Read Aghem Edêe Fughu 3 Bible Online

Edêe Fughu 3 - Aghem bible

Edêe Fughu 3

¹Yɛso n dzɛ̀ wò â mùgho enyəa, “Tɔm ndùw â tsə̀ndə̄ghā è Kə̀zə̀ e dzeŋe kə ghì a Kəzə̀ ghò an naʼ e Saldìs enyəa; ‘Ghùw wəla ù ki zə̀a ŋ Kəzə̀ mən sə̀ghàmbəgha àsùghò sə̀ghàbəlà mə̄n sə̀ghàmbəgha n dzɛ̀ enyəa, “Ŋ̀ kwo nû ghəa ghɛʼɛ à ghəəŋ gho: ghɛ̀ tsô kì ko ezən enyəa ghɛ̀ lo â tuw ko mò ghɛ̀ lo tò ghî à kpuuwn gho.

²Zǒo nùghu kɔʼ nlò alo təmgbii, ghɛ̀ dzən nduw sə̂ŋ zò am fəgha kəla kə lo mo kə kāam kpuw mɛ̀ʼɛ̀ a zəŋò ghɛ̀, tɔŋlo enyəa, Ŋ̀ kaam kôʼ dzə̀ enyəa fwàʼ kɛʼɛ kə n tɔ̀ʼ zɔn an sə kə Zə̀ kaŋa.

³Mòʼn wò nlò fəgha kəla ghe mò zoʼn tsughu ghɛ̀ a te, àsùghò ghəa ghə̀là ghɛ̀ mò zuw; ghɛ̀ e naaŋ lâŋ kə te ko, ghɛ̀ maʼa bo zo. Abugho ghɛ̀ tàʼkè nughù kɔʼ, Ǹ lo soʼō nyəa wô a zəŋò ghɛ̀ mò ghɛ̀ kwò naŋa yo tò ghûw ù tsɔ̀ŋɔ. Ghɛ̀ lo tsoo kele yo nəgha zəla Ǹ lo soʼō nyəā a te a zəŋò ghɛ̀.

⁴Ghɛ̀ nǎam ŋgəəŋ ki ko nû sə fə aghì fə̀ li fo an naʼ e Saldìs mo ghe kaām ghue zə nûʼn kàŋlo aŋ ghə̀a à biigh gho; ghàʼ à ghee lo bwîi kə̀ghuw kə̀ mɔ̀ʼ an ndzʉ̄ tə fəma to, nu ghe ŋ kɔʼ kpē.

⁵Ghùw wəla ù ghaʼ tsughu bo zo, ghe lô laso sùghò wən êzə̀ an dzʉ tə̀ fəma to, Ǹ lo zèe màʼn sùghò yò zən e wə̄n zo am mwàʼsò kə emùghù; Ǹ lo dzâa səā ndûw an ndɛ an sə kə Bəghà àsùghò an sə kə tsə̀təndə̄ghā tə wən enyəa, Wən lǒ ghùw waŋa.”

⁶Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ tə te kə dzâa ndûw â dzweŋe u ghì a Kəzə̀ ghò.

⁷Yɛso n dzɛ̀ wò â mùgho enyəa, “Tɔm ndùw â tsə̀ndə̄ghā è â dzeŋe kə ghì a Kəzə̀ ghò è zə̂ am Fìlàdɛfìa enyəa, ‘Ghùw wəla u zɔlɔ̄, kə̀a sùghò êsəŋò, vʉ̀a ù ki tsʉ kə Dɛvìd kò, ù dzɛ̀ enyəa, abugho ù dzʉ̀a fê sə wo ndughu, ghùw n yo aletsʉ̄, abugho tsʉ naŋa tsughu ndughu, ghùw n yo alefè.

⁸Ŋ̀ kwo nu fwàʼ wɛʼɛ wò. Kòʼô nlò! Mùghò m bàʼ kə̀ tsʉ naŋa â ghɛ̀ mò ghùw yò dzə̂ aledzʉ̀a; Ŋ̀ kwo nû enyəa ghɛ̀ kì ko nyàaŋ fə kədaʼa, ghɛ yia ghəə̄ŋ ghəa ghəla mùghò dzɛ̂ naŋā â ghɛ̀, ghɛ̀ yia taʼkè tuū maʼà mùghò.

⁹Kòʼô nlò! Ǹ lo ghəəŋ tsūghûu ghì agha ghəla ghe lo an ndùghùne è Satàn ghe moʼò enyəa ghe lo Tə̀dzûu, mo ghe yo dzə̂, ghe bughò təm təŋgūʼ a tsəlà ghɛ̀, ghe zoʼn kɔʼ enyəa M̀ mafə ghɛ lə̀ghà ten.

¹⁰Ghəa ghɛ̀ naŋā tsughu shwaʼ waŋa wo alekɔlɔ̄ tsughu fə̂ŋ tò, Ǹ lo boom yò enyəa kǎakǎa fə fɛ̂ ghɛ̀ an tì kə utsù kəla kə bughōo am mbī e dzə̀m, alemɔ̀msò kôʼ ghì ghəla ghe mughù aŋ ghueekətsə̄.

¹¹Ŋ̀ kuʼù bùghòo nù; tɔ̀ʼɔ naŋa tsughu nlò ghəa yìa ghɛ̀ ki ghè ghò, e kwo ghùw lò so e suʼù nughùun namso kɛʼɛ kò.

¹²Ǹ lo ghəəŋ tsughuu nù ghùw wəla ù ghaʼ tsughu bo zo ù dòʼò tsughu kənyàla an tsughu e Zə̀ kaŋa, mò ù kè kòom zə̀ghàa màʼà kòʼ tsə̀ghà yò luʼū kə te ko, Ǹ lo tɔɔ̄ naŋā tsughu zən e Zə̀ kaŋa a zəŋò wə̄n, àsùghò zən e naʼ e Zə̀ kaŋa ko, tɔ̂ɔŋ Yɛ̀lusalɛ̀m è fughu zəla è kè səā tsughuu wô alo kəwālā, Zə̀ kaŋa kə fughu tsughu wo. Ǹ lo tɔɔ̄ naŋa tsughuu sughò zən zaŋa è fughu zo a zəŋò wə̄n.’

¹³Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ tə̀ dzâa nduw â dzweŋe u ghì a Kəzə̀ ghò.”

¹⁴Yɛso n dzɛ̀ kpèʼe wò sùghò â mùghò enyəa, “Tɔm ndùw â tsə̀ndə̄ghā zəla è lò an â dzeŋe kə ghì a Kəzə̀ ghò an naʼ e Làodisìa enyəa, ‘Ghùw wəla ghe tɔŋlo enyəa à lò Zə e lo ko êzə̀, wəla ù zuūw â Zə̀ kò, kə̀aa sùghò èsəŋò aŋ ghəa e Kəzə̀; wəla Zə̀ kə fə̀ dzeŋe zîi tsughu fʉgha u gbəla wo ghèe wə̄n, ù dzɛ̂ enyəa,

¹⁵“Ŋ̀ kwo nû ghəa ghɛʼɛ à ghəəŋ gho, yìa Ŋ̀ kwo sugho enyəa ghɛ̀ bughoo ghɛ̀ n lo alo eghəa, ghɛ̀ ŋ kôom bùw a te. To ghɛ̀ maʼà fɛ lo alo eghəa, ghɛ̀ n tee tən tsughu ko a te ŋkāa mò ghɛ̀ buw alo eghəa ghɛ̀ n yo a te.

¹⁶Aŋghəa ghɛ̀ lo tò ghɛ̀ zʉ̂ lò nû àsùghò aŋghəa ghɛ̀ abugho ghɛ̀ n lo alo eghəa kôom bùw a te, Ŋ̀ lo ki aletuū maʼà ghɛ̀;

¹⁷Ghɛ̀ dzɛ̂ enyəa, Ŋ̀ kuu nù, yìa Ŋ̀ ki fʉgha wo u dzə̀m, yìa Ŋ̀ kôom kə̀ŋo yo fəgha kə̀ li ko! Ghɛ̌ yia kwo yô enyəa ghɛ̀ lo tsɔ̂ tə aghì, aghî mo ghe mugho alo tətsʉ̄a, ghî à laa gho, ghî à foō gho, àsùghò zuum tə aghì tò.

¹⁸Zən lò e ghee Ǹ tsʉ̂a wô ghɛ enyəa, ghɛ̀ zue tsɛ zo aŋ ghùu mùghò mo ghe n tsə̄ alo kənàm; tò ghɛ̀ lo doʼo ghî à kuu gho. Ghɛ̀ zue sugho ndzʉ tə̀ fəma to, ghɛ̀ dzəla kəŋ naŋa tuw kɛʼɛ kə̀ dəla chi aŋ ghùe zɛʼɛ̄ è zum zə̀, e kwo ko ghî à lô koʼō. Ghɛ̀ zue kɔʼ sugho twi wə asə wo, ghɛ̀ e dzəla tsughu an sə ghɛʼɛ̄, tò ghɛ̀ e koʼo luʼū to.

¹⁹Ghî ghə̀là Ǹ ləghaa a dzə̀m Ǹ naaŋ ghee an ulwàŋ, baa mbɛ̄ an tuw kə ghee. Ghɛ̌ fi ki alemuʼū â mbuuw mò aletiī kuwnlo, ghɛ̀ maʼa bo zo.

²⁰Mùghò wəlà Ǹ ti a fǔundughu, tsʉʉn kə̀bàʼ, ghùw wəla ù zuw dzə̀ zaŋa, vʉ̀a ù tsʉ̀ tsughu bâʼ kò, Ǹ sô nyəā ndûw ghàʼ à wə̄n zəā dzəŋlo.

²¹Ghùw wəla ù ghaʼ bo zo, Ǹ lo fughu nu wə̄n â daʼa ko aledòʼò tsughu am bùghu e ndàŋ è kə̀də̀ŋ zaŋa, tò aŋghəa ghuūghùe waŋā u fə̀ ghaʼ sugho bo zo, mùghò n dòʼò tsughu am bùghu e Bə̀ghà an ndàŋ è kə̀də̀ŋ è wə̄n.”

²²“Ghùw wəla ù ki tuūŋ ko, ù zuw fəgha kə̀là Zuʼ tə Kəzə̀ tə̀ dzaā â dzweŋe u ghì a Kəzə̀ wò.”