Read Aghem Edêe Fughu 2 Bible Online

Edêe Fughu 2 - Aghem bible

Edêe Fughu 2

¹Yɛso n dzɛ̀ wò sùghò â mùghò enyəa, “Tɔm tsughu â tsə̀ndə̄ghā è Kəzə̀ è dzeŋe kə ghì a Kəzə̀ zə Ɛfɛ̄sùs enyəa; ‘Ghùw wəla ù ki sə̀ghàbəlà mə̀n mò sə̀ghàmbəgha aŋ ghu kə wə̄n kə̀ zə̀a ko, vʉ̀a ù bwìi wo am faʼnlo e twii u tə̀lâm wə etsɛ̀ wən sə̀ghàmbəgha dzɛ̂ enyəa,

²“Ŋ̀ kwo nû ghəa ghə̀là ghɛ̀ lo mò ghɛ̀ ŋ ghəŋlo àsùghò ghə̀là ghɛ̀ lo mò ghɛ̀ m fwàʼ, yìa Ŋ̀ kwo sugho zə zəla ghɛ̀ ka tsughu am fala zɛʼɛ. Ŋ̀ kwo sugho nû aŋghəa ghɛ̀ tsoō boōm naāŋ yô ghî à bǐigh gho an lùʼu kɛʼɛ, ghɛ̀ yia mɔ̂m kôʼ sughò ghì ghəla ghe tɔɔ̄ŋ ghue e ghee zo enyəa ghe lo tətūm mo ghe yô dzə̂, kòʼ tsùghù enyəa ghe lo ghî ghə agha.

³Ŋ̀ kwo nû enyəa ghɛ̀ mafə nyɛʼɛ ŋge fala bòʼ zən zaŋa, ghɛ̀ ŋ kɔlɔ tsùghù sùghò tə̀fə̀ŋ, tsoo būghūu kòʼò yò.

⁴Ghəa e kuuwn lò ko e mɔ̀ʼ aŋghəa Ǹ saʼa ghɛ a te, aŋghəa ghɛ̀ zəghàa maʼà tsughu ləgha zəla ghɛ̀ mò bûʼ ki a zəŋò mùghò àsùghò aŋ ghùe zɛʼɛ.

⁵Mǒʼn wò aŋghəa ghɛ̀ mò bûʼ lo tsəgha a te tò ghɛ̀ è bughò bvʉ̂a kôom tsughu, kuuwn kɔʼ nlò am fə̂ŋ tɛʼɛ to, ghɛ̀ è ghəəŋ nduw ghəa ghə̀là ghɛ̀ mò buʼù ghəə̄n tsəgha. Buw êzə̀, Ǹ lo bughò sɔŋɔ̀ nughù kɔʼ ti kəlâm kɛʼɛ an luʼù kə wə̄n, tò ghɛ̀ ke telē kuuwn wo fə̂ŋ tɛʼɛ to.

⁶Ghɛ̀ naam kuuwn ki nû ghəa è dzûŋ e li zo ghɛ̀ ghəŋlo, ghɛ̀ bâa ghəa ghəla ghî ghəla ghe boō fughu â Nikòlus ghəŋlo tò aŋghəa M̀ bâa sugho.

⁷Ghùw wəla ù ki tuūŋ ko, ù zuw fəgha kəla Zuʼ tə̀ Kəzə tə̀ dzâa wo â dzweŋe u ghì a Kəzə̀ wən wo. Ǹ lo fughuu tsughuu kə̀làŋ, ghî ghəlà ghe ghaʼ tsughu ghəa à biigh gho, ghee e kʉɛɛ zəa tam kə kàʼ fə emùghùu fəla fə lo an sum u Kəzə̀ alo kəwālā.”

⁸Yɛso n dzɛ̀ wò â mùghò enyəa, “Tɔm ndùw â tsə̀ndə̄ghā è Kəzə̀ è dzeŋe kə ghì a Kəzə̀ ghò an naʼ e Smylnà enyəa, ‘Ghùw wəla ù lò sə ko, lò sugho kəbām, wəla ù fə̀ kpuw tsughu, ù ŋ kòom nùghù dòʼò wò â tuw ko dzɛ̂ enyəa,

⁹“Ŋ̀ kwo nû tsû wɛʼɛ wo àsùghò aŋghəa ghɛ̀ laa a te (dèe êzə̀ mò ghɛ̀ kuuwn kuu nù aŋ ghəa a Kəzə̀). Ŋ̀ kwo sugho nû shwaʼ ù biigh wəla ghî ghəla ghe dzɛ̂ enyəa ghe lo ghî a Tə̀dzûu, mo ghe yo dzə̂ kəa kaŋlō an tuw wɛʼɛ. Ghe lo ghî ndùghùne e Satàn.

¹⁰Kà nlò tsəŋ dzə̀ ghəa è li zo ghɛ̀ lo ki alekùʼù fala tsughu a te. Kele tsughu nlò enyəa vʉatsə̄a a ki alekùʼù nîi dzə̂n ghɛ̀ â li gho an ndùghùtsāʼ, àsùghò enyəa to ghe mô mɔ̂ɔkoʼò tsughu ghɛ̀, ghɛ̀ doʼo an tsù alo ntsuʼu eghə̄m. Gaʼ tsughu ko nlò fə̂ŋ tɛʼɛ to a zəŋò mùghò abugho e lo enyəa ghɛ̀ bùʼ kì ko alekpuw a te, tò Ǹ lo fughuu ghɛ â mùghù zò tò kənamso.”

¹¹“Ghùw wəla ù ki tuūŋ ko, ù zuw ghəa ghə̀là Zuʼ tə Kəzə̀ kə̀ te kə dzaā â dzweŋe u ghì a Kəzə̀ wò. Ghùw wəla ù ghaʼ tsughu bo zo, vʉ e kə̀ bə̀ghà zən lo mɔ̀m yǒ wə̄n.”

¹²Yɛso n dzɛ̀ kpèʼe wò â mùghò enyəa, “Tɔm ndùw â tsə̀ndə̄ghā è Kə̀zə̀ è dzeŋe kə ghì a Kəzə̀ ghò an naʼ e Pɛ̀lgamùm enyəa, ‘Ghùw wəla ù ki nyə fəla fə tɔɔ̄ bâa tə̀bə̀ghà dzɛ̀ enyəa,

¹³“Ŋ̀ kwo nû luʼù kəla ghɛ̀ mùghù a te, a fia ndàŋ è kə̀də̀ŋ è Satàn lǒ. Ghɛ̀ těe tən tsughu ko an zən zaŋā, ghɛ̀ ŋ kè tuū maʼà boo zəla ghɛ̀ ki â mùghò aŋghəa ghe fə̀ tso bûʼ wi ko Antipàs, a fia Satàn mùghu. Antipàs fə̀ lo ghùw waŋa ù tùghu ù fə̀ teso dzâa ghəa ghaŋa gho â ghî ghò am fə̂ŋ e wə̄n e dzə̀m.

¹⁴Nyàaŋ mə̀ ŋ ghə̀anlò n li lo ko nù Ǹ saʼa ghɛ a te; ghî a lo nu fì êzə̀ ghɛ̀ a ghee ghe bwiī an tsʉ̂ e Balàam zò, Balàam wəla ù fə̀ zoʼn tsughu Balàk aŋghəa ù lò aleseē nyəa ghî ghə Ezə̀lɛ̂ a te alo ebō, mò ù ghee gɔ̂ɔŋ tsùghù nû enyəa ghee e zəa fʉgha wəla ghe sɛ̂ nduw alo uzʉ̀kɔ̂ŋ, àsùghò enyəa ghe e ndzaŋa naʼ zo alo enùŋlò.

¹⁵Ghɛ̀ bɔɔm ki sugho ghî a li êzə̀ ghe zuūw ndûw tsʉ̂ e ghì a Nìkòlùs zò.

¹⁶E fi lo enyəa ghɛ̀ kì alekuwnlo. Buw êzə̀, Ǹ lo kuʼù bughò nù a fi alô ghɛ̀, alebùghò təm tsàm ghàʼ a ghee an nyə fəla fə lo an dzūghū zaŋā.

¹⁷Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ te kə dzâa nduw â dzeŋe kə ghì a Kəzə̀ ghò.” Ǹ lo fughuu ghùw wəla ù ghaʼ tsughu bo zo â kə̀m kə̀ fʉ̀ghàzəa kə̀ li ko ghe tɔŋlo enyəa à lò manà, wəla ghe nân naŋā, Ǹ lo fughuu wə̄n â tia è fəma zo, à zən è fughu zo ghe tɔm naŋā an tia e te zo, mò ghùw ù lì kwò yo, mò à kwò ko ghùw wəla ù nì kʼ.

¹⁸Yɛso n dzɛ̀ wò â mughò enyəa, “Tɔm nduw â tsə̀ndə̄ghā è Kə̀zə̀ e dzeŋe kə ghì a Kəzə̀ gho an naʼ e Tìatilà enyəa; ‘Wɛ̀ ù Kə̀zə̀, wəla sə a baŋa bɔ̀ɔ tò uwən, ghuw a wə̄n yia a nyəghanlo lo tǒ bvuʼ kəla ghe tsə tsughu alo kənàm ghe yia tsoʼso tsughu, ù dzɛ̀ enyəa,

¹⁹“Ŋ̀ kwo nû ghəa ghə̀là ghù ghəəŋ ghè ghò, kwo ləgha zəla ghù ki, kwo boo zəla ghù boō fughu tsughu, kwo fwàʼ kə̀a, kwo sugho fə̀ŋ zəla ghù kɔlɔ tsughu; kùmkùm, êzə̄ŋ èbàm ghù m bùʼ fwàʼ tsə̀ghà fəgha kə̀là ghù fə̀ bûʼ fwâʼ sûesʉ.

²⁰Ŋ̀ kuuwn ki ko ghəa zə̄n e mɔ̀ʼ Ǹ saʼā ghɛ a te; ghɛ gbən zə̀ghàa màʼà tsùghù wìzən wəla ghe tɔŋlo enyəa à lò Dzɛzɛ̄bɛ̀l, wìzən wəla ù dzɛ̀ enyəa e lo zən ù ùshʉ̀ghà, mo tsʉ̂ e wə̄n e nyuuŋ nùghùun ndùw kɔ̀ɔ maŋa enyəa ghe e ndzaŋa naʼ zo alo enùŋlò, ghe e zəa sugho fʉgha wəla ghe sɛ̂ nduw â mùʼù mò.

²¹Mugho ŋ wə̄n â nəgha e fughu enyəa ù tiī kuwnlo, vʉ̀a ù kuūwn tuū enyəa e tii maʼà dzə̀adzə̀ tə aghəa tə wə̄n te to, ù kuwnlo.

²²Ŋ̀ ki alenìi təma naŋā tsughu wə̄n an chʉ̀a wə edzàŋ. M̀ lo fughuu tsughu mwàŋ tə wə̄n â bòobò kə efālā ko; à gɔ̀ʼɔ̀ mò ghe lo tùe màʼà tsùghù ghəa ghə̀n a ghe ghəŋlo ghèe wə̄n.

²³Ǹ lo wiin tsughûu ghì ghə̀n a dzə̀m ghe nî ghuw kə ebwìi kə nughò wən ko. Zən lo zoʼn tsughu dzweŋe u ghì a Kəzə̀ u te wo to enyəa Ǹ lo ghùw wəla Ǹ tsaʼà fə̂ŋ tə ghì tò àsùghò mòʼnlò e ghee zo, àsùghò enyəa Ǹ lo ghùw wɛʼɛ fùghuu ko â fəgha kə̀là kə kpe tsughu aŋ ghə̀a a wə̄n à ghəəŋ gho.

²⁴Mùghò èzəŋ kə̂a wò ghəa ghən â ghɛ̀ yia ghɛ̀ lo an dzeŋe kə ghì a Kəzə̀ an naʼ e Tìatilà enyəa, ghɛ̀ ghən a dzə̀m ghɛ̀ doʼkè kaam zoʼn kelê ghəa ghə agha ghən, ghɛ̀ yia a lo mo ghɛ kaām zoʼn kele sùghò ghəa zo nàn tə aghəa tə Satàn; e kuuw lo ko enyəa Ŋ̀ kôom fùghuu kpeʼe yo ghɛ â fəm kə̀ li ko;

²⁵mò a mìaa ko yo enyəa ghɛ̀ tɔʼ kwu kele tsughu ko nlò ghəa ghə̀là ghɛ̀ bûʼ ki tò Ŋ̀ kê telè bughò.

²⁶Ghùw wəla ù ghaʼ tsughu bo zo, vʉ̀a ù kɔlɔ̄ mɛʼɛ̀ tsughu fə̀ŋ alefwàʼ fəgha kə̀la Ǹ ləghaa, ndùw tɛ̀ è nduw, Ǹ lo fughuu nǔ wə̄n â dwaʼa wo alelɛɛ̄n naʼà tə te to,

²⁷mò a lò dwaʼa ù mɔʼɔ̄ wəla bəghà fə̀ fughu â mùghò, ù lo kwuū kele ghee aŋ ghù kə̀ tughu ko[1], ù buū sâan tsughu ghee tǒ tɔ̀e tə etsāʼ.

²⁸Ǹ lo fughu tsughu wə̄n â sə̀ghàbəlà fə gbə̀làgbə̀là fò.”

²⁹“Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ te kə dzɛ â dzweŋe u ghì a Kəzə̀ wò.”