Read Aghem Edêe Fughu 5 Bible Online

Edêe Fughu 5 - Aghem bible

Edêe Fughu 5

¹Mùghò n daŋso kòʼ ndùw nyəme u kəmwàʼsò aŋ ghu kə təma kə ghûw wəla ù mò doʼ an ndàŋ è kə̀də̀ŋ e te mo ghe ŋ ghəa gho am bàa tə te to tə bə̀ghà tɔm naŋa, mo ghe ŋ nyəme fè zɔʼ naŋa tsughu mə̀ŋ tò a te alo təlùʼu sə̀ghàmbəgha.

²Mùghò n daŋso kòʼ tughu kə tsə̀ndə̄ghā è Kə̀zə̀ è nàʼn wô ghəa gho an dzə̂ è tughu enyəa, “À kɔʼ kpe ndugho ù lò alezʉ̀mè nughù kɔ̀ʼ mə̀ŋ tə te to, ù zèe tsughu sughò nyəme u kəmwàʼso u te wo a?”

³Ghùw n yo alo kəwālā ŋkāa aŋ ghueekətsə̄ ŋkāa an naʼ zə evʉ̄ ù lò alezèe tsughu nyəme u kəmwàʼsò u te wo, ŋkāa alebùʼù lɛɛ̄n nyəā tsughu a te.

⁴Mùghò ŋ kè dì sə̀ è wo, biso dì tsɔ̌ʼn tsughu enyəa ghùw yò dzə̂ ù kɔʼ kpē alezèe tsughu nyəme u kəmwàʼsò u te wo ŋkāa alelɛɛ̄n nyəā tsughu a te.

⁵Tsoʼ e mɔ̀ʼ an tsoʼ ti n daŋso dzɛ̀ â mùghò enyəa, “Kà dî; Kòʼô, tsɛɛ̄kəbə̄ghā e ndùghù è Dzudà, ù sə an tigh kə Dɛvìd n təmzə daʼa kə ebo ko, vʉ̀a ù lo alezʉ̀mè nughù mə̀ŋ tə te to sə̀ghàmbəgha àsùghò alezè nyəme u kəmwàʼsò u te wo.”

⁶Mùghò kòʼ tsʉa u ndzì ù ti am faʼnlo e ndàŋ è kə̀də̀ŋ zə̀ asùghò ŋgòʼ è fʉgha ù tughu ù li wo u chùakò u lo â tuw ko àsùghò am bvʉa e tsoʼ tì, tsʉa u ndzì vʉ wə n lo ko to ghe n sugho wi. Wə ŋ ki təndɔ̄ŋ sə̀ghàmbəgha àsùghò sə gho sə̀ghàmbəgha, mò à fi lo zə̀a ŋ Kəzə̀ mə̄n sə̀ghàmbəgha ghe tum sə wo am mbī e dzə̀m.

⁷Ù n daŋso ndùw nì nùghù kɔ̀ʼ nyəme u kəmwàʼsò u te wo aŋ ghu kə̀ təma kə ghûw wəla ù mò doʼ an ndàŋ è kə̀də̀ŋ e te.

⁸A m bùghò ù daŋso nî kɔʼ nyəme u kəmwàʼsò u te wo, fʉgha ù tughu vʉ̀ u chùako u fə̀ lo â tuw ko àsugho tsoʼ ti to ŋghəm m bə̀gha à ghè tò tə chìakò m bvʉ̀ nyə̀ŋè ndùw a tsəlà tsʉa u ndzì vʉ̀, chìa à bòm kə n tee ko aŋ ghu, àsùghò kàŋà mə̀ ètsɛ mò, mò a te lue kɔʼ ko ènyeē, mò à lò gɔ̂ŋlò e ghì a Kəzə̀.

⁹Ghe n zôo zom è fughu zo, zoo tsughu enyəa, “Ghǔ ŋ kɔʼkpe alenìi kɔʼ nyəme u kəmwàʼsò u te wo, àsugho alezʉ̀mè nughù kɔʼ mə̀ŋ e te, tɔŋlo enyəa ghe maā ghû wì, ghù n nì kɔ̀ʼ kâŋ tə̀ghà zuesə tsughu aghî a te an ndùm tə̀n tə̀ dzə̀m àsùghò ghì ghən a dzə̀m ghe dzeŋe saʼā shwaʼ wo u mɔ, an tum wən ù dzə̀m, aŋ ghì ghə̀n à dzə̀m an nàʼà tə̀n tə̀ dzə̀m, ghù n nì fùghù wò â Zə̀ kò.

¹⁰Ghù ŋ ghəəŋ tsughu ghee enyəa ghe doʼò tsughu naʼ e kədə̀ŋ, ghe e lo fɔ̀e tò â Zə̀ kə sɛ̀ kò, ghe e saʼa tuw u aghì ghò a dzə̀m aŋ ghueekətsə̄.”

¹¹Mùghò lɛɛn kpeʼe e nduw, zùw ndùw dzə̀ tə ndə̀mà tə bɔm tə təkam tə tsə̀təndə̄ghā to mò ghùw yò aletaŋ, tə zoō ghəa gho, mo tə n dzə̀ŋ ŋgəa kɔʼ ndàŋ è kə̀də̀ŋ è te àsùghò tsoʼ ti to àsùghò fʉgha ù tughu vʉa u ki mughù zò.

¹²Ghe n zoo sə̄a kɔʼɔ àghəa an dzə̀ tə̀ tughu to enyəa, “Tsʉa u ndzì wəla ghe mò wi ŋ kɔʼ kpe alekele ùdwaʼa, ekum, etɔ àsùghò sə̀ŋ zò, ŋkɔʼso, ùkɛɛ àsùghò bughuso zo!”

¹³Mùghò n zuw fʉgha wən u dzə̀m Zə kə fə̀ gbə̂n wo — wəla u lô alo kəwālā, aŋ ghueekətsə̄, an naʼ zə evʉ àsùghò an dzùghùntsòʼ u zoō ghəa gho enyəa, “Â wən wəla ù dòʼ an ndàŋ è kə̀də̀ŋ è te àsùghò â tsʉa u ndzì u te wo, ebughuso, ukɛɛ, ŋkɔʼso, àsùghò dwaʼa wo wə e lo u ghee wo, to mbī kê bughò mîa.”

¹⁴Nyôm tè tughu tì tə chìakò m bɛlɛ̀ kɔ̀ʼ enyəa, “Zə e lo ko êzə̀!” Tsoʼ ti n tə̀m ndùw tə̀ŋguʼ a vʉ̀a ghee, fùghù ndùw ghee â kɔʼso mò.