Read Aghem Edêe Fughu 6 Bible Online

Edêe Fughu 6 - Aghem bible

Edêe Fughu 6

¹Êzəŋ mùghò ŋ kòʼ aŋghəa tsʉa u ndzì vʉ zʉmè nughù kɔʼ mə̀ŋ è sûesʉ zə̀ an lùʼù tə təmə̀ŋ ti to sə̀ghàmbəgha, mùghò n zùw ndùw sùghò aŋghəa kəfəgha kə mɔ̀ʼ am fʉgha ù tughu vʉ̀ u chùako u lo â tuw ko dzɛ̀ sə kɔʼ an dzə̂ è li è dəmā to ghuuw e lô kəmā, enyəa, “Bùghò!”

²Mùghò mə e lɛɛn ndùw nù, daŋso kòʼ ndùw kə̀anyòm kə fəma ko, ghùw wəla ù nyəŋō wo a te ŋ ki kàʼmwɛ̀, ghe m fùghù ndùw wə̄n â tàaŋ kə kədə̀ŋ kò. Ù n sə̀ ndùw tǒ ghùw wəla tema zəa ghî gho aletsoō təma zəa nduw ghî ghò.

³A m bùghò ù zʉmè nughù tsughu mə̀ŋ è kə̀bə̀ghàa zə̀, mùghò n zùw ndùw fəgha kə tughu kə kə̀bə̀ghà kəla kə lo â tuw ko kə dzɛ̂ tsughu enyəa, “Bùghò!”

⁴Kə̀anyòm kə̀ li kə n sə̀ è wo, mo kə baŋà nù; ghe m fughu tsughu ghùw wəla ù nyəŋō ghè ko â daʼa ko enyəa ù nìi nughù kɔʼ ebughunlo am mbī, to ghî ghə è wīi kaaŋ ghue zo. Ghe m fughu tsùghu sughò wə̄n â nyə fə̀ ne fo

⁵A m bùghò ù zʉmè nughu kɔʼ mə̀ŋ è kə̀təgha zən, mùghò n zuw fəgha kə tughu kə kə̀təgha kəla kə lo â tuw ko kə dzɛ̂ tsughu enyəa, “Bùghò!” Mùghò mə e lɛɛn ndùw nù, mùghò n daŋso kòʼ kə̀anyòm kə̀ ləŋo ko, ghùw wəla ù nyəŋō ghè kò ŋ ki fòʼ aŋ ghu.

⁶Mùgho n daŋso zuw tsughu fəgha kə̀ li ko kə fuŋ sə kɔʼ am bvʉa e fʉgha ù tughu vʉa u lo â tuw ko u chùako tǒ dzə̀ è ghùw enyəa, “Kaŋa fə asò fə mɔ̀ʼ fə̀ e ke kwuu kua wəla ghùw fwàʼ alo fətsūʼ, wʉ̀a zə akue e mɔ̀ʼ e ke kwuu sugho êzə̀. E kwo ghù lò se kuuwn boon màʼnlò mvʉ àsùghò lʉ̀ mò[2].”

⁷A m bùghò ù zʉ̀mè nughù kɔʼ mə̀ŋ è kə̀chìakò kò, mùghò n zuw tsughu dzə̀ è fəgha kə chìako kə tughu kəla kə lo â tuw ko, kə dzɛ̂ enyəa, “Bùghò!”

⁸Mùghò mo e baŋà lɛ̌ɛn kɔʼɔ nù, mùghò n daŋso kò ndùw kə̀anyòm kə̀ li ko mo kə wə̂ən lə̀ŋo nù, zən e ghùw wəla ù fə̀ nyə̀ŋo kə̀anyòm kən ko n lo Evʉ̄, Naʼ zə evʉ̄ zə m bughòo a bǎà wə̄n, ghe n nì fùghù tsughu bâ kə mbī kə mɔ̀ʼ am gba wən u chùakò â ghee enyəa ghe wi alo fənyə̄, an dzəŋ, alo tədzàŋà, àsùghò nyôm tə ŋgwən to fɛ am mbī enyəa tə wiin ghî ghò.

⁹A m bùghò ù zʉ̀mè nughù kɔʼ mə̀ŋ è kə̀tɛ̀ zə̀, mùghǒ ŋ kòʼ nyə̀ ndùw ghì ghəla ghe mò kpuwnlo mo ghe ghee wi nû, mo ghe yi a lo a tsəlà tsaʼ kəla ghe kɔʼɔ fughu fughu ko a te; ghe fə̌ ghee winlo enyəa ghe kə̂aa shwaʼ u Kəzə̀ àsùghò aŋghəa ghe fə̀ teē tən tsughu ko aletesô dzɛ̂ ghəa e shwaʼ u Kəzə̀ e te zo.

¹⁰Ghe ŋ kele sə̄a kɔʼɔ àghəa an dzə̂ è tughu enyəa, “Wo Tsə̂ntə̀mbî ù Ghàʼa ù ghàʼa, ghù zɔ̀lɔ nù, ghù vʉ̀a ghù lò sugho êsəŋò, ghù lô ghì ghən fɛ am mbī saʼa zən, â ghù aledì ŋgə̀mà tə təkàŋ taʼa a?”

¹¹Ghe n daŋso fùghù ndùw ghee â dàla tə̀ fəma to, dzɛ̀ â ghee enyəa ghe tsûuŋ zʉ̂ʉn tsughu eghue, to kɔ̂n kə kɔ̀ɔ m Mughu ù te àsùghò waazə̂ ghəla ghe ki alewī aŋ ghəa ghe mò wi sugho ghee a te, kə kpeē tsughu.

¹²A m bùghò ù zʉ̀mè nughù tsughu mə̀ŋ è kə̀tǔu zə̀, mùghò mo e koʼò, bɔ̀ŋ n nùghù nòʼso tsughu ghueekətsə̄; zuw zə n daŋso nùghù ləŋ tsughu enyə tǒ ndzʉ tə evʉ̄, ndzɔŋ n nùghù bàŋ dòʼò tsùghu tò təkâŋ.

¹³Sə̀ghàbəlà ŋ kə̀wala mə̀ n nùghù tsʉ̌ɛʼn sə̀ tsùghù wò à ghueetsə̄ tǒ kâʼ fə̀ lô zəghàsò maʼn tsughuu twam wəla u doʼŋkè biso abugho kʉ̌ɛɛ kə̀ tughu kə tsəghà tsughu.

¹⁴Wala kə n nùghù mìa nyə̀ kɔ̀ʼ e ndùw to ghe lô nyəmē nughùŋ kɔʼɔ̄ nyəme u kəmwāʼsò wò, təkaʼà tə̀n tə̀ dzə̀m àsùghò nàʼà n dzùghùu mə̀n n dzə̀m n sàŋ nùghù tsùghu an bəla təla ghe fə̀ lô tsəgha a te.

¹⁵Dwə̀ŋ u mbī, à ghì à səŋò ghò, ghê komndzūghū, à ghì à kuu gho, à ghì à tughu gho, àsùghò ghì ghə̀n à dzə̀m, ukɔ̂ à ghəla ghe ndzə̂m lo n tì nàn dòʼò kǎaŋ ndùw alo ubùʼ àsùghò am faʼa tə unɔe alo təkàʼà.

¹⁶Ghe n dzâa ndùw â kàʼà tə te to àsùghò nɔe u te wo enyəa, “Bvʉ̌a nàla naŋa tsughu wò nlò ghaʼ aŋ ghùu ghùw wəla ù dǒʼ an ndàŋ è kə̀də̀ŋ e te àsùghò aŋ ghùu nʉ̀ghà ù pfʉa u tsʉa n ndzì u te wo,

¹⁷tɔŋlo enyəa tsuʼ ù ne u ghee ù pfʉso u unʉ̀ghà wə̀ m kpe. À lò ndughoo ù lò aleteme bâan ndûw ghèe nʉ̀ghà u pfʉa u te wo a?”