʼ yò.”

¹⁵Ghî a mbòʼkùm, ghəla ghe mò kum kɔʼ aŋ ghəa a nughò vʉ̀ e ke lɔʼso ti alo kədɛ̀, ghe tsəŋō fala e wə̄n zo, ghe e diī səa kɔʼɔ an dzì tə tughu to enyəa,

¹⁶“Utsû, tsû u ne wo â, kɔ kə enaʼ tò kən, kə mò dzəlà kele ndzʉ tə̀ nêene to, təla tə ləŋō baŋā nduw, mò ù n təm fʉgha u etsɛ̀ wò, təm fʉgha ù dzəə̄ŋ wo, àsùghò sʉghawua mò!

¹⁷Fʉgha wə̀n ù dzə̀m n sàaŋ mǐaa kə̀nughùnùghù aŋ kə̀mà fə enəgha enyə.” Ghî ghə̀n à dzə̀m ghe ki kwə̀n u dzughùu wo n ti alo kədɛ̀,

¹⁸dìin sə̌a kɔʼɔ aŋghəa ghe koʼò nduw nyòʼ u səā kɔʼɔ aŋghəa naʼ e te pfʉa a te. “À mò lo naʼ è ghɛ zo e lo tò kɔ kə enaʼ kə te ko a?”

¹⁹Ghe n wâaŋ kɔ̀ʼɔ kə̀gbə̀n an tuw u ghee aŋghəa ghe dînlo, muŋe, dìin sə̌a kɔʼɔ an dzə̀ tə̀ tughu to enyəa, “Wɛ̂ wɛ̂ wɛ̂, â kɔ kə enaʼ ko, mo ghî ghə̀n à dzə̀m ghe mo ki kwə̀n ù nêene wo an dzughùu mò kuu am bàm e fʉgha u wə̄n! Ù m fʉgha wo u dzə̀m guŋù aŋ kə̀mà fə enəgha enyə.

²⁰Ôo wala ko e duʼnlo, ghɛ̀ ghì zɔlɔ gho, tətum àsùghò ghǐishʉ̀ghà ghò, tɔŋlo enyəa Zə̀ kə̀ n tāʼ ghɛ̀ à ghee, fə̀n tsùghu mgbə̀ghà a zəŋò naʼ e te zo bòʼ ghəa a biigh ghəla ù mò ghəŋlo â ghɛ̀!”

²¹Tùghùtùghù kə tsə̀ndə̄ghā e Kə̀zə̀ è n daŋso bòʼò kɔʼ etia mo e dûuw tò tia è gwuūn zo, màʼà nyə tsughu an dzùghùntsòʼ, dzɛ̀ tsùghù enyəa, “À bɔ̌ɔm lo ezə̂ ghe lo maʼn Babilɔ̀n alo esə̀ŋ, kɔ kə enaʼ kən, aŋghəa a kê kôom tsuʼ kôʼ yo alo esə̄.

²²Fəgha kə̀ li kə e ke koōm fuŋu yo fɛ alo enaʼ tò kəbôm ŋkāa tò ndɔŋ ŋkāa tò mbuwlì ghe tɔŋɔ ŋkāa ghî à zɔŋɔ̀ ghəa gho. Ghî a kəfwàʼ ghəla ghe ki ghu a kəfwàʼ ghò e ke koōm yo dzə fughu an naʼ zən. Ghùw ù li e koōm taā daŋso yo alegwùu kə̀fəgha an tia è gwuūn zo a fɛ an naʼ zən.

²³Kɛ̀ʼɛ̀ kê kòom bàŋ kòʼ yò fɛ an naʼ zən. A kê koōm yo alezūw dzə̀ è wìzən ŋkāa è nùuwizən e saʼa fɛ an naʼ zən Ghɛ̀ ghî a mbòʼkùm ghən an naʼ zən mò lo ghî à səŋò ghò fɛ am mbī, vûŋ wəla ghɛ̀ mò ki fɛ alo enaʼ n sè mə̀ŋso tsughu tənaʼà tə dzə̀m kpe.

²⁴Zə n lo enyəa naʼ e Babilɔ̀n a mò ki nû ghu ko am vʉ̀a tə ghǐishʉ̀ghà a Kəzə̀ àsùghò ghì a Kəzə̀ a zɔlɔ gho, àsùghò an vʉ e ghì ghə̀n à dzə̀m ghe mò winlo aŋ ghueekətsə̄.”