Read Aghem Edêe Fughu 19 Bible Online

Edêe Fughu 19 - Aghem bible

Edêe Fughu 19

¹A m bughò tsə̀ndə̄ghā e ghàʼa zə kə̂a mɛʼɛ̀ tsughu ghəa ghən gho, mùgho n zuw ndə̀m è lì è səŋo alo kəwālā tò nɔe kə aghì kə dzâa tsughuu enyəa, “Ŋkɔʼso â Tsə̂ntə̀mbî! À lǒ wə̄n ù ki səghanyəgha mò àsùghò dwaʼa wo, yìa à lò sugho wə̄n ù bəghaasəa ghî gho.

²Ù sàʼa saʼ è tsəghatsəgha an dziī zəla è zɔlɔ̄, ù n dzə̌n mbə̀ghà è kəkpàlà kəla kə mò nûʼn kaāŋ luʼū to fɛ am mbī an nùŋlò e wə̄n, u n dì tsùghù sùghò ŋgə̀mà tə̌ kɔ̀ɔ ŋ wən məla kpàlà kə te kə fə̀ wīŋlo”

³Ghe ŋ kòom nàʼà kpèʼe sə̀ wò an dzə̀ tughu to enyəa, “Kɔʼso n lo Zə̀ kò! Nyoʼ wəla u səā kɔʼɔ̄ a zəŋò naʼ e te aŋghea e pfʉā kê tsòo sə̌a tsə̀ghà ko nù to mbī kê bughò mîaa.”

⁴Ghə̀m n tə̀tsoʼ mə̀n m bə̀ghà à ghè tò tə chìakò àsùghò fʉgha wən u chùako u lo â tuw ko n tə̀m ndùw tə̀ŋguʼ a vʉ̀a ndàŋ è kə̀də̀ŋ zə̀, fùghù ndùw ŋ̀kɔʼsò â Zə̀ kəla kə mò nyaʼ fughu an ndàŋ è kə̀də̀ŋ e te, dzàa tsùghùu enyəa, “Zə e lo ko êzè. Ukɛɛ â Zə̀ kò.”

⁵Mùghò n zuw dzə̀ è lì dzɛ̀ sə wo fughu an ndàŋ è kə̀də̀ŋ e te enyəa, “Kɛɛ ndǔw nlǒ Zə̀ kə sɛ̀ kò ghɛ̌ kɔ̀ɔ ŋ wə̄n mən n dzə̀m, ghɛ̀ ghəla ghɛ̀ tsəŋo wə̄n, ghɛ̀ bvùʼu mə̀ aghì àsùghò ghɛ̀ ghì à tughu gho.”

⁶Mùgho n daŋso zùw ndùw ndə̀m səŋō tò nɔ̂e kə aghì, kwùu wò to ebʉghàbʉ̀ghà, àsùghò to ghuuw e lô kəmā, dzàa tsùghùu enyəa “Kɛɛ u lo â Zə̀ kò! Nu Tsə̂ntə̀mbî, Zə̀ kə sɛ̀ kə̀ ghaʼa kə lo kədə̀ŋ.

⁷Bùghò nlò sɛ è duʼnlo, a e saŋlo, kɔʼso nduw wə̄n, təma ndùw wən â kəma mò, nu tsuʼ u Tsʉa u Ndzì ù niī u wîzən wə m kpē, wizən u te vʉ̀a ù ti ko an sɔ̀ŋ è bii zo.

⁸Ghe m fughu tsughu wìzən vʉ̀ â zəghaan fə ndzʉ fì nee fo enyəa ù dzə̀la kɔʼ, tsɛʼɛ̀ tsɛ̀ʼɛ̀ tsɛ̀ʼɛ̀ fə zɔlɔ̄.” (Zəghaan fə ndzʉ̄ fə̀ nee fən lò ghəa a tsəghatsəgha ghəla ghî a Kəzə̀ à zɔlɔ a ghəŋlo.)

⁹Tsə̀ndə̄ghā zə n daŋso dzɛ̀ â mùghò enyəa, “Tɔm naŋa tsughu ghəa ghən gho: Dzɔ̀ lò ghî ghəla ghe naʼā wo ghee an zə kə Tsʉa u Ndzì kə̀ niī kə wi ko.” Ù n dzɛ̀ kpèʼe wò â mùghò enyəa, “Wən lò shwaʼ ù səŋò wəla u sə wo an dzughu e Kəzə̀.”

¹⁰Mùghò n daŋso tə̀m ndùw tə̀ŋguʼ a tsəlà wə̄n enyəa M̀ fughuu ndûw wən à kɔʼso mò, zə̀ m fwə̀n dzɛ̀ wò â mùghò enyəa, “Ghù kì dzə yo aleghəəŋ ghəa ghən gho! Ghàʼ à ghù dzeŋe lò ŋkɔ̂ɔ àsùghò waazə̂ ghəla boō fughu aŋghəa è səŋò zəla Yɛso mò dê tsughu. E kɔʼso nduw Zə̀ kò!” À lò səŋò zəla Yɛso mò dê tsughu e ghəŋlo enyəa ghiīshʉ̀ghà ghə̀ e dzâ ghəa gho.

¹¹Mùghò mo e kôʼ wala kə n nùghù tsʉ̀ è tsughu, mughò ŋ kòʼ kɔ̀ʼ ndùw kə̀anyòm kə fəma ko. Ghùw wəla ù mò nyaʼ a te ghe tɔŋlo enyəa à lò Ghùw wəla ù naāŋ dzughu e wə̄n zo, lò sugho êsəŋò, ù saʼā saʼ tsəghatsəgha, təma sùghò tsàm tsəghatsəgha.

¹²Sə a wə̄n a lo tò uwən u bəghaan wo, vʉ̀a ù ki mgbɛ wo alo kətuw ndza. Ù kì ezən ghe tɔm naŋā a zəŋò wə̄n mò ghùw mɔʼɔ̄ kwo yo, mò à kwò tsughu ko wə̄n.

¹³Ù dzə̀là kèle sàŋ è lì mò à ndùuw ko tə̀kàŋ a te, zən zəa ghe tɔɔ̄ŋ wə̄n a te lo “Shwaʼ u Kəzə̀.”

¹⁴Sùghugòʼ tə kəwālā tə n ndûuw a bǎà wə̄n aŋ kʉ̀anyòm ù fəma wo mo ghe dzəlà kèle zəghaan mə̀ n ndzʉ m fə̀ma mò, mò n zɔ̀lɔ tsɛʼɛ̀ tsɛʼɛ̀.

¹⁵Nyə fə̀ tɔɔ fə̀ li fə n sə̀ wò an dzughu e wə̄n â wən aletəmazəa nduw naʼà tò a te, tò ù e ke saʼa ghee aŋ ghu kə̀ tughu ko. Zə̀ kə̀ ghaʼa kən kə̀ dzə̀m lô nʉ̀ghà u wə̄n u pfʉa u bɔɔm dèe sùgho tò aŋghəa ghe tsuʼ ləma to a te abugho ghe kpɛɛ̄n lʉ̀ n tughu mò.

¹⁶Ghe n tɔm naŋa an ndzʉ tə wə̄n àsùghò am bì kə wə̄n enyəa, “Də̀ŋ kə udwə̀ŋ àsùghò Mughu wəla ù tsə̀ghàsə ghê Mughubè a dzə̀m.”

¹⁷Mùghò n daŋso nùghù kòʼ ndùw tsə̀ndə̄ghā è lì alo ezūw, zə̀ n tɔɔŋ ndùw nwə̀n mə̀n n dzə̀m n zəghāa tsəghàa edzuŋ an dzə̂ è tughu enyəa, “Bùghò nlò, zǔuŋ wò nlò to a zə kùun tə Kəzə̀ tə̀ ne to.

¹⁸Ghe bugho nlo pfʉ nyòm è ùdwə̀ŋ, nyòm è tə̀komndzūghū, nyòm è ghì à səŋò ghò, nyòm è ukʉ̀anyòm àsùghò è ghì à nyəŋo ukʉ̀anyòm wò, àsùghò nyòm è ghì ghə̀n à dzə̀m; a pfʉ nyòm è ghì ghəla ghe ndzə̂əm lo àsùghò ghəla ghe lô kɔ̂ wò, a pfʉ nyòm e bvùʼu mə̀ n aghì àsùghò nyòm e ghì a tughu gho.”

¹⁹Mùghò n daŋso kòʼ nyòm e te ghèe ghê dwə̀ŋ u mbī wo àsùghò sùghugòʼ tə ghee to, ghe zûuŋ doʼò aletə̄m tsàm ghèe ghê ghùw vʉ̀a ù mò nyaʼ alo kəkə̀anyòm àsùghò sùghugòʼ tə wə̄n to.

²⁰Ghe ŋ kwu kɔʼ nyòm è ne zə̀, kwu dzəəŋ kɔ̀ʼ sùghò ghùwshʉ̀ghà wə àgha vʉ̀a ù mò dê tsughu sə̀ghàa mò an sə kə nyòoŋgwə̄n e ne zə. Ù n sè mə̀ŋso tsughu aghì nɔɔm tsughu ghî yia ghe mo tsə̂so naŋa ghee an tsə̌a è nyòm è ne zə̀, àsùghò ghì ghəla ghe kɔʼso mùʼù fia fə fweēn nyòm è te. Ghe n nì kɔʼ nyòm è ne e te ghèe ghùwshʉ̀gha wə̀ agha vʉ̀ â sə a tughu gho, màʼà nyə̀ ndùw am fɛ̀ɛn fɛ̀ɛn kə uwə̀n u biigh wo mo zuʼ kə̀ ləma kə̀ biigh kə̀ li kə mò səa wo an nyoʼ uwə̄n u te wo mo ghe tɔŋlo enyəa à lò sulfò.

²¹Wə̄n wəla ù mò doʼ alo kə̀anyòm m gbòoŋ wi tsughu à li ghən an nyə fia fə mô sə wo an dzughu e wə̄n; nwə̀n mə̀ n zə tughuso tsughu enyə aŋ gwə̀n a ghee.