Read Aghem Edêe Fughu 4 Bible Online

Edêe Fughu 4 - Aghem bible

Edêe Fughu 4

¹A m bùgho kôʼ M̀ mɛʼɛ̀ tsughu ghəa ghən gho, mùghò n lɛɛn kɔ̀ʼ è nduw, kòʼ kpèʼe ndùw ghəa à li gho tò Ŋ̀ koʼò an udzǒo, mughò ŋ kòʼ ndùw fuū u ndughu alo kəwālā mo wə n tsʉ̀ dòʼò! Dzə̀ zəla M̀ mô bûʼ zuw è kə̀aa wô mugho â ghəa gho to mbuwlì lò kuū, n dzɛ̀ â mùghò enyəa, “Sə kɔ̀ʼ wò fɛ, tò Ǹ dêe wô fəgha kəla kə ki alenì kə̀bala abugho ghəa ghən tsəghà tsughu.”

²Zuʼ tə Kəzə̀ tə̀ n daŋso tsom kɔʼ mugho, mùghò ŋ kòʼ ndàŋ è kə̀də̀ŋ e lì ti fughu alo kəwālā mò ghùw dòʼ te!

³Ghùw wəla ù fə̀ doʼ a te, kôʼ e wən zə n nyəghanlo tò tia à li gho ghe fə̀ tɔŋlo enyəa à lò dzaspà àsùghò kànilìyàn, gbò kə ŋgə̄m kə dzə̀ŋ ŋgəa kɔʼ ndàŋ e də̀ŋ e te, kə m fween ko tia è ləŋo zo ghe fə tɔŋlo enyəa à lò emɛlàld.

⁴Ndàŋ tə udwə̀ŋ ŋghəm m bə̀ghà à ghè tò tə chìakò n tèe dzə̀əŋ ŋgəa kɔ̌ʼ ndàŋ è kə̀də̀ŋ zə̀, an ndàŋ ten à n dòʼ tətsōʼ ŋghəm m bə̀ghà à ghè tò tə chìakò mo ghe n dzəlà kèle sàŋ tə̀ fəma to, àsùghò twàaŋ wò alo utūw mo ghe tsə tsughu alo etsɛ̀.

⁵A fughu an ndàŋ è kə̀də̀ŋ e te, ghuuw zə m mwɛ̂ɛn sə̌a wò, bɔ̀ŋ mə̀ ŋ kûu sə̌a wò sughò fughu, ghuuw zə ŋ kəmà sə̌a wò sùghò. A fughu an sə kə ndàŋ è kə̀də̀ŋ sughò, kɛ̀ʼɛ̀ wə̀ n ti sə̀ghàmbəgha bəghanlo, mò à lǒ zə̀a ŋ Kəzə̀ ŋ te mò sə̀ghàmbəgha.

⁶A fughu a vʉ̀a ndàŋ è kə̀də̀ŋ e te, an lo sugho dzùghùntsòʼ mo bugho e te e lo kuŋèkuŋè, mùghù n te mə̀ n zɔn daŋso nyə̀ ndùw ènyə tò kəlùwŋgɛ̀lɛ kəla kə zɔn tɔɔ̄ŋ daŋso nyəa nduw. Aledzə̀əŋ ŋgəāa kɔʼɔ sughò ndàŋ è kə̀də̀ŋ e te, fʉgha u sə̀a tughu u li wə tee tsə̀ghà wò a fughu u chìakò, nyôm tə te tə ŋ ki ndə̀mà tə asə, esə̄ àsùghò ebàm.

⁷Fəgha kə sə̀a tughu kə̀ sûesʉ kə n lo tǒ tsɛɛ̄kəbə̄ghā, nyòoŋgwən è sə̀a tughu kə kə̀bə̀ghà kən n lo tǒ mbɔ̀ŋ tsətaʼà, fəgha kə sə̀a tughu kə kə̀təgha kən n lo à sʉ wo tò sʉ u ghûw, fəgha kə sə̀a tughu kə kə̀chìakò kən lo tǒ mbuʼ è zəghaa wo e dzūŋ.

⁸Am fʉgha u sə̀a tughu wən u chuakò sughò, chìa ŋ ki nduw təghûo tǔu, chìa ŋ kelel ŋgə̀a tsə̀ghà wò ko asə a zəŋo ughùe u dzə̀m àsùghò a tsəla təghùo, ghe n zoo zēe ndùw àghəa bùghò zǒo bwīi ndùw mo ghe bughu yo, enyəa, “Ù zɔ̀lɔ, ù zɔ̀lɔ, ù zɔ̀lɔ, ù lò Tsə̂tə̀mbî Zə̀ kə̀ ghaʼa ko, kəla ù fə̀ lô tsəgha, chia kə lǒ êzəŋ, chia kə lo ki sughò alebùghò.”

⁹Nəgha tən tə dzə̀m fʉgha u sə̀a wən fə̀ ti fughuu ndûw unyoʼ àsùghò zɔ̀ɔŋ kò â ghùw vʉ̀a ù dǒʼ fughu an ndàŋ è kə̀də̀ŋ e te, wəla ù mùghùu tən to mbī kê bughò mîaa.

¹⁰Tsoʼ tən ŋghəm m bə̀ghà à ghè tò tə chìakò n tə̀m nduw tə̀ŋguʼ, fughuu ndùw sùghò ŋkɔʼso â ghùw vʉ̀a ù dòʼò tən an ndàŋ e kə̀də̀ŋ to mbī kê bughò mîaa, ghe n tsɔʼn màʼà tsùghu twàŋlò u kədə̀ŋ u ghee a sə̀a ndàŋ e kə̀də̀ŋ è te, zoo tsughu àghəa enyəa,

¹¹“Ghù kpe nû a Tsə̂tə̀mbî waʼa àsùghò Zə̀ kaʼa ko enyəa ghî ghə̀ è fughuu ghû â ŋkɔʼso, àsùghò səghanyəa mò, nu a fə̀ fʉgha wo u dzə̀m gbən wo ghû, ghù fə̀ ləghaa enyəa fʉgha wə̄n e lo, zə lo e ghee ghù fə̀ gbə̂n wo fʉgha u te wo aŋghəa ghù fə̀ ləgha tsughu.”