Read Aghem Edêe Fughu 21 Bible Online

Edêe Fughu 21 - Aghem bible

Edêe Fughu 21

¹Mùghò n daŋso kòʼ ndùw wala kə̀ fughu ko àsùghò ghueekətsə̄ kə̀ fughu ko; nu wala kə sûesʉ ko àsùghò ghueekətsə̄ ko mafə tsəghà mìaa, dzùghùntsòʼ ŋ kôom yò dzə̂.

²Mùghò n daŋso kòʼ ndùw naʼ è zɔlɔ zo, tɔɔŋ Yɛ̀lusalɛ̀m è fughu è te, è səā tsughuu wô alo kəwālā, è nùghù wo a vʉ̀a Zə̀ kò, mo ghe n dzə̀ tǒ wìzən ghe so e ndûw fughu alô nùm.

³Mùghò n daŋso zùw ndùw ghe dzɛ̂ sə wo fughu an ndàŋ è kə̀də̀ŋ e te an dzə̂ è tughu enyəa, “Kòʼô, luʼū kəla Zə̀ kə̀ mughu a te lo dzəəŋ ghèe ghê ghì ghò. Kə lo mùghùun ghèe ghee, ghe e ke lo ghî a wə̄n gho, kə e ke lo Zə̀ kə ghee ko.

⁴Ù lo zêe maʼà tsughu sə̀ mə̀ èdì ŋ ghee, vʉ e kê koōm yo, ghî ghə̀ ke koōm diīn yo, zuuw sùghò yò fɔɔn zo, tɔŋlo enyəa mbī è wǐi n tsə̀ghà nùghù.”

⁵Ghùw wəla ù mò doʼ fughu an ndàŋ è kə̀də̀ŋ e te n daŋso dzɛ̀ tsùghu wò enyəa, “Êzə̄ŋ, Ŋ̀ ghəəŋ tsughuu nù ghəa ghə̀n à dzə̀m kòom doʼo tsughu à fughu gho.” Ù ŋ kòom dzɛ̀ kpèʼe tsùghù sùghò enyəa, “Tɔm naŋa tsughu ghəa ghən gho, tɔŋlo enyəa shwaʼ wən lo ushwaʼ ghî à lo aleboō fughu a te, vʉa u lô sugho èsəŋò.”

⁶Ù n daŋso dzɛ̀ â mùghò, “Ghəa ghən a dzə̀m n tsə̀ghà mìaa! Ǹ lo Kəzìi lò sugho Ekuʼù! À ghəa gho a dzə̀m zîi tsùghu mùghò, yìa à mìasò sughò mugho ghəa gho a dzə̀m! Ghî ghəlà fə̀ŋ zuʼso ghee, Ǹ lo tuuwn fughuu nu ghee â mùghù mò an sə e dzùghù zəla e fughu mughùu zò mo ghe kâ fəgha kə tsə.

⁷Ghùw wəla ù lo ghaʼ tsughu ghəa a biigh gho kê zə̌a fʉgha wə̄n, Ǹ lo doʼò tsughu Zə̀ kə wə̄n, ù è ke lo wɛ waŋā.

⁸Yia a bugho ghê mgbêbvʉ̄, ghî ghəla ghe taʼkè boō fughu, ghî a dzəa gho, ghəla ghe wiī ghî ghò, àsùghò à nuūŋ gho, ghî a uvùŋ, ghəla ghe kɔʼso zʉ̀ ù li wə̄n, àsùghò ghî ghə agha a dzə̀m, luʼu ke ghee kê lǒ fɛ̀ɛn fɛ̀ɛn kə wə̀n kəla zuʼ kə biigh kə səa wo àsùghò nyoʼ ko ghe tɔŋlo enyəa à lò sulfò, mò à fi lò e kpuūw kuenlò.”

⁹Tum an tum tən sə̀ghàmbəgha ghe mò bûʼ ki kə̀ŋò mə̀n sə̀ghàmbəgha, məla zəŋ təla tə doʼò gûŋso tsughu sə̀ghàmbəgha lue doʼò a te, m bùghò dzɛ̀ â mùghò enyəa, “Bùghò Ǹ dêe wô ghù â wìzən, wi ù Tsʉ u Ndzì u te wo.”

¹⁰Zuʼ tə zɔlɔ tə n nyəən tsughu mugho, Tsə̀ndə̄ghā è Kəzə̀ n daŋso bòʼò nùghù kɔʼ ndùw mùghò an ndɔ̀ŋɔ̀ndɔ̀ŋɔ̀ fə də̀ghàa kə ukwàʼ kə̀ li ko, dè tsùghù wò mùghò â Yɛ̀lusalɛ̀m, naʼ è zɔlɔ zo, mo zə e səā tsughuu wô alo kəwālā e nughù wo a vʉ̀a Zə̀ kò.

¹¹Naʼe te zə n lo an səghanyəgha ŋ Kəzə̀, nyəghanlo tò tia è li zo e nyəghanlo tò kəlùwŋgɛ̀lɛ, nyəghaan sùghò tò eshiaghɔŋlo.

¹²Naʼ e te zə ŋ ki faŋkwu kə bəgha kə ughɔ̄ŋ kə̀ daā kə̀ li ko kə dâ mîa kɔʼ nduw edzuŋ, à fu e ughɔŋ zo eghəm à ghè zò e bə̀ghà, tsə̀təndə̄ghā tə Kəzə̀ tə n lo eghə̄m à ghe tò təbə̀ghà a fù e ughɔ̄ŋ e te zo, mo ghe n nyàʼ nàŋa kɔʼ zən a tuw u təndughu wən èghəm à ghè wò u bʉ̀ghà aŋ wɛ ghə Ezə̀lɛ̂ fughu a fù u ughɔŋ u te wo.

¹³Fu e ughɔŋ e təgha zə n lɛɛn ndùw tsə kə̀ səa ko, e təgha e li zə lɛɛn ndùw tsə kə ekùw kò, e təgha è li zən lɛɛn ndùw tsə kə e màm ko, fu e ughɔŋ è li zən e təgha zə n lɛɛn ndùw tsə kə̀ bəŋo ko.

¹⁴Ghe mò bəgha ghɔŋ wə naʼ u te wo an tia a kəbəghalo eghəm à ghee gho a bəgha, mo ghè n tɔm naŋa zən a tum tə Tsʉa u Ndì tə̀n eghəm à ghe tò tə bə̀ghà an tia a te.

¹⁵Tsə̀ndə̄ghā zəla e mò kəa wô ghəa gho â mùghò ŋ ki fòʼ tǒ mbàŋ fə etsɛ aŋ ghu alefòʼ naʼ zə a te, àsùghò fu e ughɔŋ e te zo àsùghò bʉgha ù te wò.

¹⁶Bʉgha wə naʼ u te wo ù dzəm m bɔɔm kele tsəghà wo foʼ e mɔ̀ʼ, dəghànlò n te mə̀ m bɔɔm lò sugho tǒ zǐi n te mò. Tsə̀ndə̄ghā e te m foʼ tsùghù naʼ e tə zo am fôʼ è mbàŋ fì, fòʼ zə̀ enaʼ e te n lo kwə̀n n tə tàm m bə̀ghà à kam è bɔm tə tətàm tə chìako; dəghànlo n te mə̀ n lo eghəla e mɔ̀ʼ ghèe ghê zǐi n te mò àsugho dà e te zo.

¹⁷Tsə̀ndə̄ghā è te m foʼ tsùghù bəgha kə ughɔŋ kə te ko, kə lo tətam ŋghəm tǔu à tàm tǒ tǔu an dà e te zo, aŋghəa ghî à foʼò fʉgha wo a te.

¹⁸Ghe mò bəgha kə te kə bəgha alo tə shiaghɔŋlo; ghe ŋ kuuwn bəgha ghue u enaʼ e te zo am baabâ zə etsɛ̀ mo e zɔlɔ tò kə lùwŋgɛ̀lɛ kəla kə zɔn daŋso nyə nduw.

¹⁹Ghe mo bəghàan kə ghɔŋ wə enaʼ kə te kə fəghaan tən ko n kɔɔ tə atia tə dzûŋ tò. Tia è kəbə̀ghānlò e sʉesʉe zə ŋ ki eshiaghɔŋlo, e kəbə̀ghànlo e kə̀bə̀ghà zə ŋ ki tia fə̀ nî, tia e kə̀təgha zə ŋ ki udzʉ̂adzʉ̀a, tia e kəbə̀ghànlo e kə̀chìkò zə ŋ kə tia ghəla a ləŋo lòʼ tò kəghê,

²⁰tia e kəbə̀ghànlo e kətɛ̀ zə tia zəla e ləŋo tò kənɛ, tia e kəbə̀ghànlo e kətǔu zə ŋ ki ŋkɔbɛ̀lɛ̀, tia kəbə̀ghànlo e kə̀səghàmbəgha zə ŋ ki tia è li zo nyəghaan ləŋo nduw tò tuw kə kəghè, tia e kəbə̀ghànlò e kěfaa ŋ ki tia e kə məghaməgha, tia e kəbə̀ghànlo e kə̀tɛ̀ndzughu zə̀ ŋ ki tia zəla e mò nyəghaan baŋa tò unumlo, tia e kəbə̀ghànlo e kěghəm zə ŋ ki tia e li zo ghe mò tɔŋlo enyəa kə̀lesopə̀lɛ̀s, tia e kəbəghànlò e kěeghəm à ghè zò e mɔ̀ʼ ŋ ki tia zəla e ləŋo tò kəwālā, e kəbəghànlò e kěeghəm à ghè ghò a bəghà zə̀ zəla ghe tɔŋlo enyəa à lò ametyst.

²¹Ghe mò fu e ughɔŋ zən e eghə̄m a ghe zo ebəgha ghəŋlo am fə̀ghà n nyə̀ghanlo n li mò ghə tɔŋlo enyəa à lo pɛ̂ɛl eghəm a ghè mò m bəgha, ù fu u mɔ̀ʼ alo fə pɛ̂ɛl fə mɔ̀ʼ. Ghe n bəgha tsughu dziī tə tənàʼà tə to am baabâ zə etsɛ̀ mo e zɔlɔ tǒ lùwŋgɛlɛ kəla kə zɔn daŋso nyə nduw.

²²Mùgho ŋ kè kôʼ ndùghù è Kə̀zə̀ e ne è li zo fughu alo enaʼ, tɔŋlo enyəa ndùghù e Kəzə̀ e ne zə̀ ena e te màʼa fə̀ lo Tsə̂ntə̀mbî Zə̀ kə̀ ghaʼa kən kə̀ dzə̀m ghèe Tsʉa u Ndzì u te wo.

²³Ezuw ŋkāa dzɔ̀ŋ buʼ ki yo fwàʼ kò fughu alo enaʼ, tɔŋlo enyəa səghanyəgha ŋ Kə̀zə̀ n lo tsə̀ a fughu alo enaʼ, Tsʉa u Ndzì vʉa u baŋà sugho fughu alo enaʼ tò kəkɛ̀ʼɛ̀.

²⁴Ghî a nàʼà tən tə dzə̀m e ke bwiī tsəgha an tsə̀ e naʼ e te zo, ù dwə̀ŋ u mbī wən ù dzə̀m lo nîi wô â fʉgha u ghee u dzə̀m an naʼ zən.

²⁵Fu e ughɔŋ zə e naʼ e te zo ke lo tsəgha ko tùghò tsuʼù mə n dzəm, tɔŋlo enyəa tsuʼ u kê dzə̀ kòʼ yǒ a fùghù ezə̀.

²⁶Ghe lo nìi wò kɔ tə ufʉgha tə nàʼà tə̀n tə dzə̀m àsùghò kum e ghee zo a fughu êzə̀ an naʼ e te zo.

²⁷Fəgha kə li kə ke kòom tsə̀ghà nyə yo fughu alo enaʼ mo ke dzəa nù, ghuw wə agha kê nyə̀ yo fughu alo enaʼ ŋkāa ghuw wəla ù ghəəŋ ghəa tuw kə̀ dala ko. À lǒ fughu nyəa ko ghì ghəla ghe lo mo ghe n tɔm naŋa zən a ghee gho am mwàʼsò kə emùghù kə Tsʉa u Ndzì e te.