Read Aghem Edêe Fughu 20 Bible Online

Edêe Fughu 20 - Aghem bible

Edêe Fughu 20

¹Mùghò n daŋso kòʼ tsə̀ndə̄ghā è lì səā tsughuu wô alo kəwālā, mò è kì tsʉ kə kəbùʼ kəla kə kuʼù yo aŋ ghu kə wə̄n àsùghò faŋkwu kə tsaʼ kə̀ li ko.

²Ù ŋ kwu kɔ̌ʼ ŋgə̄m zə̀, zùghù è wǐiwǐi e zə̌, zəla à lò Avʉatsə̄a, lò sugho Satàn, kɔ̀n nàŋa tsughu wə̄n enyəa ù dòʼò fughu alo tənùu kam.

³Ù n nì màʼà nyə̀ tsùghù ndùw wən fughu alo kəbùʼ, dzʉ̀a fè nàŋa ndùw wə̄n fughu, enyəa e kwo ko ù lò kôom sè mə̀ŋso sugho naʼà tò am mbī, mò a gɔ̀ʼɔ̀ ko mo kam è tə̀nùu zən bùghò tsəghà nughù. Abugho nəgha zən lo tsəghà tsughu, ghe lo ki aletsʉā zəghà tsugho wə̄n aŋ kə̀mà fə enəgha.

⁴Mùghò n daŋso kòʼ ndùw ndàŋ tə udwə̀ŋ, ghî ghəla ghe mò doʼ a te n lo ghî ghəla ghe fughu ghee â dwaʼa wo alesaʼa naʼà tò. Mùgho ŋ kòʼ sùghò gwən a ghì ghəla ghe mò gbôon tuw u ghee wo bòʼ ghe fə̀ lo ghê bvûʼnɔ̀ʼ a Yɛso, ghe n naʼn sùghò shwaʼ u Kəzə̀, ghəla ghe mò doʼŋkè fughu ŋkɔʼso â nyòoŋgwən è ne zə̀, ŋkāa mùʼù fə wən fia fə fweēn wə̄n, kè nîi sughò tsə̌a è nyòoŋgwən zə aŋ kàʼ mə̀ esʉ ŋ ghee ŋkāa aŋ ghu a ghee. Ghe n nùghù dòʼò wò â tuw ko, ghe n saʼa am mbī ghèe ghê Kə̀lestò tò udwə̀ŋ am bɔ̀m n tə̀nùu eghə̄m.

⁵Ghî à kpuwnlo à li ghən kafə̄ nughù dòʼò kòʼ wò â tuw ko mo kàm è tə̀nùu zən kâ tèlè tsə̀ghà tsùghù dzə̀. Zə̀n lo nəgha e sûesʉ zo Zə̀ kə̀ lo zôo nughùu kɔʼ ghî gho a te alo evʉ̄.

⁶Dzɔ̀ lò ghî ghəla ghe lo kɔʼɔsəā alo evʉ̀ an nə̀gha e sûesʉ zə̄n, nu ghe lo am fɔe kə ghì a Kəzə̀ a zɔlɔ! Vʉ e kəbə̀ghà zəla e dzûum wo kôom kì yo daʼa kə̀ li ko a zəŋò ghì ghən, ghe kê kǔuwn lǒ tuw u tə̀fɔ̀e u Kəzə̀ àsùghò u Kə̀lestò wò, ghe e ke saʼa am mbī ghèe ghê Kə̀lestò am bɔ̀m n tə̀nùu eghə̄m.

⁷Abugho bɔm m tənùu mən eghəm lo bughò tsəghà tsughu, ghe lo zêe zəghàa səā wô Satàn an ndùghù e tsaʼ e wə̄n.

⁸Ù kè sə̌a wò alebùghò sêe məŋsô kâaŋ nàʼà təla tə lô kaŋlo am mbī, mo ghe naʼà tən tə tɔŋlo enyəa à lo Gɔ̂ʼ àsùghò Magɔ̀ʼ, alezùuŋ wô ghee an tsə a tsam; tàŋ è ghee lo n də̀m tò shiashia kə mǎakùw.

⁹Ghe fə̀ sə mɛlɛ tsughu am mbī e dzə̀m, dzə̀əŋ ŋgəa kɔʼ bɛlɛ kə ghì à zɔlɔ gho, naʼ zəla Zə̀ kə ləghaa; wən wə ŋ kuuwn sə̀ tsùghù wò alo kəwālā bùghò tsughu kpàa màʼà kɔʼ ghee.

¹⁰Ghe ŋ màʼà nyə̀ ndùw vʉatsə̄a ghəla a mò nɔm ghee aŋ wə̀n u fɛɛ̄n wo mo ghe kpâa kɔ̀ʼ am fəgha kə̀ li ko kə ki zuʼ kə̀ biigh ko ghe tɔŋlo enyəa à lò sulfò, a fia nyòoŋgwən è ne ezə̂ ghèe ghùwshʉ̀gha wə̀ agha u vʉ mò lo, a fia ghe kê tsôo zuūw zeē tsəghà ko fɔɔn zo bùghò zǔuw bwii ndùw to mbī kê bughò mîaa.

¹¹Mùgho n daŋso kòʼ ndùw faŋkwu kə fə̀màfə̀m kə ndàŋ è kə̀də̀ŋ è lì àsùghò ghùw wəla ù dòʼ a te. Kəwala àsùghò ghueekətsə̄ kə n nùghù saŋ tsughu fughu an sə kə wə̄n, ghe ŋ kôom yò alekòʼ kəwālā àsùghò ghueekətsə̄ kə te ko.

¹²Mùgho n daŋso kòʼ ndùw ghì à kpuuwn gho, bvùʼù mə̀ aghì àsùghò ghì a səŋo ghò, ghe ti an sə kə ndàŋ è kə̀də̀ŋ zə̀. Tsə̀təndə̄ghā tə̀ li tə n tsʉnlo ùmwàʼsò, ghe n tsʉ kpeʼe kɔʼ mwàʼsò kə̀ li ko, mò à lǒ mwàʼsò kə emùghùu. Zə̀ kə̀ n sâ saʼ tə ghì à kpuuwn yì aŋ ghəa ghəla ghe tɔm naŋā fughu am mwàʼsò vʉ̀, ghe n saʼ ghe aŋ ghəa ghəla ghe lo mo ghe mafə ghəŋlo.

¹³Dzùghùntsòʼ n tùŋù nàŋa sə kɔ̀ʼ wò ghì à kpuuwn ghəla ghe mò lo a te a beē. Evʉ àsùghò naʼ zə evʉ zə n zə̀ghàa màʼà wò sùghò ghì à kpuuwn ghəla ghe mò lo a fughu a te, Zə kə̀ n saʼ saʼ tə ghee a dzə̀m, chìa am fəgha kəla ù lǒ mò ù ŋ ghəŋlo.

¹⁴Ghe n daŋso nì màʼà nyə̀ ndùw Èvʉ ghèe Naʼ zə Evʉ̄ zo aŋ fɛ̀ɛn kə uwə̀n kə̀ biigh ko. Fɛ̀ɛn kə uwə̀n kə biigh kən fɛ lò vʉ e kə̀bə̀ghà zəla e dzûum wo.

¹⁵Ghùw wəla ghe mò kəŋo kêe tsughuu zən e wə̄n zo am mwàʼsò kə emùghù, ghe m màʼà nyə̀ ndùw wən am fɛ̀ɛn kə uwə̀n kə te ko.